1 Corintios 8 - Kashibo-Kakataibo Biblia

Unin ꞌacë ñu rabiquin ñuina ꞌacë piti ñuiquian Pablonën ca bana

¹ Unían unínbi ꞌacë ñu rabiquin ꞌaracacë ñuina ꞌacë a namix cara piisa ꞌicë quixunmi ꞌë ñucácë bana, a ñuiquin cana ësaquin mitsu cain. ꞌËn ꞌunáncësaribi oquin camina mitsun asérabi ꞌunan, Nucën Papa Diosëshi dios ꞌain ca unin ꞌacë ñu rabiquin ñuina rëcë a nami ax bëtsi namisaribi ꞌaish piti ꞌicën. Usaquin sinani ca uni raíri ainra isa ñu ꞌunánxa quixun sinani, a nami pi, bëtsibë cëruanánia. Usa ꞌaínbi ca raírinëx, a namix ca bëtsi namisaribi ꞌaish piti ꞌicë quixun ꞌunánxunbi an picëma unicama nuibaquin ꞌuchamisama tanquin piima, Jesucristonën sinánsaribi ꞌixun.

² An —ꞌën cana ñu ꞌunan —quixun sináncë uni an ñu ꞌunánxunbi ca asérabi uisai ꞌiti cara quixun upí oquin ꞌunánima.

³ Usa ꞌaínbi ca axa asérabi ami sináncë uni a Nucën Papa Diosan ainan ꞌicë ꞌunania.

⁴ Unínbi ꞌacë ñu rabiquin ñuina rëcë aín nami piti cara asábi ꞌicë quixunmi ꞌë ñucácë bana a ñuiquin cana ësaquin mitsu cain. Cananuna ꞌunan, unin ꞌacë ñu ax ca ñuishi uniocë ꞌaish asérabi diosma ꞌicën. Nucën Papa Dios ax ca achúshi ꞌicën, bëtsi dios ca ꞌaíma ꞌicën.

⁵ Raíri unin ca sinania, ꞌaisamaira ca dios ꞌicë quixun. Usa ꞌaish ca naínu ꞌicë ꞌimainun menu ꞌicëribi ꞌicën. Ax ca dios ꞌicë quianan ax ca nun ꞌibu ꞌicë quiax quia.

⁶ Usaquian sináncëbëtanbi cananuna nun ꞌunanin, achúshi ca Nucën Papa Dios ꞌicën. An ca camabi ñu uniocëxa. Ainan ꞌinun ca nuribi uniocëxa. ꞌImainun ca Nucën ꞌIbu achúshi, Jesucristo, ashi ꞌicën. An ca aín Papabëtan camabi ñu unionan nuribi uniocëxa.

⁷ Usa ꞌaínbi ca axa Jesúsmi catamëcë uni raírinën —unían rabinuxun ꞌacë ñu ax ca ñuishi ꞌaish anu nun rabiti dios, ama ꞌicë —quixun upí oquin ꞌunaníma. ꞌUnánquinma ca usabi oquin unin ꞌacë ñu rabicë ꞌixun, Jesucristomi catamëquinbi a ñu rabiquin ñuina rëxun aín nami piia. Piquinbi ca —unían a ñu rabiquin rëcë ñuina nami pi sapi cana ꞌucha —quixun sinania.

⁸ Nucën Papa Diosan iscëx ca an ñu picëma uni ꞌicësaribi an ñu picë uni ꞌicën. Usa ꞌain cananuna nun ñu picë cupí ꞌianan nun ñu picëma cupí Nucën Papa Diosan iscëx upí ꞌima.

⁹ ꞌAisa tanquin camina uni itsin usa ñu rabiquin ñuina ꞌacë aín nami piti ꞌain. Usa ꞌaínbi camina an upí oquin —a ñux ca unin ꞌacë ꞌaish ñuishi ꞌicë —quixun ꞌunáncëma uni a ꞌuchamiti rabanan sinánti ꞌain, —cana pitima ꞌai —quixun.

¹⁰ Ënëx ca ësa ꞌicën. Min a rabinuxun unin uniocë ñu a rabiquinma camina —a rabiquian unin rëcë ñuina nami a piibi cana Nucën Papa Diosmi ꞌuchaima —quixun sinánquin, anuxun a ñu rabiti xubunuxun a nami piti ꞌain. Usa ꞌaínbi ca minmi a nami piia iscë cupí an —unin uniocë ñux ca ñuishi ꞌicë —quixun upí oquin ꞌunáncëma uni, an a ñu rabiquin a nami piti ꞌicën.

¹¹ Min a nami piquin camina, minun rabanan ꞌicësaribitia anun rabananribi Cristo bama uni, a ꞌuchamin.

¹² Usaquin piquin camina axa mibë Jesúsmi sináncë uni, an —unin uniocë ñu ax unínbi ꞌacë ꞌaish cushiñuma ꞌain ca a rabiquin unin ꞌacë ñuina namix bëtsi namisaribi ꞌicë —quixun ꞌunáncëma ꞌixunbi anribi pinun sinánmin. Sinánmi ami ꞌuchai camina Cristomiribi ꞌuchain.

¹³ Usaquin ꞌën a nami piquin axa Jesúsmi sináncë uni itsi ꞌuchamiti rabanan cana xënibua ꞌaínbi unin ꞌacë ñu rabiquin pitia ꞌacë ñu a pitima ꞌain.