1 Reyes 21 - Kashibo-Kakataibo Biblia

ꞌApu Ahabnën Israel uni Nabotnën ꞌapákë uvas bikuantisa tan ñuikë bana

¹ Usa ꞌain ka basikëbë achúshi uni Jezreel ëmanua ꞌikë, Nabot kakë uni aín uvas ꞌapákë ëma ꞌuramabi ꞌiakëxa, ax ka Samaria ëmanua ꞌikë ꞌapu Ahab aín xubu chaiira a rapasubi ꞌiakëxa.

² Achúshi nëtën ka Ahabnën Nabot kakëxa: —Min uvas ꞌapákë kaina ꞌë ꞌinántima ꞌain anu bëtsi ñukama ꞌëxribi aña ꞌinuxun ꞌapánun, ax ka ꞌën xubu rapasurabi ꞌikën. A mi ꞌë ꞌinánkëxun kana usamaira upíira me anu uva ꞌapákëñu a mi ꞌinánti ꞌain, ami kuëëniama kana uiti kupí kaina ꞌaisatani mi kuríkinën kupíoti ꞌain.

³ Kixuan kakëxunbi ka Nabotnën ꞌapu Ahab kakëxa: —Diosan ka ꞌë mi ꞌinánti sinánmitima ꞌikën ënëx ka ꞌën papa ꞌimainun ꞌën titan ñukin ëbian me mi ꞌinántima ꞌikën.

⁴ Ësokia kakëx ka Ahab amo nishananbi masánuitu kiani aín xubunu kuankëxa, Nabotnëan ꞌën papa ꞌimainun ꞌën titan ñukin ꞌë ënxua me kana mi ꞌinanima kixuan kakë a bana sinani. Usai kuantankëx ka aín xubunu nukuti ain chikën ami bësui rakakëxa, rakaxun ka añubi piti sinánma ꞌikën masá nuitukin.

⁵ Usai ꞌiaxa rakakëbi ka aín xanu Jezabelnën anu kuanxun mërakin kakëxa: —¿Uisakatsi kaina pisama tani masánuitutin?

⁶ Kixuan kakëxun ka Ahabnën aín xanu kakëxa: —Axa nu ꞌurama ꞌikë uni Nabot a kana ꞌëa aín uvas ꞌapákë marunun kixun kan; ꞌaisamatankian uvas ꞌapákë me itsi ꞌinánun sinánun kixun kana kan. ꞌAínbi ka an ꞌë ꞌinántisama tanxa.

⁷ Ësokian ñuixunkëxunbi ka aín xanu Jezabelnën aín bënë kakëxa: —¡Mix karamina an Israel unikama ësokin ka ñu ꞌat kakë uni ama ꞌain! Nirukianxun ka masanuituxunma pitan. ¡ꞌËn kana uisoxun karana biti ꞌain usoxun Nabotnën uvas ꞌapákë naë mi bixunti ꞌain!

⁸ Usokin aín bënë katankëxun ka Jezabelnën achúshi kirika kuënëokin aín bënë Ahabnën anën ꞌatankëxun anua ꞌapun kirika sellakë anun ꞌatankëxun; a ëmanua ꞌikë aín tukurikubu ꞌimainun ꞌapukama amixun anu ꞌikë ëmanua ꞌikë Nabot a buámiakëxa.

⁹ A kirika kuënëokë anu ka ësokin atu kakin ꞌakë ꞌiakëxa: “Kamabi Jezreel ëmanua ꞌikë unikamax ka añu ñubi pima samánux timë́kanti ꞌikën. Usakin ꞌakin ka Nabot anua unikama tsókankë anu rëkuë́mikin tsónti ꞌikën.

¹⁰ ꞌAtankëxun ka rabë́ uni axa ami këmëi a ñui bananun kixun katankëxun a rëkuë́mikin tsónkanti ꞌikën, a unix ka Nabotnëx ka Dios ñui kianan ꞌapu Ahab ñuiribi ꞌatimati banaxa kiti ꞌikën. Usaia kikëbëtan ka ëman chikíntankëxun anuxun maxaxan ꞌakin rëkanti ꞌikën.”

¹¹ Usokin kakëxun ka anua Nabot tsókë ëma Jezreelnu ꞌikë aín ꞌapukama ꞌimainun aín tukurikubu an Jezabelnën atu kirika xuxunkin kakësabiokin ꞌakankëxa:

¹² ꞌAkin ka kamabi unikaman timë́xun atun achúshi nëtën añubi pima samákin Nabot anua kamabi unikama timë́kë anua rëkuë́ni atubë tsónun ꞌimiakëxa.

¹³ Usokia ꞌan ka axa ami këmëi banai usaisa kiaxa kitia anëkë uni rabë́ axribi anua timëkankë anuax, usaisa Nabot kiaxa kiax kamabi unin kuamainun ësai kiakëxa. Nabot ënëx ka Dios ñui kianan ka ꞌapu ñuiribi ami ꞌatimati banaxa kiakëxa. Usai uni rabë́ ax kikëbëtan ka Nabot anua ꞌikankë atun ëmanua chikinbianxun a ꞌurinxun maxáxan ꞌakin rëkankëxa.

¹⁴ Usokin ꞌatankëxun ka Jezabel kamikankëxa, Nabot kananuna maxaxan ꞌakin min kakësabiokin rëtëan.

¹⁵ Usakia kamikëxun kuaxun ka Jezabelnën aín bënë Ahab kakëxa: —Kuanxun kamina Nabot Jezreel uni an uvas ꞌapákë naëmi marutisa taniabia mi marutisama tankë a kamina minan ꞌinun bitsi kuanti ꞌain. Aín ꞌibu Nabot; kaisa bërí ñukë ꞌikën.

¹⁶ Usa ꞌain ka Ahabnën naë ꞌibu Nabot kaisa ñuaxa kixun kuabianxun an ꞌapákë uvas ainan ꞌinun biakëxa.

¹⁷ Usa ꞌain ka Diosan Tisbé ëmanua tsóa uni Elías a kakëxa:

¹⁸ “Bënëkiani anu kuanxun kamina abë banakin Ahab Israel unikaman ꞌapu, Samaria menua tsókë a isi kuanti ꞌain. Bëríbi ka Nabotnan ꞌikëbi ainan ꞌiti binuxun uvas ꞌapákë a isi naënu kuanxa.

¹⁹ Kuanxun kamina kati ꞌain: Ësokin mi kanun ka Dios kiaxa: Min ismina Nabot ꞌatankëxun ain uvas ꞌapákë naë ꞌibuan, usa ꞌain isa anuxun Nabotnën aín imi ꞌapatia kamunan biaxkakë anuxunbi min imiribi kamunan biaxkati ꞌikën ka kiaxa.”

²⁰ Usokin katanua kakëx ka Elías kuankëxa. Kuanxun ka anua uvas ꞌapákë naë anua mërakëxun ami Ahabnën Elías nishkin kakëxa: —¿Mix ꞌëbë nishanankë uni ꞌaíshbi kaina ꞌë baribëtsini uax ꞌëbë mëranan? Kakëxun ka Elíasnën kakëxa: —Mibë bananuxun mi bari kana uan, min kamina Diosan upí iskëma ñuishi ꞌain.

²¹ Usa ꞌain ka Dios ësai kiaxa: ꞌËn kana bërí uisa karana oisatani usokin ꞌanan kana kamabi min rëbúnki kamaxa këñunun ꞌimianan; kana min rëbúnkinën bakë bëchikëkama bëná unibu Israel menua ꞌikë akamabi masóti ꞌain.

²² ꞌAnan kana min aintsikamabi masókin Jeroboam kakë uni Nabat aín bakë bëchikë ꞌasaribiokin ꞌanan Baasá Ahías aín bakë bëchikë ꞌasaribiokin kamabi Israel unikamaxa ꞌëmi ꞌuchanun kixun ꞌamiakën, usa ꞌain kana ꞌëx ꞌitsaira nishkë ꞌixun min aintsikama axa ami nishkë unikaman anun ꞌamiti ꞌain.

²³ Kianan ka Jezabel ñuiribi ësai Dios kiaxa: An ñu pukë pikë kamunkaman ka Jezabel anun Jezreel ëma bëararakin kënëarakë a tanain ëmánxun aín nami piti ꞌikën.

²⁴ ꞌImainun ka min aintsikama axa ëmanu tsókë kamaxa bamakë ka kamunkaman aín nami piti ꞌikën; pimainun ka ñuina pëchiu an ñu bamakë pikë akamanribi axa ꞌuri kuanx ñu ꞌapákënu bamakëkama aribi piti ꞌikën.

²⁵ Uinsaranbi ka Ahabnën aín xanu Jezabelnën bana tankin, ꞌaisama ñu ꞌanan Diosan upí iskëma ñuira akësokin an ꞌakë ꞌapu ꞌaíma ꞌiakëxa.

²⁶ Usokin ꞌanan ka unínbia a rabinuxun ꞌakë ñuribi rabiakëxa, amorreo unikaman ꞌasaribiokin, usokin ꞌaia ka Diosan a unikama Israel unibunën menua chikíankëxa.

²⁷ Ësokia Dios kikë bana Elíasnën ñuixunkëxun a banakama kuakin ka Ahabnën aín chupa abi tukai ꞌikiani aín xubunu kuanxun chupa xënira pañutankëx añubi pima a pañukë chupa xënira añabi ꞌuxanan, masá nuitukëishi ꞌaish niakëxa.

²⁸ Usaia ꞌikëbëtan ka Nukën ꞌIbun Elías kakëxa:

²⁹ “¿Min kaina Ahab ꞌuchatankëxbia ꞌëmi sinanati usai ꞌia isin? Usa ꞌain kana aín aintsikama ꞌatima okinma upitaxa bukunun ꞌimianan, ax ñukëbëa aín bakë bëchikë ꞌapu ꞌikëbë kunia atun ꞌikënu ꞌaisama ñu ꞌinun ꞌimiti ꞌain.”