1 Reyes 10 - Kashibo-Kakataibo Biblia

Sabá menu ꞌapu ꞌikë xanu Salomón isi kuan ñuikë bana

^1-2 Xanu achúshi Sabá menu ꞌapu ꞌiti anëkë an ka aín kushi ꞌinánkin ꞌakinkëxua Salomónnën Diosmi sinani ami kushikin ñu ꞌaia unikaman ñuikania kuakëxa, kuabiani ka an kuaisama ꞌimainun an ꞌunántisama banakama ñukákin tanti sinanx Jerusalén ëmanu kuankëxa. Kuanx ka aín suntárunën kushikaman bëararamainun aín camellokamanu ro sanuira ñusutinu ꞌaruxun camellokamanan nankë akama këñun ꞌaisamaira kuri këñunbi maxá chabáchabákikë upíirabu akama uanx bëbakëxa. Anu bëbaxun ka usakin ñukatia sinánbëtsinkë banakama a banabi Salomón ñukákëxa,

³ Ñukákëxunbi ka kamabi bana an ñukákë a ꞌapu Salomónnën uisai kara a bana kia a ñuixuankëxa. Uisa banabi ka Salomónnën a xanun ñukákëxun usai ka a bana kia kixun ꞌunánkëmama ꞌiakëxa.

⁴ Usakin unin ꞌunántisama banakama abi upíira okin ꞌunánkë Salomón kuanan aín xubu upíira okin ꞌamikë isi ka Sabá kakë ëmanua ꞌapu ꞌikë xanu,

⁵ aín piti ñukama bata ꞌinun mëtuakin ꞌamixun anuxun pikë ñu upiranu nankë isakëxa, isanan ka anua aín suntárunën kushikama ꞌikë, aribi upí isanan aín unikaman chupa upíbu pañumainun, an ꞌapu aín xëati ꞌaxunkë unikamaribi chupa upí pañukë isanan, anuxun Dios rabiti xubunubi ꞌakë anuxuan ñuina rëxun sacerdotekaman Dios xaroxunkë a kamabi isi ratúkin ka ꞌapu xanu an,

⁶ ësokin ꞌapu kakëxa: —ꞌËn nëtënuxun ësokin min ñu ꞌunánkëira ꞌixun ñu ꞌaia unin ñuia kuabëtsini uxun ꞌënbi iskë ënëx ka këmëma asérabi ꞌikën;

⁷ usa ꞌain kana asérabi kara usa ꞌikë kixun isi uxun bërí ꞌën bërúnbi iskin këmëkinma ka unin ñuiaxa kixun ꞌunan. ꞌAínbi ka añu ñukama ꞌanan kaina uisakin ira ñu ꞌai kixun ꞌë upíira okin ñuixunkankëma ꞌikën, usa ꞌaínbi ka ñu upíokin ꞌunánkëira ꞌixunmi ꞌamikë min ñukama ënëx ꞌëa ñuixunkëxun ꞌën kuakë usamaira ꞌikën.

⁸ Ësokin min ñu ꞌakëbë sapi ka min xanukamaxa upiti tsómainun, an mi ñu mëëxunkë min uni ënë kamaribi upíokin sinánkin ñu ꞌai upitani kuëënia, atun ka mi rapasu ꞌixun ñu ꞌunánkëira ꞌixun kakëxun min bana kuatia. Usa ꞌain ka atux kamáxbi kuëënia.

⁹ ¡Min ꞌIbu Diosan ka min Dios ꞌixun, upíokin ñu ꞌaia iskin nuibakin Israelkaman ꞌapu ꞌinun mi ꞌimiaxa! ¡Xënibua ꞌaínbi Israelkama ꞌikë mikama nuibakin Diosan, ꞌapu ꞌixunmi ꞌaisama okinma ñu atu ꞌaxúnti mi anëxuanxa usa ꞌain kamina bërí ꞌapu ꞌain!

¹⁰ Usakin pain katankëxun ka a xanun ꞌapu tres mil novecientos sesenta kuri ꞌinánkëxa ꞌinánan, ka ꞌitsaira ro sanuira ꞌimainun maxá upíirabu akama ꞌinánkëxa. Uinsaranbi ka Sabá kakë menu ꞌapu ꞌikë xanua ꞌapu Salomón ꞌinainshia usaribi ꞌitsaira ꞌimainun ꞌaisamaira sanuira ro Israel menu uínbi bëama ꞌikën.

¹¹ Usakin a ñukama ꞌinánan ka Hiram Tiro ëmanu ꞌikë ꞌapu, an Ofir kakë me axa Arabia menu ꞌikë anua ꞌain ñu maruti buánkë bakan nikë manë nunti anun kuri bëakëxa, bëanan ka sándalo kakë no imi ꞌitsaira tukapakë a kamakëñun maxá chabachaba kikë upíbu akamaribi bëakëxa.

¹² Usakin ꞌinánkëxun ka sándalo kakë no imi tukapakëa ꞌinánkë anun anuxun Dios rabiti xubu ꞌakë anu ꞌanan ꞌapun xubu anuribi ꞌamiakëxa. ꞌAmianan ka a ibi aín arpa ꞌanan Dios rabi kantakin a banamiti ñukamaribi ꞌakëxa. Uínsarabi ka ꞌitsaira ꞌimainun ꞌaisamaira sándalo kakë no imi unin isáma ꞌikën. ꞌImainun ka bërí nëtënbi bëráma ꞌia usaribi ꞌaisamaira sándalo kakë no imi kirikanu kuënëokë ënë ñuikin kuënëo usaribi unin isima.

¹³ Usakin ꞌakëxun ka ꞌapu Salomónnën Sabá menu ꞌapu ꞌikë xanu kamabi ñu an ñukátisa tankë a ꞌinánkëxa, ꞌinánan ka anbi kuëënxua a ꞌinánti ami kuënkin nankë aribi ꞌinánkëxa. Usakin ꞌinánkëx ka ꞌapu anëkë xanu aín suntárunën ꞌapukaman uamainun atubëbi anuaxa ukë aín menu kuantëkëankëxa.

Salomón upíokin ñu ꞌaia ñuñuira ꞌia ñuikë bana

¹⁴ Kamabi baritian Salomónnën xuxunkëxun bikë kuri ax ka veintidós milbëtan sënën aín ꞌëñë ꞌiakëxa,

¹⁵ ax ka unikaman kupíokë akëñun tupunkëma ꞌiakëxa, usakin ka Israel unibu ñuñuirakama axa aín ñu marui tëkë akaman upiti atun ñu marui tëëti kupín kupíomainun, kamabi ꞌapu Arabia menu ꞌikë akama ꞌimainun, bëtsi menu ꞌikë ꞌapukaman kupíokëxa.

¹⁶ Usokin ꞌamianan ka ꞌapu Salomónnën aín uni an ñu ꞌaxunkë akama kuri charóxuan ami katamëti parókin doscientos ꞌaxúnun ꞌamiakëxa, a kuri parókin ꞌakë achúshi achúshinëx ka chabu ꞌianan mapai achúshi ꞌimainun achúshiokin tupunkë aín kilo ꞌiakëxa.

¹⁷ Usokian ꞌanun ꞌamianan ka trescientos chukúmabu ꞌitanunribi charóxun kuri ami katamëti parókin ꞌamiakëxa, usakian ami katamëti parábu ꞌitánun kuri ꞌamikë chukúmabu ꞌax ka achúshi kilo okin tupúanan nëbë́tsi sënë́onkin achúshi tupunkë aín ꞌëñë ꞌiakëxa, akama ka usokin ꞌamitankëxun ꞌapun xubu Líbanunën ni kakin anëkë anua mëníokin bukunun ꞌamiakëxa.

¹⁸ ꞌAmianan ka ñuina xëtakëñun anu tsóti achúshi cha ꞌitánun, ꞌamixun kurin ratátakakin ronun ꞌamiakëxa.

¹⁹ Anua ꞌapu tsóti ꞌakë ax ka aín amo rabë́bi uarukin mapai ꞌimainun achúshi tapiti okin ꞌakë ꞌiakëxa; ꞌimainun ka anuira tsóti ax turua ꞌimainun ami katiki tsóanan ami bankëpimëtia tsóti anubi paru ꞌinúan tankin ꞌakë rabë́ nitsinkin nankë ꞌiakëxa.

²⁰ Usakin ꞌamixun ka mapai rabë́ ꞌimainun rabë́ paru ꞌinúan tankin ꞌakë a, mapai ꞌimainun achúshi tapiti ꞌakë anu amo rabë́bi nitsinkin nankëxa. ¡Uisaxunbi ka bëtsi ꞌapukaman an ñu mëëxunkë aín unikama ësaribi ꞌitánun ñu upíokin ꞌaxúnun ꞌamiama ꞌikën!

²¹ Usakin ꞌakë ꞌimainun ka, amia ꞌapun xëakëkama ax manë xampakama ax bëtsi ñu këñun mëskukin ꞌakinma kurishi ꞌakë ꞌiakëxa, ꞌimainun ka ꞌapun xubu Líbanunën ni kakin anëkë anu nankë. Kamabi amia ꞌapun pikë ñukama ax upíirabu kuri ꞌakëishi ꞌiakëxa. Usa ꞌain ka manë uxua ꞌakë ñubi anu ꞌaíma ꞌiakëxa, a nëtëkaman ka Salomón ñukëma pain ꞌain kuríki ꞌakë ñukamax kupímara ꞌiakëxa,

²² usaía ꞌimainun ka ꞌapun manë nunti chaiirabu anúan ñu maruti nikinkë Tarsis menua ꞌikë a kamaxa kuanmainun, Hiram kakë ꞌapun manë nunti anun ñu maruti uankë a kamaribi abëbi, kuri, kuríki, ñuina xëta ꞌinánan ni mananën nikë ñuina ꞌimainun pabukama ꞌarakakë a kamabi ꞌapu Salomón bëxuni ai rabë́ ꞌimainun achúshi baritia ꞌikëbë ꞌikëbë bëbakëxa.

²³ Usakin upíokin ñu ꞌai ka kamabi menu ꞌikë ꞌapukama ꞌikësamaira ꞌinun ñuñuira ꞌianan ñu upíokin ꞌunánkëira ꞌapu Salomón ꞌiakëxa.

²⁴ Usakin ꞌaia kuati ka kamabi menu ꞌikë unikama uisaira okin karaisa Diosan ꞌapu ꞌimianan aín kushi ꞌinánkin kamabi ñu ꞌunánkëira ꞌinun ꞌimia kixun Salomón istisa tankëxa,

²⁵ usakin istisa tankin ka kamaxunbi baritia ꞌirukëtibi a ꞌinainshiti ñukama anu uankëxa: uankin ka manë uxua ꞌakë ꞌimainun kuri chupakama, ꞌianan anun ꞌakánanti ñukama a ꞌimainun ro, sanuira ꞌimainun caballo, bënë ꞌimainun aín xanu akama këñunbi ñu a ꞌinánti anu kuankin uanxuankëxa.

ꞌApu Salomónnën marukin bitankëxun caballo ꞌimainun caballonën nikinkë carreta amiribishi marutëkëan ñuikë bana

²⁶ ꞌApu Salomónnën ka caballonën nikinkë carretakama ꞌimainun axa caballonuax ꞌakánanti ꞌunan unikama timëkin biakëxa. Usa ꞌain ka aín caballonën nikinkë carreta mil cuatrocientos ꞌiakëxa, ꞌimainun doce mil axa caballonën nikë suntárukama a Jerusalénnu ꞌikë xubu anua suntáru ꞌikë anu xuakëxa.

²⁷ Usakin ꞌanan ka ꞌapu Salomónnën Jerusalén ëmanua ꞌaisamaira maxása kuríki ꞌinun ꞌimiakëxa; usakian ꞌimikëbë ka kunxan kakin anëkë no imi akamaxribi ꞌaisamaira higuera ninu unia iskësaira me sapannu ꞌiakëxa.

²⁸ Usa ꞌain ka Salomónnën suntárunën ꞌapun unikaman Musri kakë menu ꞌikë anua maruanan Cilicia, kakë ëma anuaribi marutakëxun aín caballokama axa ꞌapun ñu marui tëkë manë nunti chaiirabu anúan Israel menu buánxuntanun xuakëxa.

²⁹ Achúshi caballonën nirinkë upíokin Egipto menuxun ꞌakë marukë ax ka seiscientos manë kuríki kupíakëxa, ꞌimainun ka caballo achúshi ciento cincuenta manë kuríki ꞌakë kupíakëxa. Usakian ꞌaia ka hititanu ꞌikë ꞌapu ꞌimainun Sirionu ꞌikë ꞌapukamanribi Salomónnën suntárunën kushikaman ꞌamikëxun atumi ꞌixun aín ñukama maruakëxa.