1 Samuel 11 - Kashibo-Kakataibo Biblia

Saúlnën amonita unikama abë ꞌakanankin ꞌa ñuikë bana

¹ Nahas kakë ꞌapu Amón ëmanu tsókë ax ka, Jabés anua Galaad ꞌikë anu kuanxun ꞌain suntárukama a ëmanu ꞌikë unikama ꞌanuxun mëníokamiakëxa. ꞌAínbi ka Jabésnu tsókë unikaman usaía ꞌikëbi kakëxa: —Nukamabëtan kamina achúshi ñu mëníoti ꞌain, usa ꞌain kananuna uisai ꞌinun kaina nu kai usaibi ꞌiti aín.

² Ësokin kakëxun ka Nahas amonita an kakëxa: —Mitsubëtan kana achúshi ñu mëníoti ꞌain, ꞌaínbi kamina ꞌën suntárukaman mitsu achúshi achúshinën bëru mëkeu ꞌikë ëchipanun ꞌamiti aín, usakin ꞌaxun kananuna Israel unikama tëmëramiti ꞌain.

³ Usakin kakëxun ka Jabésnu ꞌikë ꞌapukaman kakëxa: —Nukamina mapai achúshi ꞌimainun rabë́ nëtë anun kamabi menu tsókë Israel unikama chaniotanun uni xunun ꞌamiti ꞌain kixun kakëxa; usa ꞌain kananuna nu ꞌakini uixi ukëbëtama min kakësabiokin ꞌati ꞌain.

⁴ Usokin akama katankëxua xukëx kuanx ka bana chaniotia xukë unikama ax Guilbeá, anua Saúl ꞌikë anu bëbakëxa, bëbaxun ka anu ꞌikë unikama bana ñuixuankëxa. Usokin a bana ñuixunkëx ka anu ꞌikë unikama ꞌaisamairai nishkankëxa.

⁵ Usai nishkankëbë ka Saúl ain pastonuax vaca bënë raíri bëi ukinbi usaía inkania iskin ñukákëxa: —¿Uisai kara unikama ꞌiax? ¿Uisai ꞌiax kara kamabi unikama inin? Kia ka Jabésnu ꞌikë unikaman kuanxua ñuikë bana a ñuixukin kakëxa.

⁶ Kakëxun kuakëbëshia Diosan bëru ñunshin anu ꞌirukëbë ka; ꞌaisamairai Saúl nishakëxa.

⁷ Usai nishkin ka vaca bënë rabë́ ꞌatankëxun tukapaxun, uni raíri an kamabi menu ꞌikë Israel kama nami paná ꞌinantanun xuakëxa. Xukin ka a xukë unikama a kakëxa: Ësokin kana Israel kama axa ꞌë ꞌimainun Samuel ꞌakanani kuania nuibiankëma ain vaca bënëkama ꞌati ꞌai kixun katánun kakëxa.” Usakin kamikëxun kuati ꞌitsaira rakuë́ti ka uixi bërútima Saúl ꞌimainun Samuelbëtan amia nishkë uni a ꞌanux timë́ti rikuatsiankëxa.

⁸ Usa ꞌain ka Saúlnën aín unikama tupunkin, Bézec ꞌikë anu ka trescientos mil Israel ꞌimainun treinta mil Judánu ꞌikë unikama timë́axa kixun kakëxa.

⁹ Katankëxun ka axa bana chanioi Jabésnuax kuanx bëbakë unikama an ësokin kakëxa: —Jabésnu ꞌikë unikama kamina kai kuanti ꞌain, imë́ishi bari xamarukëbëtan kananuna atu ië́miti aín. Ësokin Saúlnën kakëx kuantëkëxua a unikaman ñuixunkëxun ka Jabésnu tsókë unikaman, ꞌitsaira kuëënkin.

¹⁰ Nahas ësokin kakankëxa: —Imë́ishi kananuna nukamax minu ꞌinámëti ꞌain, usa aín kamina min uisakin karamina nu ꞌaisatani usakin nukama ꞌati ꞌain.

¹¹ Usokin ꞌakë a pëkarakëbëtan ka Saúlnën ain suntárukama rabë́ ꞌimainun achúshi okin amo sëtënakëxa, usakin ꞌaxun ka pëkarakëma ꞌaínshi abë ꞌakanani ukë bëtsi unikama bëararatanun xuakëxa, xukëxun bëaraxun ka amonita suntárukama bari xamarutamainun ꞌaisamaira okin kupitanuma ꞌakëxa. Usokin ꞌakëx ka axa bamakëmakama ax uinu ꞌikë uníxbi rabëtax abátima achúshi achúshi unix anua ꞌikë anuax unë́kiani abati amami amami kuankëxa.

¹² Usakin ꞌan ka a ëmanu ꞌikë uni raírinën Samuel kakëxa: —¿Uikamax kara Saúlnëx ka nun ꞌapu ꞌiti ꞌikë kixun sinántisama tanx? A unikama kamina nun ꞌanun nu ꞌinánti ꞌain kixun ka kakëxa.

¹³ ꞌAínbi ka Saúlnën ësokin atu kakëxa: —Ënë nëtën ka uixi bamatima ꞌikën, Nukën ꞌIbun ka Israel kama ië́mikin ꞌakianxa usa ꞌain.

¹⁴ Kakëbëtan ka Samuelnën kamabi unikama kakëxa: —Guilgalnu kananuna Saúl ꞌitabatia ꞌapu ꞌinun atsinmi kuanti aín.

¹⁵ Usa ꞌain ka kamabi uni Gilganu kuankëxa, anuxun ka Nukën ꞌIbun ismainunbi ax ka ꞌapu ꞌia kixun timë́kamë ꞌëoxun Saúl anëakëxa. Usakin anëtankëxun ka nuibanankin ñuina rëxun xaronan pi ꞌitsaira israel unikama Saúlbëbi kuëënkankëxa.