1 Juan 5 - Kashibo-Kakataibo Biblia

Ñu ꞌatima ꞌacëcama ënquin ꞌatëcëntima bana

¹ An —Jesús ax ca Cristo, axa utia judíos unicaman caían, Nucën Papa Diosan Bëchicë, a ꞌicë —quixun sináncë unicamax ca Nucën Papa Diosan bëchicëribi ꞌicën. Uicamax cara Nucën Papa Diosmi sinania ax ca aín bëchicëcamamiribi sinania.

² Usa ꞌain cananuna ꞌunanin, nux ami sinánquin Nucën Papa Dios quicësabi oquin ꞌacë ꞌaish cananuna aín bëchicëcamamiribi sinani quixun.

³ Axa Nucën Papa Diosmi asérabi sináncë uni, an ca aín bana quicësabi oquin ꞌaia. Ax quicësabi oquin ꞌaisa ca a bana ꞌicën.

⁴ —Ax quicësabi oquin ꞌanun ca Nucën Papa Diosan ꞌë ꞌaquinia —quixun ꞌunani ami catamëcë ꞌixun ca aín bëchicëcaman, an ënë menu ꞌicë ñuishi sináncë unicaman ꞌacësaribi oquin ꞌaquin ñu ꞌatima ꞌati ashiquin ënia.

⁵ Axa —Jesús ca asérabi Nucën Papa Diosan Bëchicë ꞌicë —quixun ꞌunani ami catamëcë uni an cuni ca ënë menuxuan ñu ꞌatima ꞌacëcama ënquin ꞌatëcënima.

Jesús ax ca asérabi Nucën Papa Diosan Bëchicë ꞌicë quixun ꞌunánti bana

⁶ Jesucristo ax ca axa ꞌunpaxan nashimicë ꞌianan aín imi ꞌapati bama a ꞌicën. ꞌUnpaxan nashimia ashima aín imi ꞌapati bamaribi ca ax ꞌicën. Nucën Papa Diosan Bëru Ñunshin Upitanribi ca —Jesús ax ca Cristo, asérabi Nucën Papa Diosan Bëchicë, a ꞌicë —quixun nu ꞌunánmia. Nucën Papa Diosan Bëru Ñunshin Upí ax ca Nucën Papa Diosan sinánsaribi ꞌicën.

⁷ Usa ꞌain ca naínu ꞌicë Nucën Papa Dios ꞌimainun aín Bana, Jesucristo, ꞌimainun aín Bëru Ñunshin Upí, acama ꞌaish rabë́ ꞌimainun achúshi ꞌicën. Usa ꞌaíshbi ca achúshishi ꞌicën. Anribi ca nu ꞌunánmia, Jesus, ax ca asérabi Cristo, Nucën Papa Diosan Bëchicë, a ꞌicë quixun.

⁸ Ënë menuxun Nucën Papa Diosan Bëru Ñunshin Upitan ꞌunánmicë ꞌianan Jesucristo ꞌunpaxan nashimia sinánan axa aín imi ꞌapati bama, acama sinánquin cananuna ꞌunanin, Jesús ax ca asérabi Cristo, Nucën Papa Diosan Bëchicë, a ꞌicë quixun.

⁹ Unin bana cuananbi cananuna aín Bëchicë Jesucristo ñuia, axira unin banabë sënë́nma ꞌaish Nucën Papa Dios quiá bana aira cuati ꞌain. Ënëx ca aín Bëchicë ñui Nucën Papa Dios quiá bana a ꞌicën.

¹⁰ Axa aín Bëchicëmi catamëcë uni, an ca Nucën Papa Diosan ꞌunánmicëxun asérabi ꞌunania, Jesucristo ax ca asérabi aín Bëchicë ꞌicë quixun. Usa ꞌaínbi ca an Nucën Papa Diosan bana ca asérabi ꞌicë quixun sináncëma uni, ax —Nucën Papa Dios ca cëmë ꞌicë —quicësa ꞌicën, an aín Bëchicë ñui quicë bana ca asérabima ꞌicë quixun sináncë cupí.

¹¹ Nucën Papa Dios ca quiacëxa, aín Bëchicëmi catamëcë cupí cananuna an ꞌimicëx ainan ꞌaish xënibua ꞌaínbi abë ꞌiti ꞌai quiax.

¹² Uinu ꞌicë unix cara Nucën Papa Diosan Bëchicënan ꞌicë, a unix ca usaribiti nëtë́timoi Nucën Papa Diosbë ꞌia. Usa ꞌaínbi ca uinu ꞌicë unix cara aín Bëchicënanma ꞌicë, a unix xënibua ꞌaínbi Nucën Papa Diosbë ꞌima.

Bërúanx ꞌinun caquian ashiquin ꞌësëa bana

¹³ Aín Bëchicëmi catamëcë ꞌaish camina ainan ꞌaish Nucën Papa Diosbë xënibua ꞌaínbi ꞌiti ꞌai quixunmi ꞌunánun cana ënë ñucama mitsu cuënëoxunin.

¹⁴ Cananuna ꞌunanin, nun nu asérabi ax cuëëncësabi oquin ñu ñucácëxun ca Nucën Papa Diosan nun bana cuatia quixun.

¹⁵ Usaquin ñucáquin cananuna ꞌunanin, Nucën Papa Diosan ca nun ñucácëxun cuaquin, anu ñucácë ñu ꞌinánan nun ñucácësabi oquin nu ꞌaquinia quixun.

¹⁶ Abëa Jesucristomi catamëcë uni itsían ñu ꞌatima ꞌaia ꞌunánquin ca unin —tërë́ntisama ꞌinun ca ꞌuchacëma ꞌicë —quixun sinánquin aín ꞌucha tërë́nquin sinanaminun Nucën Papa Dios ñucáxunti ꞌicën. Ñucáxuncëxun ca Nucën Papa Diosan aín ꞌucha tërë́nquin a uni upí ꞌitëcënun ꞌimiti ꞌicën. Usa ꞌaínbi cana axa tërë́ntisama ꞌinun ꞌuchacë uni a Nucën Papa Dios ñucáxunun quixun mitsu caiman.

¹⁷ Camabi ñu ꞌatima ꞌacë ax ca ꞌucha ꞌicën. Bëtsi bëtsi ꞌucha ca uisoxunbi tërëcaisama ꞌicën. Usa ꞌaínbi ca camabi ꞌuchax tërëcaisamama ꞌicën.

¹⁸ Cananuna ꞌunanin, asérabi Nucën Papa Diosan bëchicë ꞌaish ca uni amiribi amiribi ꞌuchaima. Usa ꞌicëa Nucën Papa Diosan Bëchicë Jesucristonën bërúanquin ꞌaquinia ca ñunshin ꞌatimanën uisabi oima.

¹⁹ Cananuna ꞌunanin, nuxnu Nucën Papa Diosnan ꞌaínbi ca camabi menu ꞌicë unicamax ainanma ꞌaish ñunshin ꞌatimanën ꞌapunan ꞌicë quixun.

²⁰ ꞌUnánan cananuna ësaquinribi ꞌunanin, aín Bëchicënën ca ënë menu ax uá ꞌaínu ami catamëtia uisa cara Nucën Papa Dios, axëshia asérabi Dios, ax ꞌicë quixun nu ꞌunánmia. Aín Bëchicë, Jesucristo, ax nubë ꞌain cananuna an ꞌaquincëx ax cuëëncësabi oi tsotin. Ax ca axëshi asérabi Dios ꞌaínu nux ainan ꞌaish abë xënibua ꞌaínbi ꞌiti a ꞌicën.

²¹ ꞌËn bëchicësa ꞌicë cana mitsu cain, anbi sinánxuan dios isa quixun a rabinuxun unínbi ꞌacë ñucama camina rabitima ꞌain. Ashi, Juan.