1 Samuel 10 - Kashibo-Kakataibo Biblia

Samuelnën Israel unibunën ꞌapu ꞌinun Saúl ꞌimia ñuikë bana

¹ Usa ꞌain ka Samuelnën ñunu ꞌarukë a xëni bikin anun ꞌikúkin aín maxkánu tutukakin Saúl kakëxa: —Nukën ꞌIbu ka mixmi bërí Israelkaman ꞌapu ꞌinun ꞌimiti ꞌikë kixun ka kakëxa. Mix atun ꞌapu ꞌixun kamina a ꞌurama ꞌikë ami nishkë uni kamabë ꞌakananun ꞌimitima ꞌain. ꞌImainun ka aín unikaman ꞌapu ꞌimikëx kaina uisai ꞌi tantia Diosan mi ꞌimikë ꞌikën.

² Bërí kamina ꞌëbë ënananin usa ꞌain kamina, anu Raquel maían ꞌurama anuax uni rabëbë mërananti ꞌain, ax ka Selsah anua Benjamínën rëbúnkinën me ꞌurama anu ꞌikën. Atun ka ami barikë burro aín xanukama ka mëraxa ka mi kati ꞌikën, usa ꞌain ka burro aín xanukama ami sinanima mitsumira bërí sinania kixun ka mi kati ꞌikën, uisa kara ꞌën bakë bëchikë ꞌiaxa kiax kia.

³ Ënuax kuanxmi anua Tabor kakë menu i pëñanakëkë nikë anu bëbakëbë ka Betelnuxua Dios rabi kuankë uni rabë́ ꞌimainun achúshi uni mibë mërananti ꞌikën. Atun ka achúshinëan rabë́ ꞌimainun achúshi chibu uamainun bëtsínribi rabë́ ꞌimainun pán achúshi uamainun ka bëtsin achúshi ñuina xakánu ꞌarukë uvas baka xëati ꞌakë a uanti ꞌikën.

⁴ Uankin mërai mibë kanankian pán rabë́ ꞌinánkankëxun kamina timakinma biti ꞌain.

⁵ Usokin ꞌatankëx kamina matá me chairukë Diosan me ꞌikë, Guibeá kakë anua filisteo unikaman suntáru ꞌikë anu bëbati ꞌain. Bëbax a ëmanu atsini kamina an Dios kikë bana uni ñuixunkë unikamabë anuxun Dios rabiti ꞌakë anuax rikuatsinkëbë atubë mërananti ꞌain. Mëranankin kamina atux kuanmainun rëkuë́nkiani kuankin mëkën rëbun mëëkin banamikë, ꞌimainun arpakëñun, xunkakin banamikë ñukama, a banamibiani kuania isti ꞌain.

⁶ Usakin a iskëbë ka Nukën ꞌIbun Bëru Ñunshin mibë ꞌiti ꞌikën, ꞌimainun ka mibë ꞌikin an bana ñuixunkë unikaman sinánsaribi ꞌimikin bana ñuixunun mi ꞌimiti ꞌikën.

⁷ Uínsaran kara Diosan ꞌimikëx minu usai ñu ꞌia anun kamina Diosanbi mi ꞌakinkëxun sinánti ꞌain.

⁸ Usa ꞌain kamina ënuax kuantankëxun Guilgal bëmánon, anuax ꞌitsama nëtë ꞌikëbë mërananxun ñuina ꞌaxun ꞌaímai këñutanun xaroi ñu ꞌatima ꞌakëkama mëníonanux timë́ti anu bëbaia ꞌë kaínti ꞌain. Anuxun kamina mapai achúshi ꞌimainun rabë́ nëtë ꞌimikin ꞌë kaínti ꞌain. Anuxun kana ami ꞌati ñu ñuikin mi kati ꞌain.

⁹ Usakin kakëx Samuelbë ënanankiani kuani ka Saúl Diosan ꞌimikëx aín nuitu bëtsikë upí tani chuámarua ꞌiakëxa. Usakin chuámarua tankëbë ka a nëtënbi a ñuikian Samuelnën kakë ñukama usaibi ꞌiakëxa.

¹⁰ Usai ꞌikiani kuanxa Saúl aín unibë Guibeá, anu bëbakë ꞌain ka, an Dios kikë bana ñuixunkë unikamax atubë mëranani kuankëxa. Kuankë ꞌain ka Diosan Bëru Ñunshin upitan abë ꞌixun ꞌamikëxun Saúlnën atun ꞌakësaribi okin bana ñuixunkin uni kuëënmiakëxa.

¹¹ ꞌAínbi ka an bëráma ꞌunan akamax, an Dios kikë bana uni ñuixunkë unikamabë timë́xun bana ñuixunia isi ami banai bëtsibë bëtsibë kánani kikankëxa. “¿Uisai kara Quisnën bëchikë ux ꞌiax? ¿Saúlnëxribi kara an uni bana ñuixunkë unikama achúshi ꞌik?”

¹² ꞌAínbi ka atubë ꞌikë Israelkama achúshinëx ësai kiakëxa: “¿ꞌImainun kara uix ꞌain papa ꞌik?” An ka ꞌunánxa anun uni banakë bana kikësabi oi ꞌia. “¿Usa ꞌain kara Saúlribi an uni bana ñuixunkë unikama achúshi ꞌik?”

¹³ Usakin bana ñuixunkin sënë́onbiani kuanx ka Saúl anua ꞌikë aín xubunu bëbakëxa.

¹⁴ Usaia bëbakë ꞌikë ka ain kukun an ñu mëëxunkë uni akëñunbi ñukákin kakëxa: —¿Uinu kaina kuankan? Kakëxun ka Saúlnën kakëxa: —Burro aín xanukama nëtë́kë bari kananuna kuan. ꞌAínbi kananuna mërákëbëma, Samuel isanan abë banakuatsini ain.

¹⁵ Ësakian kakëxun ka aín kukun an ñu mëëmikë uni ꞌimainun Saúl kakëxa: —¿Uisakin kara Samuelnën mi kax? Akamina ꞌë bërí ñuixunti ꞌain.

¹⁶ Kixun kakëxun ka Saúlnën aín kuku kakëxa: —Nun kuamainubi ka ësokin nu kaxa burro aín xanu akama ka mërakanxa kixun ka nu kaxa. ꞌAínbi ka Saúlnën abë banakian Samuelnën Diosan Bëru ñunshin upitan ka mi ꞌapu ꞌimiti ꞌikë kakë ashi ñuixuanma ꞌikën.

¹⁷ Usakin kakë ꞌixun ka Samuelnën israel unibu abëtan Nukën ꞌIbu Mispá kakë ëmanuxun rabi unun kixun kamiakëxa;

¹⁸ anuxun ka ësakin kakëxa: —Ësai ka israel unibunën Dios kiaxa: “ꞌËn kana Egipto menu ꞌiabi israel unibu ꞌikë mitsu chikiankën; chikínkin kana egipcio unibunën tëmëramikin ñu mëmiabi ꞌanan bëtsi unikamaribi ñu mëëxuniabi chikiankën.”

¹⁹ ꞌAínbi kamina mikaman bërí Diosma ꞌikë ꞌakësa okinra kuëënkima rakan, an kamabi ñu ꞌaisama ꞌanan tëmërakin ñu mëi atsánkë ꞌikë chikían ꞌixunbi. ꞌImainun kamina ami manúkin a rakani axa mitsun ꞌapu ꞌiti achúshi uni anëxunun kikan. Usa ꞌain kamina bërí Nukën ꞌIbu rabi anu ukanti ꞌain, ꞌaínbi kamina, atun bananbi banakë akama abiribi ñaká, umainun ka ñakátibi aín aintsibë aintsibë uti ꞌikën.

²⁰ Usakin katankëxun ka Samuelnën kamabi uni ñaká achúshi achúshi a ꞌurama rikuatsinun kakëxa. Usakin kakëxa rikuatsini timëkë ꞌain ka ñura rabë́ kuënëoxun anun tankëxi ka Benjamínën rëbúnkinën ñakámi oi nipakëakëxa.

²¹ Usakin a maxá bikëbi ka amiribishi Samuelnën a ꞌurama unun Benjamínën, rëbúnkikama kakëxa, kakëx uaxa timë́kë ꞌain ñu rabë́ra ꞌunánti okin kuënëoxun anun tankëxa, tankëxa atumi ki nipakëtia ka Matrínën, rëbúnkikaman biakëxa, anuax ka Saúl, Quisnën bëchikë ami kiribi nipakëakëxa. Nipakëkë barikinbi ka a mërakanma ꞌikën,

²² mëraima ka atux amiribishi Nukën ꞌIbubë banatëkëánkëxa, anu kara Saúl ꞌikë ꞌunánkatsi kiax. Ñukákëxunbi ka Nukën ꞌIbun kakëxa Saúl ka ënu ꞌiaxa, ꞌaínbi ka anu chupa ꞌarukë ñu bukunkëmi unëaxa kixun ka kakëxa.

²³ Usakin kakëx ka raíri unix abákiani anua unë́kë anua Saúl bitsi kuanëakëxa. Kuaxun bitsínkin bëkëxa atu nëbëtsi nirakëtia iskëxbi ka Israel kaman a tupuma ꞌixun atu rapëskakë ꞌikë iskankëxa.

²⁴ Usa ꞌikëa iskaniabi ka Samuelnën atu ñukákin kamabi kakëxa: —¿Nukën ꞌIbun mitsun ꞌapu ꞌinun kaískë uni a kaina iskanin? ¡Ënë unisaribi israel uni achúshi ka ꞌaíma ꞌikën! ¡Axëshi ka nun ꞌapu ꞌiti ꞌikën! Kixun ka israel unibunën kakëxa.

²⁵ Usakin kakëxun ka Samuelnën anuxun ax kikësaibi ꞌiti Nukën ꞌIbun banakama a unikama ñuixuankëxa, ꞌimainun ka usakin ñuixuntankëxun achúshi kirikanu kuënëoxun anuxun Israel kaman Dios rabikë a mëu mëníokin nankëxa. Usakin ꞌaxuan Samuelnën anuaxa ukë anu kuantanun kakëx ka Israel kama anua ꞌikë ꞌain xubunubi rikiankëxa.

²⁶ Atux kuantamainun ka Saúlnëxribi aín xubunu kuani, Guibeá ëmanu kuankëxa, kuankëbëtan ka Diosan Israel uni aín sinan kushibu raíri abë kuankian uantanun kixun sinánmiakëxa.

²⁷ ꞌAínbi ka Israel uni aín patsan axa ñu upí kuëënkëma ax ami ꞌatimati banai ësai kikankëxa: —“¿Ënëx kara an nu ië́miti a ꞌik? Ësai kanankin a timai ka ax ka nun ꞌapu ꞌikë kisama tankankëxa; usai kikaniabi ka Saúlnën atu kuakëmasa okëxa.