1 Samuel 2 - Kashibo-Kakataibo Biblia

Anan kantakin Dios rabia ñuikë bana

¹ Ësai ki ka Ana Diosbë banakëxa: Nukën ꞌIbu ꞌëx kana ꞌën nuitunënbi mi sinani kuëënin, min kamina amiribishi kushiñu ꞌinun ꞌë ꞌimian. Usa ꞌaish kana axa ꞌëmi nishkë unikama ñui banati ꞌain, min kamina ꞌë ꞌakian. ¡Usa ꞌain kana bërí kuëënin!

² ¡Nukën ꞌIbu uixi ka upíira misaribi ꞌaíma ꞌikën! ¡Uínbi ka min ꞌakësa okin bërúankin nu ꞌakinima, Nukën ꞌIbu! Uixi ka misaribi ꞌaíma ꞌikën.

³ Uinu ꞌikë uníxbi ka ax kuëënkësa oi banatima ꞌikën, ꞌimainun ka uixi ꞌitsaira rabiakati banatima ꞌikën, Diosan ka ax Dios ꞌixun kamabi ñu ꞌaia, an ka kushiira ꞌixun kamabi unin ꞌakë ñu ꞌunankin ꞌatima oia.

⁴ An ka kamabi uni kushiirabu atun piakama ꞌimainun aín kantikama tsasipanan, kushiñumakama ax kushiñu ꞌinun ꞌimia;

⁵ ꞌimainun ka axa ꞌaisamaira pitiñu ꞌiakama, an bërí piti chukúmara kupí aín ñu bëtsi ꞌinania; ꞌaínbi ka axa numin ꞌiakama an, bërí numi tanima. ꞌImainun ka axa tuáñuma ꞌia xanukama, an mapai achúshi ꞌimainun rabë́ okin tuaxa, ꞌaínbi ka ax paia ꞌitsa tuáñu ꞌiakama ax, bërí tuáñuma ꞌikën.

⁶ Usa ꞌain ka Diosan uni tsónun ꞌimianan bamanun ꞌimia; ꞌimianan ka anu uni mainkënu ꞌimixunbi, anuabi uni baískimi tëkënia.

⁷ Nukën ꞌIbun ka nu ñuñu ꞌimianan ñuñuma ꞌinun ꞌimia; ꞌimainun ka nu ꞌuchaiabi, nuibakin ꞌakinia.

⁸ Nukën ꞌIbun ka ñuñuma uni ñuñu ꞌinun ꞌimia ꞌimianan ka kuaínbëkini nitsi ñu ñukákanankë uni, atúxribi ñuñu unikamabë ñuñu ꞌi ꞌapu ꞌinun ꞌimiti ꞌikën ꞌimikin ka, atux tsókë anuribi tsónun ꞌimiti ꞌikën; Dios ax ka kamabi ñun ꞌibu ꞌianan kamabi men ꞌIbu ꞌikën, usa ꞌixun ka an me uniokin anubia ꞌitinu nankëxa.

⁹ An ka aín unikama uinu kara nitsia anuabi bërun oia, ꞌaínbi ka an ñu ꞌatima ꞌakë unikama Dios ꞌunánkëma ꞌaish bëánkibukënu bamaia, usa ꞌain ka uínbi ax kushi ꞌikë a uisabi oima.

¹⁰ Nukën ꞌIbun ka axa ami nishkë unikama këñunun ꞌimiti ꞌikën, ꞌimikin ka naíkamë ꞌëonuax kanákamë ꞌëo banarui ꞌikin atunu ꞌibúkin këñunun ꞌimiti ꞌikën. Usakin ka Nukën ꞌIbun kamabi menu ꞌikë unikama ꞌati ꞌikën; ꞌanan ka anbia ꞌapu ꞌinun kaiskë ꞌapu a kamabi nëtëan kushiñu ꞌinun ꞌimiti ꞌikën.

¹¹ Ësai kitankëx sënë́nkiani ka Elcaná ꞌimainun Ana Ramánua ꞌikë aín xubu anu kuankëxa, kuankinbi ka aín tuá sacerdote Elí kakë anu an bërúanxun Nukën ꞌIbun ñu mëëti ꞌakinun ëbiankëxa.

Elínën bakë bëchikë kaman ñu ꞌaisama ꞌa ñuikë bana

¹² Elínën bëchikë kamax ka sacerdote ꞌaíshbi ñu ꞌatima ꞌakë ꞌaish ꞌatima sinánñubu ꞌiakëxa, usa ꞌixun ka Nukën ꞌIbun kuëënkësama okin ñu ꞌakëxa,

¹³ ꞌakin ka sacerdote unikaman ꞌakësokin ꞌakinma; an ñu mëmikë unikaman uin kara ñuina nami xaronanbi ꞌaruia a anua an ñu mëëxunkë unikaman anun nami biti xëta rabë́okin ꞌakë tuiax kuanxua,

¹⁴ manë kënti ꞌarukëxa kubinkënuabi nëbikin aín bakanua, biti tuínxun këntinuabi nami bikë ax ka, Elínën bëchikë sacerdotekama ainan ꞌiakëxa. Usakin ka Silónuax uxun israel unikaman bëxun ꞌaia ꞌakëxa.

¹⁵ ꞌAnan ka an ñuina xarokë akaman ꞌarukëma ꞌaínshi ukin kakëxa: ꞌË kamina Elínën bakë bëchikë sacerdotekama xuixunu nami ꞌinánti ꞌain; kixun ka sacerdote an ñu ꞌaxunkë unikaman kakëxa, ꞌarukë nami a kuëënkinma ka paxaishi sacerdotenën kuëënti ꞌikën.

¹⁶ Kakëxunbia an ñuina xarokë sacerdotenën Dios ꞌaxunkë ka aín xëni pain kana xaroti ꞌain, sënë́nkëbëtan kuni kamina uiti kaina kuëëni ati biti ꞌai kixun ka a ñukákë uni an kakëxa. Kakëxunbi ka: ¡Usama ka bëríbi kamina ꞌë ꞌinánti ꞌain! ꞌInánkëxuma kana mix kuëënkëbëtamabi mi bikuanti ꞌain.

¹⁷ Usokia Elínën bakë bëchikëkaman Dios ꞌinainshiti ꞌikëbi ꞌakë ax ka Nukën ꞌIbun iskëx ꞌaisama ꞌiakëxa, usokian atun ꞌakëx ka Nukën ꞌIbu ꞌaxunkë ñu ax ꞌaisama okin ꞌakë ꞌiakëxa.

¹⁸ Usokia atun ꞌamainun ka, bëná ꞌixun Samuelnën efod kakë chupa upíira lino ꞌakë a pañukë ꞌixun Nukën ꞌIbun ñu mëëti ënkinma abi ꞌakëxa.

¹⁹ ꞌAmainun ka baritia ꞌikëtibi aín tita ꞌimainun aín papan, anuxun Dios rabiti xubunu atun ꞌakësabi okin ñuina rëxun xaroi kuankin chupa chukúma achúshi upíokin ꞌaxunkë a buánxuankëxa.

²⁰ Buánxunkë ꞌain ka Elínën Elcaná ꞌimainun aín xanu upíokin sinánxuni ësai kiakëxa: Nukën ꞌIbun ka ënë xanumi bëchitëkënun mi ꞌakinti ꞌikën, an ka aín ñu mëëti ꞌanun ënë tuá ꞌimiaxa. Ësokin ꞌatankëx ka aín xubunu kuankëxa,

²¹ kuankëa Nukën ꞌIbun upíokin sinánxunkëx, ka Ana tutankëx bakë́ankëxa. Usai ꞌikinka, Ana rabë́ ꞌimainun achúshi bëbu tuá ꞌanan xanu rabë́ ribi tuakëxa, usokin ꞌamainun ka Samuelnëx anuxunbi Nukën ꞌIbun ñu mëëti ꞌai kaniakëxa.

²² ꞌImainun ka Elí ax kaniakëkë uni ꞌixunbi, aín bakë bëchikëkaman Israelkamabëtan ꞌatima ñu ꞌaia ꞌunánkëxa, ꞌunánkin ka anuax Diosbë mërananti ꞌakë xubu chukúma aín xëkuënua an bërúankë xanukamabë ꞌuxkë aribi ꞌunánkëxa.

²³ Usa ꞌunánxun ka aín bakë bëchikëkama kakëxa: Kamabi unix ka mitsunmi ꞌatima ñu ꞌakëbë ꞌëmi banaia. ¿Uisa kupín kaina mitsun usakin ñu ꞌain?

²⁴ Usokinmi mitsún ñu ꞌakë ax ka ꞌën kuakëx upíma ꞌikën, usokin ꞌakin kamina Nukën ꞌIbun unikama mitsún ꞌuchamin, usa ꞌain ka unikamax mitsun ꞌakë ñu ñui banaia.

²⁵ Achúshi uníxa bëtsi unimi ꞌatimati banakë a ka Nukën ꞌIbun mëníoti ꞌikën; ꞌaínbi ka achúshi uníxa Nukën ꞌIbu ñui banakë a ¿kara uin mëníoxunti ꞌik? Kixun kakëxunbi ka aín papan bana atun kuaisama tankëxa, usai ka Nukën ꞌIbunbi usai ꞌia atu këñumiti sinánkë ꞌain ꞌiakëxa.

²⁶ Usa ꞌain ka Samuel bërunani kanikin upíokin ñu ꞌaia Nukën ꞌIbun ismainun unikamanribi upí tuá ꞌixuan upíokin ñu ꞌaia ꞌunánkëxa.

²⁷ A nëtën ka a isi achúshi uni an Dios kikë bana ñuixunkë anu bëbaxun Elí kakëxa: Ësai ka Nukën ꞌIbu kiaxa: mitsun rarakama Egipto menuxun faraón ñu mëëxunkëbë kana ꞌëx asérabi atumi mërakën.

²⁸ ꞌImainun kana Israel unikaman ñaká kamanua ꞌën kaískë sacerdote ꞌixuan atun anuxun ñuina xaroti ꞌën ꞌamikë anuxun, ñuina xaronan sanuira ro aribi ꞌanan sacerdote unikaman pañukë chupa upíira a pañunun ꞌamiakën. ꞌAmianan kana mitsun rarakama ꞌimainun mitsuribi ꞌë ꞌinaishikë ñu ꞌë rabikin xaroia aín tëxëkë pinun ꞌamiakën.

²⁹ ¿Mitsun kamina usakin ꞌanun kakëxuan ꞌaiabi, ꞌë ꞌinainshikë ñu ꞌatimon? ¿Uisati kaina min bakë bëchikëkama usakin ꞌëmi manuxun ñu ꞌanun ꞌamiti ꞌain? ¿Mitsux kamina ꞌë ꞌinainshiti Israel unikaman bëkë piti ñu upíbu a pibi xuátima ꞌai kiax ka Dios kiaxa?

³⁰ Usa ꞌain ka Israel unibunën Dios an mi ꞌimainun min aintsi aín ñu mëëti ꞌaxúnun ꞌinánkë ax bërí kiaxa: Uinsaranbi kana atun ësokin, ꞌë ñu ꞌaxúnun ꞌamitima ꞌain, ꞌakinma kana an ꞌë nuibakë aribi nuibati ꞌain, ꞌanan kana ꞌëmi kuaikin ñu ꞌakë a nuibatima ꞌain. ꞌËx min ꞌIbuira ꞌaish kana ësai kin.

³¹ Anun ꞌën min kushi ꞌimainun min rarakama ꞌaisama oti nëtë ka ꞌurama ꞌikën. Usa ꞌain ka uinu ꞌikë mitsun aintsixbi kaniakëti tsótima ꞌikën.

³² Usa ꞌain kamina ꞌaisamaira nitë́xëti Israel unikama upíokin ꞌën ñu ꞌaxunkëbë atumi nishtima ꞌain, ꞌimainun ka uínsaranbi min aintsi ꞌibukama kaniakëtira tsótima ꞌikën.

³³ ꞌAínbi kana ꞌën min rëbúnki achúshi an sacerdote ꞌixun ꞌë ñuina xaroxunun ꞌimiti ꞌain, ax ka bëskuni bëkaniakati ꞌiskasmati ꞌën mi kakësabi oi tëmërati ꞌikën, usai ꞌimainun ka min rëbúnki raírinëx bëtsi unikaman ꞌakëx këñuti ꞌikën.

³⁴ Usai ꞌimainun ka min bakë bëchikë rabë́, Hofní ꞌimainun Finees minmi ꞌë kakësabi oi ka ꞌia kixun mi isnun a nëtënbi a rabëtaxbi ñuti ꞌikën.

³⁵ Usai ꞌikëbëtan kana ꞌënbi achúshi sacerdote min aintsima bëtsi uni ꞌën kakësabiokin ꞌaisa uni bariti ꞌain, an ka ꞌën kakësabiokin ꞌati ꞌikën, ꞌianan kana a asaribi okin aín rëbúnkikamanribi ax kikësa okían ꞌën ꞌimia ꞌapu ñu mëëxunun ꞌimiti ꞌain.

³⁶ Usokin ꞌakëbë ka, min aintsi axa ñukëmakama ami rantinpurunkin a piti ñukama ñukánan anun ñu maruti kuríki binux tënuxun sacerdotekama ñukati ꞌikën.