1 Reyes 16 - Kashibo-Kakataibo Biblia

Ahab kakë uni Israel unin ꞌapu ꞌia ñuikë bana

²⁹ ꞌApu ꞌikin pëua ꞌaish ka Judá menu treinta ꞌimainun ocho baritia ꞌimi Asá ꞌapu ꞌikëbë ka Ahab Omrí, kakë unin aín bakë bëchikë axribi Israel menu ꞌapu ꞌiakëxa, usai ꞌapu ꞌitankëx ka atun ëma chaiira Samaria kakë anu veintidós baritia ꞌimi ꞌapu ꞌiakëxa.

³⁰ Usai ꞌapu ꞌixunbi ka ꞌaisama nuituñu ꞌixun Diosan bërunuxunbi, ax ꞌisama ꞌaia anpaira ꞌapu ꞌia unikama an ꞌasamaira okin Dios kuëënkëma ñu ꞌakëxa,

³¹ usakin ñu ꞌatima ꞌai ka Jeroboam Nabatnën bakë bëchikë ꞌiásaribiti ꞌuchakinbi ka ꞌaisama ñu ꞌakinma kana upí ñuishi ꞌati ꞌai kixun sinánma ꞌikën. Usai chaiira ꞌuchaibi ka a sinanima Sidónu ꞌikë ꞌapu Et-baal kakë aín ini bëchikë xanu achúshi Jezabel kakë abë biranankëxa, usai ꞌixun ka Baal kakë unin ꞌakë dios a rabiakëxa,

³² ꞌimainun ka usakin Baal rabikin anuxun ñuina xaroxunti ꞌamianan anuxun rabiti xuburibi Samaria menu ꞌamiakëxa.

³³ Usakin ꞌanun ꞌamianan ka a ꞌakëbëa Dios ꞌaisamairai nishtanun, unin ꞌakë Aserá, kakë a tankinribi ꞌakëxa, usakin ꞌakëbë ka Israel unibunën Dios, ax ꞌaisamairai ꞌapu ꞌimia unikaman ñu ꞌaisama ꞌakëbëa ꞌiásamairai atian ira nishakëxa.

³⁴ Anuan Ahab kakë uni ꞌapu ꞌikë a nëtë kaman ka Hiel kakë uni Israel uni Betel ëmanua tsókë an amiribishia Jericó ëma kënëtëkënun ꞌamiakëxa. ꞌAmikin taëomixua ami birukin uarukin kënëti aín tapun akama ꞌamikëbë ka aín bakë bëchikë apan Abiram, kakin anëkë ax ñuakëxa, ñukë ꞌaínbi ka ëma kënëmixua aín xëpútikama ꞌanun ꞌamikëbë aín bakë bëchikë ꞌanáka Segud kakë axribi a xëpútikama ꞌamikëbë ñuakëxa, Diosan Josué Nunnën bakë bëchikë a usai ka ꞌinuxun ꞌaia kixun a ñuikin kásabi oi ka usai ꞌiakëxa.