1 Reyes 17 - Kashibo-Kakataibo Biblia

Elías an Dios kikë bana uni ñuixunkë ꞌuñëbi ꞌibúkëbëma ka me ëskinxun ꞌaia kia bana

¹ Aín bana unikama ñuixunua Diosan kaískë Elías, Tisbé kakë ëma Galaad, menua ꞌikë anu tsókë an ka ësokin Ahab kakëxa: “¡Diosan kuamainunbi kana ami sinánun mi kain, Israel unibunën Dios an kakësabiokin aín bana tankin ꞌën ñu ꞌaxunkë ax ka ꞌëx kikëbë ꞌibunux ka ënë barikaman ꞌuí ꞌibutíma ꞌimainun imë́bi nibí ꞌibutima ꞌikën!”

² Usa ꞌain ka Diosan Elías ësokin kakëxa:

³ “Ënuax kuantankëx kamina amiaxa bari urukë, ami kikiani kuanti ꞌain, kuanx kamina Jordán kakë baka amiaxa bari urukë anu kuantankëx anua ꞌikë Querit, kakë xëxá anu unëax ꞌiti ꞌain.

⁴ Anu ꞌixun kamina xëxá ꞌumpax a xëati ꞌain, usa ꞌain kana anumi ꞌikëbëtan anuxunmi piti ñu mi uanxunun kana ñumakuru kan.”

⁵ Usokian kakëx ka Elías Diosan kakësabi oi anu kuanx Querit kakë xëxá amiaxa bari urukë amia ꞌikë Jordán kakë baka au ꞌi bërúakëxa.

⁶ Usai kuanxa anu ꞌia ka ñumakurukaman usakin anua Diosanbi ꞌamikëxun pán këñun ain piti nami ñantainshi bari urukëbëtan ꞌinánpunkin xupinbukëbëtanribi Elías ꞌinánkëxa. Usakian ꞌakëxun ka xëxá ꞌumpax abi xëakëxa.

⁷ Usakin anua ꞌumpax ain xëati bikëbëbi ka xëxá ax ꞌitsama nëtë ꞌikëbë, Israel nëtënuaxa ꞌuí ꞌibúkëbëma ë́skiakëxa.

Elías ꞌimainun Sarepta ëmanua ꞌikë raëmëkë xanu ꞌia ñuikë bana

⁸ Usa ꞌain ka Querit kakë xëxá ëskikë ꞌain Diosan ësokin Elías kakëxa:

⁹ “Bërí kamina nirukiani Sarepta, ëma Sidón kakë ëma ꞌurama ꞌikë anu kuanti ꞌain, anu kuantankëx kamina anu ꞌi bërúti ꞌain. Anua ꞌikë xanu raëmëkë kana, anu ꞌia mi piminun kan.”

¹⁰ Ësokian kakëx ka Elías Sarepta kakë ëmanu kuankëxa. Kuanx anun ëmanu atsínti xëkuënu bëbaxun ka, achúshi xanu raëmëkëan karu bitsia isakëxa. Iskin ka kuënxun kakëxa: —ꞌË kamina ami xëati ñu achúshimi xëanun ꞌumpax bëxúnti ꞌain.

¹¹ Usakin kakëxua bitsi kuaniabi ka, Elíasnën a xanu amiribishi kuëntëkënkin kakëxa: —Kamina, achúshi pán tukakëribi ꞌë bëxúnti ꞌain.

¹² Kixun kakëxun ka xanuxun Elías kakëxa: —Asérabi kana paránkinma ami sinánun min Diosanbi kuamainun mi kain, ꞌëx kana pán xuikë achúshirabi nankëñuma ꞌain. ꞌAínbi kana mëkën achúshi harinara ꞌën chumunu xëni chamarakëñun anu ꞌaruti anu ꞌaruxun nan, usa ꞌain kana bërí karu chamara anu ꞌën tuanan ꞌimainun ꞌën piti xui kuanxun bian. Usa ꞌain kananuna a chamara pitankëx a piti ꞌaíma ꞌain numin bamati ꞌain.

¹³ Ësokin kakëxunbi ka Elíasnën kakëxa: —Kamina bamaiman usa ꞌain kamina rakuë́tima ꞌain. Kuantankëxun kamina ami ñuikë piti a ꞌai kuanti ꞌain. ꞌAínbi kamina ꞌë pain min ñuikë harina a pán chukúma ꞌitánun ꞌabëtsinkin bëxúnti ꞌain, usakin ꞌë pain bëxuntankëxun kamina minan ꞌanan min tuáribi pán ꞌaxúnti ꞌain.

¹⁴ Nukën ꞌIbu, Israel unibunën Dios ax ka ësai kiaxa, ami chumunu ꞌaruxun nankë harina a ꞌimainun, xëni anu ꞌaruti ꞌakë ñunu ꞌaruxun nankë ax ka anuan Diosan menu ꞌuí ꞌibúmitëkënti nëtë ꞌitámainun këñutima ꞌikën.

¹⁵ Usakin kakëx kuanxun ka xanu raëmëkë an usakian anua Elíasnën kakësabiokin ꞌakëxa. Usokin an ka xanu raëmëkë ꞌimainun aín tuá abëtan Elíasnën kamabi nëtën piti ñu sënën ꞌiakëxa.

¹⁶ Usa ꞌain ka ñutënu ꞌaruxun nankë harina ꞌimainun xëni ñunu ꞌaruxun nankë ax këñuama ꞌikën, Diosan usai ka ꞌiti ꞌikë Elías kakësabi oi ka usai ꞌiakëxa.

¹⁷ Usai ꞌia ꞌitsa nëtë inúkëbë ka raëmëkë xanu aín tuá ꞌinsínan kushiira uin bitsi ꞌinsínkë ꞌiakëxa.

¹⁸ Usaia aín tuá ꞌian ka kasunamëkë xanu an ësokin Elías kakëxa: —¿Añu karana ꞌën mixmi Diosan uni ꞌain, mibëtan ꞌati ꞌain? ¿Mix kaina ꞌën ꞌucha kupín ꞌuchañu kamina ꞌai ꞌë kakin ꞌën tuá ñumiti kupín ënu uan?

¹⁹ Ësokian kakëxunbi ka Elíasnën kakëxa: —Ënu kamina min tuá ꞌë bëxúnti ꞌai kixun. Ësakin kakin ka xanu raëmëkë an aín tuá bibiakin uani kuanx ka anu ꞌuxtia ꞌinánkë manan anu kuaruxun anua ꞌuxkë anu tuá ñukë a rakankëxa.

²⁰ Anuxun ka Dios munuma banakin kakëxa: “Dios uisa ꞌixun kaina mix ꞌën ꞌIbu Dios ꞌixunbi, ¿Kasunamëkë xanu aín xubunu ꞌëx ꞌikë ënë aín tuá ñumi anun rabanan paë ꞌitsaira tëmëranun ꞌimin?”

²¹ Usokin katankëxun ka rabë́ ꞌimainun achúshi okin buinakin tuá ñukë manan uankë a chupa bëpantankëxun, abë banakin munuma Dios kakëxa: “ꞌËn ꞌIbu Dios, ¡ꞌËn kana mibë banakin ësokin mi kain, ënë tuá ñukë kamina amiribishi baískitëkëntakëxa tsónun ꞌimiti ꞌain!”

²² Usokin ñukákëxun ka Nukën ꞌIbun Elíasnën ñukákësabi okin a tuá baískimiakëxa.

²³ Usakian baískimitëkënia ka Elíasnën bënë́kinshi ax anu ꞌuxkë anua bëkë anua bibiankin xubu shimú uanxun ꞌinánkin aín tita kakëxa: —¡Ka kuat, min tuá ka ñuaxi baískiaxa!

²⁴ Ësakin kakëxun ka xanuxunribi Elías kakëxa: —Bërí kana ꞌën mix kamina asérabi këmëima Diosan uni ꞌai kixun ꞌunanin, ꞌimainun ka mixmi asérabi këmëima banaia Diosan kuatia.