1 Samuel 18 - Kashibo-Kakataibo Biblia

Jonatán ꞌimainun David ꞌunánan ñuikë bana

¹ Usa ꞌain ka David ꞌimainun Saúl banatankëx sënë́nkëbë, Jonatán upiti Davidbë ꞌunánankëxa, usai ꞌiax ka upiti nuibanairakëxa.

² Usai ꞌia ka Saúlnën a nëtënbi anuxunbia aín ñu mëëti ꞌaxúnun ꞌamikin ain papan xubunu kuantanun xuisama tankëxa.

³ Anuax ka uínsaranbi ënanantëkënuxma ꞌunánankatsi kiax Jonatán ꞌimainun David kanankëxa, usai kanantankëx ka Jonatán ꞌimainun David ꞌitsaira bëruanankëxa.

⁴ Bëruanankin ka an pañukë aín tari Jonatánnën pëxun David ꞌinánkëxa, ꞌinánan ka aín manë xëtokë akëñun, ain kanti a ꞌinánan anúan tsitëkërëkikë aribi ꞌinánkëxa.

⁵ Usa ꞌain ka Saúlnën ꞌakanantanun xukëtibi Davidnën filisteo suntárukama ainra kanankin kupitanuma ꞌakëxa, ꞌaia ka Saúlnën axa ꞌakanani kuanti suntárukama uanti aín kushi ꞌinun anëakëxa. Usokin anëkë ꞌain ka suntárukama ꞌimainun ain kushikamaxribi kuëëankëxa.

Saúlnëx Israel unikaman David rabikëbë ami nisha ñuikë bana

⁶ Usa ꞌain ka Israel suntárukama Davidtan filisteo uni Goliat kakë a ꞌakëbë rikuatsinkëbë, kamabi ëmanuax chikiti Israel xanukamax ꞌapu Saúl ñui kantai ransai ꞌikin kuëënkin bitsi manë sharíkati sharíkanan manë pará okë aribi ꞌakankëxa.

⁷ ꞌAi kantakëbë ka ransai kamabi xanukama amiribi amiribi kikankëxa: “Saúlnën ka mil unishi ꞌaxa, ꞌamainun ka Davidnën diez mil uni ꞌaxa kiax kiakëxa.”

⁸ Ësai kia kuatankëx ka Saúl, ꞌitsaira nishi kiakëxa: —Davidnën ka diez mil uni ꞌaxa kiax ka kikania, ꞌën karana mil uniratsushi rëtëan. ¡Usa ꞌaish ka ꞌapu ꞌimikanti ꞌuramashi ꞌikën!

⁹ Usaia kikë anuaxëshi ka Saúl David istisama tani ami nishakëxa.

¹⁰ A nëtë́an aín xubunuxunbi ñu mëëxuni anubi bërunu koonkë a pëkarakëbëtan Diosan anu xukëxun ñunshin ꞌatimanën anua ꞌikë ꞌapun xubu a ꞌukëmëu ꞌikëbia bikëx ñunshin bakëkësa ꞌiakëxa. ꞌIkëbëtan ka an ꞌakësabi okin arpa Davidtan ꞌakëxa, ꞌamainun ka Saúl ain manë xëtokë a rapasu nankë ꞌiakëxa.

¹¹ Usa ꞌain ka Saúlnën kënëkëñunbi amibi takáshkakin ꞌati sinánxun aín manë xëtokën ꞌakëxunbi Davidtan rabë́okin ñanákin ꞌamiakëxa.

¹² ꞌAmian ka Saúl Davidmi Diosan ka ꞌakinia kixun ꞌunani rakuë́akëxa, usa ꞌain ka Nukën ꞌIbun David ꞌakiankëxa, ꞌaínbi ka Saúl ꞌakinti Diosan ënkë ꞌiakëxa.

¹³ Usakin ꞌaxun ka a rapasu ꞌimikima chikíankëxa, chikínxun ka suntárunën ꞌapu comandante ꞌinun anëakëxa, anëkëxun ka aín suntárukama ꞌakanani kuanti ꞌain uantankëxun ꞌakanankuatsinkin bëakëxa.

¹⁴ Usa ꞌain ka Nukën ꞌIbun ꞌakinkëbë kamabi Davidtan ꞌakë ñukama asábi ꞌiakëxa.

¹⁵ Usai ꞌikëbë ka Saúl Davidmi rakuë́akëxa, an ꞌakë ñukama upíokin ꞌaia isi.

¹⁶ ꞌAínbi ka Israel ꞌimainun Judánu ꞌikë unikaman an ꞌakë ñu upíokin ꞌaia iskin, David kuëënkankëxa, an ka suntárukama ꞌakánanti uanxun bërúanxun bëtëkëankëxa.

¹⁷ Achúshi nëtën ka Saúlnën David kakëxa: —ꞌËn ꞌini bëchikë apan Merab kakë a kana min xanu ꞌinun mi ꞌinánti ꞌain, usa ꞌain kamina mix ꞌakanantimi rakuë́tima Nukën ꞌIbu mi ꞌakinkëx ꞌakánanti ꞌai kixun kakëxa. ꞌAínbi ka Saúlnën anbi ꞌakinma, këmëxun filisteo suntárukama ꞌamiti sinánxun usakin kakëxa.

¹⁸ Kakëxunbi ka Davidtan kakëxa: —Min kamina ꞌitsa ꞌë nuibatin ꞌaínbi kana ꞌëx añubima ꞌain, ꞌimainun ka ꞌën aintsi Israel kaman añubima ꞌë isia, usa ꞌain kana mix ꞌapu ꞌain min piaka isama ꞌëx ꞌain.

¹⁹ Usakin kakë ꞌixun anun Saúlnën ain bëchikë xanu Merab kakin anëkë a aín xanu ꞌinun David ꞌinánti nëtën, a ꞌinankima Adriel kakë uni Meholá kakë ëmanu tsókë uni a ꞌinánkëxa.

²⁰ ꞌAínbi ka Mical Saúlnën ꞌini bëchikë xanuitsi a Davidtan mërati okë ꞌiakëxa. Mërati okë ñuikania kuati ka Saúl asábi ka kixun sinani kuëëankëxa,

²¹ kuëënkin ka David aín xanu ꞌixun ka an paránxun filisteo suntárukama ꞌamiti ꞌikë kixun sinánkëxa. Usakin sinánxun ka amiribishi David katëkëankëxa: —Bëríra kamina ꞌën piaka ꞌinuxun ꞌain.

²² Ësokin katankëxun ka Saúlnën an ñu mëëxunkë unikama kakëxa: —Mitsunribi kamina abë banakin ꞌapun ka ꞌitsaira mi kuëënia kixun kati ꞌain, usa ꞌain kamina mix ꞌapun piaka ꞌiti ꞌain kixunribi kanan, an ñu mëëxunkë nukamanribi kananuna mi nuibati kixun kati ꞌain, usa ꞌain kamina mix aín piaka ꞌiti ꞌain kixuan kanun ka kakëxa.

²³ Kakëx anu rikianxun ka Saúlnën kakë bana an ñu mëëxunkë unikaman kakëxa, ꞌaínbi ka Davidtan kakëxa: —¿Mitsun sinánkëx kara ꞌapun piaka ꞌiti ax tëmara ꞌianan uni ñuñumara ꞌianan, unin kushibëtan sënë́nmara ꞌësa unix ꞌiti ꞌik?

²⁴ Kakëx anu kuantëkënxun ka Saúl an ñu mëëxunkë unikaman usakian Davidtan atu kakë bana ñuikin kakëxa.

²⁵ Usakin ñuixunkëxun ka Saúlnën an ñu ꞌakinkë unikama David filisteo unikama ꞌamiti sinánkin ësakin kakëxa: —David kamina ꞌën ꞌini bëchikë aínan ꞌiti bikian, añubi ꞌë ꞌinanxuma ꞌanun kati ꞌain, ꞌëx kana ꞌapu ꞌaish kuëënin ꞌëa cien filisteo uni ꞌaxun aín nëtokë ñu rëbu maxaka tëakin bixun bëxunun kati ꞌain, usakin ꞌakëbëtan kana ꞌëmi nishkë unikama ꞌatima oti ꞌain. Asérabi ka Saúl filisteo unikaman ꞌati kuëëankëxa.

²⁶ Ësokin kakëxun ka an Saúl ꞌakinkë unikaman ënë bana ñuikin David kakëxa, kakëxun ka Davidtan asérabi kana ꞌapun piaka ꞌiti ꞌai kixun sinánkëxa. Usa ꞌain ka Saúlnën usakin ꞌanun kakë bana sinánkin a nëtën bënun kakë a nëtë ꞌikëma ꞌaínbi kana aín nëtokë ñu rëbu a bëxúnti ꞌai kixun sinánkëxa.

²⁷ Ësakin sinánkin ka David ain suntárukama uani kuanx abë ꞌakanankin doscientos filisteo suntáru ꞌakëxa. ꞌAtankëxun bibiankin ka filisteo suntárunën nëtokë ñu rëbu maxaka ꞌapu aín piaka ꞌisatankin, buánxun ꞌinánkëxa, ꞌinánkëxun ka Saúlnën aín ꞌini bëchikë Milcá ꞌain xanu ꞌinun ꞌinánkëxa.

²⁸ Usakin ꞌinánkëxun ka Saúlnën Nukën ꞌIbun ka David ꞌakinia, usa ꞌikë ka ꞌën bëchikë Milcánën kuëënia kixun ꞌunánkëxa,

²⁹ ꞌunani ka bëráma ꞌikësamairai ami rakuë́akëxa, rakuë́ti ka abë nuibanantëkënima ami nishakëxa.

³⁰ Usaia ꞌimainun ka filisteo suntárunën kushikama, Israel suntárubë ënananima abi ꞌakanani chikíakëxa, usai ꞌiabi ka Davidtan Saúlnën suntárunën kushikaman ꞌakësamaira okin ꞌakëxa, usakin ꞌakëbë ami rakuë́kin ka Israel kaman uisakinbi David káma ꞌikën.