1 Reyes 11 - Kashibo-Kakataibo Biblia

Salomónnën kaniakëkin bëtsi ñukama rabia ñuikë bana

²⁶ ꞌItsa baritia inúkëbë ka achúshi nëtën Jeroboam Nabat ain bëchikë ax Salomón chikíanan ꞌapu ꞌiisa tankëxa. Jeroboam ax achúshi uni an Salomónnën ñu mëëxunkë Seredá kakë ëmanu ꞌikë ꞌaish Efraínën rëbúnki ꞌiakëxa. Usa ꞌain ka aín tita ax raëmëkë xanu Serúa kakin anëkë ꞌiakëxa.

²⁷ Jeroboam axa ꞌapumi nishkë ax ka ꞌiakëxa: Salomónnëa kënëara kënë ain kinikama men natakakakë a kupín ka usai ꞌiakëxa, ax ka ain papa Davidnën ëma kakin anëkë ꞌiakëxa.

²⁸ Salomónnën ka Jeroboam ax ka uni bëna kushi ꞌianan ñu ꞌaisa ꞌikë kixun ꞌunánkëxa, usakin unánxun ka an isa Josénën rëbúnkikama ñu mëia bërúanun kixun anëakëxa, atux ka Efraín ꞌimainun Manasésnën rëbúnkikama ꞌiakëxa.

²⁹ Usa ꞌain ka achúshi nëtën Jeroboam Jerusalénnuax kuankëxa, kuankinbi ka an Dios kikë bana uni ñuixunkë Ahías Silónu ꞌikë axa, chupa iotan raküax kuankëbë abë mëranankëxa. Usai ꞌi ka a rabëtaxëshi anu uni ꞌikëma ni anuax mëranankëxa,

³⁰ mëranankin ka Ahíasnën anúan rakúkiankë aín chupa ió a bikin mapai rabë́ ꞌimainun rabë́ ꞌitanun tukapakëxa,

³¹ tukapakin ka Jeroboam kakëxa: “Mapai rabë́ tukapakë ënë kamina minan ꞌinun biti ꞌain, Israel kaman Dios ka ësai kiaxa: ꞌËn kana Salomón ꞌapu ꞌikëbi chikinuxun ꞌain, chikínkin kana mixmi mapai rabë́ ñakánu ꞌikë unikama ꞌapu ꞌinun ꞌimiti ꞌain.

³² Usa ꞌain kana Salomón achúshi ñakánu ꞌikë unikaman ꞌapuishi ꞌinun ꞌimiti ꞌain, aín papa Davidtan ka ꞌën kakësabiokin ꞌakëxa ꞌimainun kana Jerusalén ëma ꞌënbi Israel unikaman ëmanua kaisakën.

³³ Salomónnën ka ꞌën kakësabiokin ꞌë rabikinma bëtsi dios rabikin, Astarté diosa kakë sidonio; Quemós moabita unikaman dios; a ꞌimainun Milcom amonita unikaman dios akama rabiaxa. Usakin ꞌakin ka ꞌën ismainunbi ñu ꞌatima ꞌaxa, usakin ꞌakin ka ain papa Davidtan ꞌásabiokin ꞌën banakama kikësabiokin ꞌakëma ꞌikën.

³⁴ Usa ꞌaínbi kana ñukëmapain ꞌikë aín ꞌapu ꞌikënua chikinkima bërúanti ꞌain, ain papa David an ka ꞌën kásabiokin, ꞌanan ꞌën bana kikësabiokin ꞌanan a tanti banakama kikësabiokin upíokin ꞌakëxa.

³⁵ ꞌAínbi kana aín bakë bëchikënëxa ꞌapu ꞌinun ꞌimitima ꞌain, ꞌimikinma kana mixmi mapai rabë́ ñakánu ꞌikë; unikaman ꞌapu ꞌinun ꞌimiti ꞌain.

³⁶ Usakin kana achúshi ñakánu ꞌikë unin ꞌapuishi ꞌinun aín bakë bëchikë ꞌiminuxun ꞌain, ꞌimikëxun ka anua ꞌën uni David ꞌia Jerusalén ëma ꞌën kaisa anuxua ꞌë rabiti xubu ꞌamiakëxa.

³⁷ Usa ꞌain kamina ꞌën mi ꞌimimainun mix kamabi unin ꞌapu ꞌianan, kamina kamabi menu ꞌikë Israel unikaman ꞌapu ꞌiti ꞌain.

³⁸ ꞌËn mi kakësabiokin kamabi ñu upíokin, ꞌën ismainunbi ꞌakin a tanti banakama ꞌimainun ax kikësabi oi ꞌiti banakama ꞌaia kana ꞌën uni David ꞌakiansaribi okin mi ꞌakinti ꞌain, ꞌakinkin kana min rëbúnkinëxa Israel kaman ꞌapu ꞌinun ꞌimiti ꞌain, ꞌën uni David kásabi oi ka ain rëbúnki Judá menu ꞌikë unikaman ꞌapu ꞌiti ꞌikën.

³⁹ Usa ꞌaínbi kana Davidtan rëbúnki uisakin karana tëmëramiti ꞌai usakin ꞌati ꞌain, Salomónnën ñu ꞌaisama ꞌakë kupín, ꞌaínbi kana xënibua ꞌixun usakin ꞌatima ꞌain, kiax ka Dios kiaxa kixun ka Ahíasnën kakëxa.”

⁴⁰ Ësokian Ahíasnën kakë kuaxun ka Salomónnën Jeroboam ꞌaisatankëxa; ꞌaínbi ka Jeroboam Egipto me anua Sisac ꞌapu ꞌikë anu abati kuankëxa, kuanx ka anu Salomón bamatamainun tsóti bërúakëxa.

Salomón ñua ñuikë bana

⁴¹ Usai ꞌianan usakin ñukama ꞌá, ꞌimainun raíri banakama ax sinan ñuira ꞌaísha usai kia, banakama raíri a ka Salomónnën a ñukama kuënëokë kirika crónicas anu kuënëokëxa.

⁴² Salomón ax ka Jerusalén ëmanu cuarenta baritia kamabi Israel kaman ꞌapu ꞌiakëxa,

⁴³ usa ꞌikë ka ñukë aín papa Davidtan ëma kakë anu maíankëxa. Usa ꞌain ka ax baman aín bëchikë Roboam ax ꞌapu ꞌiakëxa.