1 Reyes 8 - Kashibo-Kakataibo Biblia

Anua Diosan bana ꞌarukë bunántisa okin ꞌakë a anuxun Dios rabiti xubunu buánkan ñuikë bana

¹ Usa ꞌain ka Salomónnën anua ꞌikë Jerusalén ëmanua timë́kani unun kixun Israel unikaman kushibu kamiakëxa, kamianan ka kamabi ñakánu ꞌikë aín ꞌapukama ꞌimainun ain aintsikaman uisakinbi ax ka usa ꞌikë kixun kakëma Israelkama atúan bunántisa okin ꞌakë kurin ratakakakë anua Diosan bana kuënëo a Sión kakë ëma anua Davidtan ëma kakë anu takuti ꞌakini unun kamiakëxa.

² Anúan ꞌaisamaira uni mapanati okin atun ꞌuta ꞌax ꞌikanti fiesta nëtë ꞌiti mapai achúshi ꞌimainun rabë́ ꞌuxë këñuti kuankëbë ka ꞌapu Salomónbë kamabi Israel aín kushikama timëakëxa.

³ Usaia kamabi Israel kushikamax anu timë́ti bëban ka Sacerdote unikaman bunántisa okin ꞌakë kurin ratakakakë anua Diosan banakama kuënëoxun nan a bianan,

⁴ xubusa okían anuax Diosbë mërananti ꞌakë a mëu bukúnkë ñukama upíirabu akama këñunbi, Sacerdote ꞌimainun Levitas unikama raírinën buánkëxa.

⁵ Usa ꞌain ka ꞌapu Salomón ꞌimainun kamabi Israelkama abëa timë́kë akaman, bunántisa okin ꞌakë kurin ratakakakë a ꞌurama oveja ꞌimainun vaca aín bënëkama unin tupuntisamaira ꞌinun rinbëtsinkë akama Dios xaroxuankëxa.

⁶ Usakin ꞌatankëxun ka Sacerdote unikaman bunántisa okin ꞌakë kurin ratakakakë anua Diosan bana kuënëo mëníokin nan a buántankëxun anuxun Dios rabiti xubua ꞌakë a ꞌukëmëu, aín kata upíira anua querubin tankin ꞌakë aín pëchi tëmú anu nankankëxa,

⁷ aín pëchi rabë́ an ka bunántisa okin ꞌakë kurin ratakakakë a mapuanan anun tuinbiankin buánti ꞌakë tsatisa akëñunbi mapukë ꞌiakëxa.

⁸ ꞌAínbi ka anun tuínxun buánti ꞌakë tsatisa ax aín rarasama chaxkë́ira aín rëbu ꞌiakëxa, usa ꞌikë ka upí kakë anuxunbi unin aín kata upíira anu nankë istisa ꞌiakëxa, ꞌaínbi ka ëmánxun unin istisama ꞌiakëxa; usai kaisa anúan ënë kirika kuënëoti nëtë sënë́ntamainun ꞌiakëxa.

⁹ Usa ꞌain ka bunántisa okin ꞌakë kurin ratakakakë anu raíri ñukama nankan a ꞌaíma ꞌimainun maxax pará rabë́ anua usai Israel unikama Egipto menuax chikíkiani kuani ꞌitia Diosan kuënëomikëxun ꞌaxun Moisésnën Horeb kakë bashi anuxun nan ashi anu ꞌiakëxa.

¹⁰ Usokin nantankëxa sacerdotekamax anuxun Dios rabiti xubu mëua ꞌikë upíira kakë anuax chikíkëbëishi ka Diosan ꞌimikëx kuin këxtuira ꞌibúkin mapuakëxa,

¹¹ usakian kuinan mapukë ꞌain ka sacerdotekaman anuxun Dios rabitisatankinbi ꞌama ꞌikën, Diosan kushian anuxun a rabiti xubu nuturukë ꞌain.

Salomónnën anuxun aín bana ñuiti xubu këñúkë ꞌain Dios ñuká ñuikë bana

¹² Usa ꞌain ka Salomón ësakin kakëxa: Mix Dios ꞌaish kamina ësai kiakën, ꞌëx kana bë́anbëankibukënu ꞌiakën.

¹³ ꞌAínbi kana ꞌën achúshi xubu anumi ꞌiti mi ꞌamixuan anu kamina nëtë xënibua ꞌaínbi ꞌiti ꞌain.

¹⁴ Ësai kitankëx ka ꞌapu Salomón aua kamabi Israel unikama sëtë́kë, atumi bësuakëti nirakëkin upíokin atu sinánxuni

¹⁵ ësai kiakëxa: Israel unikaman Dios ax ka upíokin rabikë ꞌiti ꞌikën, an ka ꞌën papa David kásabiokin ꞌaxa, usa ꞌaish ka ësai kiakëxa:

¹⁶ A nëtën ꞌën Israel unikama Egipto menua chikínbëtsinkin bëkin kana uinu ꞌikë Israel ñaká kamanuabi an anuxun ꞌë rabiti xubu ꞌaxúnun kixun kaisama ꞌain. ꞌAínbi kana David ashi ax ꞌapu atsíntankëxuan Israel ꞌën unikama ꞌakinun kaisakën.

¹⁷ Usa ꞌain ka ꞌën papa David axëshi anuxun Israel unibu nun Dios rabiti xubu ꞌati sinánñu ꞌiakëxa.

¹⁸ Usa uni ꞌikë ꞌunánxun ka Diosan ꞌën papa David kakëxa: Anuxun ꞌë rabiti xubu ꞌakin kamina upíokin ꞌati ꞌain;

¹⁹ ꞌaínbi kamina min a xubu ꞌatima ꞌain, min bakë bëchikë achúshi an ka a xubu ꞌë ꞌaxúnti ꞌikën.

²⁰ Usa ꞌain ka Diosan usaía ënë ñukama ax kiásabi oi ꞌinun ꞌimiaxa. Usa ꞌain kana ꞌën papa Davidtan ꞌama ꞌikëbi anuxun Dios rabiti achúshi xubu an Israel unibu ꞌikë nu ꞌakian Dios ꞌaxuanan bërí Israel unikaman ꞌapu ꞌëx ꞌain.

²¹ ꞌAnan kana a xubu mëu anu bunántisa okían ꞌakë kurin ratakakakë anua Diosan banakama ꞌikë anu nantiribi ꞌamian ax ka Diosan nun chaitiokëkama Egipto menua chikínbëtsinkin usaía atux ꞌiti banakama ꞌinan anu nankë a ꞌikën.

²² Usokin atu katankëx ka Salomón anuxun Dios ñuina xaroxunti ꞌakë a bëmánon, kamabi Israelkaman ismainunbi nirakëti ka manámi aín mëkën rabë́ buarui mëshpakin,

²³ munuma banakin Dios ñukákëxa: “Israel unikama nun Dios: naínu ꞌianan ka menubi min ꞌakësaribi okían an ñu ꞌakë dios achúshirabi ꞌaíma ꞌikën, usa ꞌixun kamina mix kiásabiokin an min bana asérabi kuëënkin ꞌakë akamaishi ꞌakinin;

²⁴ usa ꞌixun kamina bërí min uni ꞌën papa David mi ꞌaxunuxun kásabiokin ꞌan, an ka añu ꞌanun kaina kai a mi ꞌaxuankëxa, min achúshi ñu abëtan mëniosabi okin ꞌimainun kamina kakën achúshi min bëchikënën ka anuxun ꞌë rabiti xubu ꞌati ꞌikë kixun ká nëtë a bërí sënë́anxa.

²⁵ Usa ꞌain kamina mix Israelkaman Dios ꞌixun, minmi ꞌën papa David min uni ꞌikë kásabiokin asérabi: nun rëbúnkikamaxa min ꞌimikëx an ꞌakinti ꞌapuñua Israelkamax ꞌinun ꞌimiti ꞌain, usakin ꞌimikëx ka ain bëchikëkamax ain niti bërúankati ꞌikën, ain papan ain niti bëruansaribi okin.

²⁶ Usa ꞌain kamina, mix Israelkaman Dios ꞌaíshmi kia bana axa ꞌën papa David min uni ami, kásabi oia ꞌinun asérabi ꞌimiti ꞌain.

²⁷ ꞌAínbi kara ¿asérabi Dios ënë menu tsóti ꞌik? Naíkamë ꞌëo axbi ka chaiira ꞌaíshi mibë sënë́nma ꞌikën, ¡usa ꞌaínbi kana ꞌën unikama anuxun mi rabiti achúshi xubu ꞌaxunun ꞌamian!

²⁸ Usa ꞌain kamina akama këñunbi mi ñukákëxun kuakin; mix Nun Dios ꞌixun mi ñukamainun bërí ꞌën bana kuakin min uni ꞌikë ꞌë ꞌakinti ꞌain.

²⁹ Min kamina nëtën ꞌimainun imë́ribi uisa ñu kara anuxun mi rabiti xubu ënuax ꞌia akamabi isti ꞌain, mix kamina anu ismina ꞌiti ꞌai kiax kian. Ënuxun ꞌëx min uni ꞌixun mi ñukamainun kamina ꞌën bana kuati ꞌain.

³⁰ Usa ꞌain kamina ꞌën ñukákëxun kuanan min unikama Israel atúnribi anuxun mi rabiti xubu ënëmia iskin mi ñukákëxun atun bana kuati ꞌain. Kuakin kamina anumi ꞌikë naíkamë ꞌëo anuxunbi, ꞌatima ñu ꞌaínu ꞌuchakë akama nu mëníoxunti ꞌain.

³¹ Uin kara aín ꞌunánkë unimi ꞌatimati ami banaxunbi anuxun mi ñuina xaroxunti ꞌakë ënuxun mëníokatsi kixun sinánxun min xubu ꞌikë ënu aia,

³² a kamina naíkamë ꞌëo anumi ꞌikë anuxunbi istankëxun min uisakin kara ꞌati ꞌikë a mëníonun ꞌamiti ꞌain usokin kamina; min uni ꞌikëbi ꞌati ꞌain. Uin pain kara bëtsi ꞌaisama oxa a ꞌatimokin, ꞌaxa usai ꞌikë kupí an ꞌakë ñu istankëxun, ꞌanan kamina an bëtsi ꞌatima okëma uni ashi uisabi okima ënti ꞌain.

³³ Uínsaran kara min uni Israelkama mimi ꞌuchaia, anúan min usakin ꞌanun ꞌamikëxun axa ami nishkë unikaman abë ꞌakanankin ꞌatankëxun ñatanbiankin buánkëx tëmërakian, amiribishi mimi sinanakin mi rabianan ñukákin anuxun mi rabiti ꞌakë xubu ënëmi sinania,

³⁴ kuakin kamina anumi ꞌikë naíkamë ꞌëo anuxunbi atúxa ꞌuchakëkama tërënxunti ꞌain, usokin ꞌaxun kamina anu tsónumi nun chaitiokëkama ꞌinan me ënubi amiribishi bëtëkënti ꞌain.

³⁵ Uínsaran kara min uni Israelkamax mimi ꞌuchaia, iskin sapikamina ꞌuí ꞌibúkëbëma me ëskinun ꞌimiti ꞌain, usakin ꞌimikëbëtanma ka anuxun mi rabiti xubu ënë mi sinánkin amiribishi mi ñukánan mi barikin atux ꞌuchakëkama chikinamikin ꞌanë rabiti ꞌikën,

³⁶ usokin ꞌakëxun atun bana kuakin kamina min kaisa Israel kama atúxa mimi ꞌuchakë a anumi ꞌikë naíkamë ꞌëo anuxunbi kuakin atun ꞌucha tërënxunti ꞌain, usakin ꞌaxun kamina añu ꞌai kara atux tsóti ꞌikë kixun ꞌunámianan, uisai kara bukukanti ꞌikë kixunribi ꞌunánmiti ꞌain. Usokin ꞌaxun kamina amiribishi ënë menu ꞌuí ꞌibumitëkënti ꞌain, atun papakama kia bana ꞌaia atun bakë bëchikë min unikama atux tsónun.

³⁷ Uínsaran kara min uni Israelkamax mimi ꞌuchaia a ꞌunánkin atu ꞌatimokin a piti ñu ꞌaíma ꞌaia panáni ꞌianan barin xarokëx nikama chushimainun, ꞌaisama ꞌinsín ꞌimainun an ñu ꞌapákë këñuti champu unimianan ꞌaisamaira ꞌixuan xënan ñu ꞌapákëkama xarokin chushiminun ꞌimianan; uínsaran kara axa numi nishkë unikaman nun ëmakama bëarabuinxun nu ꞌaisatania, ꞌianan kara bëtsi ñu kamanribi nu ꞌamainun ꞌinsin kushinribi nukama këñuti ꞌikën,

^38-39 usai ñu ꞌikëbë tëmërakin Israel unikaman Diosan ka nux ami ꞌuchakë ꞌikë ësokin nu tëmëramia kixun sinánkin manámi mëshpakin anuxun mi rabiti xubu au bësui nixun ñukákëxun kuankin kamina. Anumi ꞌikë naíkamë ꞌëo anuxunbi atun bana kuakin; uisa ñu ꞌatima kara ꞌakanxa kixun min ꞌunánkin asérabi mimi katamëkian mi ñuixunkëxun atun ꞌakë ñukama mëníoxunti ꞌain, minshi kamina aín nuitunëan unin sinánkë a ꞌunanin.

⁴⁰ Usokinmi ꞌakëxun ka añu ꞌanun kaina atu kai usokinbi ami nun chaitiokëkama ꞌinan me ënu pain tsókë ꞌixun min kakësabiokin ꞌakánti ꞌikën.

⁴¹ Usaribitia Israel unibu nukën ëmanu tsókëma atuxribi, min kamina kushiira ꞌixun ñu ꞌai kixun ñuikania kuabëtsini ꞌura men tsókë unikamax utankëxun,

⁴² anuxun mi rabiti ꞌakë xubu ënë kupin mi ñukákëxun kamina, min anë chaiira a ꞌimainun min kushi a ñui kia kuati ꞌain.

⁴³ Usa ꞌain kamina anumi ꞌikë naíkamë ꞌëo anuxunbi kuakin, añu kara mi ñukákania akamabi ꞌakinti ꞌain, usakinmi ꞌaia kuakin ka bëtsi bëtsi menu tsókë unikamanribi min uni Israelkaman ꞌakësaribi okin mi ꞌaxunkin, ꞌën mi ꞌaxunkë xubu ënëx ka anuxun asérabi a rabiti ꞌakë ꞌikë kixun atúnribi ꞌunánti ꞌikën.

⁴⁴ Uínsaran kara min uni Israelkamax axa atumi nishkë unikamabë ꞌakananux min xukëx uinu kaina xuti anu kuania, anuxua mibë banakin min nu kaisuan ëma ënëmiokin isanan ꞌën unikama anuxun mi rabiti ꞌamia xubu,

⁴⁵ amiokin iskin ñukákëxun kamina naínuxunbi atun bana kuakin añu kara mi ñukatia a ꞌakianan, uisai kara ꞌia anuabi ꞌakinti ꞌain.

⁴⁶ ꞌImainun kamina kamabi menu ꞌikë unix ꞌikësaribitia mimi ꞌuchaia atumi xuamati nishkin axa atubë nishanankë unikaman ñusma oxun ꞌatankëxua raíri bitankëxun atux anu ꞌikë ëma ꞌura buananbi urairama ëmanu buánkëxuan,

⁴⁷ anua buankankë me anuax tëmërakin mimi sinanakin ꞌakinun kixun mi ꞌaisama ñu ꞌai kananuna ami ꞌucha kixun ñukákin kakëxun kamina,

⁴⁸ asérabi amiribishi atun Dios ꞌikë mi kuëënkin këmëkinma mimi sinanakian, anua ami nishkë unikaman ñatanbiankin atu buánkë me anuxun mi ñukákin, nun chaitiokë kamami ꞌinan me ënëmi sinánkin ꞌanan minbimi atu ꞌinan ëma ënë ꞌimainun anuxun mi rabiti xubu ꞌamikë ënëmi okin iskin ñukákëxun kamina,

⁴⁹ atun bana kuakin anumi ꞌikë naíkamë ꞌëo anuxunbi atuan mi ñukákësabiokin ꞌakinti ꞌain.

⁵⁰ ꞌAkianan kamina min kaisa unikama atúxa mimi ꞌuchakë ꞌikëbi mëníoxunkin bana kuakëma unibu ꞌikëbi atux ꞌuchakëkama tërënxunti ꞌain. Usakin ꞌanan kamina axa atumi nishkë unikama atúan nuibakin ꞌakinun sinánmiti ꞌain.

⁵¹ A unikamax ka min kaisa unibu ꞌaish min unibi ꞌikën; minbi kamina Egipto menuaxa tsi ënxaira anu ñu xuiti ꞌakë anuax ꞌikësaira ꞌinua ñu mëi tëmëraiabi atu chikiankën.

⁵² Usa ꞌain kamina min unikaman ñukákëxun kuakin min kaisa Israel unikama munuma banakin mi ñukákëxun kuati ꞌain. ¡Mix Dios ꞌixun kamina nun bana kuati ꞌain!

⁵³ Minbi kamina atun Dios ꞌixun ꞌakinuxun min kaískë unia ꞌikanun bëtsi bëtsi menu ꞌikë ëmakamanua minanbi ꞌinun atu bikin, min uni Moisés kai nun chaitiokëkama Egipto menua chikíntankëx kiakën.”

⁵⁴ Ësai abë banakin Dios ñukátankëxun sënën oin ka Salomón aín rabuxunën menu rantinpuruni tsóbuxun anuxun ñuina xarotia ꞌakë bëmánon auxun aín mëkën rabë́ manámi oi mëshpati tsóxun ñukákëxa,

⁵⁵ usokin ꞌatankëx nirukin ka kamabi Israel unikama timë́kë a upíokin sinánxuni munuma banai ësai kiakëxa:

⁵⁶ ¡Nukën ꞌIbu Dios ax ka upíokin rabikë ꞌiti ꞌikën, an ka aín unibu Israelkama añu ꞌakinux kara kiakëxa akamabi asérabi upiti bukunun ꞌakiankëxa! Usa ꞌixun ka an ꞌakatsi kia ñukama achirabi ꞌaíma ꞌikima kamabi ñu aín uni Moisés kásabiokin ꞌakëxa.

⁵⁷ Usa ꞌain ka Nukën ꞌIbu Dios bërí nubëribi ꞌiti ꞌikën, nun chaitiokëkamabë ꞌiásaribiti. Usa ꞌixun ka nukama ënkinma ꞌakinti ꞌikën,

⁵⁸ ꞌakianan ka asérabi nux ami sinánkin kamabi ñu ꞌanun nuribi sinámianan ax kikësabi oi ꞌiti bana ꞌimainun a tanti banakama nun chaitiokëkama ꞌinan aribi nun ꞌunánun nuribi sinánmiti ꞌikën.

⁵⁹ Usa ꞌain kana ꞌën kuëënin, Nukën ꞌIbu Diosan ka ñantan ꞌimainunbi nëtënbi ꞌën ñukákë ñukama sinánkin añu karanuna kuëëni akamabi aín unibu Israel ꞌixun nun rabikëxun añu kara nëtë kamabi ꞌinántisa tania a nu ꞌinánti ꞌikën,

⁶⁰ usakin nu ꞌakinia ka bëtsi menu tsókë unikaman Israel unikama an ꞌakinkë Dios usaribi bëtsi Dios ka ꞌaíma ꞌikë kixun ꞌunánti ꞌikën.

⁶¹ Usa ꞌain kamina mitsun këmëkinma Nukën ꞌIbu Diosan bana kikësabi oi ꞌikin a tanti banakama ꞌimainun ax kikësabi oi ꞌiti banami bërí ꞌakankësa ësabiokin ꞌakánti ꞌain.

⁶² Ësokin atu kai sënë́ntankëxun ka ꞌapu Salomónnën kamabi Israel unikama timë́kë akamabëtan ñuina rëtankëxun Dios xaroxuankëxa.

⁶³ Usakin Dios ñuina xaroxunkin ka Salomónnën veintidós mil vaca bënë ꞌimainun ciento veinte mil ovejakama atun ꞌucha kupín xarokëxa, usakin ꞌakin ka ꞌapu Salomón ꞌimainun kamabi Israelkaman anuxun Dios rabiti xubu ꞌakë a upí ꞌinun mëníokëxa.

⁶⁴ A nëtënbi ka ꞌapu Salomónnën anuxun Dios rabiti xubu ꞌukëmëua ꞌikë me mëníonx ënëx ka anuxun Dios rabiti xubu ꞌikë kian timë́kamë ꞌëoxun pikankëxa, usokin ꞌatankëxun ka anuxun Dios ñuinakama xaroxuanan, a nanxuinshiti ñu akamaribi ꞌakëxa, ꞌimainun ka atun ꞌuchakama kupían xarokë ñuina aín xëni akamaribi xëkuë bëmánon anuxun ñuina xaroti manë ꞌakë axa chukúma ꞌain, kamabi a ñukama anuxun xaroisama ꞌaish sënë́nkëbëtama, ñuina xaroti nankëkama ꞌimainun a nanxuinshiti ñukama ꞌianan atun ꞌucha kupí xarokian aín xëni bikë akama timë́xun xarokëxa.

⁶⁵ Usakin ka Salomónnën kamabi Israelkama axa anu timë́kamë ꞌëokë unikama ꞌimainun Hamat kakë ëmanuaxa rikuatsinkë ꞌianan, anua Egipto me sënënakëkë anuaxribia rikuatsimainun Israelkama anua ꞌikankë menuax uxun ꞌuta ꞌax ꞌiti fiesta anun Dios rabikin ꞌakankëxa, ꞌanan ka bëtsi fiestaribi anuxunbi mapai achúshi ꞌimainun rabë́ nëtë sënë́nmikin ꞌakankëxa, usakin a fiesta rabë́ ꞌakin ka catorce nëtë sënë́nmikin ꞌakankëxa.

⁶⁶ Usakin fiesta ónkë a pëkaran ka ꞌapu Salomónnën kamabi unikama atun ꞌikënu kuantanun kixun kakëxa, kakëx kuanuxun ka atúnribi kana kuani kixun kabiani atun ꞌikënu rikiani ꞌitsaira kuëëni Diosan aín uni David ꞌakianan anbia kaisa Israelkama ꞌakian akama sinani kuëënkiani kuankankëxa.