1 Reyes 3 - Kashibo-Kakataibo Biblia

Salomón faraónën ꞌini bëchikë xanubë biranan ñuikë bana

¹ Aín ꞌini bëchikë xanubë birakatankëx ka Egipto menu ꞌikë ꞌapu faraónbë banai kananuna ꞌakananima nuibanani aintsi onantankëx upitax tsóti ꞌai kixun katankëxun, Salomónnën aín xanu anu pain aín papa David ꞌapu ꞌaish ꞌia ëma anu ꞌikinkin uankëxa, uanxun ka anu ꞌapu ꞌiti xubu ꞌimainun anuxun Dios rabiti xubu ꞌanan Jerusalén ëmaribi buinarakin kënëkin sënë́onun ꞌamiakëxa.

² Usakin ꞌakinbi anuxun Dios rabiti xubu sënëonkëma ꞌain ka anuxuan bëtsi dios rabikin ñuina axun xaroxuan aín bashi anuxunbi Dios rabikin, unikaman ñuina xaroxuankëxa.

Salomónnën kamabi ñu ꞌaia kushionun kixun Dios ñuká ñuikë bana

³ Usa ꞌain ka Salomónnën Dios nuibati ami katamëkin ax kikësabi oi ꞌiti aín banakama tankin, aín papa Davidtan ꞌasaribiokin Diosan kakësabiokin ꞌakëxa, ꞌakin ka anbi bashinu anuxun xaroti ꞌatankëxun ñuina rëtankëxun ꞌaímai këñuti xarátia sanutanun, ꞌanan sanuira rokëñun xaroxuankëxa,

⁴ usakin ꞌanan ka Gabaón kakë ëma anuribi ñuina rëtankëxun anuxun xaroxuni kuankëxa, anu ka anuxuinra ñuina xaroti manan upíokin ꞌakë ꞌiakëxa. Usa ꞌain ka manan kuaxun anuxun ñuina rëxun mil okin Dios xaroxuankëxa.

⁵ Achúshi ñantan ka Gabaón ëmanuxun, ꞌuxkë namámikin Diosan Salomón kakëxa: Añu ñu kaina kuëënkin ꞌë ñukáti akana mi ꞌinánti ꞌai kixun ka Diosan kakëxa.

⁶ Usakian kakëxun ka Salomónnën kakëxa: “Min kamina ꞌën papa David min uni ꞌikë, ꞌitsaira nuibakin ꞌakiankën, an ka minmi ꞌakinkëxun upíokin ñu ꞌanan, aín nuitunënbi sinani mimi katamëkin upíokin ñu ꞌakëxa. Usakin ꞌaia ꞌën papa ꞌitsaira nuiba ꞌixun kamina aín bakë bëchikë ꞌikë, ax ꞌiásaribiti ꞌapu ꞌinun bërí ꞌë ꞌimian.

⁷ Dios mix ꞌën ꞌIbu ꞌixun kamina, ꞌën papa David ꞌiásaribiti ꞌapu ꞌinun ꞌë ꞌimian, ꞌaínbi kana ꞌëx achúshi uni bëná pain ꞌixun uisakin ñu ꞌati kara kixun ꞌunairakëma ꞌain.

⁸ Usa ꞌaínbi kana min uni ꞌinunmi kaisa unikama ꞌakinti ꞌain: ꞌAisamaira ꞌinun ꞌuakamë ꞌëoi ëma chaiira, ꞌianan ka tupuntisamaira ꞌikë uiti kara kixunbi ꞌunántisama atux ꞌikën.

⁹ Usa ꞌain kamina upíokin sinánkin atun ꞌapu ꞌixun min kaisa unikama ꞌakinun ꞌë sinánmiti ꞌain, sinánmianan kamina uisa ñu kara upí ꞌikë, uisa ñux kara ꞌatima ꞌikë akamabi ꞌunánun ꞌë ꞌakinti ꞌain; usakin min ꞌakëbëma kara, ¿min unikama an tupuntisamaira ꞌinun ꞌaisamairai ꞌuakamë ꞌëokë ꞌain uix atun ꞌapu ꞌiisa uni ꞌik?”

¹⁰ Ësokian abë banakin ꞌakinun kixun ñukákëx kuëënkin ka Diosan Salomón,

¹¹ kakëxa: Min kamina mi ꞌakinun ꞌë ñukákin ꞌitsaira baritia tsóti ñukánan ñuñuira ꞌiti ñukánan mimi nishkë unikama bamaminun ꞌë ñukákima uisakin kaina ꞌën unikaman ꞌapu ꞌixun atu ꞌakinti ꞌai kixun ꞌë ñukan, usa ꞌain ka ax asábi ꞌikën,

¹² usa ꞌain kana ꞌëmi bërí ñukákësabi okin mi ꞌaxúnti ꞌain: ꞌAxunkin kana ñu ꞌunánkëira uni ꞌinun mi ꞌimianan kamabi ñu upíokin ꞌanun upí sinánñuira mi ꞌimiti ꞌain, uinu ꞌikë unibi kana bëráma mi, ꞌakëmapan ꞌixun usakin ꞌama ꞌain, ꞌaínbi kana usakin mi ꞌatankëxun bëtsi uniribi misaribi ꞌinun ꞌimitima ꞌain.

¹³ ꞌImainun kana, ñuñuirami ꞌinun mi ꞌimikin ꞌëmi ñukákë ñukama mi ꞌinánti ꞌain, ꞌaínbi ka mixmi ñukëma ꞌaish tsókëpa ꞌain misaribi ꞌapu itsi ënë menu ꞌaíma ꞌiti ꞌikën.

¹⁴ Minmi ꞌëx kuëënkësabi okin ꞌanan, ax kikësabi oi ꞌiti ꞌëx kia banakama ꞌimainun a tanti banakama, min papa Davidtan ꞌasaribiokin ꞌakëbëtan, kana xënibutimi tsónun mi ꞌimiti ꞌain.

¹⁵ Usakian, kakëx bësukin ka Salomónnën namákin kana ënë banakama kua kixun sinánkëxa. Usakin namábiani Gabaón ëmanua kuanx Jerusalén ëmanu bëbax anua Dios bunántisa okin axun kë kurin ratakakakë nankë ꞌikë anu kuanxun ka, anuxun atun ñu ꞌaisama ꞌakëkama mëníokanun unikama ꞌimikin Salomónnën ñuina rëxun Dios xaroxuankëxa. Usokin ꞌatankëxun ka aín piti ñukama chookin ꞌamitankëxun aín unikamabëtan piakëxa.

Salomónnën sinánñuira ꞌixun nishanani tsotia uni mëníoxuan ñuikë bana

¹⁶ Achúshi nëtën ka bëtsi bëtsi unin aín nami ꞌakë xanu rabë́ anua ꞌikë aín xubunuax ꞌapubë banai kuankëxa. Kuanx anu atsínxun,

¹⁷ ka xanu rabë́ kuankë a achúshinën kakëxa: —¡Mixmi ꞌapu ꞌikë kana ësokin mi kain! Ënë xanubë kana ꞌëx achúshi xubunu ꞌin, ꞌëx kana abë ꞌaish anuax ꞌën tuá bakë́an.

¹⁸ Anun ꞌëx bakënkë rabë́ ꞌimainun achúshi nëtë ꞌaínbi ka ënë xanuribi aín tuá nachikiaxa. Uisa uni ꞌunánkëmabi ka a xubunu nubë ꞌima. Nu rabëtaxëshi kananuna anu ꞌin.

¹⁹ Usainu anu ꞌikëbëbi ka achúshi imë́ ënë xanun tuá aín titanbia ꞌuxun rëtsë́kakëx ñuaxa.

²⁰ Usakin aín tuá ꞌaxun imë́ naëx bësuxun, ꞌëx ꞌuxkë ꞌain ꞌë rapasu ꞌuxmikë ꞌikëbi ꞌën tuá bianan, aín tuá ñukë a ꞌë rapasu nanxa.

²¹ Pëkarakëma ꞌaínshi bësui nirukin xuma ꞌaminuxun ꞌën iskëxbi ka ꞌën tuá rëtëkë ꞌiaxa. ꞌAínbi kana ꞌaimaia xabati pëkarakëbëtan ñachakin iskëxbi ka ꞌëx bakënkë ꞌën tuá ama ꞌiaxa.

²² Ësaia kikëbëbi ka xanu itsi axribi ësai kiakëxa: —Usama ka bamakëma tuá ënëx ka ꞌën tuábi ꞌikën, bamakë tuá ënëx ka min tuá ꞌikë kixun ka xanu itsi an bëtsi kakëxa. Ësakin kakëxunbi ka ax pain aín tuá bamakë ñui kikë an bëtsi kakëxa: —Usama ka axa ñukë tuá ënëx ka min tuá ꞌikën, usa ꞌain ka bamakëma asábi ënëx ꞌën tuá ꞌikën. Ësai kánani ka a xanu rabëtabi ꞌapun kuamainunbi kuëbikanani kanankëxa.

²³ Usai kanania a xanu rabë́ kuëbikanania kuakin ka ꞌapun sinánkëxa. Ënë xanux ka ñukëma asábi ax isa aín tuá ꞌikë, kia kianan ka bamakë ax isa xanu itsi aín tuá ꞌikë kia; ¡ꞌaínbi ka bëtsix aín tuá ñui asérabisa ꞌain tuá rëtëkëma ꞌikë kia!

²⁴ Usai kanania kuakin ka ꞌapun ꞌain suntárunën kushi kakëxa: —¡ꞌË kamina manë xëtokë achúshi bëxúnti ꞌain! Usakin kakëxuan manë xëtokë uania ka ꞌapun aín suntárunën kushi achúshi kakëxa:

²⁵ Tuá ñukëma ënë kamina nëbë́tsi tuurabë́ oxun, amo ꞌikë bëtsi xanu ꞌinánan amo ꞌikëribi bëtsi ꞌinánti ꞌain.

²⁶ ꞌUsakin ꞌanun ꞌapu kikëbë ka tuá ñukëma aín tita ax, ꞌitsaira ratuti ꞌapu kai kiakëxa: —¡Mix ꞌapu ꞌixun kamina ñukëma tuá a min suntárunën usakin ꞌanun ꞌamitima ꞌain! ¡Ënë xanu kamina tuá ënë ꞌinánti ꞌain! Kiax xanuitsi ax kikëbëbi ka bëtsíxribi ꞌapu kai kiakëxa: —Tuá ënëx ka ꞌënan ꞌianan minanribi ꞌitima ꞌikën. ¡Usa ꞌain ka nëbë́tsi tuurabë́ okë ꞌiti ꞌikën!

²⁷ Usai a rabëtax kikëbëtan ka ꞌapun sinanatëkënkin ësokian ꞌanun kakëxa: —Tuá ñukëma a kamina uisabi okima ꞌain tita ꞌinánti ꞌain. Ax ka asérabi aín tita ꞌikën.

²⁸ Usakian ꞌapun xanu rabë́ nishanankë mëníoxunkë ka kamabi Israel unibunën kuakëxa, kuati ka ꞌapumi rakuë́ti Diosan ka a ꞌapu sinánñuira ꞌinun ꞌimianan ꞌupíokia ñu ꞌanun ꞌimiaxa kiax kikankëxa.