1 Samuel 19 - Kashibo-Kakataibo Biblia

Saúlnën David ꞌati sinán ñuikë bana

¹ Achúshi nëtën ka Saúlnën aín bakë bëchikë Jonatán ꞌimainun an ꞌakinkë suntárunën kushikama David isa ꞌanun kixun kakëxa. ꞌAínbi ka Jonatán ax Davidbë nuibanankë ꞌiakëxa,

² usa ꞌain ka karaishikin kuanxun kakëxa: —ꞌËn papa Saúlnën ka uisoxun kara mi ꞌati ꞌikë kixun sinánkin baria. Usa ꞌain kamina imë́ishibi pëkarakëma ꞌaínshi kuantankëx uínbi anua mi mëratinuma unëti kuanti ꞌain.

³ ꞌËx kana ꞌën papabë uinu kaina unëa anu kuanti ꞌain. Anuxun kana abë banakin uisai kara kia kuanuxun mi ñuikin kati ꞌain. Usokin katankëxun kana uisai kara kiaxa kixun mi ꞌunánun mi ñuixunti ꞌain.

⁴ Usa ꞌain ka Jonatánnën ain papa Saúl, David ñuikin kakëxa: —Papa ësokin kana mi kain, David kamina ꞌaisama otima ꞌain, an ka mixmi ꞌapu ꞌikë mi uisabi oti sinanima, usa ꞌain kamina mix ꞌapu ꞌixun upíokin sinánti ꞌain;

⁵ an ka filisteo uni achúshi axa ꞌakánanti ꞌunánkë ꞌikëbi ꞌakëmasa okinshi Goliat an ira ꞌaisa ꞌixunbi ꞌaxa, usakin ka Israel unikama ꞌakinun Nukën ꞌIbun ꞌamiaxa, ꞌaia kamina minbi isan isi kamina ꞌitsaira kuëan. ¿Usa ꞌain kamina ñu ꞌaisama ka ꞌakëma ꞌikë David ꞌati sinántima ꞌain?

⁶ Ësokian aín bakë bëchikë Jonatánnën kakëxun kuati sinanati ka Saúl munuma kuënkëni kiakëxa: —Asábi ka kana Nukën ꞌIbun kuamainun kin David kana uisabi otima ꞌain, asérabi ka añu ñu ꞌaisama ꞌakëma ꞌikën.

⁷ Usai kikiania aín papa kuantamainun ka Jonatánnën anua unëkë anua kuënkë́xa aia, usakian aín papa kakë banakama David ñuixuankëxa. Usokin ñuixunbiankin ka aín papa Saúlnu buánkëxa, buánkëx ka David bëráma ꞌikësaibi a ñu mëëxuni aín xubunu ꞌiakëxa.

⁸ Usai anu ꞌikëbëbi ka amiribishi filisteo suntárukamax Israel unikamabë ꞌakanantëkënti sinánkëxa, sinan ka David filisteo unikamabë ꞌakanani kuankëxa, kuanxun ka Davidnën Israel suntárukamabëtan filisteo unikama raíri abátamainun ꞌitsa uni ꞌakëxa.

⁹ Usakia ꞌakë ꞌain ka Saúl aín xubunu aín manë xëtokë nanx tsókëbi Nukën ꞌIbun amiribishi ꞌatima sinánun ꞌimiakëxa, ꞌimimainun ka Davidtan aín arpa ꞌakësabi okin ꞌai tsóakëxa,

¹⁰ tsótan ka Saúlnën aín manë xëtokë bikin, David anua tsókë anuabi xubu chikënkë këñunbi ꞌati sinánxun ꞌakëxa. ꞌAínbi ka Davidnën meu kikin ꞌamikëbëtan ka aín xubu chikën ashi ꞌakëxa, usakin ꞌakinbi ñankokëx ka David a ꞌimë́bi abati kuankëxa.

¹¹ Abáti kuakin ka Saúlnën bënë́kinshi aín unikama, aín xubunu kuanxua David kaixun pëkarakëma ꞌaínshi chikitia ꞌatanun kixun xuakëxa. ꞌAínbi ka aín xanu Micalnën David ësokin sinánmikin kakëxa: —Ënë ꞌimë́bi kamina ënuax abáti ꞌain, abákëma ꞌaish kamina imë́ishi bamakë pëkarati ꞌain.

¹² Usakin katankëxun ka bënë́kinshi Micalnën aín xubu xëkuë chukúma manámia ꞌakë au bëpaxun abátanun David nanpákëxa.

¹³ Usakin ꞌatankëxun ka Micalnën uni tankia ꞌakë a bixun, anua David ꞌuxkë anu nankëxa, nanxun ka aín maxkánu cabranën rani bixúan xëokin ꞌakë a aín maxkánu unin busabi ꞌitánun nankëxa, nanxun ka a upíokin sabananën mapuakëxa.

¹⁴ Saúlnëan ꞌain unikama David ñatanti xukëbi ka Micalnën ꞌën bënë David ka ꞌisianxa kixun kakëxa.

¹⁵ Usokin kakëx rikianxun a unikaman Saúl kakëxa, David ka ꞌinsínkë ꞌiaxa, kakëxun ka Saúlnën, amiribishi aín unikama David baritëkëntanun kixun ësokin kaxun xuakëxa: —¡ꞌIsianxa aín ꞌuxtinu rakakëbi kamina David ꞌaminun ꞌë bëxúnti ꞌain!

¹⁶ Kixuan kakëx rikianx ka Saúlnën unikamax Davidnën xubunu atsíankëxa, atsínkinbi ka anua David ꞌuxkë anua, uni tankia ꞌakë ñu ashi cabra rani xëokë a aín maxkánu nankë ashi mërakëxa.

¹⁷ Usa ꞌain ka Saúlnën Mical kakëxa: —¿Uisa kupín kaina ësokin ꞌë paránuxun ꞌëx ami nishkë uni abámian? Kixuan kakëxun ka. Micalnën kakëxa: —An ka abáti ꞌakinkëxuma kana asérabi mi ꞌaxun rakanin kixun ꞌë kaxa, usa ꞌain kana kuantanun kixun kan.

¹⁸ Usai ka David aín xubunuax abákëxa. Abáx ka Samuel Ramá kakë ëmanua isi kuankëxa, kuanxun ka anu bëbaxun Saúlnën usokin ꞌakëkama ñuixuankëxa. Usai banakiani ka anuax David ꞌimainun Samuel ëma chukúma Naiot anu tsóti kuankëxa.

¹⁹ Anu David kuankëbi ka Saúlnën ka Naiot kakë ëma chukúma Ramá ꞌurama ꞌikë anu kuanxa kixun ñuikania kuakëxa,

²⁰ kuaxun ka Saúlnën amiribishi aín unikama ñatanxua bëtánun kixun xuakëxa. Xukëx kuanx bëbakin, Saúlnën xukë unikaman iskëxbi ka Samuelnën an bana ñuikë unikamabëtan Diosan bana unikama ñuixunia nikë mërakëxa. Usakia isia ka Diosan bëru ñunshinan atúxribi an bana ñuikë unikama ꞌinun ꞌimiakëxa, usai ꞌikin ka bënë́kinshi bana ñuikankëxa.

²¹ Usaia a unikama ꞌikë kuaxun ka Saúlnën raíri unikamaribi David bitánun kixun xuakëxa, xukëx kuanxbi ka atúxribi raíri ꞌikësaribiti bënëtishi an Diosan bana ñuikë uni ꞌiakëxa. Usai ꞌian ka amiribishi Saúlnën aín unikama xutëkëankëxa, xukëx kuanxbi ka atúxribi usaribiti ꞌikankëxa.

²² Usaia an xukë unikamax ꞌikëbë ka Saúl axbi Ramá kakë ëmanu kuankëxa, kuantankëx ka anua ꞌumpax nunkurukë Secú kakë ëmanu bëbakin, uinu karaisa Samuel ꞌimainun David ꞌia kixun ñukákëxa. Ñukatia ka achúshi unin ñuixuankëxa. Ax ka Naiot, Ramá kakë ëma ꞌurama anu ꞌia kixun ka kakëxa,

²³ usakin kakëx ka Saúl anu kuankëxa. Kuantankëxa bëbaiabi ka aribi Diosan bëru ñunshinan an ribia bana ñuikë uni ꞌinun ꞌimiakëxa, ꞌimikëx ka Saúl axribi kuëëni ransakiani bain kuanx Ramá kakë ëma ꞌurama ꞌikë Naiot ëma chukúma anu bëbakëxa;

²⁴ usai ꞌika uinu kara Samuel ꞌikë anu nukuxun aín chupa pëtankëxun a nëtënbi pëuxun ꞌabaikin a imë́ribi Diosan bana ñuiakëxa. Anuax ka ësai kiakëxa. “¿Saúl axribi kara an Dios kikë bana uni ñuixunkëkama achúshi ꞌik?”