1 Pedro 1 - Kashibo-Kakataibo Biblia

Axa bëtsi bëtsi menuax Jesucristomi catamëcë unicama Pedronën quirica cuënëoxuan

¹ ꞌËx cana Pedro, aín bana unicama ñuixunuan Jesucristonën caísa ꞌain. Mitsun nëtënuax bëtsi bëtsi menu tsóti cuan ꞌaíshmi Ponto, Galacia, Capadocia, Asia, Bitinia, a nëtëcamanu ꞌicë cana ënë quirica mitsu buánmin.

² An sinánsabi oquin ainan ꞌinun ca Nucën Papa Diosan mitsu caísacëxa. Aín Bëru Ñunshin Upitan ꞌimicëxmi ainanshi ꞌaish ax quicësabi oi ꞌinun mitsu ꞌimianan ca Jesucristo bama cupí mitsun ꞌuchacama tërë́nquin mitsun nuitu upí ꞌimiaxa. Usaími mitsux Nucën Papa Diosan nuibacëx ꞌicësamaira oi chuámarua ꞌaish bucucanti cana cuëënin.

Usai ꞌitia unin ñuia

³ Nucën Papa Dios, ax Nucën ꞌIbu Jesucristonën Dios ꞌianan aín Paparibi, a cananuna rabiti ꞌain. An ca nu nuibaquin bamaxbia baísquia Jesucristo an nun ꞌuchacama tërë́ncëxnu bacë́ntëcëncësa ꞌaish, ainan ꞌinun nu ꞌimiaxa, ënë nëtënuax ainan ꞌaíshnu aín nëtënuribi ꞌinun.

⁴ Nucën Papa Diosan ca mitsúxmi aín nëtënu abë ꞌitioquin mëníocëxa. A nëtënuax ca uisa ñubi, ënë nëtënuax ꞌicësari chëquianan cëñútima ꞌicën, anu ca uisa ꞌuchabi ꞌaíma ꞌicën. Usabi ca xënibua ꞌaínbi ꞌiti ꞌicën.

⁵ A nëtënu ꞌiisama pain ꞌaíshmi ënë nëtënuaxbi ami catamëtia isquin ca Nucën Papa Diosan aín cushínmi ñu ꞌatima ꞌaíma upíshi ꞌinun mitsu bërúanquin ꞌaquinia, an mëníosabi oími Jesucristoa utëcëncëbë aín nëtënu abë tsónun.

⁶ Acama sinani camina mitsux uisa ñu cara ꞌicëbëbi bënëtima cuëënin, ënë menu ꞌaish tëmëraibi.

⁷ Ënëx ca ësa ꞌicën. Asérabi cara curishi ꞌicë isnuxun ca unin curi tsi rëquirucënu xaroquin tania. Usaribiti camina mitsux caramina ami catamëcë ꞌai quixun isnuxun Nucën Papa Diosan tancë ꞌiti ꞌain. Curi ꞌaíshbi ca cëñúti ꞌicën. Usa ꞌaínbi camina tëmëraquinbi Nucën Papa Diosmi catamëquin ëncëma ꞌaish curisamaira ꞌiti ꞌain. Usaquin tancëxbimi asérabi ami catamëti ꞌain ca utëcënquin Jesucristonën —asérabi ꞌënan ꞌaish camina ꞌëbë ꞌaish cuëënti ꞌai —quixun mitsu cati ꞌicën.

⁸ A isúnmabi camina mitsun Jesucristo sinanin. Usa ꞌain camina a isaxmabi ami sinani chuámarua tani cuëëinra cuëënin, anúnmi uisairai caramina cuëëni quixun nu ñuixunti bana ꞌaíma ꞌaínbi.

⁹ Ami catamëcë cupí ca mitsun ꞌuchacama tërë́ncë ꞌiananmi ainan ꞌinun Nucën Papa Diosan mitsu ië́miaxa.

¹⁰ An Nucën Papa Dios quicë bana uni ñuixuncë unicaman ca —Nucën Papa Diosan ca aín ꞌuchacama tërë́anan uni ainan ꞌinun ië́miti ꞌicë —quixun cuënëoquinbi uisai quicë cara a bana ꞌicë quixun ꞌunánma ꞌicën. ꞌUnáncatsi quiax ñucacanánquin Nucën Papa Diosan bana amiribi amiribi isquinbi ca ꞌunánma ꞌicën.

¹¹ Cristo ënë menu ucëma ꞌaínbi ca aín Bëru Ñunshin Upitan sinánmicë ꞌixun, an Nucën Papa Dios quicë bana uni ñuixuncë unicaman ꞌunáncëxa, tëmërax bamatancëx baísquitancëx ca Cristo aín Papasaribi ꞌApu ꞌaish abë tsóti ꞌicë quixun. Usaquin ꞌunánquin ca uisa uni cara Cristo ꞌiti ꞌicë quixun ꞌunántisa tanan uínsaran cara uti ꞌicë quixun ꞌunántisa tancëxa.

¹² Usai Cristo ꞌitia Nucën Papa Diosan ꞌunánmicëxun ca atun isquinmabi, atun rëbúnqui ꞌixun cananuna nun a ñucama isnuxun ꞌai quixun ꞌunáncëxa. A bana Cristo ñui quicë, a ca a Nucën Papa Diosan naínua xucë aín Bëru Ñunshin Upitan ꞌamicëxun aín unicaman mitsu ñuixunia. A bana ca ángelcamanribi uisai quicë cara quixun cuaisa tania.

Jesucristomi catamëcë uníxa usai upí ꞌiti bana

¹³ Usa ꞌain camina Jesucristonan ꞌixun upí oquin sinani ax quicësabi oi ꞌiti ꞌain. ꞌIquin camina Nucën Papa Diosan ca abëmi aín nëtënu ꞌiti mëníocëxa quixun sinani cuëënquin Jesucristo anun uti nëtë caínti ꞌain.

¹⁴ Ainan ꞌixun ax quicësabi oquinshi ñu ꞌaquin camina bëráma Jesucristomi catamëquin Nucën Papa Dios ꞌunáncëma ꞌixunmi cuëë́an ñucama ꞌatëcëntima ꞌain.

¹⁵ Nucën Papa Dios, an mitsu ainan ꞌinun Jesucristomi sinánmia, ax ca uisa ꞌuchañumabi ꞌicën. Usa ꞌain camina mitsúnribi añu ꞌuchabi ꞌatima ꞌain.

¹⁶ Ësai ca Nucën Papa Diosan bana cuënëo quia: “ꞌËx uisa ꞌuchañumabi ꞌaish upíira ꞌain camina mitsúxribimi upíira ꞌinun uisa ꞌuchabi ꞌatima ꞌain”.

¹⁷ Nucën Papa Diosan ca camabi uni uisa ñu cara ꞌaxa quixun isia. Usa ꞌain camina mitsun —Nucën Papa Dios ax ca ꞌën Papa ꞌicë —quixun sinani aín nëtënu ꞌinux ënë nëtënu pan ꞌiquin ñu ꞌatima ꞌatimi racuë́quin upí ñuishi ꞌati ꞌain.

¹⁸ Mitsun raran Jesucristomi sinánti ꞌunánma ꞌaínmi usaribi oquin sinaniabi ca Nucën Papa Diosan ainan ꞌinun ië́miquin mitsu Jesucristomi sinánmiaxa. Camina ꞌunanin, curi ꞌimainun curíqui ꞌimainun bëtsi ñucama axa cëñúti a cupíbi ca Nucën Papa Diosan mitsu ië́micëma ꞌicën.

¹⁹ Usama ca. Judíos unicaman aín ꞌucha cupí uisaíbi ꞌicëma carnero aín upíira rëmia ꞌaínbi ca aín imi ꞌapati Cristo bamacë a cupí mitsun ꞌucha tërë́nquin ainan ꞌinun Nucën Papa Diosan mitsu ië́miaxa.

²⁰ Cristo ca usai ꞌiti ꞌicë quixun ca camabi ñu unioisama pain ꞌixunbi Nucën Papa Diosan mëníocëxa. Usaquian mënío ꞌain ca aín uti nëtë sënë́ncëbëishi usai ꞌinux Cristo ënë menu uacëxa, mitsúxmi ami catamënun.

²¹ Usa ꞌain camina an Jesucristo bamacëbi baísquimitancëxun aín nëtënu abë ꞌinun ꞌimicë cupí ami sinanin, Nucën Papa Dios an ca asérabi ax quicësabi oquin mitsu ꞌimiti ꞌicë quixun ꞌunani.

²² Aín Bëru Ñunshin Upitan ꞌimicëx Jesucristomi catamëti ax cuëëncësabi oi ꞌiquin axa mitsux ꞌicësaribiti Jesucristomi catamëcë unicamabë upiti nuibananuxun camina ñu ꞌatima ꞌati ashiquin ëan. Usa ꞌaish camina bërí ꞌicësamaira oi asérabi cuëënquin upí oquinra sinani atubë nuibananti ꞌain.

²³ Unishi ꞌinuan aín titan tuacë ꞌaish ca uni bamaia. Usa ꞌaínbi ca axa xënibua ꞌaínbi usabi ꞌiti, aín bana a cuatia Nucën Papa Diosan mitsu bacë́ntëcëncësa ꞌimiaxa.

²⁴ Nucën Papa Diosan bana cuënëo ca ësai quia: Basix ca upí ꞌitancëxbi chushia. Ro uax ca upíira ꞌitancëxbi tiriqui nëtëtia. Usaribiti ca camabi uni bamai aín upí nëtëtia.

²⁵ Usa ꞌaínbi ca Nucën ꞌIbu Diosan bana xënibua ꞌaínbi usabi ꞌia. Ënë banax ca —Jesucristomi catamëti ca uni Nucën Papa Diosnan ꞌiti ꞌicë —quixuan aín unicaman mitsu ñuixuncë a ꞌicën.