1 Juan 4 - Kashibo-Kakataibo Biblia

Axa ami sináncëma uni ꞌimainun axa Nucën Papa Diosmi sináncë uni ñui quicë bana

¹ ꞌËn nuibacë xucë́antu, ënë nëtënuxun ca ꞌitsa unin —Nucën Papa Diosan sinánmicëxun cana uni bana ñuixuni —quiquinbi an sinánmicëxunmabi anbia sináncë bana uni ñuixunia. Usa ꞌain camina —Nucën Papa Diosan ca ꞌë sinánmia —quiquian unin ñuicë bana acamaira cuatima ꞌain. Upí oquin pain camina asérabi cara Nucën Papa Diosan sinánmicëxun uni ñuixunia quixun cuati ꞌain.

² Ësaquin camina ꞌunánti ꞌain, ui unix cara Nucën Papa Diosan Bëru Ñunshínñu ꞌicë quixun: An —Jesucristo ca uni ꞌinux uacëxa —quixun asérabi ꞌunáncë uni, an ca Nucën Papa Diosan Bëru Ñunshin Upitan anu ꞌixun ꞌunánmicëxun usaquin ꞌunania.

³ Usa ꞌaínbi ca an usaquin Jesús ꞌunáncëma uni, ax Nucën Papa Diosan Bëru Ñunshin Upíñuma ꞌicën. Usa ꞌaish ca an Cristo ꞌatimaquin ñuicë uni banacësa ꞌicën. An Cristo ꞌatimaquin ñuicë uni ca uti ꞌicë quixun camina cuan. Usa uni ca uti ꞌicë quiáxa quicë ꞌaínbi ca bëtsi bëtsi unin bëríbi Cristo ꞌatimaquin ñuia.

⁴ ꞌËn bëchicësa unicama, mitsux camina Nucën Papa Diosnan ꞌain. Nucën Papa Dios axa mitsubë ꞌicë aín cushibëtan sënë́nma ca an ënë nëtënu ꞌicë ñuishi sináncë unicaman cushi ꞌicën. Usa ꞌain ca an Cristo ꞌatimaquin ñuicë unicaman sinanëx mitsun sinánbëtan sënë́nmara ꞌicën.

⁵ A unicamax ca ënë menu ꞌicë ñuishi sináncë ꞌaish a ñuishi ñui banaia. Usa ꞌicë ca asaribi unicaman aín bana cuatia.

⁶ Usa ꞌaínbi cananuna nux Nucën Papa Diosnan ꞌain. Ainan cupí ca uicaman cara ainan ꞌixun a ꞌunánxa an cuni nun bana cuatia. Usa ꞌaínbi ca Nucën Papa Diosnanma unin nun bana cuatima. Usa ꞌain cananuna ꞌunánti ꞌain, uin cara nun bana cuatia ax ca Nucën Papa Diosan sinánmicë ꞌicë quixun. Usaribi oquin cananuna ꞌunánti ꞌain, uin cara nun bana cuatima, ax ca Nucën Papa Diosan sinánmicëma, ñunshin ꞌatimanën sinánmicë ꞌicë quixun.

Nucën Papa Dios an ca nu nuibairaia quicë bana

⁷ ꞌËn nuibacë xucë́antu, cana mitsu cain, Nucën Papa Diosan sinánmicëxun ca unin uni itsi nuibatia. Usa ꞌain cananuna ainan ꞌaish bëtsibë bëtsibë nuibananti ꞌain. An uni itsi nuibacë unicamax ca Nucën Papa Diosan bëchicë ꞌianan a ꞌunáncë ꞌixun an sináncësa oquin sinania.

⁸ Nucën Papa Dios ax ca an unicama nuibairacë a ꞌicën. Usa ꞌain ca an bëtsi uni nuibacëma uni ax Nucën Papa Dios ꞌunáncëma ꞌicën.

⁹ Nucën Papa Diosan ca aratsuishi ꞌicëbi aín Bëchicë ënë menu uni ꞌinun xuacëxa, a cupínu nux ainan ꞌaish nëtë́timoi abë ꞌinun. Usoquian ꞌá ꞌain cananuna ꞌunanin, uisaira oquin cara Nucën Papa Diosan camabi uni nuibatia quixun.

¹⁰ Ami sináncëxunmabi unicama nuibaquin ca Nucën Papa Diosan, a cupí unin ꞌuchacama tërë́ncë ꞌinuan ënë menuax bamanun aín Bëchicë xuacëxa. Usoquin xuá ꞌain cananuna ꞌunanin, usaira oquin ca Nucën Papa Diosan unicama nuibatia quixun.

¹¹ ꞌËn nuibacë xucë́antu, Nucën Papa Diosan unicama usaira oquin nuibacë ꞌain cananuna nuxribi usaribiti bëtsi unicamabë nuibananti ꞌain.

¹² Nucën Papa Dios ca uinu ꞌicë unínbi isáma ꞌicën. Usa ꞌaínbinu nux bëtsibë bëtsibë nuibanancëbë ca ax nubë ꞌicën. Nubë ꞌixun ca an ꞌacësaribi oquinu unicama nuibanun nu ꞌimia.

¹³ An aín Bëru Ñunshin Upí nubëa ꞌinun ꞌináncë ꞌixun cananuna ꞌunanin, nux cananuna abë ꞌai quixun. ꞌUnánan cananuna —ax ca nubë ꞌicë —quixun ꞌunanin.

¹⁴ Nunbi cananuna, an atun ꞌucha tërë́nquin ënë menu ꞌicë unicama ainan ꞌinun ië́minuan Nucën Papa Diosan xuá, aín Bëchicë a isacën. Isá ꞌixun cananuna a ñuiquin mitsu cain.

¹⁵ Uin cara —Jesucristo ax ca asérabi Nucën Papa Diosan Bëchicë ꞌaish asaribi ꞌicë —quixun ꞌunánquin unicama ñuixunia, ax ca Nucën Papa Diosbë ꞌicën. ꞌImainun ca Nucën Papa Diosribi a unibë ꞌicën.

¹⁶ Usa ꞌain cananuna asérabi ꞌunanin, Nucën Papa Diosan ca nu nuibatia quixun. Nucën Papa Dios ax ca an unicama nuibairacë a ꞌicën. Usa ꞌain ca an aín sinan upí ꞌixun uni nuibacë uni ax Nucën Papa Diosbë ꞌicën. ꞌImainun ca Nucën Papa Diosribi a unibë ꞌicën.

¹⁷ Usa ꞌixun cananuna an nu nuibaquin sinánmicë ꞌixun ax cuëëncësa oquin Nucën Papa Diosmi upiti sinánan unicama nuibatin. Usa ꞌaish cananuna nux ënë nëtënuax asaribi ꞌaish, anuan Jesucristo utëcënti nëtën nux masá nuituti rabíntima ꞌain.

¹⁸ Usa ꞌain ca an Nucën Papa Diosmi sinánan bëtsi uniribi nuibacë uni, ax ami ꞌuchacëma ꞌaish unimi racuëtima. Anuan Jesucristo utëcënti nëtë́nribi ca racuë́tima ꞌicën. Usa ꞌaínbi ca unix asérabi bëtsi unibë nuibanancëma ꞌaish racuëti ꞌatimaquin sinani bënëtia. Usa unin ca upiti nuibananti ꞌunanima.

¹⁹ An paían nu nuiba ꞌain cananuna nuxribi Nucën Papa Diosmi sinani ami catamëtin.

²⁰ An —ꞌëx cana Nucën Papa Diosmi sinani ami catamëti —quicë ꞌaíshbi ami nishquin uni itsi nuibacëma ꞌaish ca a uni cëmëia. Usa ꞌixun ca a isquinbi uni itsi nuibaquin sináncëma ꞌixun a iscëma, Nucën Papa Dios, aribi sinanima.

²¹ Ënë bana ca Nucën Papa Diosan nu ꞌináncëxa: axa ami sináncë uni ax ca uni itsimiribi sinánti ꞌicën.