1 Pedro 5 - Kashibo-Kakataibo Biblia

Axa Jesucristomi catamëcë unicama ꞌësëti bana

¹ Axa Jesucristomi catamëcë unin cushicamasaribi cana ꞌëx ꞌain. Usa ꞌixun cana atúan ꞌacësaribi oquin Cristo camabi unin ꞌucha cupía tëmëra, a ñuiquin bana ñuixunin. ꞌAnan cana atúxa ꞌicësaribiti Cristo utëcëncëbë aín nëtënu abë ꞌiti sinanin. Usa ꞌixun cana axa Jesucristomi catamëcë unin cushicama mitsu ësaquin cain:

² Atun cushicama ꞌixun camina Nucën Papa Diosan unicama bana ñuixunquin, atúxa upí nuituñu ꞌaish chuámarua bucunun ꞌaquinti ꞌain. An carnero bërúancë unin aín carnero ꞌacësaribi oquin camina a unicama upía ꞌinun bërúanti ꞌain. Usoquinmi ꞌanúan mitsu unin caíscë cupíshima camina asérabi ꞌaisa tanquin ꞌati ꞌain. ꞌAnan camina curíqui biti sinánxuinshima minbi asérabi ꞌaquinsa tanquin ꞌati ꞌain.

³ ꞌApúxa unían ax quicësa oquinshi ꞌanun quiax quicësaribiti camina banatima ꞌain. Usari ꞌíma camina mitsúnmi bana ñuixuncë unicamaxa usaribiti ꞌinun, upíshi ꞌiti ꞌain.

⁴ Usoquin ꞌaia ca Jesucristo, unin ꞌacësamaira oquian an aín unicama bërúancë, an utëcënquin mitsu —asábi ca —quixun catancëxun aín nëtënuaxmi xënibua ꞌaínbi abë cuëënun mitsu ꞌimiti ꞌicën. Ënë nëtënuax cuaiquin canania uisa ñu cara ꞌináncëxun bitsia uni cuëëncëbëbi ca an bicë ñu chëquia. Usaía uni ꞌicë ꞌaínbi camina mitsux xënibua ꞌaínbi Nucën Papa Diosbë ꞌaish cuëënti ꞌain.

⁵ Usaribi oquin cana bëná unicama ësaquin cain, mitsun cushicaman bana camina timaquinma cuati ꞌain: Nucën Papa Dios ca unia rabíti cuëënima. Usa ꞌixunbi ca axa rabícëma unicama nuibaquin ꞌaquinia. Usa ꞌain camina —ꞌëx cana bëtsi unisamaira ꞌai —quixun sinanima camáxbi bëtsin sináncësaribi oquin sinani upiti ꞌësëananti ꞌain.

⁶ Usa ꞌain camina aín bana timaima uisa ñu cara ꞌicëbëbi bënëtima Nucën Papa Dios ꞌApuira ami catamëti ꞌain. Usaími ꞌia ca an anúan ꞌati nëtë ucëbëtan uisai cara ꞌiquin tëmëracë ꞌaíshbimi usai ꞌicëmasa ꞌianan asábiira ꞌinun mitsu ꞌimiti ꞌicën.

⁷ Uisaquin sinani caramina masá nuituti, añu ñu sinani caramina racuëti, a ñuiquin camina Nucën Papa Dios cati ꞌain, an ca mitsu nuibaquin bërúanquin ꞌaquinia quixun ꞌunánquin.

⁸ Paru ꞌinúan cuëë́rui aín piti bari nicësa, usaribiti ca ñunshin ꞌatimanën ꞌapu, uni ñu ꞌatima ꞌanun quixun sinánmianan Nucën Papa Diosmi sinánti ënminuxun bari nitsia. Usa ꞌain camina mitsua paránti rabanan bërúancati ꞌain.

⁹ Usa ꞌixun camina ñunshin ꞌatimanën ꞌapúan ñu ꞌatima ꞌamitisa tancëxunbi Jesucristomi catamëquin usa ñu ꞌatima ꞌain. Camina ꞌunánti ꞌain, mitsu ꞌacësaribi oquin ca ñunshin ꞌatimanën ꞌapun, camabi menu ꞌicë axa Jesucristomi catamëcë unicama tania quixun.

¹⁰ Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.

¹¹ Camabi unin ca Nucën Papa Dios rabiti ꞌicën, nëtë xënibua ꞌaínbi. Cëñútimoi ca axira cushiira ꞌApu ꞌia. Usai ca ꞌia.

Bërúanxa ꞌinúan Pedronën Jesucristomi catamëcë unicama ca

¹² Nucën xucën Silvano, ax ca ꞌën iscëx upiti Jesucristomi sináncë ꞌicën. Usa ꞌain cana an mitsu buánxunun ënë quirica mitsu ꞌaxuan. Ënë quiricanu ꞌësë́anan cana mitsu cain, an mitsu upí oquin cushionan ꞌaquincë cupí camina asérabi ꞌunánti ꞌain, uisaira oquin cara Nucën Papa Diosan mitsu nuibatia quixun. A ënima camina mixmi ꞌicësabi oi ami upiti catamëti ꞌain.

¹³ Babilonianu ꞌicë axa Jesucristomi catamëcë unicama, mitsu ꞌacësaribi oquian Nucën Papa Diosan ainan ꞌinun caíscë, acaman ca bërúanxmi ꞌicanun ꞌën mitsu canun ꞌë caxa. Marcos, ꞌën bëchicësa, anribi ca bërúanxmi ꞌinun ꞌën mi canun ꞌë caxa.

¹⁴ Jesucristo cupí micamaxbi xucë́nsa ꞌaish camina nuibanani bërúanx ꞌinun bëtsibë bëtsibë cananti ꞌain. Uicamax cara Jesucristonan ꞌicë ax chuámarua bucucanti cana cuëënin. Ashi, Pedro.