1 Reyes 5 - Kashibo-Kakataibo Biblia

Salomónnën ꞌapu Hiram Tiro ëmanu ꞌikë abëtan upitax tsónuxun mënio ñuikë bana

¹ Usa ꞌain ka Tiro ëmanu ꞌikë ꞌapu Hiram an bërámabi Salomónnën papa David a ꞌunánkë ꞌiakëxa. Usa ꞌixun ka Salomón ka Israel unikaman aín papa ꞌasaribiokin atun ꞌapu ꞌinun ꞌimiaxa kixun ñuikania kuakëxa, kuaxun ka aín unikama anu kuanxua Israel unikaman bërí anëkë ꞌapu istánun kixun xuakëxa.

² Xukë ka ësokian ꞌapu Hiram kaxuntanun kixun kamiakëxa.

³ Minbi kamina ꞌunan ꞌën papa Davidnëx ka axa ami nishkë unikamabëshi ꞌakanankin atumi mëkaxun anuxun Dios rabiti achúshi xubu ꞌaisatankinbi ꞌama ꞌikën. Usai ꞌiaka Diosanbi axa aminishkë unikama ꞌakian kupitanuma ꞌanun ꞌamiakëxa.

⁴ Usai ꞌikin ꞌaiama okin ka bërí nun Diosan nukamaxnu ꞌakananima axa nu ꞌurama tsókë unikamabë upitaxëshi bukunun ꞌimiaxa, usa ꞌain kananuna ax numi nishkin nu ꞌakatsikixun ubioti ꞌaíma ꞌain upitax bërí bukuin.

⁵ Usa ꞌain kana anuxun nun Dios rabiti xubu achúshi ꞌamiti sinan, an ka bërámabi ꞌën papa David ësokin kakëxa, min bakë bëchikë a ꞌën ꞌapu ꞌinun ꞌimiti an ka aín unikama anuxun ꞌë rabiti xubu achúshi ꞌanun ꞌamiti ꞌikën.

⁶ Usa ꞌain kamina min unikama Líbano menua ꞌikë kunxan upíirabu a ꞌë tëaxunun ꞌamiti ꞌain. Min ꞌamikëbëtan kana an ꞌë ñu mëëxunkë unikama ꞌaia atu ꞌakinun xuti ꞌain, usakin ꞌaia kana an mi ñu mëëxunkë unikamami kupíonun uiti kuríki kaina ꞌë ñukatin atibi mi ꞌinánti ꞌain, minbi kamina ꞌunan Israel unikaman ka uínbi i tëati ꞌunanima, Sidonio kakë ëmanu tsókë unikaman ꞌakësokin.

⁷ Usokian kakëx ka Tironuaxa ukë unikamax atun ëmanubi rikiankëxa, rikianxun ka Salomónnëa kamikë banakama ꞌapu Hiram ñuixuankëxa. Ñuixunkëxun kuati ka ꞌitsaira kuëëankëxa kuëëni ka, munuma banai kiakëxa: ¡Nukën ꞌIbu Dios ax ka bërí upíokin rabikë ꞌiti ꞌikën, an ka David aín bakë bëchikë achúshi ꞌinánkëxa, kanitankëxuan a tuakëx sinánñuira ꞌixun aín aintsikamabi ax ꞌapu ꞌixun ꞌakinun ꞌimiakëxa!

⁸ Usa ꞌain ka nëtë itsin Hiramnën amiribishi aín unikama Salomón kaxuntanun kixun xutëkëankëxa: Xukin ka ësokin kamiakëxa, minmi ꞌë kamikë banakama ka ꞌën unikaman ꞌë kaxa usa ꞌain kana añu ꞌaxúnti kaina kuëëni a mi ꞌaxúnti ka asábi ꞌikën, usa ꞌain kana min ñukákësabi okin kunxankama ꞌamianan pino kakë i akamaribi mi ꞌamixunti ꞌain.

⁹ An ꞌë ñu mëëxunkë unikaman ka Líbano kakë ni anuxun buánpaxun parúmpapa anu sënën mi i buánxun bukunxunti ꞌikën, anuxun kana tapusokin ꞌatankëxun tapukama a bakan buántanun xuti ꞌain xukëx kuabutia kamina ikama biti ꞌain, uinu sënën buánxunun kaina ꞌë kai anubia mi buánxunun kana ꞌamiti ꞌain. Anuxua tapankama a bakan buántanun xutia kamina kuabutia ikama a biti ꞌain. Min kamina axa ꞌën xubu chaiira anu ꞌikë unikaman pitishi ꞌinánkin anun ꞌë kupíoti ꞌain.

¹⁰ Usa ꞌain ka Hiramnën an ñukákësabi okin Salomón kunxan, pino kakë i akamabi aín unikama ꞌamixun ꞌinánkëxa,

¹¹ ꞌinánkëxun ka Salomónnënribi Hiram an ñukákësabi okin aín xubunu ꞌikë unikaman piti xuxuankëxa: cuatro millones cuatrocientos mil litro trigo ꞌimainun cuatro mil cuatrocientos litro olivo bimi ꞌakë xëni akama Salomónnën ꞌapu Hiram baritia tibi buámiakëxa.

¹² Usa ꞌain ka Diosan an kásabiokin Salomón, sinánñuira uni ꞌinun ꞌakiankëxa. Usakian ꞌimikë ꞌain ka Salomónnën ꞌapu Hirambë mënionankëxa usakin ꞌan ka unikamax ꞌakánanti sinanima upitax tsókankëxa.

¹³ Usa ꞌain ka ꞌapu Salomónnën kamabi Israel menu ꞌikë unikamax ka achúshi ñu mëëti ꞌati kamáxbi timë́kanti ꞌikë kixun bana piküakëxa, usokin ꞌan ka axa tëëti unikamax timëkëx treinta mil uni sënën ꞌiakëxa,

¹⁴ usokin timëxun ka Salomónnën Líbano menu xukin diez mil uni axa achúshi ꞌuxë ꞌimikin ñumënun xuakëxa, xukëx kuanxa tëia ka ax pain kuankë unikama a ain xubunu bëanan axa kuankëma kama aribi achúshi ꞌuxë ꞌimia atúxribi tëëkanun kixun xuakëxa. Usokin xukëx ka ñu mëëi a unikamax achúshi ꞌuxë ꞌimi Líbano menu ꞌikankëxa ꞌimainun ka tanti uax atux xubunu rabë́ ꞌuxë ꞌimishi ꞌiakëxa. An atu bërúanxun ñu mëëmiti ka Adoniram kakë Israel uni achúshi anëkë ꞌiakëxa.

¹⁵ ꞌImainun ka anua tëkankë ni anu raíri unikamax ciento cincuenta mil an Salomón ñu mëëxunkëkama ax ꞌiakëxa ochenta mil ka uni an maxax upíokin tukapakin ramëniokëkama ꞌiakëxa, ꞌimainun ka setenta mil unikama axribi an raíri ñukama papiti nankë ꞌiakëxa,

¹⁶ ꞌimainun ka an tëia unikama bërúantia anëkë tres mil trescientos uniñuribi Salomón ꞌiakëxa.

¹⁷ Usa ꞌain ka ꞌapu Salomónnën aín unikaman maxax chaiirabu bianan kupíikëira akamaishia anuxun Dios rabiti xubu ꞌakin ami birukin ꞌati a ꞌimainun, maxax tukapakin mëníokë akama binun kixun kakëxa.

¹⁸ Usa ꞌain ka Salomón an ñu mëëxunkë an xubu ꞌati ꞌunáinra unikamañu ꞌimainun ka an Hiram ñu mëëxunkë unikama ꞌimainun. Guebal kakë ëmanua tsókë unikamanribi i bianan maxaxribi tukapakin ramëniokin anuxun Dios rabiti xubu ꞌati bitsia atu ꞌakiankëxa.