1 Pedro 4 - Kashibo-Kakataibo Biblia

Nucën Papa Diosan a ꞌanun nu ꞌimicësabi oquin ñu upí oquin ꞌati

¹ Uni ꞌixun ca Cristonën tëmëraquin paë tancëxa. Usa ꞌain camina ꞌunánti ꞌain, mitsúnribi camina —sapi cana tëmëraquin paë tanti ꞌai —quixun sinánti ꞌain. Uin cara Jesucristonan cupí tëmëraquin paë tanxa an ca ñu ꞌatima ꞌai ꞌuchati ëanxa.

² Usa ꞌixun ca axa Jesucristomi sináncëma unin sináncësa oquin sinanima Nucën Papa Dios cuëëncësa oishi ꞌia, anúan bamati nëtëa ꞌitámainun.

³ Bëráma camina axa Nucën Papa Diosmi sináncëma unicaman ꞌacësaribi oquin ñunshínquin ñu ꞌatima ꞌanan paë́anan, paë́nxun pi sharánan Nucën Papa Dios rabiquinma unían anbi sinánxun ꞌacë ñuishi rabiacën. Usaquin ꞌaquinbi camina a ñucama ëancën.

⁴ Usai ꞌiquinmi atubëtan ñu ꞌatëcëniama oquin ca unin —uisa cupí cara nubë niquinbi nu ëanxa —quixun sinánquin mitsu ꞌatimaquin ñuia.

⁵ Mitsu ñuiabi ca ax utëcënquin Cristonën a unicama ꞌimainun camabi uniribi, axa bamacëmacama ꞌimainun bamacëcamaribi —uisa carana ënë unicama oti ꞌai —quixun isti ꞌicën, an ꞌacë ñucama ꞌunánquin.

⁶ Usai ca ꞌiti ꞌicë quixuan ꞌunánun ca bamacëma pain ꞌixuan unicaman cuanun aín unicaman Cristo ñui quicë bana ñuixunia. A bana cuati Jesucristomi catamëcë ꞌaish ca aín unicama, camabi uni ꞌicësaribiti bamati ꞌaíshbi, Nucën Papa Dios ꞌicësaribiti nëtë́timoi tsóti ꞌicën.

⁷ Anúan ënë menu ꞌicë ñucama cëñúti nëtë ca ꞌuramatia. Usa ꞌain camina camabi nëtën upí oquin sinani Nucën Papa Diosbë banati ꞌain.

⁸ ꞌIanan camina mitsux asérabi nishananima nuibanani upitax bucuti ꞌain. Bëtsi uni nuibacë ꞌixun ca unin a unin ꞌuchacama ñuiquinma manuia.

⁹ Min xubunua aia camina bëtsi uni biisama tani bëtsi sinánquinma upí oquinshi biti ꞌain.

¹⁰ Mitsúnmi raíri uni ꞌaquinun ca Nucën Papa Diosan uisa ñu caramina ꞌati ꞌai quixun mitsu ꞌimia. Usa ꞌain camina Nucën Papa Diosan mitsu achúshi achúshi bëtsi bëtsi ñu mëëti ꞌanun ꞌimicë ꞌixun mitsun ñu mëëti upí oquin ꞌati ꞌain.

¹¹ Uix cara banati ꞌicë, ax ca Nucën Papa Diosan sinánmicësabi oi banati ꞌicën. Uin cara raíri uni ñu ꞌaxunia an ca Nucën Papa Diosan cushiocëxun upí oquin ꞌati ꞌicën. Usoquin camina Jesucristonan ꞌixun, añu ñu caramina ꞌai a Nucën Papa Diosa cuëëntanun ꞌati ꞌain. Ax ꞌApuira ꞌaish cushiira ꞌicë ca camabi unin rabiti ꞌicën, nëtë xënibua ꞌaínbi. Usaquin ca ꞌati ꞌicën.

Jesucristonan ꞌaish tëmërati

¹² ꞌËn nuibacë xucë́antu, mitsúnmi asérabi caramina Jesucristomi catamëti quixun ꞌunánuan bëtsi bëtsi ñu ꞌicëbë tëmëraibi camina ratuti —uisa cupí carana ësai ꞌi —quiax bënë́tima ꞌain. Camina sinánti ꞌain, axa Jesucristomi catamëcë unicamax ca usari ꞌia quixun.

¹³ Bënë́quinma camina sinánti ꞌain, ami nishquian unin bëtsi bëtsi ocë́xa Cristo tëmërasaribi oquin cananuna nunribi tëmërai quixun. Usaquin sinani camina tëmëraibi cuëënti ꞌain, usaribiti ꞌApuira ꞌaísha Cristo aia isi cuëënux.

¹⁴ Cristonan cupía unin mitsumi nishquin ꞌatimaquin ñuicëxbi camina Nucën Papa Diosan Bëru Ñunshin Upí cushiira, axa mitsubë ꞌain, cuëënti ꞌain. Unían ꞌatimaquin ñuiabi camina mitsun Cristo rabin.

¹⁵ Mitsua Jesucristonan cupí unin bëtsi bëtsi ocëx camina a sinani rabíntima ꞌain. Usa ꞌaíshbi camina uni ꞌacë cupí ꞌianan ñu mëcamacë cupí ꞌianan ñu ꞌatima ꞌacë cupí ꞌianan ñuianancë cupími tëmëracë a sinani rabínti ꞌain.

¹⁶ Usaquin ñu ꞌacëma ꞌaíshbi Cristonan ꞌicë cupía unin tëmëramicëxbi camina rabíntima ꞌain. Rabínquinma camina Nucën Papa Dios rabiti ꞌain, mitsúxmi asérabi ainan cupí.

¹⁷ An aín bana ꞌacë unibi ca Nucën Papa Diosan uisai cara ꞌia quixun isia. Usa ꞌixun ca an aín bana cuacëma unicama aira atun ñu ꞌatima ꞌacë isquin uisaira cara oti ꞌicë usoquin ꞌati ꞌicën.

¹⁸ ¿Atux aín ñu ꞌatima ꞌacë ënquin ñu upí ꞌacë ꞌaíshbia, aín unicama ië́tima ꞌaíshbi ië́cë ꞌain, cara ax ami catamëcëma ꞌuchañu unicama uisairai ꞌiti ꞌic?

¹⁹ Usa ꞌain camina tëmëraibi —Nucën Papa Dios cuëëncëbë cana ësai ꞌi —quixun sinánquin mitsun ꞌacësabi oquin upí ñuishi ꞌanan Nucën Papa Dios, an mitsu unio, an bërúanun ami catamëti ꞌain, an ca aín quicësabi oquin ꞌë bërúanti ꞌicë quixun ꞌunani.