1 Juan 1 - Kashibo-Kakataibo Biblia

Anun Jesucristonan ꞌiti bana

¹ Ënë mecama unioisama ꞌaínbia aín Papabë ꞌiá axa ënë menu uá, a ñuiquin cananuna ënë quirica mitsu cuënëoxunin. A cananuna aín bana cuanan nun bërúnbi isacën. Nun bërúnbi ñachaquin isanan cananuna nun mëcënanribi ramëacën. Ax bamatimoi tsócë ꞌixuan aín unicamaribi abë ꞌinun ꞌimicë, a ñuiquin cananuna mitsu cain.

² A cananuna nusaribi ꞌaish uni ꞌicë nun ꞌunáncën. Usa ꞌixun cananuna asérabi a isacën. Isá ꞌixun cananuna a mitsu ñuixunin. Ax aín Papabë ꞌitancëxbi ënë menu uá ꞌixun ca bamatimoi tsócë ꞌixun, usaribitinu abë ꞌinun nu ꞌimiti ꞌicë quixun cananuna mitsu ñuixunin.

³ Nuxnu asérabi Nucën Papa Dios ꞌimainun aín Bëchicë Jesucristobë upí ꞌicësaribitimi mitsúxribi nubë Jesucristomi upiti sinánun quixun cananuna nun nu isanan cuacë, ënë ñucama mitsu ñuixunin.

⁴ Upí oquin sinanimi chuámaishirua tani cuëënun cananuna ënë banacama ësoquin mitsu cuënëoxunin.

Nucën Papa Diosan unían ñu ꞌatima ꞌati sinántima bana

⁵ Jesucristonënbia nu pain ꞌunánmia ꞌixun cananuna ënë bana mitsu ñuixunin: Nucën Papa Dios an ca asérabi upíira ꞌixun ñu upíshi ꞌaia. An ca unë́xun ñu ꞌaima. Usa ꞌain ca uisa ꞌuchabi anu ꞌaíma ꞌicën.

⁶ Ñu ꞌaisama ꞌaíbi —ainan ꞌaish cana Nucën Papa Diosbë upí ꞌai —qui cananuna cëmëin. Ainan cana ꞌai quicë ꞌixunbi ax quicësabi oquin ꞌaquinma ñu ꞌatima ꞌai cananuna cëmëin.

⁷ Usa ꞌaínbi cananuna axa ꞌicësaribiti ñu ꞌatima ꞌati sináncëma ꞌianan Nucën Papa Diosbë upí ꞌaish, axa ami catamëcë unicamabëribi upiti nuibananin. Usaínu ꞌia ca an, aín Bëchicë Jesucristo aín imi ꞌapati bama cupí, uisa ñu ꞌai caranuna ꞌuchai, abi nu tërë́nxunia.

⁸ —ꞌËx cana ꞌuchañuma ꞌai —qui cananuna nuxbi cëmëin. Usa ꞌain ca nun bana asérabima ꞌicën.

⁹ Usa ꞌaínbi cananuna ꞌunánti ꞌain, nun nu nun ꞌuchacama chiquinaxuncëxun ca Nucën Papa Diosan, ax upí ꞌixun ax quicësabi oquin ꞌaquin, nun ꞌuchacama nu tërë́nxunquin upí ꞌinun nu ꞌimiti ꞌicën.

¹⁰ Nucën Papa Diosan bana ca quia —camabi unin ca ñu ꞌatima ꞌaia —quiax. Usaía quicë ꞌaínbi —ꞌën cana ñu ꞌatima ꞌacëma ꞌai —qui cananuna —Nucën Papa Diosan bana ca cëmë ꞌicë —quicësa ꞌain. Usai quicë ꞌixun cananuna, asérabi ca aín bana ꞌicë quixun sinaniman.