1 Samuel 1 - Kashibo-Kakataibo Biblia

Diosan ꞌamikëxun Anan achúshiokin tuá ñuikë bana

¹ Anua Efraínën me aín, bashi ꞌikë Ramá kakë anu ka achúshi uni Suf kakë aín aintsi tsóa ax ka Elcaná kakë ꞌiakëxa. Ax ka Jeroham aín bëchikë ꞌianan Elihú ain xuta ꞌiakëxa. ꞌImainun ka ain xuta itsi Tohu kakë, Sufnën bëchikë ax Efraínën aintsi ꞌiakëxa.

² Elcaná ax ka rabë́ xanuñu ꞌiakëxa. Bëtsíxa Ana kakin anëkë ꞌimainun ka bëtsiribi Peniná kakin anëkë ꞌiakëxa. Usa ꞌain ka Peniná kakë an tuamainun Ana kakë ax tuakëma xanu ꞌiakëxa.

³ Usa ꞌain ka kamabi baritia ꞌikëbë Elcaná ax aín ëmanuxun rabianan Nukën ꞌIbu kamabi kushiñu a Silónuxun ñuina xaroxuni chikíakëxa. Elí kakë sacerdote ain bakë bëchikë rabë́ Hofní ꞌimainun Finees kakin anëkë ꞌiakëxa, usa ꞌain ka a rabëtaxbi sacerdoteribi ꞌiakëxa.

⁴ Usa ꞌain ka uínsaran kara ñuina xaroti ꞌia anun Elcaná an ñuina nami anbia ꞌanun, aín xanu Peniná ꞌimainun aín bakë bëchikëkama ꞌinánkëxa,

⁵ ꞌaínbi ka Ana a ira, nami ꞌitsaira an nuibakin ꞌinánkëxa, Nukën ꞌIbun ax tuáñu ꞌiti kuëënxunkë ꞌikëmabi.

⁶ Usokin ꞌakëbë ka Peniná ami ꞌitsaira nishakëxa, nishi ka a istisama tani Nukën ꞌIbun a tuánun ꞌimikëbëma ami kuaiakëxa.

⁷ Kamabi baritia anuxun Nukën ꞌIbu rabiti xubunu kuankëtibi ka Peniná ami nishakëxa; usaía ami nishkëxun ꞌunankin ka Anan masá nuituti inkin piisama tankëxa.

⁸ Usai ꞌia iskin ka aín bënë Elcanánën kakëxa: Ana, ¿uisa kupín kaina inin? ¿uisa kupín kaina masá nuitukin piisamatanin? ¿ꞌËx karana mapai rabë́ bakë tuá bëbu kamasamaira minan ꞌain?

⁹ Bëtsi nëtën ka Silónu kuanx, piíkin sënë́ontankëx Ana niruakëxa. Anu ka sacerdote Elí kakë ax anu tsóti ꞌakënu anuxun Nukën ꞌIbu rabiti xubu xëkuë anun atsínti ꞌurama tsókë ꞌiakëxa.

¹⁰ Usa ꞌain ka Ana ꞌatima okin sinani nishi iankëxa, ini ka Nukën ꞌIbubë banakëxa,

¹¹ banakin ka ësokin kakëxa: Min asérabi ꞌëx tëmëraia ꞌunánkin kamina an mi ñu ꞌaxunkë xanu ꞌikë ꞌëmi sinanakin, achúshi tuá ꞌë ꞌinánti ꞌain, ꞌinánkëxun kana kanikia an mi ñu ꞌaxúnun ꞌunánmiti ꞌain, ꞌimainun kana ꞌunántiokin aín bu tëatima ꞌain.

¹² Usa ꞌain ka Anan Nukën ꞌIbu basipain ñukatia, Elínën aín kuëbí isakëxa;

¹³ ꞌaínbi ka aín sinanëinshi ñukákëxa. Usakin ñukatia ka aín bana kuama ꞌikën; kuakëxumabi ka aín kuëbishi shaikakëxa. Shaíkaia iskin ka Elínën ñu paë xëax sapi ka paëanxa kixun sinánkëxa,

¹⁴ sinánkin ka kakëxa: —¿Uínsaran kaina min paë́nkë ënti ꞌain? ¡Uvas baka paëokin ꞌakë ꞌuran xëaxuma ka at!

¹⁵ Kakëxunbi ka Anan kakëxa: —Usama ka ꞌën kana uvas baka paëokë ꞌanan uisa ñubi paë ꞌitánun ꞌakëbi xëakëma ꞌain, ꞌaínbi kana ꞌitsaira masá nuituti paëanan Nukën ꞌIbun ismainunbi tëmërain.

¹⁶ Usa ꞌain kamina min ꞌëx kana bëtsi xanusa ꞌai kixun sinántima ꞌain, ꞌën kana kamabi nëtën Dios ñukatin, ꞌimainun kana ꞌitsaira ñu sinani masá nuituti tëmërain.

¹⁷ Kixun kakëxun ka —chuámarua kamina kuanti ꞌain —kixun Elínën kakëxa—, ꞌimainun ka Israelkaman Diosan ka min ñukákësabi okin mi ꞌinánti ꞌikë kixun kakëxa.

¹⁸ Kakëxun ka asábi ka kixun Anan kakëxa: —Usakin kabiani ka Ana anúan ukë anunbi kuankëxa, kuanxun ka piakëxa, usai ka uínsaranbi masá nuitutëkëntimoi ꞌiakëxa.

¹⁹ Usaia ꞌión pëkarakëma ꞌaínshi nirutankëxun Nukën ꞌIbu rabibiani ka anuaxa ukë Ramá kakë ëmanu ꞌikë aín xubu anubi kuantëkëankëxa. Kuanx ka anuax Elcaná aín xanu Anabë ꞌiakëxa, ꞌikë ꞌunánxun ka Nukën ꞌIbuan an ñukákin kakësabiokin ꞌaxuankëxa.

²⁰ Usokëx ka Ana tutankëx anun bakënti nëtë ꞌikëbë bëbu tuá achúshi bakëankëxa, bakënxun ka Samuel kakin Nukën ꞌIbun ꞌinánkë kupín anëakëxa.

²¹ Anëan ka Elcaná aín aintsikamabëbi Silónu kuankëxa, kuanxun ka anuxun ax kikësabiokin ꞌakin, rëtankëxun ꞌaímai këñutanun baritia tibi ꞌakësabi okin ñuina xaroi kuankëxa;

²² usai kuankëbëbi ax kuankinma ka Anan aín bënë kakëxa: —ꞌËx kana ꞌën tuakënpan xuma ëntamainun kuanima. Usa ꞌain kana xuma ꞌakë ënia kuni Nukën ꞌIbu ꞌën kakësabiokin ꞌaxunia anubi ꞌinun ëni kuanti ꞌain.

²³ Kakëxunbi ka aín bënë Elcanánën kakëxa: —Uisokin ꞌati kaina sinanin usakin kamina ꞌati aín. Usa ꞌain kamina an pain xuma ëntamainun bërúti ꞌain. ꞌËx kana kuëënin Nukën ꞌIbun ax kikësabiokin ꞌanan mi ꞌakinti. Ësokian kakëx kuanima bërúxun ka ꞌain tuákën xuma ꞌakë ëntanun ꞌikiankëxa.

²⁴ ꞌIkinkëxua ꞌain xuma ꞌakë ënia ka chukúmara ꞌikëishi anbi anuxun Nukën ꞌIbu rabiti xubu Silónu ꞌikë anu buánkëxa. Buánkin ka vaca bakë rabë́ ꞌimainun achúshi këñun veintidos litro trigo bimi ꞌimainun achúshi ñuina xakánu ꞌarukë uvas bakaribi buánkëxa.

²⁵ Buánxun ka achúshi vaca bakë buánkë a ꞌaímai këñutanun xaronan ꞌain tuá buánkë a Elí ꞌurama an isnun buánkëxa.

²⁶ Buánxun ka Anan kakëxa: —ꞌËn ꞌIbu ꞌë kamina uisabi otima ꞌain, mix kamina bërí ënu ꞌain, ꞌëx kana an mi rapasunuxun Nukën ꞌIbu ñukákë xanu a ꞌain.

²⁷ ꞌËn kana Nukën ꞌIbu ënë tuá ꞌë ꞌinánun ñukan, usa aín ka ꞌë ꞌinánxa.

²⁸ Usa ꞌixun kana ꞌën Nukën ꞌIbu Diosan ñu mëëti ꞌanun ꞌimian, usa ꞌain ka ainan ꞌiti ꞌikën. Ësakin kakëx ka Elí ꞌain bëmánanën me tikai tsóbukin Dios rabiakëxa.