1 Juan 3 - Kashibo-Kakataibo Biblia

Nucën Papa Diosan bëchicëcama ñuicë bana

¹ Nux cananuna Nucën Papa Diosan bëchicë ꞌain, an cacësabi oi. An aín bëchicë ca quixun nu cacë cupí cananuna ꞌunánti ꞌain, uisaira oquin cara an nu nuibatia quixun. Usa ꞌaínbi ca an ënë menu ꞌicë ñuishi sináncë unicaman ainanma ꞌixun Nucën Papa Dios ꞌunáncëma cupí, nux cananuna aín bëchicë ꞌai quixun ꞌunanima.

² ꞌËn nuibacë xucë́antu, bërí cananuna Nucën Papa Diosan bëchicë ꞌain. Usa ꞌicëbi ca uisaira caranuna ꞌinuxun ꞌai quixun an nu ꞌunánmicëma pan ꞌicën. Usa ꞌaínbi cananuna ꞌunanin, Jesucristo utëcëncëbëtan cananuna upí oquin uisa cara ax ꞌicë quixun isti ꞌain. A isi cananuna asaribi ꞌiti ꞌain.

³ Uicaman cara —asaribi cana ꞌiti ꞌai —quixun sinania, a unicamax ca Jesucristosaribi ꞌiti cupí, aín ꞌuchacama ëni upí ꞌia.

⁴ Usa ꞌaínbi ca an ñu ꞌatima ꞌacë unicama, ax Nucën Papa Diosan bana quicësabi oi ꞌima ꞌuchaia. Nucën Papa Diosan bana quicësabi oquinu ꞌacëma, ax ca ꞌucha ꞌicën.

⁵ Camina ꞌunanin, unin ꞌuchacama tërë́nux ca Jesucristo uacëxa, ax uisa ꞌuchañumabi ꞌixun.

⁶ Usa ꞌain ca uix cara ainan ꞌaísha, a ëníma abë ꞌicëa Nucën Papa Diosan sinánmicë ꞌicë, a unin ñu ꞌatima amiribi amiribi ꞌaima. An ñu ꞌatima amiribi amiribi ꞌacë uni ax ca ami catamëcëma ꞌianan uisa cara ax ꞌicë quixun Jesucristo ꞌunáncëma ꞌicën.

⁷ ꞌËn bëchicësa ꞌicë, cana mitsu cain, unin paráncë camina ꞌitima ꞌain. An upí ñu ꞌacë uni ax ca Jesucristosaribi ꞌaish aín nuitu upí ꞌicën.

⁸ Usa ꞌaínbi ca an ñu ꞌatima ꞌacë unicama ax ñunshin ꞌatimanën ꞌapun uni ꞌicën, ñunshin ꞌatimanën ꞌapu ax ca nëtë ióñubi ꞌucha ꞌaish usabii bërí nëtë́nbi ꞌuchaia, usa ꞌain. Usa ꞌaínbi ca ñunshin ꞌatimanën ꞌapúan ñu ꞌatima ꞌacëcama cëñui Nucën Papa Diosan Bëchicë uacëxa.

⁹ Uix cara asérabi Nucën Papa Diosan bëchicë ꞌicë, an ca ñu ꞌatima ꞌati sinanima. An ꞌacësaribi oquin sinánun Nucën Papa Diosan ꞌimicë ꞌixun ca aín bëchicëcaman ñu ꞌatima ꞌati sinanima. Usa ꞌixun ca ꞌuchatëcënti sinanima.

¹⁰ Ënëx ca ësa ꞌicën. Ui unin cara ñu upí ꞌaima ax ca Nucën Papa Diosnanma ꞌicën, ui unin cara uni itsiribi nuibatima axribi ca Nucën Papa Diosnanma ꞌicën. Usa ꞌain cananuna uinu ꞌicë unix cara Nucën Papa Diosan bëchicë ꞌicë quixun ꞌunánan uinu ꞌicë unix cara ñunshin ꞌatimanën ꞌapunan ꞌicë quixun ꞌunánti ꞌain.

Unicamaxa bëtsibë bëtsibë nuibananti bana

¹¹ Jesucristomi catamëtabaquinbimi mitsun cua a bana ca ënëx ꞌicën, bëtsibë bëtsibë cananuna nuibananti ꞌai quicë.

¹² Ñunshin ꞌatimanën ꞌapunan ꞌixun ca Cainan aín xucë́nbi ꞌacëxa. Usaribi cananuna ꞌitima ꞌain. ¿Uisa cupí cara Cainan aín xucën ꞌacëx? Aín xucënan ꞌacë ñu upí ꞌimainuan an ꞌacë ñu upíma ꞌain ca Cainan aín xucën ꞌacëxa.

¹³ ꞌËn xucë́antu, axa Jesucristomi catamëquinma ënë menu ꞌicë ñuishi sináncë unicaman mitsumi nishquin nuibacëxunmabi camina —uisacatsi cara ꞌëmi nishia —quixun masá nuituquin sinántima ꞌain.

¹⁴ Nux ꞌicësaribitia ax Jesucristomi catamëcë unicama nuibacë ꞌixun cananuna ꞌunanin, nux ainanma ꞌiá ꞌaíshbi cananuna bërí Nucën Papa Diosnan ꞌai quixun. An uni itsiribi nuibacëma uni ax ca Nucën Papa Diosnanma ꞌaish usabi ꞌicën.

¹⁵ An ami nishquin uni raíri nuibacëma uni ax ca an uni ꞌacë unisa ꞌaish ꞌaisama ꞌicën. Camina ꞌunanin, an uni ꞌacë unix ca Nucën Papa Diosnanma ꞌaish xënibua ꞌaínbi abë ꞌitima ꞌicë quixun.

¹⁶ Jesucristo nu nuibati bama cupí cananuna ꞌunanin, usari ca uni nuibati ꞌiti ꞌicë quixun. Usaquin ꞌunánquin cananuna ꞌunanin, Jesucristonën ꞌásaribi oquin cananuna nunribi a ꞌaquincë cupí bamanuxunbi ꞌaquinquin bëtsi uni nuibati ꞌai quixun.

¹⁷ ¿Usa ꞌain cara an ñuñu ꞌixunbi axa ꞌaquinsa ꞌicë isquinbi uni itsi nuibaquin ꞌaquincëma uni, ax Nucën Papa Diosmi sináncë ꞌic? Usama ca.

¹⁸ ꞌËn bëchicësa ꞌicë, cana mitsu cain, nun cuëbitanshi uni —ꞌën cana mi nuibati —quixun caquinma cananuna asérabi nuibaquin ꞌaquinsa ꞌicë a ꞌaquinti ꞌain.

Cananuna asérabi Nucën Papa Diosnan ꞌai quixun ꞌunánti bana

¹⁹ Nun uni nuibaquin ꞌaquincë ꞌixun cananuna ꞌunánti ꞌain, nun cananuna asérabi ainan ꞌixun Nucën Papa Dios cuëëncësabi oquin ꞌai quixun. Usaquin ꞌunani cananuna bënëtima chuámarua ꞌiti ꞌain.

²⁰ Usa ꞌain ca nun —ꞌëx cana upíma ꞌai —quixun sinaniabi Nucën Papa Diosan, an camabi ñu ꞌunáncë ꞌixun, nun sinánribi ꞌunania.

²¹ ꞌËn nuibacë xucë́antu, nun ñu ꞌatima ꞌacëcama a mëníocë ꞌain cananuna a sinani masá nuitutima Nucën Papa Diosbë banati ꞌain.

²² Nun ax quiásabi oquin ꞌanan, ax cuëëncësabi oquin ꞌaia isquin ca an nun ñucácësabi oquin nu ꞌaxunia.

²³ Axa quicësabi oquin ꞌati bana ax ca ësa ꞌicën, cananuna aín Bëchicë Jesucristomi catamëanan bëtsibë bëtsibë nuibananti ꞌain, an nu cacësabi oi.

²⁴ Axa aín bana quicësabi oi ꞌicë unicamax ca Nucën Papa Diosbë ꞌicën, ꞌimainun ca axribi atubë ꞌicën. An nu ꞌináncë aín Bëru Ñunshin Upí ax nubë ꞌain cananuna asérabi ꞌunanin, Nucën Papa Dios ca nubë ꞌicë quixun.