1 Corintios 9 - Kashibo-Kakataibo Biblia

An Jesucristomi catamënun uni bana ñuixuncë uni ca cupí biti ꞌicë quicë bana

¹ Nucën ꞌIbu Jesusan aín bana uni ñuixunti caísa cana ꞌëx ꞌain. An caíscë unicaman ꞌacësaribi oquin cana ꞌënribi Nucën ꞌIbu Jesús isacën. ꞌËn aín bana ñuixuncë cupí camina mitsúxribi ami catamëtin. Usa ꞌain camina mitsúnbi ꞌunánti ꞌain, ꞌëx cana asérabi a usaquin ꞌanúan Nucën Papa Diosan caísa ꞌain.

² —Jesucristonën aín bana uni ñuixunun ꞌimicëma ca Pablo ꞌicë —quixuan uni itsin sináncëbëtanbi camina mitsun —an ꞌimicë ca —quixun ꞌunánti ꞌain. ꞌËn aín bana ñuixunia cuati camina mitsux Nucën ꞌIbu Jesúsmi catamëtin. Usa ꞌain camina asérabi ꞌunánti ꞌain, an ca ꞌë aín bana ñuixunun xuaxa quixun.

³ An ꞌë ñuicë unicama cana ësaquin cain:

⁴ —An ꞌën bana ñuixuncëxun cuacë unicaman ꞌë piti ꞌináncëxun ꞌën biti ca asábi ꞌicën.

⁵ A Jesusan aín bana ñuixunun caíscë uni raíri ꞌimainun Nucën ꞌIbu Jesusan xucë́antu ꞌimainun Pedro, acaman aín xanu abë cuanun buáncësaribi oquin cana ꞌënribi ꞌaisa tanquin xanu buánti ꞌain.

⁶ ¿Axa mitsubë ꞌicë uni raírinën ꞌacësaribi oquin ꞌënribi Bernabébëtan ꞌën mëcënan ñu mëëquinma, Nucën Papa Diosan banaishi ñuixunti cara asábima ꞌitsíanx? Ca asábi ꞌitsíanxa.

⁷ Suntárunën ca anbi aín ñu maruima, ꞌapun cuni ca a ꞌinania. Usaribi oquin ca an ñu ꞌapácë unin an ꞌapácë ñuxa tuaia, aín bimi bixun piia. Usaribi oquin ca an vaca bërúancë unin vaca xuma bixun xëaia.

⁸ ꞌËnbi ꞌën sinanën sináncëma ca ënë bana ꞌicën. Moisésnën cuënëo banaribi ca usai quia.

⁹ Moisésnën cuënëo bana ca ësai quia: “Trigo bimima rëucubutia piia quixun camina vaca bënë cuëtanitima ꞌain”. Axa tëëcë cupía an piti ca asábi ꞌicën. Vaca bënëxëshi ca usai ꞌiti quixun ca Nucën Papa Diosan Moisés ënë bana cuënëomiama ꞌicën.

¹⁰ Numiribi sinánquin ca usaquin Moisés cuënëomiacëxa. Unin ca ñu bëru ꞌapánuxun me mëníoia. Mëníoquin ca —ꞌapácëx canitancëxuan ñu bërun tuaia cana aín bimi biti ꞌai —quixun sinania. Usaribi oquin ca unin trigo bimi biquin, —ënë bimi cana pinuxun ꞌai —quixun sinania.

¹¹ Nun mitsúxmi Jesúsmi catamënun Nucën Papa Diosan bana ñuixuncëxunmi mitsun nun piti ñu nu ꞌinánti ca asábi ꞌicën.

¹² Nun cananuna bëtsi unin ꞌacësamaira oquin mitsu ꞌunánmian. Usa ꞌain ca bëtsi unimi ꞌináncësamaira oquin mitsun nu ñu ꞌinánti asábi ꞌitsíanxa. Usa ꞌaínbi cananuna a ñubi mitsunua bicëma ꞌain. Mitsun nun Jesucristo ñuicë bana cuaisama tanti rabanan cananuna ñuñuma ꞌixunbi mitsu ñu ñucácëma ꞌain.

¹³ Camina ꞌunanin, Nucën Papa Diosan mëníosabi oquin ca anuxun a rabiti xubunuxun an ñu ꞌacë unicama ꞌimainun sacerdotecamanribi Nucën Papa Dios rabiquin ꞌacë ñuina aín nami paná piia.

¹⁴ Usaribi oquin ca Nucën ꞌIbu Jesusan mëníocëxa, an a ñuiquin aín bana uni ñuixuncë unicama a ca an aín bana cuacë unicaman anúan aín ñu biti ꞌinánti ꞌicën.

¹⁵ Usa ꞌaínbi cana ꞌën Jesusan bana unicama ñuixunquinbi añu ñubi bicëma ꞌain. Bëríribi cana ꞌëmi ñu ꞌinánun quixun ënë quirica mitsu buánmiman. Bana ñuixuncë cupí cana añu ñubi bicëma ꞌai quixun ꞌën mitsu cacë, a bana cëmë ꞌiti cana cuëëniman. ꞌAcëñuma ꞌaish ꞌëx bamacëbëbi ca a bana cëmëma ꞌiti ꞌicën.

¹⁶ ꞌËn Jesusan bana unicama ñuixuncë cupí cana rabiacátima ꞌain. ¡Aín bana ñuixunun Jesucristonën ꞌë cacë ꞌixunbi an cacësa oquin ꞌacëma ꞌaish carana uisai ꞌicë ꞌitsían!

¹⁷ Nucën Papa Diosan ca Jesucristo cupía unicama ainan ꞌinun ië́miti ꞌicë quicë bana, a ꞌëxbi cuëënquin ñuixuncë ꞌixun cana cupí biti sinántsian. ꞌIxunbi cana ꞌënbi sináncëma, an ꞌë a bana ñuixunun ꞌë cacë cupí, an cacësabi oquinshi ꞌati ꞌain.

¹⁸ ꞌËn cupí biti asábi ꞌaínbi cana cupí biquinma unicama Jesucristo ñuicë bana ñuixunin. Ñuixuni cana curíqui bitsi cuëëncësamaira oi mitsúnmi ꞌë cupíoquinmashi a bana cuati cupí cuëënin.

¹⁹ ꞌËa unin ñu mëëmicëma, ꞌaíshbi Nucën Papa Dios cuëëncësabi oíshi ꞌiquin cana an camabi uni ñu mëëxuncë unisa ꞌixun, Cristomi catamënun unicama aín bana ñuixunin.

²⁰ Judíos unicamabë ꞌaish cana atu Jesucristomi sinánmisa tani judío uni ꞌicësai ꞌin. Usaía judíos unicama ꞌinun Moisésnën cuënëo bana quicësabi oi ꞌicë cupíma Nucën Papa Diosmi catamëcë cupíshi cana ië́ti ꞌai quixun ꞌunánquinbi cana an usai judíos unicama íti Moisésnën cuënëo bana cuacë unicama Jesucristomi sinánmisa tanquin a bana quicësaribi oquin ꞌain.

²¹ Usa ꞌaínbi cana judíosma uni, an Moisésnën cuënëo bana ꞌunáncëma, acamabë ꞌixun Jesucristomi sinánun ꞌunánmiti cupí atux ꞌicësaribiti ꞌinux, usaía judíos unicama ꞌinun Moisésnën cuënëo bana manucësa ꞌian. Usai ꞌibi cana Jesucristonan ꞌaish Nucën Papa Diosan bana quicësabi oi ꞌin.

²² Jesucristomi catamëcë ꞌixunbi upí oquin ami catamëti ꞌunáncëma unicama Jesucristomi upiti catamënun quixun cana atun sináncë ñu timaquinma bana ñuixunin. Camabi uni cana uisai cara atux ꞌia usairibi ꞌiquin, Cristomi upiti catamënun ꞌaquinin.

²³ Jesucristomi catamëtia Nucën Papa Diosan ainan ꞌinun ië́minun cana unicama bana ñuixunin, Jesucristomi catamëcëbë atubë cuëënuxun.

²⁴ Camina ꞌunanin, cuai ca uni uix pain cara bëbati ꞌicë isnux, camáxbi abatia. Camáxbi abácëbëtanbi ca ax paían bëbacë ainshi ñu bitsia. Usaribiquin camina Jesucristobë tsóti sinani cuëënquin ax quicësabi oquinshi ꞌati ꞌain.

²⁵ Uni axa cuaiticama ax ca aín nami cushi ꞌinux bachuaquin tania. Aín namia cushi ꞌiti cupí ca ñu ꞌatima ꞌaima. Usai ꞌitancëx abati ax pain bëbaquin ca ñu bitsia. Usai ꞌiquian bicëxbi ca a ñu chëqui ꞌatimatia. Usa ꞌaínbi cananuna nux Jesús cuëëncësabi oi ꞌinux camabi nëtën upí ꞌiti ꞌain. Usai ꞌitancëx cananuna an ꞌimicëx asaribi upí ꞌaish uinsaranbi nëtë́timoi abë tsóti ꞌain.

²⁶ Amanu amanu sinánquinma cana Jesucristo cuëëncësabi oquin upí oquin ꞌati sinanin. Bëxuñu uníxa abati amo amotan cuancësari cana ꞌiisama tanin, ꞌimainun cana unia suñubë mëëanancësa ꞌiisama tanin.

²⁷ ꞌËn Nucën Papa Diosan bana unicama ñuixuncë ꞌixunbi ax cuëëncësabi oi ꞌima ꞌëxbi cëmëia ca an aín bana ñuiaxma ꞌinun ꞌë cati ꞌicën. Usaquian ꞌë cati rabanan cana ꞌën nami ñu ꞌatima ꞌati cuëëncëbëtanbi ꞌaíma Jesucristo cuëëncësabi oíshi ꞌin.