1 Reyes 2 - Kashibo-Kakataibo Biblia

Davidtan aín bakë bëchikë Salomón ax ñukëbëa usai ꞌiti banakama ñuixunkin ka bana

¹ Ax ñuti nëtë ꞌurama ꞌikë ꞌunánkin ka Davidtan, aín bakë bëchikë Salomón kuënxun ësokin kakëxa:

² Kamabi uni axa ënë menu tsókë unikamax ka aín nëtë ꞌikëbë ñuia, usa ꞌain kana ꞌitsama nëtë́ishi ꞌitankëx ñuti ꞌain. Usai ꞌëx ꞌikëbëbi kamina mix kushi sinánñu ꞌaish añubimi rakuëma ꞌiti ꞌain.

³ Usai ꞌikin kamina añu ꞌanun kara Dios kiakëxa ax kiásabiokin ꞌanan Moisésnën Diosan ꞌamikëxun kuënëo banakama kikësabiokin ꞌati ꞌain, usokinmi ꞌakëbëtan ka Diosan kamabi min ꞌakë ñukamaxa uinu kaina kuani anuxunmi ꞌakëxbi upí ꞌinun ꞌimiti ꞌikën.

⁴ Usokin ꞌakëbëtan ka Diosan ꞌëbëtan achúshi ñu ꞌásabiokin nun rëbúnkikamaribi añu ꞌanun kara Diosan atu kaia usakinshi aín sinan upí ꞌixun ꞌati ꞌikën, usakin ꞌaia ka uínsaranbi nun aintsikamaxëshia Israel unibunën ꞌapu ꞌixun ꞌakinun ꞌimiti ꞌikën.

⁵ “Minbi kamina ꞌunan uisokin kara Joab Seruiánën tuá an ꞌë ꞌakëxa kixun, an ka Israel unibunën suntárunën kushi rabë́: Nernën bakë bëchikë Abner a ꞌimainun Amasá Itránën bakë bëchikë aribi, aín imi ꞌapamikin ꞌakëxa, usakin ꞌatankëx ka unikaman isa ꞌakanankënuxun axa kia këmënuxun ꞌakëxa, ꞌaínbi ka a nëtëkaman uni ꞌakanantëkënima asabi pain tsókë ꞌiakëxa, usa ꞌain kamina an ka usokin ꞌakëxa, usa ꞌain kaina uisa oisatani usakin ꞌatimoti ꞌain.

⁶ Usa ꞌain kamina uisoxun ꞌati kara kixun istankëxun ꞌakin, abia xënibuti tsótankëx ñunu ëntima ꞌain.

⁷ ꞌImainun kamina Barzilainën, bakë bëchikëkama Galaad menua bukukë akamabëshi, nuibanani tsókin atu kuëntankëxun min xubunuxun pikinti ꞌain, a unikaman ka ꞌë min xukë́n Absalónnën ꞌati rabanan ami rakuë́ti abatiabi ꞌë ꞌakiankëxa.

⁸ ꞌIanan kamina, anu kara Simí kakë uni Guerá aín bakë bëchikë Benjamín aín rëbúnkinën ñaká axa Bahurim ëmanu tsókë a ꞌikë kixun kuati ꞌain. An ka ꞌëx anun Mahanaim kakë ëmanu kuanti nëtën kuaniabi ꞌaisamaira banakin ꞌë ꞌichábiankin ñukákëxa. Usokin ꞌaxunbi ka Jordán kakë baka anu kuania aín ꞌapu ꞌakësokin ꞌë upíokin biakëxa, usokëxun kana Diosan anën ꞌën kana mi ꞌatima ꞌai kixun kakën.

⁹ Usa ꞌain kamina abë mëníonanti sinánkima. Min kamina uisokin kara ñu ꞌati ꞌikë kixun upíokin ꞌunan usa ꞌixun, kamina uisa kaina a uni oti ꞌai kixun istankëxun usakin ꞌati ꞌain. ꞌAkin kamina bënëtishia ñunun ꞌimiti ꞌain.”

David ñua ñuikë bana

¹⁰ Usai ñukë ka David anua aín aintsikama maínkan me anua tsóa ëma Jerusalén anubi David maínkankëxa.

¹¹ Usa ꞌain ka tsókëpan ꞌaish cuarenta baritia sënën Israel unikaman ꞌapu ꞌiakëxa, ax ka mapai achúshi ꞌimainun rabë́ baritia sënën Hebrón ëmanu ꞌapu ꞌiakëxa ꞌitankëx ka treinta ꞌimainun tres baritia ꞌimi Jerusalén ëmanuribi ꞌapu ꞌiakëxa.

¹² Usokian aín papa Davidnën ꞌapu ꞌixun aín aintsikama ꞌakian ꞌain ka aín bakë bëchikë Salomón axribi atun ꞌapu ꞌixun kamabi Israel unikama ꞌitsa baritia ꞌakiankëxa.