1 Pedro 3 - Kashibo-Kakataibo Biblia

Usai uni aín xanubë ꞌiti bana

¹ Xanucama, mitsuribi cana cain, min bënë́an cacëxun cuaquin ꞌatimaquin sinanima camina abë upí ꞌiti ꞌain. Usaími mitsux ꞌicëbë ca min bënë, Cristo ñui quicë bana cuaisama tancë ꞌaíshbi, min cacëxmabi upitax ꞌia isi sinanati ꞌicën,

² mixmi upí sinánñu ꞌaish abë upí ꞌain.

³ Upíira upí ꞌiisa tanquin camina min bu ꞌaisamaira oquin mëníonan, curi ñun mëníocanan, chupa cupíira cupícë pañutima ꞌain.

⁴ Usai ꞌima camina mitsux upí sinánñu ꞌaish bëtsibë nishananima upitishi banati ꞌain. Usai ꞌia isquin ca bëtsin sinánti ꞌicën —a xanux ca aín nuitu upí ꞌicë —quixun. Usai upí ꞌiti ax cuni ca uisa ꞌaíshbi cëñutima. Usai ꞌími mitsux upí ꞌicë isi ca Nucën Papa Dios cuëënia.

⁵ Usairibi ca an Nucën Papa Dios cuëëncësabi oquin ꞌaisa tancë xanucamaxribi ꞌiacëxa. Nucën Papa Diosmi catamëanan aín bana cuaquin ca aín bënë quicësabi oquin ꞌacëxa.

⁶ Usaribi oquin ca Saran aín bënë Abraham cuëëncësabi oquin ꞌanan aín bënë ꞌicëbi —ꞌën ꞌibu —cacëxa. Mitsúxribi ñu upíshi ꞌanan, Nucën Papa Diosmi catamëti, uisa ñu cara ꞌicëbëbi racuë́cëma ꞌaish camina Sara ꞌiásaribi ꞌiti ꞌain.

⁷ Xanuñu unicamaribi cana ësaquin cain, min xanubë camina upí oquin sinani nuibananti ꞌain. Axa xanu ꞌaish cushima cupíshima, mix ꞌicësaribitia ax Nucën Papa Diosmi catamëcë cupí camina a nuibaquin ꞌaquinti ꞌain, mitsúnmi usoquin ꞌaia isquian Nucën Papa Diosan mitsúnmi a ñucácë bana upí oquin cuati cupí.

Jesucristomi catamëquin upí ñu ꞌacë cupía ax tëmëracë unicama

⁸ Ënë banaribi cana mitsu cain, axa Jesucristomi catamëcë uni raírinën sináncësaribi oquin sinani camina atubë nuibananti ꞌain, atúxa mitsun xucë́nsaribi ꞌain. Camina bëtsibë camáxbi nuibanani ꞌaquianani rabítima ꞌain.

⁹ An mitsu ꞌatimocë unicama camina cupiquin aribi ꞌatimotima ꞌain. Axa mitsumi ꞌatimati banacë unimi camina mitsúxribi ꞌatimati banatima ꞌain. Usai ꞌimi bëtsibë nuibanani upitax bucunun ca Nucën Papa Diosan ainan ꞌinun mitsu caísacëxa.

¹⁰ Ësaribi ca Nucën Papa Diosan bana cuënëo quia: Ax upitax tsótisa tancë unix ca ñu ꞌaisama ñui banaima ꞌianan cëmëi banatima ꞌicën.

¹¹ Ñu ꞌaisama ꞌati ënquin ca ñu upíshi ꞌati ꞌicën. Nishananíma ca unibë upíshi ꞌiti ꞌicën.

¹² Usai ꞌiquin ca ꞌunánti ꞌicën, Nucën ꞌIbu Diosan ca an upí ñu ꞌacë unicama bërúanquin ꞌaquinquin aín bana cuaquin an ñucácësabi oquin ꞌaquinia quixun. Usa ꞌixunbi ca an ñu ꞌatima ꞌacë unicama an ꞌaquinima.

¹³ Mitsúnmi upí ñu ꞌaia isía mitsu ñui uni mimi manáncëxbi ca cëmëi quicë ꞌiti ꞌicën.

¹⁴ Mitsúnmi ñu upí ꞌacë cupí tëmëraibi camina Nucën Papa Diosan ꞌaquincëx cuëënti ꞌain. Mimia uni ꞌicë́xbi camina racuëti masá nuitutima ꞌain.

¹⁵ Usai ꞌíma camina min nuitu mëu —Cristo ca asérabi ꞌën ꞌibu ꞌicë —quixun sinani ami catamëti ꞌain. Unin mitsu —uisa cupí caramina Jesucristomi catamëquin abë tsoti sinani —quixun ñucácëxun anun cati bana ꞌunáncë camina ꞌiti ꞌain. Usa ꞌixun camina cëruti rabíquinma upí oquinshi cati ꞌain.

¹⁶ A sinani masá nuitunuxun ñu ꞌatima ꞌaíma camina chuámashi ꞌiti ꞌain. Usaími mitsux Cristonën ꞌimicëx upitax ꞌia isi ca an mitsu ꞌatimaquin ñuicë unicama —nuxnu quicë bana ax ca cëmë ꞌicë —quixun sinani rabínti ꞌicën.

¹⁷ Axa cuëëncëbëa, Nucën Papa Diosan uni aín ñu upí ꞌacë, a cupí tëmërati asábi ꞌaínbi ca an ñu ꞌatima ꞌacë cupía uni tëmërati ax aín ꞌuchabi ꞌicën.

¹⁸ Ax upí ꞌaíshbi ca Cristo camabi unin ꞌucha cupí achúshitishi bamacëxa, unicama ami catamëti Nucën Papa Diosnan ꞌinun. Uni ꞌaish bamatancëxbi aín namibë aín bëru ñunshin ꞌitëcëni baísquiax ca bëtsi ꞌiacëxa.

¹⁹ Cristo bamatancëx baísquicëma pain ꞌixun ca anua bama unicaman bëru ñunshin sipuacësa ꞌicë, anu cuanxun bana ñuixuancëxa.

²⁰ Bamacëma pain ꞌixun ca a unicaman Nucën Papa Dios cuëëncësabi oquin ꞌaisama tancëxa. Noénëan aín manë nunti ꞌamainun ca unicama aín ñu ꞌatima ꞌacëcama ënun quixun Nucën Papa Diosan caíancëxa. Caíncëxunbia aín ñu ꞌatima ꞌacë ëncëma ꞌicëa aín patsan bacan cëñumainun ca ꞌitsamashi ocho uníxëshi manë nunti mëu atsini ië́acëxa.

²¹ Nucën Papa Diosan sinánmicëxa Noé manë nuntinu ꞌiruax ië́asa, usaribiti cananuna nuxribi Nucën Papa Diosmi catamëti ꞌunpaxan nashimicë ꞌaish iëtin. Nun namia chuañuma ꞌinun cananuna nashimicë ꞌitima ꞌain. Usai ꞌíma cananuna —Jesucristo baísquia cupía Nucën Papa Diosan nu upí ꞌimicë ꞌaish cananuna nun ꞌuchacama tërë́nce ꞌaish an iscëx upí ꞌai —quixun sinani nashimicë ꞌain.

²² Baísquitancëx naínu cuan ꞌaish ca Jesucristo ax Nucën Papa Diosbë ꞌApu ꞌaish aín mëqueu ꞌicën. Usa ꞌicë ca ángelcama ꞌimainun uisa cushi cara anribi aín bana cuatia.