1 Juan 2 - Kashibo-Kakataibo Biblia

Cristo, an Nucën Papa Dios nu ñucáxuncë

¹ ꞌËn bëchicësa ꞌicë, cana ñu ꞌatimami ꞌatin rabanan ënë ñucama mitsu cuënëoxunin. Usa ꞌaínbia uinu ꞌicë unix cara ꞌuchaia, a an ñucáxunti ca Nucën Papa Diosbëa ꞌicë Jesucristo, ax ꞌicën. Ax ca uisa ꞌuchañumabi asérabi upíira ꞌicën.

² Jesucristo axa bama cupí ca nun ꞌuchacama tërë́ncë ꞌicën. Nunanshima camabi unin ꞌuchacamaribia tërë́ncë ꞌinun ca Jesucristo bamacëxa.

³ Aín bana quicësabi oquin ꞌacë ꞌixun cananuna ꞌunanin, nux cananuna asérabi ainan ꞌaish a ꞌunáncë ꞌai quixun.

⁴ Usa ꞌaínbi ca uix cara —ꞌën cana ainan ꞌixun Nucën Papa Dios ꞌunani —quibi aín bana quicësabi oi ꞌima, a uni cëmë ꞌicën. Usa ꞌaish ca cëmëishi banaia.

⁵ Usa ꞌaínbi ca an aín bana quicësabi oquin ꞌacë uni ax ëníma upiti Nucën Papa Diosmi sinania. Usa ꞌixun cananuna ꞌunanin, nux cananuna asérabi ainan ꞌai quixun.

⁶ Usa ꞌain ca axa —ainan ꞌaish abë ꞌicë ca Nucën Papa Diosan ꞌë sinánmia —quicë uni, ax Jesucristo ꞌiásaribiti ꞌiti ꞌicën.

Axa quicësaribiti ꞌiti bana

⁷ ꞌËn xucë́antu, mitsun ꞌunáncëma bana ñuiquin cuënëoquin cana mitsu caiman. Jesucristomi catamëtabaquinmi cua bana abi cana mitsu ñuixuntëcënin.

⁸ ꞌËn mitsu ñuixuncë bana ióma ꞌaínbi camina a banabi mitsun ꞌásamaira oquin ꞌunáncë ꞌaish ax quicësabi oi ꞌin, Cristo ꞌiásaribiti. Usari ꞌi camina mitsun ñu ꞌatima ꞌacëcama ëni Nucën Papa Diosbë upí ꞌaish ax cuëëncësabi oi ꞌin.

⁹ Uix cara —ꞌëx cana ainan ꞌaish Nucën Papa Diosbë upí ꞌai —quibi nuibatíma uni itsimi nishia, ax ca Nucën Papa Diosnanma pain ꞌicën.

¹⁰ An uni itsi nuibacë uni ax ca Nucën Papa Diosnan ꞌaish abë upí ꞌicën. Usa ꞌain ca a cupía a uni ꞌuchati ñu ꞌaíma ꞌicën.

¹¹ Usa ꞌaínbi ca nuibatíma bëtsi unimi nishcë uni an Nucën Papa Diosbë upíma ꞌixun ñu ꞌatima ꞌatishi sináncë cupí sinánñumasa ꞌixun uisai cara ꞌiti ꞌicë quixun ꞌunanima.

¹² ꞌËn bëchicësa ꞌicë, cana Jesucristo cupía Nucën Papa Diosan mitsun ꞌuchacama tërë́ncë cupí mitsu quirica cuënëoxunin.

¹³ Uni apáncama, mitsúnmi axa ënë mecama unioisama pain ꞌaíshbi ꞌiá, Nucën Papa Dios, a ainan ꞌixun ꞌunáncë cupí cana mitsu quirica cuënëoxunin. Bëná unicama, mitsuribishi cana ñunshin ꞌatimanën ꞌapúan ñu ꞌatima ꞌamitisa tancëxunbimi ꞌacëma cupí quirica cuënëoxunin. ꞌËn bëchicësa ꞌaíshmi ainan ꞌixun Nucën Papa Dios ꞌunáncë cupí cana mitsuribi quirica cuënëoxuan.

¹⁴ Uni apáncama, mitsúnmi axa ënë mecama unioisama pain ꞌaíshbi ꞌiá, Nucën Papa Dios, ainan ꞌixun ꞌunáncë cupí cana mitsu quirica cuënëoxuan. Bëná unicama, mitsux Jesucristomi cushicë ꞌianan Nucën Papa Diosan bana mitsun nuitunënbi sináncë ꞌixun ñunshin ꞌatimanën ꞌapúan ñu ꞌatima ꞌamitisa tancëxunbi ꞌacëma cupí cana mitsu quirica cuënëoxuan.

¹⁵ Ënë nëtënuxuan Nucën Papa Dios cuëëncëma ñu an ꞌunáncëma unin ꞌacësa oquin ꞌati camina cuëëntima ꞌain. Uix cara ax cuëëncëma ñu ꞌai cuëënia, ax ca Nucën Papa Diosmi sinanima.

¹⁶ An ënë menu ꞌicë ñuishi sináncë unix ca ñunshínquin piti, xëati, xanubë ꞌiti acama sinánan ñu ꞌatima isti cuëëanan —ñuñu cana ꞌai —quixun sinani rabitia. Nucën Papa Diosan ca usaía ꞌinun uni sinánmicëma ꞌicën. Abi ënë menu ꞌicë ñuishi sináncë ꞌaish ca uni usai ꞌia.

¹⁷ Mecama ꞌimainun anu ꞌicë ñucamaxribi ca cëñúti ꞌicën. ꞌImainun ca ñunshínquian unin a ꞌatishi sináncë ñu ꞌatimacamaxribi cënúti ꞌicën. Usa ꞌaínbi ca axa Nucën Papa Dios cuëëncësabi oi ꞌicë unicama xënibua ꞌaínbi abë ꞌiti ꞌicën.

An —Jesús ax ca asérabi Cristo ꞌicë cacë unicama ꞌimainun axa —cëmë ca a bana ꞌicë —quicë unicama ñuicë bana

¹⁸ ꞌËn bëchicësa ꞌicë, cana mitsu cain, anúan ënë mecama cëñúti nëtë ca ꞌurama ꞌicën. A nëtëa ucëma pan ꞌain ca axa Cristo ꞌatimaquin ñui banacë uni uti ꞌicë quixun camina cuan. Ca uti ꞌicë ꞌaínbi ca bëríbi ꞌitsa unin Cristo ꞌatimaquin ñuia. Usa ꞌain cananuna ꞌunanin, anúan ënë mecama cëñúti nëtë ca ꞌurama ꞌicë quixun.

¹⁹ An Cristo ꞌatimaquin ñuicë unicama nubë ꞌixunbi ca nu ëanxa, asérabi nun ꞌacësaribi oquin Jesucristo sináncëma ꞌixun. Nux ꞌicësaribiti asérabi Jesucristomi sináncë ꞌaish ca nubë bërúcë ꞌitsíanxa. Usa ꞌain ca atúan nu ëncë cupí camaxunbi ꞌunánti ꞌicën, nubëa ax timë́cë unicamax ca camáxira asérabi nux ꞌicësaribiti Jesucristomi sináncëma ꞌiaxa quixun.

²⁰ Usa ꞌaínbia Cristo cupí Nucën Papa Diosan Bëru Ñunshin Upí mitsubë ꞌain camina ꞌunanin, atúan Jesucristo ꞌatimaquin ñuicë banacamax ca cëmë ꞌicë quixun.

²¹ Mitsúnmi Cristonan ꞌixun ax cuëëncësabi oi ꞌiti ꞌunáncëma cupí cana mitsu caiman. Mitsúnmi a ñucama ꞌunáncë cupí cana mitsu ënë quirica cuënëoxunin. Camina ꞌunanin, Cristonan ꞌixun ax cuëëncësabi oi ꞌiti ꞌunáncë uni ax ca cëmëtima ꞌicën.

²² ¿Uix cara cëmë uni ꞌic? Axa —Jesús ax ca Cristoma ꞌicë —quicë uni ax ca a ꞌicën. A unix ca axa Cristomi ꞌatimati banacë a ꞌicën. Ax ca aín Bëchicë ꞌimainun Nucën Papa Diosmiribi ꞌatimati banaia.

²³ Camabi uni axa —Jesús ax Cristoma ꞌicë, cana ami catamëtima ꞌai —quicë uni, ax ca Nucën Papa Diosmiribi catamëcëma ꞌicën. Usa ꞌaínbi ca axa —Jesús asérabi Nucën Papa Diosan Bëchicë ꞌaish asaribi ꞌicë cana ami catamëti —quicë unicama, abë Jesucristo ꞌimainun Nucën Papa Diosribi ꞌicën.

²⁴ Usa ꞌain camina Jesucristomi catamëtabaquinmi cua a bana manuquinma upí oquin sinánti ꞌain. A bana asérabi sináncë ꞌaish camina abë upí ꞌaish ënima camabi nëtën aín Bëchicë ꞌianan Nucën Papa Diosbëribi ꞌiti ꞌain.

²⁵ Jesucristonëxbi ca quiacëxa, a cupíshi cananuna ainan ꞌaish Nucën Papa Diosbë xënibua ꞌaínbi ꞌiti ꞌai quiax.

²⁶ An mitsu parántisa tancë unicama ñuiquin cana ënë banacama mitsu cuënëoxuan.

²⁷ Atúxa usa ꞌaínbi ca Jesucristonën aín Bëru Ñunshin Upí mitsubëa ꞌinun ꞌináncë, ax mitsubë ꞌixun uni itsían ꞌunánmiamabi an mitsu ꞌunánmia. An mitsu ꞌunánmicë ñux ca asérabi ꞌaish cëmëma ꞌicën. Usa ꞌain camina aín Bëru Ñunshin Upitan ꞌunánmiquin sinánmicësabi oi camabi nëtën Cristobë ꞌiti ꞌain.

²⁸ ꞌËn bëchicësa ꞌicë, cana mitsu cain, utëcënquian Jesucristonën nu upí isti cupí camina camabi nëtën an sinánmicësabi oquin sinánti ꞌain, axa ucëbë rabíntima cupí.

²⁹ Mitsun camina, Jesucristo ax ca asérabi upí ꞌicë quixun ꞌunanin. Usa ꞌixun camina ësaquinribi ꞌunánti ꞌain, an upí ñu ꞌacë unicamax ca Nucën Papa Diosan bëchicë ꞌicë quixun.