1 Samuel 12 - Kashibo-Kakataibo Biblia

Samuelnën ax ꞌapu ꞌinun Saúl anëa ñuikë bana

¹ Usa ꞌain ka Samuel kamabi israel unikama timë́kë a kai kiakëxa: —Mitsun kamina isin añu ꞌaxúnun kaina ꞌë kai a kana mitsu ꞌaxuan, ꞌianan kana achúshi ꞌapu anëxunun kia mitsu anëxuan.

² Ënu ka ꞌapu an mitsu bërí ꞌakinti anëkë a ꞌikën. Bëná ꞌaíshbi mitsun ꞌapu ꞌia ꞌixun kana bërí nëtënbi mitsu ꞌakinin. Usa ꞌain kana bërí kaniakëkë ꞌaish ꞌitsaira ꞌën bu uxua ꞌirua, ꞌimainun kamina ꞌën bakë bëchikëkamaribi mitsubë tsotia uisa uni kara kixun ꞌunánkan,

³ ënu kana bërí mitsubë ꞌain: Usa ꞌain kamina uisai karana ꞌia ꞌë kakanti ꞌain, bëtsin ꞌarakakë vaca ꞌanan karana aín burro ꞌënamabi mëkamaxun ꞌibuanan, karana ami kuaikin ꞌën kuëënkësa okin an a unikaman ka bëríbi Nukën ꞌIbun ismainun kanan anbia kaískë mitsun ꞌapu ënën kuamainunbi ꞌë kati ꞌikën, bërí kana ui karana ribini a kupíoti ꞌain.

⁴ Ësokian kakëxunbi ka timë́kë unikaman kakëxa: —Uínsaranbi kamina nun ñu mëkamanan nu paránan usokinbi ꞌakin këmënuxun nun kuríki bianan uisokinbi nu ꞌakëma ꞌain.

⁵ Usai kia ka Samuelnën atu kakëxa —Nukën ꞌIbu ꞌimainun anbia kaískë mitsun ꞌapu an ka mitsux mi kikë bana ꞌunánxa, usa ꞌain kamina ꞌatimai banakin ꞌë ꞌucha okankëma ꞌain —kixun ka Samuelnën unikama kakëxa. —Asérabi ka usa ꞌikë —kixun atúnribi kakëxa.

⁶ Kakëxun ka Samuelnën kamabi Israel kama kakëxa: —Nukën ꞌIbu an ka kamabi ñu ꞌanun Moisés këñun ain xukë́n Aarón a rabë́ ꞌamiakëxa, usakin ꞌamikin ka nun chaitiokëkama Egipto menua chikínbëtsinkin bëakëxa.

⁷ Usa ꞌain kamina bërí mëníokakanti ꞌain, ꞌën kana Nukën ꞌIbun ismainunbi mitsu uisakin kara an mitsu ꞌakianxa kanan, uisakin kara nun chaitiokë ꞌakiankëxa akama mitsu ñuixunti ꞌain.

⁸ Jacob ꞌimainun aín aintsikamaxa Egipto menu tsóti kuankë ka a menuxun egipcio unikaman nun chaitiokëma ꞌaisamaira okin ñu mëëmikëx Diosan ꞌakinun kiax kikankëxa, usai ꞌikëbëtan ka Nukën ꞌIbun Moisés ꞌimainun Aarón an atu Egipto menua chikínun kixun ꞌamiakëxa, usakin ꞌakëx ka utankëx anunu bërí nux tsókë ënë menu atux pain tsókankëxa.

⁹ Usokin ꞌakinkëxbi ka Nukën ꞌIbu Diosmi atux manúkankëxa, usai ꞌia okin ka ax atumi nishkë unikaman abë ꞌakanankin kupimikinma ꞌanun Hasor ëmanu ꞌikë ꞌapu Jabín aín suntárunën kushi Sísaranën an bërúankë suntárukamabëtan ꞌanun ꞌamiakëxa, ꞌaia ka filisteo unikama ꞌimainun Moabnu ꞌikë ꞌapu anribi atubë ꞌakanankin ꞌakëxa.

¹⁰ Usokian ꞌakëx ka atúxbi sinanati Nukën ꞌIbumi ꞌuchakin kananuna ami manutankëxun bëtsi unikaman rabikë Baal ꞌimainun Astarté tankin ꞌakë atun dios a rabi ꞌucha kixun ñukákin, axa numi nishkë unikaman mëkënua kamina, mi rabikin añu ꞌanun kaina nu kai ashi mi ꞌaxúnun chikínti ꞌai kixun kakëxa.

¹¹ Usakin ñukákëxun ka Nukën ꞌIbun Jerubaal, Barac, Jefté ꞌimainun ka Samuel mitsu ꞌakinun kixun xuakëxa, xukëxun kananuna axa mitsumi nishkë unikaman ꞌibuakë ꞌikëbi mitsu ꞌakiankën upitaxmi bukukanun.

¹² ꞌAínbi kamina Nahas amonitakaman ꞌapu axa mitsu ꞌanux kuankëbëtan atumi rakuë́kin achúshi ꞌapu an mitsu ꞌakinti anëxunun kiax kikankën Diosmi katamëti sinanima.

¹³ Ënu ka bërí mitsun kaiskankë ꞌapu a ꞌikën; Nukën ꞌIbu Diosan ka mitsun mi kuëënkë ꞌapu a mikama ꞌinánxa.

¹⁴ Bërí kamina mitsun añu ꞌanun kara Nukën ꞌIbun mitsu kaia a ꞌanan ashi rabikin ax kikësabiokin ꞌakin aín bana kikë sama oi kamina ꞌitëkënkantima ꞌain, usai ꞌima kamina mikamax an mitsu ꞌakinkë ꞌapu abëbi Nukën ꞌIbu kikësabi ꞌoíshi ꞌikanti ꞌain, usai ꞌikëbë ka mitsun ꞌakë ñukamaxribi upí ꞌiti ꞌikën.

¹⁵ Usai ꞌikinma ax kikë bana kiásabiokin ꞌakëbëtan ka an mitsun ꞌapu këñunbi uisa kara oisatania usokin ꞌati ꞌikën.

¹⁶ “Usa ꞌain kamina anumi bukukë anuax kuainkima pain uni itsin ꞌakëma ñu Nukën ꞌIbun mitsun ismainun ꞌaia iskanti ꞌain.

¹⁷ Mitsúnbi kamina ꞌunan bërí ka anun trigo bimi biti ꞌuxë ꞌikën, ꞌaínbi ka ꞌuñe ꞌibutíma, ¿asérabi kara usa ꞌik? Usa ꞌaínbi ka ꞌën ñukákëxun Nukën ꞌIbun ka kaná banamianan uñeribi ꞌibúnun ꞌimiti ꞌikën, usokin ꞌakëbëtan kamina mitsun sinanakin ꞌunánti ꞌain, nun kananuna Nukën ꞌIbu kuëënkëma ñu ꞌakin achúshi ꞌapu nu ꞌinánun ñukákën kixun.”

¹⁸ Usakin atu katankënxun ka Samuelnën Nukën ꞌIbu ñukákëxa, ñukákëxun ka an bënë́kinshi uñe ꞌibúmianan kanáribi banarunun ꞌimiakëxa; usai ꞌia isi ka kamabi uni timë́kë atux ꞌitsaira Nukën ꞌIbumi rakuëanan Samuel mi ribi rakuëkankëxa.

¹⁹ Usai ꞌikin ka kamabi unikaman Samuel kakëxa: —Min kamina Dios ñukáti ꞌain, an mi ñu mëëxunti unikama nu kupí, an ka nu këñunun ꞌimitima ꞌikën; nun kananuna ami ꞌaisamairai ꞌuchakë ꞌixunbi amiribishi achúshi ꞌapu nu ꞌinánun kixunribi ñukan.

²⁰ Kikania ka Samuelnën atu kakëxa: —Kamina rakuë́kantima ꞌain. Ax ka asérabi ꞌikën mitsúnbi kamina ꞌaisama ñuira ꞌan; usa ꞌain kamina bërí an kakësokin ꞌaisamatankinma asérabi ashi min nuitunënbi sinánkin Nukën ꞌIbu rabikanti ꞌain.

²¹ Usa ꞌain kamina bërí unin diosmabi rabikë ñukama a ënti ꞌain, an ka mitsu uisa ñu kara inutiabi ꞌakianan uisakinbi ië́mitima ꞌikën, ax ka unin këmëkinshi ꞌakë ꞌikën.

²² Nukën ꞌIbu an ka asérabi nukama kaisakëxa. Usa ꞌixun ka uínsaranbi nukama ënuxunma ꞌaia, anbi ka mitsu aín uni ꞌiti kaisakëxa.

²³ ꞌËn kana mitsu Nukën ꞌIbu ñukaxunkin ëntima ꞌain, mitsu ñukáxunima kana ami ꞌuchakë ꞌiti ꞌain. ꞌIanan kana uisai kaina mitsux an kuëënkësabi ꞌoíshi tsóti ꞌain akama ꞌunánmiti ꞌain.

²⁴ Mitsun kamina Nukën ꞌIbun kakësokinshi ꞌakin asérabi kuëënkin ashi rabikanti ꞌain, an ka nu upíokin ꞌitsaira ꞌakinia kixun ami sinánkin.

²⁵ Usokin ꞌakinkëxunbi mitsun amiribishi ꞌaisama ñu ꞌakin ismikëxun ka mitsun ꞌapu këñunbi axa mitsumi nishkë unikaman këñukin ꞌanun ꞌamiti ꞌikën.