1 Samuel 16 - Kashibo-Kakataibo Biblia

David ꞌapu ꞌinun anëa ñuikë bana

¹ Achúshi nëtën ka Nukën ꞌIbun Samuel kakëxa: —¿Uínsaran kaina Saúl sinani mix masá nuitukë a ënti ꞌain? ꞌËx kana abia Israel kaman ꞌapu ꞌiti kuëënima. Usa ꞌain kamina ñuina manchan anu ꞌaruti ꞌakë anu xëni ꞌarubiani kuanti ꞌain, Jesé Belénnu ꞌikë ain xubunu, ꞌën kana ꞌain bakë bëchikë achúshi axa ꞌapu ꞌinun kaísan.

² —¿Uisokin karana anu kuanuxun ꞌati ꞌain? —kixun ka Samuelnën kakëxa—. ¡Saúlnën usakin ꞌakë ꞌunánkin ka ꞌë ꞌati ꞌikën! Kakëxunbi ka Nukën ꞌIbun kakëxa: —Vaca bërí kanikë ain xanu bibiania iskin uínbi kara mi ñukákëxun kamina ꞌë kamina ñuina xaroxuni kuani kixun kati ꞌain.

³ Usa ꞌain kamina ain xubunu bëbakin Jesé mia ñuina xaroia ꞌakinun kati ꞌain, ꞌën kana añu kaina ꞌati ꞌai kixun mi kati ꞌain. Usa ꞌain kamina ꞌën ui kaina ꞌapu ꞌinun anëti ꞌai ꞌën mi kamainun aín maxkánu xëni tutukati ꞌain.

⁴ Kakëx ka Nukën ꞌIbun kakësabiokin ꞌai kuani Samuel kuankëxa. Kuani Belénnu bëbaia bikin ka ꞌapukaman ami chukúmashi rakuë́kinbi, ñukákankëxa: —¿Añu ꞌai kaina aín añu ñu kara ënu ꞌik?

⁵ Kakëxun ka Samuelnën —usa ka —kixun kakëxa. —Dios ñuina xaroxuni kana aín. Mënioka kuatsini kamina ëbëtan Nukën ꞌIbu ñuina xaroxunkin rabianan pi kamina ukanti ꞌain. Usokin raíri katankëxun ka Jesé ꞌimainun ain bakë bëchikë bëbukama upiti mëníokanun ꞌimiakëxa, ꞌimixun ka anuxua ñuina xaroti anuribia ununkixun kakëxa.

⁶ Usa ꞌain ka anuxun ñuina xaroti anu bëbaia Eliab Jesénën bakë bëchikë apan iskin Samuelnën sinánkëxa: Ënë uni sapi ka Nukën ꞌIbun ꞌapu ꞌiti kaískë a ꞌikën.

⁷ ꞌAínbi ka Nukën ꞌIbun kakëxa: “Uisa kara kixun ñachanan kamina uiti chaxkë́ kara kixun istima ꞌain, ꞌëx kana ax ꞌiti kuëëniman. ꞌËx kana unin iskë ñu ñui kikëma ꞌain; unin ka uisa kara bëtsi uni ꞌikë kixun isia, usa ꞌaínbi kana ꞌën uisakin kara unin sinania a ꞌunanin.”

⁸ Kakëxun ka Jesénën aín bakë bëchikë Abinadad kuënbiankin, Samuel ismikin uankëxa; ꞌaínbi ka Samuelnën kakëxa: —Ënëribi ka Nukën ꞌIbun kaiskëma ꞌikën.

⁹ Kixuan kakëxun ka Jesénën aín bakë bëchikë Samá kakin anëkë aribi buánkëxa; aínbi ka Samuelnën kakëxa: —Ënëribi ka Diosan kaiskëma ꞌikë kixun kakëxa.

¹⁰ Katëkënxun ka Jesénën mapai achúshi ꞌimainun rabë́ ain bakë bëchikë bëbukama Samuel ismiakëxa, ꞌaínbi ka Samuelnën achúshirabi ka Nukën ꞌIbun ënë min bakë bëchikëkama kaiskëma ꞌikë kixun kakëxa.

¹¹ Usakin pain ꞌuran ñukátakëxun ka amiribishi kakëxa: —¿Min bëchikë itsi kara ꞌaíma ꞌik? —Kixuan ñukákëxun ka anu ka an ñuina ꞌarakakë bërúankë aín ꞌanáka achúshi ꞌikë —kixun Jesénën kakëxa. Kakëxun ka Samuelnën barixua bëtánun kamina —achúshi uni xuti ꞌain —kixun kakëxa—, ax ukëmapan ꞌain kananuna mesanu nami ꞌën xuikë pinux tsóbutima ꞌain kixun ka kakëxa.

¹² Kakëxun ka Jesénën an ñu mëëxunkë uni achúshi barixua bitánun xuakëxa xukëx kuanxun bitsínkin bëakëxa. A bëná uni ax ka ain bëmanamiax upí ꞌianan ranshin uni ꞌiakëxa. Usa ꞌain ka Nukën ꞌIbun Samuel kakëxa: —Ënë kamina axa ꞌapu ꞌinun anëti ꞌain.

¹³ Kakëxunshi ka ñuina manchanua ꞌarukë xëni bikin aín xukë́n apankama ismainunbi David kakë uni bëná aín maxkánu axa ꞌapu ꞌinun anëkin xëni tutukaxa. Usokëbëshi ka Nukën ꞌIbun bëru ñunshin anu uax ꞌiruakëxa. Usokin ꞌabiani ka Samuel kana kuanin kixun atu kabiani Ramánu ꞌikë aín xubunu kuantëkëankëxa.

David Saúl ñu mëëxuni ꞌia ñuikë bana

¹⁴ Usa ꞌain ka Nukën ꞌIbun aín bëru ñunshin Saúlnua, chikinnun ꞌimianan anbi ñunshin ꞌatima an ꞌatimonun Nukën ꞌIbun anu xuakëxa, an ka ñunshin bakënun ꞌimiakëxa.

¹⁵ ꞌImikëxa ñunshin bakëia iskin ka an ñu mëëxunkë unikaman kakëxa: —Minbi kamina ꞌunanin, Diosan ka mi ꞌatimonun minu ñunshin ꞌatima xuaxa an ka mi ubioia.

¹⁶ Usa ꞌain kamina min an mi ñu mëëxunkë nukama achúshi an arpa ꞌati ꞌunánkë uni achúshi baritanun xuti ꞌain, an ka mia ñunshin ꞌatimanën bikëbëtan a kuatimi chuámarua tani kuëënun arpa ꞌati ꞌikën.

¹⁷ —Asabi ka usa ꞌain kamina an arpa upíokin ꞌati ꞌunánkë uni baribëtsinkin ꞌë bëxuni kuanti ꞌain, —kixun ka Saúlnën kakëxa.

¹⁸ Kakëxun ka an ñu mëëxunkë uni achúshitan kakëxa: —ꞌËn kana Jesé Belénnu tsókë aín bëchikë achúshinën upíokin arpa ꞌaia isan; ꞌimainun ka ax ꞌakánanti rakuëma ꞌianan, asérabi ax kikësabiokin ñu ꞌaia, usa ꞌikë ka Nukën ꞌIbun ꞌakinia.

¹⁹ Ësokin kakëxun ka Saúlnën ain unikama Jesé ësokin katánun kamikin xuakëxa: “Min bakë bëchikë David an min ovejakama ꞌarakakë bërúankë akamina ꞌë xuxunti ꞌain kixun katánun xuakëxa,”

²⁰ xukëxua kakëxun ka Jesénën aín bakë bëchikë David Saúlnu xuakëxa. Xukin ka an Saúl buánxuntanun burro achúshinu pán xuanan, ñuina xakánu ꞌarukë uvas bakakëñun achúshi cabra tuá chukúma xuakëxa.

²¹ Usakin uamikëx a uani kuanx ka David Saúlnën xubunu bëbakëxa, bëbax anu ꞌia ka Saúlnën ain ñu mëëti ꞌaxúnun ꞌimiakëxa, ꞌimikëxun upíokin ñu mëia ꞌitsaira nuibakin ka Saúlnën an ꞌakinun kixun anëakëxa.

²² Anëtankëxun ka achúshi uni abë ꞌinun kara ain bëchikë David ami ëntima ꞌikë ain papa Jesé ñukáxuntanun ꞌitsaira nuibakin uni xuakëxa.

²³ Usa ꞌain ka Diosan anu xukëxun ñunshin ꞌatimanën bikëx bikëx Saúl ñunshin bakëi ꞌikëbëtan, Davidtan ain arpa bikin ꞌakëxa. Usakin ꞌakëbë ka Saúl ꞌásabi tani kuëënun ñunshin ꞌatima anuax chikíakëxa.