1 Pedro 2 - Kashibo-Kakataibo Biblia

¹ Usa ꞌain camina Nucën Papa Diosnan ꞌixun ñu ꞌatimacama, cëmëti, uni paránti, nutsiti, unibë ñuiananti, acama ënti ꞌain.

² Bërí bacë́ncë tuacën ca anun caninuxun aín titan xuma ꞌati cuëënia. Usaribi oquin camina Nucën Papa Diosan bana upí oquin ꞌunánti cuëënti ꞌain, ainan ꞌaish aín cuëëcësabi oquin ꞌai ami cushicë ꞌinuxun.

³ Usai ꞌi camina Nucën ꞌIbu Diosmi sinánquin ax ca asérabi upí ꞌicë quixun ꞌunáncë ꞌaish aín bana ꞌunánti cuëënti ꞌain.

Cristo ami xubu raroti maxáxsa

⁴ Usa ꞌain camina axa bamatimoi tsócë, Jesucristo, a sinani ami catamëti ꞌain. Judíos unían cuëëncëma ꞌaíshbi ca anun cuëënquin Nucën Papa Diosan iscëx ax upíira ꞌicën. Unían xubu ꞌaquin maxax upí ami xubu raroti caíscë usaribi ca Jesucristo ꞌicën.

⁵ Usa ꞌain camina mitsux a xubumi bucúnrucë maxáxsa ꞌain. Jesucristomi catamëcë ꞌaíshmi asaribi upí ꞌinun ca Nucën Papa Diosan ainan ꞌinun mitsu ꞌimiaxa. Usa ꞌain camina Nucën Papa Diosan Bëru Ñunshin Upía mitsubë cupí bëtsibë bëtsibë nuibanani, bëtsin sináncësaribi oquin sinani achúshisa ꞌain. Usa ꞌixun camina Jesucristo cupí ainan ꞌixun Nucën Papa Dios cuëëncësabi oquin ñu ꞌanan a rabianan unicama a ñucáxunti ꞌain.

⁶ Nucën Papa Diosan bana cuënëo ax ca ësai quia: ꞌËn cana maxax upí nancësa oquin uni achúshi, Sión cacë matá me anua Jerusalén ꞌicë, anua ꞌinun ꞌimiti ꞌain. Unían xubu ꞌanuxun maxax upí ami xubu raroti caíscë usaribi oquin ꞌën caíscë ca ax ꞌicën. Axa ami catamëcë unicaman ca isti ꞌicën, an ca asérabi ax quicësabi oquin atu ꞌaquinia quixun.

⁷ Ami catamëcë ꞌixun camina mitsun anun cuëëncë ñu upí sináncësamaira oquin a sinánti ꞌain. Mitsux usai ꞌicëbëbi ca axa ami catamëcëma unicamax Nucën Papa Diosan bana cuënëo ësai quicësa ꞌicën: An maxax xubuacë unían bitancëxun a cuëënquinma racáncë ꞌaíshbi ca a maxax bërí amia xubu cushicë ꞌicën, itá upímia xubu cushicë usaribiti.

⁸ ꞌImainun ca Nucën Papa Diosan bana ësai quia: A maxáxmi ca uni raírinëx tatíqui chacáti ꞌicën, a maxax chami chacati ca nipacëti ꞌicën. Maxax ñui quicë ꞌaíshbi ca a bana Cristo ñui quicë ꞌicën. An Jesusan bana cuaquinbi asérabi ami catamëquin aín bana quicësabi oquin ꞌacëma ax ca uni maxáxmi tatíqui nipacëcësaribi ꞌicën. Ui unicamax cara usai ꞌiti ꞌicë quixun ca Nucën Papa Diosan bëráma ꞌunáncëxa.

Nucën Papa Diosnan unicama ñuicë bana

⁹ A unicama usa ꞌaínbi camina mitsux Nucën Papa Diosan ainan ꞌinun caísa ꞌain. Usa ꞌixun camina ax cuëëncësabi oquin ꞌanan aín unicama a ñucáxunin. Camina an ꞌimicëx upí ꞌaish aín uni ꞌain. Usa ꞌixunmi a rabiquin an ꞌacë ñucama camabi uni ñuixunun ca Nucën Papa Diosan mitsu ainan ꞌinun caísacëxa. Mitsux bëráma bëánquibucënu nicësa ꞌiá ꞌaíshbi camina bërí an ꞌimicëx xabánu nicësa ꞌain, axa mitsubë ꞌain.

¹⁰ Bëráma Nucën Papa Dios ꞌunáncëma ꞌiá ꞌaíshbi camina mitsux bërí aín uni ꞌain. An ca mitsu nuibaquin ꞌaquinti ꞌicë quixun ꞌunáncëma ꞌicëbia Nucën Papa Diosan nuibaquin mitsun ꞌuchacama tërë́nxuan ꞌaish camina ainan ꞌain.

Nucën Papa Dios cuëëncësabi oi ꞌiti bana

¹¹ ꞌËn nuibacë xucë́antu, cana mitsu cain, Nucën Papa Dios mitsun ꞌApu ꞌain ca aín nëtëx mitsunanribi ꞌicën. Usa ꞌain camina ënë menu ꞌaish unia aín menumabi ꞌicësaribi ꞌain. Usa ꞌaish camina anbia ꞌatimaquin sináncë cupía ꞌatima ñu ꞌacë uníxa ꞌicësaribiti ꞌitima ꞌain. Usa unix ca Nucën Papa Diosbë upí ꞌima.

¹² An Nucën Papa Diosan bana ꞌunáncëma unicaman isnun camina mitsux upitax bucuti ꞌain. Usaími ꞌia isi ca atux an ñu ꞌatima ꞌacë uni ꞌacësa oquin mitsu ñui ꞌatimati banacë ꞌaíshbi mitsúnmi upí oquin ñu ꞌaia isá ꞌixun anúan an camabi unin ñu ꞌacë isti nëtën Nucën Papa Dios rabiti ꞌicën.

¹³ Nucën ꞌIbu Jesucristomi sináncë ꞌixun camina camaxunbi mitsun ꞌapucama ënë menua unin ꞌapu ꞌimicë, axa quicësabi oquin ñu ꞌati ꞌain. Amiira unicama cushicë ꞌapucëñunbi,

¹⁴ camina an anëcë aín unicaman banaribi tanti ꞌain. Atux ca unían uisa ñu cara ꞌaia mëníonuan ꞌapun ꞌimicë ꞌicën. An ꞌamicëxun ca atun axa ꞌuchacë uni usaquin ꞌatëcënxunma ꞌanun castícania. Usaquin ꞌanan ca an ñu upí ꞌacë unicama a nuibaquin —mix camina upí ꞌai —quixun caia.

¹⁵ Mitsúnmi upí ñuishi ꞌati ca Nucën Papa Dios cuëënia. Usaquinmi ꞌaia isi ca an Nucën Papa Diosan bana ꞌunáncëma ꞌixun an upí oquin sináncëma unicama ax mitsumi uisaíbi banatima ꞌicën.

¹⁶ Mitsun upí ñuishi ꞌai camina ꞌapucamami racuë́tima ꞌain. Usa ꞌaíshbi camina —ꞌëx cana camabi unin iscëx upí uni ꞌai —quixun sinánquin amo cëmëanan ñu ꞌatima unë́xun ꞌati sinántima ꞌain. An asérabi Nucën Papa Dios cuëëncësabi oquinshi ꞌacë unisa camina ꞌiti ꞌain.

¹⁷ Camabi uni camina upí oti ꞌain. Axa Jesucristomi catamëcë unicama camina nuibati ꞌain. Nucën Papa Diosmi camina racuë́ti ꞌain. Racuë́anan camina mitsun ꞌapu quicësabi oquin ñu ꞌati ꞌain.

Cristo tëmërasaribi oía aín unicamax tëmërati bana

¹⁸ Uni ñu mëëxuncë ꞌixun camina ami ñu mëëxuncë unían mi ꞌamicëxun ꞌaisama tanquinma a ꞌanúan mitsu cacë ñu a upí oquin ꞌaxunti ꞌain. Usaquin camina an mitsu nuibacë unishima, an mitsu nuibacëma uniribi upí oquin ñu ꞌaxunti ꞌain.

¹⁹ An ñu mëëxuncë unían upí oquin ñu mëëxuncëxunbia an ñu mëëmicë unin ꞌatimoquin tëmëramicëxunbi ca an uni ñu mëëxuncë unin —ꞌëx cana Nucën Papa Diosnan ꞌai —quixun sinánquin tanshiti ꞌicën. Usai ꞌiti ca Nucën Papa Diosan iscëx upí ꞌicën.

²⁰ Usa ꞌaínbi ca upí oquin ñu mëëiama, an mitsu ñu mëëmicë unin mitsu ꞌatimoquin tëmëramicëxunmi tanshitiabi Nucën Papa Diosan mitsu upí isima, mitsun ꞌucha cupía usoquin mitsu ꞌaia isquin. Isanan ca upí oquinmi ñu mëëxuncëxunbia an mitsu ñu mëëmicë unin ꞌatimoquin tëmëramicëxunmi tanshitia Nucën Papa Diosan mitsu upí isia.

²¹ Usaími ꞌinun ca Nucën Papa Diosan mitsu aín uni ꞌimiaxa. Cristonën ca ñu ꞌatima ꞌacëma ꞌixunbi mitsu cupí tëmëracëxa. Usaribi oquin camina ñu atima ꞌacëma ꞌaish tëmëraquinbi tanshiti ꞌain.

²² Cristonën ca uisa ñu ꞌatimabi ꞌama ꞌicën. ꞌAnan ca uisaquinbi uni paránma ꞌicën.

²³ Unían ami nishquin ñu cacëxunbi ca usaribi oquin cáma ꞌicën. Usa ꞌixun ca unían ꞌatimoquin tëmëramicëxunbi uni —cana mi cupiti ꞌai —quixun cáma ꞌicën. Cupiti sinánquinma ca —ꞌën Papa Diosan cuni ca upí oquin isquin mëníoti ꞌicë —quixun sináncëxa.

²⁴ Nun ꞌuchacama cëñucë ꞌaíshnu amiribishi ñu ꞌatima ꞌatëcënima, ñu upíshi ꞌai tsónun ca Cristo nun ꞌuchacama bicë cupí i curúsocënu bamacëxa. Mitsúxmi ñu ꞌatima ꞌai ꞌinsíncësa ꞌaíshbi upí ꞌinun ca ax ꞌaisamaira oquin paë tënëi bamacëxa.

²⁵ Carneronëxa ꞌibuñuma ꞌaish ꞌicësari camina mitsux ꞌiacën. Usa ꞌiá ꞌaíshbi camina sinanati Cristomi catamëan. Amia catamëcëxuan aín ꞌibun carnero bëruancësa oquin ca an upími ꞌinun mitsu bërúanquin ꞌaquinia.