1 Reyes 9 - Kashibo-Kakataibo Biblia

Diosan Salomónbëtan achúshi ñu ꞌati mënió ñuikë bana

¹ Anuxun Dios rabiti xubu ꞌamianan, anu ꞌapu ꞌiti xubu ꞌamikin sënëomixuan kamabi an ꞌaisatankë ñukama ꞌakin këñumian ka

² rabë́ oí mërati Gabaón ëmanuaxa bëráma ꞌikësaribiti Salomón mi Nukën ꞌIbu amiribishi mëratëkëankëxa,

³ ami mërakin ka ësokin kakëxa: ꞌËn kana ꞌëbë banakinmi ꞌë kakëxun kuan, ꞌimainun kana anuxun ꞌë rabiti min ꞌamikë anu ꞌëx mitsubë ꞌiti ꞌain. Anu mitsubë ꞌixun kana uisaxunbi xënibua ꞌaínbi mi ëntima ꞌain.

⁴ Mix kamina bërí min papa David ꞌiásaribiti, ꞌën iskëx ñu ꞌatima ꞌati sinanima min nuitu upí ꞌixun, kamabi usaími ꞌinun ꞌën mi kakë bana kikësabi oi ꞌianan, ax kikësaibi oí ꞌiti banakama kikësabi oi ꞌëmi katamëtin,

⁵ usa ꞌain kana mi ꞌimainun min ꞌaintsi ꞌibukamaxa Israel menu ꞌapu ꞌinun ꞌimiti ꞌain, ꞌën min papa David kásabiokin, uínsarabi kana Israel unibunëxa atun ꞌapuñuma ꞌinun aín rëbúnki achúshi ꞌapu ꞌimiti ëntima ꞌai kixun kana kakën.

⁶ Usa ꞌaínbi kana mix ꞌikëbëma min rëbúnkikama ꞌikëbëa bëtsi unikamaribi ꞌë rabiti ëni ꞌëmi manúkin a tanti banakama ꞌimainun ax kikësabi oi ꞌiti banakama a ñuikin usakin ꞌanun ꞌën atu kakë usakinbi ꞌakinma, ami katamëkin bëtsi ñukama rabia kana,

⁷ ꞌën atu ꞌinan me anua Israelkama chikínti ꞌain, chikíanan anuxun ꞌë rabiti xubu ꞌamikë a ënun ëmikëbë ka Israel kamami bëtsi menu ꞌikë unikama kuaiti ꞌikën.

⁸ Usakin ꞌanun atu ꞌamianan kana anuxun ꞌë rabiti xubumi ꞌamikë ënëribi rurukubuti aín maxákama tukibuti aín i kamaribi chánkibuaxa bukunun ꞌimiti ꞌain, usakin ꞌën ꞌimikë ꞌain ka a ꞌurama kuainkin isi ratuti ami uni kuaiti ꞌikën, kuai ka ñukákanani kananti ꞌikën uisai ꞌiaira kara Diosan ënë me ësonan anuxun a rabiti xubu ënë ësokin ꞌakëxa.

⁹ Kia kuakin ka uisa unínbi kara bëtsi kati ꞌikën, aín chaitiokëkama Egipto menua chikían ꞌixunbia ami katamëti ënkin bëtsi dios rabia ami manúkëxun ka aín Dios ꞌixunbi usakin Israel unibu ꞌaxa kixun kanan ka usa ꞌain ka ꞌitsaira tëmëramianan ꞌaisamaira okin masá onan ꞌatimoxa kixun bëtsi kati ꞌikën.