1 Reyes 12 - Kashibo-Kakataibo Biblia

Israel unikama rairi kuantamainun ꞌain patsan amo kuan ñuikë bana

¹ Usa ꞌain ka Roboam Siquemnu kuankëxa, kuankëbë ka kamabi Israel unikama anuxun atun ꞌapu ꞌiti anënux rikiankëxa.

² Rikiankë ñuikania Jeroboam Nabat aín bakë bëchikënën Egipto menuxun kuakëxa, ꞌapu Salomónnën ꞌati rabanan abáx anu bërua ꞌaish anu tsókë ꞌixun ka anuxun kuakëxa.

³ Usa ꞌain anu unun kamikëx uax, ka Jeroboam kamabi israel unikamabë anu kuanxun Roboam kakëxa:

⁴ —Min papan ka nukama ꞌaisamaira ñu mëëkin tëmëranun ꞌimiakëxa; usa ꞌain kananuna minmi nukama ñu mëëmikin chaiira ꞌamikinma chukúmashitani ꞌamikëxun mi ñu mëëxunti ꞌain.

⁵ Kakëxun ka Roboamnën atu kakëxa: —Ënuax kuantankëx kamina rabë́ ꞌimainun achúshi nëtë ꞌikëbë ꞌë isi rikuatsintëkënti ꞌain usakin kakëx ka a isia ukë unikamax rikiantëkëankëxa,

⁶ rikiankëbëtan ka ꞌapu Roboamnën uni ain tukurikubu, an ain papa ñukëma pain ꞌikë ñu mëëxuan akama ñukákëxa: —¿Uisakin kaina mitsun ꞌë isi ukë unikama kanun ꞌë kati ꞌain?

⁷ Kakëxun ka atun kakëxa: —Min kamina bërí atun kakësabiokin upíokin atúxa kuëëntanun ꞌati ꞌain kixun ka kakëxa, usakin min ꞌaxunkëxun ka ënkinma abi ñu mi mëëxukanti ꞌikën.

⁸ Kakëxunbi ka Roboamnën uni tukurikubu kaman kakësokin ꞌakinma atun bana kuaisama tankin, anu kuanxun abë kanikë ꞌixunbia an ñu mëëxunkë uni bënábukama,

⁹ atu ñukákëxa: —¿Uisokin axa ꞌë isi ukë unikama, an ꞌën papan ꞌaisamaira okin ñu mëëmia ꞌixun ꞌën chukúmashi okin ñu mëëminun kixun ñukáti ukë akama kanun kaina mitsun ꞌë kati ꞌain?

¹⁰ Ësokin kakëxun ka uni bënábu abë kanikin ñu mëëkë atun kakëxa: —Axa minu ukë unikama min papan ꞌaisamaira okin ñu mëëmia atu kamina ësokin kati ꞌain: ꞌËn papan ka ꞌaisamaira okin mitsu ñu mëëmiakëxa ꞌaínbi kana, ꞌën ꞌitsaira mitsu ñu mëëti ꞌai kixun kamina kati ꞌain;

¹¹ an ñu cha ꞌamia ꞌikë kana, usamaira ñu chaiira mitsu ꞌamiti ꞌain; an anúan tsitëkërëkikë anun rishkia ꞌikë kana ꞌën mitsu mëxi ain rëbunu manë xëtokë tëkërëkakë anun mitsu rishkiti ꞌai kixuan atu kanun kakëxa.

¹² Usokian kakë rabë́ ꞌimainun achúshi nëtë ꞌikëbë ka Jeroboam ꞌimainun unikamax utëkëankëxa ꞌapu Roboamnën kakësabi oi.

¹³ ꞌAínbi ka ꞌapu Roboamnën ami nishkin aín tukurikubukaman bana kuakëmasa okin atumi nishkin kakëxa,

¹⁴ kakin ka usakin kanun bëná unikaman kakë usakinbi kakëxa: ꞌën papan ꞌitsaira ñu mëëmikin achúshi ñu ꞌië ꞌamia ꞌikë kana, ꞌën bëtsi usamaira ꞌië́ra mitsu ꞌamianan chaiirabu ꞌamiti ꞌain, ꞌën papan anúan tsitëkërëkikë anun rishkia ꞌikë kana mitsu ꞌën mëxi aín rëbunu manë tëkërëkakë anúnribi rishkiti ꞌain.

¹⁵ Usakin ꞌapun ax usai ꞌitia Dios kikësabiokin unikama kakësokin ꞌaisamatankëxa, usai ax ꞌiti ñuikian Diosan kásabi oi ka, Jeroboam Nabatnën bakë bëchikë Ahías Siló ëmanu ꞌikë an kakësabi oi ꞌiakëxa.

¹⁶ Usa ꞌain ka axa a isi kuankë Israelnën ꞌapukama atun kakëxun kuaisama tankë a sinánkin ësokin atun kakankëxa: “¡Nukaman kananuna Davidtan aintsi nun ꞌapu ꞌiti kuëënima! ¡ꞌImainun ka Jesénën bëchikë Davidtan añu ñubi nu ꞌaxunkëma ꞌikën!” ¡Nun xubunubi kananuna kuantëkënti ꞌain kiax ka israel unikama kanankëxa! ¡Usa ain ka David ain aintsikaman ꞌapubi ꞌiti ꞌikë kiax ka kikankëxa! Ësokin kabiani ka Israel unikama aín xubunubi rikiankankëxa.

¹⁷ Usakin kabiani rikian ka Judá menu ꞌikë ëmakamanu tsókë Israel kaman ꞌapubi Roboam ꞌiakëxa.

¹⁸ Usa ꞌain ka Roboamnën Siquemnuxun xukëbi ka Adoram an kamabi unin ñu mëia iskë a xuakëxa, xukëbi ka Israel kaman maxatan ꞌakin rëakëxa. Usakin rëkë kuati ka bënëti caballonën nikinkë anu ꞌirukiani Roboam Jerusalénnu abákëxa.

¹⁹ Ësai ꞌian ka Israelkama Davidtan rëbúnki ꞌapu ꞌiti kuëënima ami nishakëxa, usai ꞌia ꞌaish ka bëríbi usai ꞌia.

²⁰ Usokëbë amiribishi abati Jerusalénnu kuantëkënkë kuankin ka Israel unikama Jeroboam kamabi uni timë́xun anua unun kixun kamiakëxa, kamikëx uax bëbakë ka atu achúshinën, mix kamina Israel unikaman ꞌapu ꞌiti ꞌai kixun kakëxa. Usakin anëkëbëbi ka Judánu ꞌikë unikama atux kuëënima Davidtan rëbúnkin achúshi ꞌapu ꞌiti kuëëankëxa.

²¹ Usokin ꞌanbi ka Roboamnën Jerusalénnu bëbaxun, ciento ochenta mil suntáru kaisbëtsinkin bëi uakëxa, atux ka Judánën ꞌaintsi ꞌimainun Benjamínën rëbúnkikama ꞌiakëxa, Israel kama abë ꞌakanankin kupitanunma ax ꞌapu ꞌikatsi kixun ka usakin bëakëxa.

²² ꞌAínbi ka an bana ñuikë Semaías aín uni a Diosan ësakian ꞌanun kakëxa:

²³ “Roboam Salomónnën bëchikë Judánu ꞌikë unikaman ꞌapu a kanan, kamina Judánën ꞌaintsikama ꞌimainun Benjamínën aintsikama kanan kamabi unikamaribi kati ꞌain,

²⁴ ꞌën kana min xukë́n apan Israel unikamabë kamina ꞌakanantima ꞌai kixun mi kamin. Usa ꞌain ka a unikamax atubë ꞌakananima atún xubunubi rikiantëkënti ꞌikën, ꞌëx kana usaía atux ꞌinun kian.” Ësokian kamikëx ka kamabi uni atun xubunubi rikiantëkëni, usokin kanua Diosan xukëxua kakëx kuankankëxa.

Jeroboamnën Israel unikaman rabiti bëtsi ñu unio ñuikë bana

²⁵ Jeroboam an ka Siquem kakë ëma ꞌamitëkëankëxa, ꞌamitankëx ka Efraínnën ñakánu ꞌikë unikama anu tsókë, aín bashi anu tsóti bërúakëxa. Anuxun ka Penuel kakë ëma aribi ꞌamitëkëankëxa.

²⁶ ꞌAínbi ka an ësokin sinánkëxa: “Davidtan rëbúnki ꞌapu ax sapi ka Israel unikaman ꞌapu ꞌiti ꞌikën,

²⁷ ënë unikamax ka Jerusalénnu ꞌikë anuxun Dios rabiti xubunuxun ñuina xaroi kuanti ꞌikën. Kuania Roboam Judánu ꞌikë ꞌapu an upíokin nuibakëxun tankin maxatan ꞌë rëbiani ka Roboamnu rikianti ꞌikën.”

²⁸ Ësokin pain sinántakëx ka an ꞌakinkë aín suntárunën kushikamabë banatankëxun ꞌapu Jeroboamnën rabë́ vaca bakë bërí kanikë tankin uniomiakëxa, uniomitankëxun ka kamabi unikama kakëxa: “Israel unikama mitsux kamina ꞌitsaira nitsi Jerusalénnu kuanin. Usa ꞌain ka ënu an Egipto menua chikínbëtsinkin mitsu bëa Dios a ꞌikën.”

²⁹ Usokin atu katankëxun ka achúshi Betel kakë ëma anu nitsimianan ka bëtsi aribi Dan kakë ëma anu nitsínun ꞌamiakëxa.

³⁰ Usokin ꞌaxun ka Israel unikama ꞌuchamiakëxa, usa ꞌain ka a rabi Betelnu kuanan Dan kakë anuribi a rabi kuankankëxa, usai ꞌikin ka Jerusalénnu Dios rabi kuankë a ënkankëxa.

³¹ Usokin ꞌanan ka anuxun unin ꞌakë ñu rabiti ain bashikamanu xubu anuxun bëtsi dios kamaribi rabinun ꞌamiakëxa, ꞌamixun ka ëmanu ꞌikë uni sacerdote isa ꞌinun kixun levita uni ꞌikëmabi anëakëxa.

³² ꞌAnan ka anbi ꞌati kuëënxun anun bëtsi ñu rabikin fiesta ꞌati nëtë nankëxa, a ka mapai achúshi ꞌimainun rabë́ ꞌuxë ꞌirukë axa mapai rabë́ nëtë ꞌikë a nëtë nankëxa, nankë ꞌain ka anuxun Judánu ꞌikë unikaman fiesta ꞌakëxa, ꞌakin ka anuxun xaroti ꞌakë anuxun ñuina xarokëxa. Ësokin Betelnuxun ꞌakin ka vaca bakë tankin ꞌakë a ñuina xaroxuankëxa, ꞌanan ka an vaca bakë tankin ꞌakë rabikin ñuina xaroxunti sacerdote anëakëxa.

³³ Usa ꞌain ka mapai achúshi ꞌimainun rabë́ ꞌianan achúshi ꞌuxë ꞌirukë anun Jeroboam anribi anuxun xarotia Betelnu ꞌamikë anuxun ñuina xarokëxa. Ësokin ka anbi sinánxun anun fiesta ꞌati nëtë an kuëënkësa okin nankëxa; usakin ꞌatankëx ka a nëtë ꞌikë anuinsa Israel unikaman fiesta ꞌati ꞌikë kiax kiakëxa, usa ꞌain ka a ꞌuxë ꞌikëbë ꞌikëbëtan ñuina xaroi anu kuankankëxa.