1 Samuel 15 - Kashibo-Kakataibo Biblia

Nukën ꞌIbun Saúl kuëënkima tima ñuikë bana

¹ Achúshi nëtën ka Samuelnën Saúl kakëxa: —Nukën ꞌIbun ka ꞌën mi utankëxun anbia kaisa Israel kaman aín ꞌapu ꞌinun, mi anënun kixun ꞌë kaxa. Usa ꞌain kamina, ësokin mi kanun kikë bana kamainun kuati ꞌain.

² Nukën ꞌIbu kamabi kushiñuira an ka mi ësokin kaia: bërí kana amalecita unikamami ꞌën ꞌamikëxun ꞌanun mi ꞌamiti ꞌain, usa ꞌaínbi ka atun Israel unikama Egipto menuaxa aia atubë ꞌakanankin ꞌakëxa.

³ Usa ꞌain kamina, min suntárukama buani kuantankëxun; atu ꞌakin añu ñuñu kara atux ꞌikë akamabi masókin ꞌanan atu nuibakinma kamabi uni ꞌimainun xanukamaribi ꞌanan tuá bërunankë akama ꞌanan bëría bakënkë akamabi ꞌati ꞌain, ꞌanan kamina vaca bënë atun oveja camello ꞌimainun atun burrokama këñukin ꞌati ꞌain.

⁴ Usakia kakëxun ka Saúlnën Israel suntárukama an Telaim kakë ëmanu timënun kixun xuakëxa, anu timë́kë ka atun anën kuënkin kamabi suntáru tupuankëxa, tupúnkëx ka doscientos mil suntáru axa men kuani ꞌakanankë ꞌiakëxa, ꞌimainun ka Judánën rëbúnki kamax diez mil suntáru ꞌiakëxa.

⁵ Usakin ꞌabiani ka Saúl aín suntárukama buani Amalec kakë aín ëma chaiira anu kuanxun ratukinshi ꞌanux achúshi xëxanu ꞌibuax anu unë́nun ꞌimiakëxa,

⁶ usokin ꞌatankëxun ka Saúlnën quenita unikama ësokin kamiakëxa: —¡Kamikëx kuanxun ka ësokin kakëxa! ¡Anumi Amalecita unikamabë tsókë ënuax kamina chikínkanti ꞌain ënë unikama ꞌakin kananuna atukëñunbi mitsuribi ꞌati ꞌain; mitsun kamina Egipto menuaxa chikíküatsini aia israel unikama uisabi okinma nuibakën! Usokian kakëx ka quenita unikamax amalecita unikamanuax chikikankëxa.

⁷ Usa ꞌain ka Saúlnën aín suntárukamabëtan ꞌakin amalecitakama anua Havilá me ꞌikë anuxunbi pëuxun nuibiankin au bari kuabúkë Egipto me sënënakëkë anubi bëbarukin ꞌakëxa;

⁸ ꞌakin ka atun ꞌapu Agag kakë ashi ñatankankëxa, ñatanan ka atun manë xëtokën aín suntárukama ꞌakankëxa.

⁹ ꞌAnan ka Saúlnën aín suntárukamabëtan, Agag a uisabi oima ꞌianan atun ꞌarakakë ñuina upíbu oveja, vaca, bënë, carnerokama xuairabu akama bianan ñu upíbu akamaribi ꞌaisama okinma, ñu kupíkëma kamaishi ꞌatima okëxa.

¹⁰ Usokia ꞌakë ꞌain ka Nukën ꞌIbu abë banakin Samuel kakëxa:

¹¹ —ꞌËnbi upí ꞌiisa sinánkin Saúl ꞌapu ꞌinun ꞌimikëxunbi ka, ꞌën ꞌanun kakësokin ꞌakinma an kuëënkësokin ꞌaxa. Ësokin kakëx ka Samuel masá nuituti ꞌitsaira nishakëxa, usai ꞌiax ka a imë́ Nukën ꞌIbubë bananëakëxa.

¹² Usai ꞌinëti ka Samuel pëkarakëma ꞌaínshi nirukiani Saúl bari kuankëxa, kuaniabi ka abë mëranankëmabi kakankëxa, Saúl ka Carmel kakë menu kuanxun anu achúshi mapara chaxkë́ a iskin ami unin sinántisa kixun nitsintankëx, ami achúshi oi kuainakëkiani Guilgal kakë ëmanu kuanxa kixun ñuixuankëxa.

¹³ Usakian kakëx ka Samuel uimi kara Saúl kuanxa anuabi bari kuankëxa, kuankian nukukëxun ka kakëxa: —Nukën ꞌIbun ka mi ꞌakinti ꞌikën. ꞌËn kana kamabi Nukën ꞌIbun ꞌanun kakëkama ꞌan.

¹⁴ Kiabi ka Samuelnën kakëxa: —¿Uinan kara ovejakama bana maínun vaca bënëkama mankiabatia ꞌën kuakë ax ꞌik? Kixun ka Samuelnën ñukákëxa.

¹⁵ —ꞌËn kana a ñuinakama bëkëma ꞌain Amalec menua ka suntárukaman bëaxa —kixun ka Saúlnën kakëxa—, atun ka min ꞌIbu Dios rabikin xaroti bëkanxa. ꞌAínbi kananuna raíri ñuinakama achúshirabi nitsinkinma kamabi këñuan.

¹⁶ Usokian kakëx ami nishkin ka Samuelnën Saúl kakëxa —¡Nëtë́xun kamina usokin mi kanun ꞌë kakë mi kamainun kuati ꞌain, Nukën ꞌIbun ënë imë́ ꞌë kakë kana mi kati ꞌain! Ësokin kakin ka kiabi nëtë́miakëxa. —Asabi ka kamina ꞌë kati ꞌain —skixun ka an kakëxa.

¹⁷ Usa ꞌain ka Samuelnën kakëxa: —Minbi kamina ꞌapu ꞌisama ꞌixun ꞌëx kana añubi ꞌisama ꞌai kixun sinánkën, ꞌaínbi kamina bërí israel unibunën ꞌapu ꞌain, usaími ꞌinun ka Nukën ꞌIbun mi ꞌimiaxa.

¹⁸ Usa ꞌikë ka Nukën ꞌIbun, minmi Amalecita ꞌuchañu unibu abë ꞌakanankin aín suntárukama këñukinshi ꞌanun mi kaxa.

¹⁹ ꞌAínbi kaina ¿Uisa kupí an mi kakësokinshi ꞌakinma atu ꞌaxun Nukën ꞌIbun ismainun, axa mimi nishkë unikaman ñu usokin ꞌan?

²⁰ Kixuan kakëxun ka Saúlnën kakëxa: —ꞌËn kana añu ꞌanun kara Nukën ꞌIbun ꞌë kaxa a kamabi ꞌaxuan: ꞌAkin kana Amalecita unikama këñukin ꞌanan atun ꞌapu Agag ashi ꞌakinma bitsínkin usabi bëan.

²¹ ꞌAínbi ka suntárukamainshi atun ꞌarakakë ñuina aín upíirabu a kamabi këñutia Dios kikë akama bëaxa, a ka Dios Guilgal kakë ëma anuxun xaroxunti bëaxa.

²² Usokin kakëxunbi ka Samuelnën kakëxa: Nukën ꞌIbun ka kuëënia ax kikësokinshi ꞌaxúnti, usa ꞌain ka ñuina xaroxuntishi kuëënima; ax kikësabi okinshi ꞌati ax ka ñuina xaroxuanan carnero aín xëni xaroxunkë usamaira ꞌikën.

²³ Usa ꞌaish ka uin kara ax kikësokin ꞌaima ax ami ꞌuchai an ñu tankë unikamasa ꞌiti ꞌikën; usa ꞌaish ka ñu tankin ꞌaxun rabikë unikamasa ꞌixun Diosan kakësokin ꞌaima ami ꞌuchaia. Usa ꞌaínbi kamina min an kikësokin ꞌakëma ꞌain, an kakësokin kamina ꞌaisama tanin, usa ꞌikë ka ꞌapu ꞌikëbi mi ꞌakintima ꞌikën.

²⁴ Ësokian kakëxun ka Saúlnën Samuel kakëxa: —ꞌËn kana Nukën ꞌIbun kakësama okin ꞌai ꞌuchan ꞌimainun kana min kakësokiribi ꞌakëma ꞌain, usa ꞌain kana atumi rakuë́kin añu ꞌanun kara ꞌë kaia usakinbi atu ꞌaxuan.

²⁵ ꞌAínbi kamina usai ꞌuchakë ꞌikëbi ꞌë mëníoti ꞌain, ꞌianan kana ꞌëbë mix Nukën ꞌIbu rabi kuanti kuëënin.

²⁶ —Kixun kakëxunbi ka usama ka, mibë kana kuanima —kixun Samuelnën kakëxa—, min kamina Nukën ꞌIbu ꞌanun kakësokin ꞌakëma ꞌain, usa ꞌain ka mixmi Israel unibunën ꞌapu ꞌiti kuëënima.

²⁷ Ësokin katankëxa Samuel kuani anua ꞌikë anuax kuainakëtiabi ka Saúlnën aín pañukë tari a munuma bikin kuënáraskakëxa.

²⁸ Usokin ꞌakëxun ka Samuelnën Saúl kakëxa: —Minmi ꞌën tari tukakin bikë ësaribiokin ka Nukën ꞌIbun ka mix Israel kaman ꞌapu ꞌikëbi. Mi ꞌimikinma bëtsi uni kaístakëxun, an Israel unikama min ꞌakësamaira okin atu ꞌakinun ꞌimiti ꞌikën.

²⁹ Nukën ꞌIbu Dios an ka Israel kama upí ꞌinun ꞌimiti ꞌikën, ax ka paránani këmëi banaima, ꞌianan ka uni ꞌikësai ñu ꞌakatsi kiax kana ꞌaíma kiax kítëkënima.

³⁰ —ꞌËx kana ꞌuchan —kiax ka Saúl amiribishi kítëkëankëxa—. Usa ꞌaínbi kana mi amiribishi katëkënin Israel kaman kushi ꞌimainun kamabi unikaman, ax ka asérabi nun ꞌapu ꞌikë kixun mi sinánun kamina ꞌëbë kuanti ꞌain. Usa ꞌain kamina ꞌëbë kuantëkëntankëxun Nukën ꞌIbu rabi kuanti ꞌain kixun ka katëkëankëxa.

³¹ Usai kanankiani ka Samuel ꞌimainun Saúl anua ꞌikë anuax kuankëxa, kuanxun ka Dios rabiakëxa.

³² Usokin ꞌatankëxun ka Samuelnën kakëxa: —ꞌË kamina Amalecita unikaman ꞌapu Agag bëxúnti ꞌain. Kakëxun bëkëx ka Agag aín bamatisa inúaxa kiax upitaxëshi kuantankëx Samuel bëmánanu nirakëakëxa, uisabi isa okanima a ꞌatimisa manukanxa kixun sinani.

³³ ꞌAínbi ka Samuelnën kakëxa: —Min kamina min manë xëtokën ꞌakin ꞌën aintsi xanun tuákama këñukin ꞌan. Usaribiti ka min titax tuáñuma bërúti ꞌikën. Ësokin kakinshi ka Samuelnën aín manë xëtokë bikinshi anun ꞌakëxa, Guigal kakë ëma anuxun Nukën ꞌIbun kakësabiokin ꞌaxun ka Agag aín nami chánkapakëxa.

³⁴ Usokin ꞌatankëx ka Samuel Ramá kakë ëmanu kuankëxa. Kuantamainun ka Saúl axribi anua ꞌikë aín xubu Guilgal kakë ëma anu kuankëxa.

³⁵ Usai ꞌitankëxun ka Samuelnën uínsaranbi amiribishi Saúl istëkëama ꞌikën, a sinani ꞌitsaira masá nuitukinbi, ꞌimainun ka Dios anbi Israel kaman ꞌapu Saúl ꞌimiaxbi kuëanma ꞌikën.