1 Corintios 7 - Kashibo-Kakataibo Biblia

II. CORINTONU ꞌICË UNICAMAN ÑUCÁCËXUAN PABLONËN CA (7-16) Unin cara xanu biti ꞌicë quixuan Corintonu ꞌicë unicaman ñucácëxuan Pablonën ca

¹ Mitsúnmi ꞌë quirica bëmiquin ñucácë banacama a ñuiquin cana ësaquin mitsu cain, unin xanu bitima ca asábi ꞌicën.

² Usa ꞌaínbi ca camabi unin xanu cuëënia. Usa ꞌain ca xanu itsi cuëënti rabanan camabi uni xanuñu ꞌiti ꞌicën, camabi xanúxribi ca bënëñu ꞌiti ꞌicën.

³ Nucën Papa Diosan mëníosabi oi ca uni aín xanubë ꞌiti ꞌicën. Usaribiti ca xanu aín bënëbë ꞌiti ꞌicën.

⁴ Xanux ca axëshima ꞌicën, ax ca aín bënënanribi ꞌicën. Usaribiti ca uni axëshima ꞌicën, ax ca aín xanunanribi ꞌicën.

⁵ Usa ꞌain ca xanun aín bënë aín nami ꞌaisa tancëxun timatima ꞌicën. ꞌImainun ca unínribi aín xanu aín nami ꞌamitisa tancëxun timatima ꞌicën. A rabëtaxbi upiti Nucën Papa Diosbë banatisa tani cananquin mëníotancëx cuni ca ënánanti ꞌicën. Ñunshin ꞌatimanën ꞌapúan ꞌatimaquin sinánmicëx tënëtisama tani ꞌuchati rabanan biránantëcënuxbi ca bënëtishi ënánanti ꞌicën.

⁶ Unían asérabi xanu binun quixun cana ꞌën caiman. Biisa tanquin ca biti ꞌicën.

⁷ ꞌËn sináncëx ca camabi uni ꞌësaribi xanuñuma ꞌiti asábi ꞌicën. Usa ꞌaínbi ca Nucën Papa Diosan achúshi achúshi uni, xanuribi, uisai cara ꞌiti ꞌicë quixun mëníoia.

⁸ Ësaquin cana mitsu cain, xanuñuma unin xanu bitima ca asábi ꞌicën, ꞌëx ꞌicësaribiti. ꞌImainun ca bënëñuma xanu ꞌimainun casunamëcë xanu bënutima asábi ꞌicën.

⁹ Usa ꞌaínbi ca xanuñuma ꞌiti tënëtisama tanquin unin xanu biti ꞌicën, xanúxribi ca bënëñuma ꞌiti tënëtisama tani bënuti ꞌicën.

¹⁰ Bënëñu xanu ñuiquin cana ësaquin cain, an ca aín bënë ëntima ꞌicën. ꞌËn sinanënbi caquinma cana Nucën ꞌIbu Jesusan sinánmicëxun usaquin cain.

¹¹ Aín bënë ënquinbi ca xanun uni itsi bitima ꞌicën. Biisa tanquin ca aín bënë bitëcënti ꞌicën. Usaribi oquin ca unin aín xanu ëntima ꞌicën.

¹² Ënë banaribi ñuiquin cana Nucën ꞌIbu Jesusan ꞌë sinánmicëma, ꞌënbi sinánquin, ësaquin mitsu cain: axa Jesucristomi catamëcë unin ca aín xanúxa Jesucristomi catamëcëma ꞌaíshbi abë upí ꞌixun ëinsama tancëxun ëntima ꞌicën.

¹³ Usaribi oquin ca xanuxun ax Jesucristomi catamëcë ꞌixun aín bënë Jesucristomi catamëcëma ꞌicëbi an ëinsama tancëxun ëntima ꞌicën.

¹⁴ Usa ꞌain ca aín xanu Jesúsmi catamëcë ꞌixun aín bënëribi Jesúsmi sinánun sinánmiti ꞌicën. Sinánmianan ca aín tuácamaribi Jesucristomi sinánun sinánmiti ꞌicën. Usaribi oquin ca aín bënën Jesúsmi catamëcë ꞌixun aín xanuribi Jesúsmi sinánun sinánmianan aín bëchicë Nucën Papa Diosan bana ꞌunánmiti ꞌicën. Usaquinmi ꞌaquincëx ca mitsun bëchicëcama ax an Nucën Papa Diosan bana cuacëma unin bëchicësa ꞌitima ꞌicën.

¹⁵ Usa ꞌaínbi ca axa Jesúsmi catamëcëma unin aín xanu Jesúsmi catamëcë ꞌicë ëinsa tanquin ënti ꞌicën. Usaía ꞌicëxbi ca aín xanun ꞌuchama ꞌicën. Usaribi oquin ca axa Jesúsmi catamëcëma xanun aín bënë Jesúsmi catamëcë ꞌicë ëinsa tanquin ënti ꞌicën. Usaía ꞌicëxbi ca aín bënën ꞌuchama ꞌicën. Nucën Papa Dios ca nuxnu nun xanubë ꞌatimonani cuëbícanani tsoti cuëënima.

¹⁶ Camina ꞌunaniman, mix xanu ꞌixunmi ami sinánmisa tancëx cara min bënë Jesucristomi sinánti ꞌicë quixun. Camina ꞌunaniman, mix bëbu ꞌixunmi ami sinánmisa tancëx cara min xanu Jesucristomi sinánti ꞌicë quixun.

¹⁷ Nucën ꞌIbu Dios cuëëncësabi oi camina a nëtë́an an mitsu ainan ꞌimicë, usaíbi ꞌiti ꞌain. Usoquin cana camabi ëmanu ꞌicë axa Jesucristomi catamëcë unicama cain.

¹⁸ Ënëx ca ësa ꞌicën. Mitsux judíos uni ꞌicë Nucën Papa Diosan Jesúsmi catamënun sinánmicëx camina mitsux judíos unicama ꞌicësaribiti ꞌunánti ocë ꞌaish usabi ꞌiti ꞌain. Usaribiti mitsux judíosma uni ꞌaish Jesúsmi catamëti ami sinántancëx camina judíos uni ꞌicësaribiti ꞌinux ꞌunánti oracatima ꞌain.

¹⁹ ꞌUnánti oracacë ꞌianan ꞌunánti oracacëma ꞌixunbia aín bana quicësabi oquin ꞌaia cuni ca Nucën Papa Diosan uni upí isia.

²⁰ Uisai cara Nucën Papa Diosan ainan ꞌinun ꞌimicëma pain ꞌaish ꞌiaxa, usaíbi ca ainan ꞌaish uni ꞌiti ꞌicën.

²¹ Mixmi an uni ñu mëëxuncë uni ꞌicë Nucën Papa Diosan ainan ꞌimicëxun camina bënë́quinma min ꞌacësabi oquin an mi ñu mëëmicë uni ñu mëëxunti ꞌain. Usa ꞌaínbi camina an mi ꞌaisa tanquin chiquíncëx anuax cuanti ꞌain.

²² Uni an uni ñu mëëmicë uninan ꞌixun ca aín ꞌibu cuëëncësabi oquin ꞌaia. Usa ꞌaíshbi ca Nucën ꞌIbu Jesucristonën ainan ꞌinun ꞌimicë ꞌixun a unin an ñu mëëmicë uni ñu mëëxuníbi, Nucën ꞌIbu Jesucristomi catamëcë ꞌixun upí oquin ꞌacë ꞌaish, abi ꞌaxuncësa ꞌia. Usaribi oquin ca uni an uni ñu mëëxuncëma a Nucën Papa Diosan ainan ꞌinun Cristomi sinánmicë ꞌixun, ax aín bamati nëtë sënë́ntamainun Cristonën uni ꞌixun ax cuëëncësabi oquinshi ꞌaia.

²³ Mitsúxmi ainainshi ꞌiti oquin ca Nucën Papa Diosan aín Bëchicëbi camabi uni cupí bamati oquin mëníocëxa. Usa ꞌain camina uinu ꞌicë unínbia Jesucristo cuëëncësoquinma ax cuëëncësoquinshi ꞌacë ꞌitima ꞌain.

²⁴ ꞌËn xucë́antu, cana mitsu catëcënin, uisai caramina Nucën Papa Diosan Jesucristomi sinánmicëma pan ꞌaish ꞌia, usabii camina ꞌiti ꞌain, Nucën Papa Dios cuëëncësabi oi.

²⁵ Nucën ꞌIbu Jesusan sinánmicëma ꞌëxbi cana, bënëñuma xanu ꞌimainun xanuñuma uni ñuiquinmi mitsun ꞌë ñucácë a ñui ësai quin, Nucën ꞌIbu Jesusan aín bana unicama ax cuëëncësabi oquin ñuixunti ꞌimicë ꞌaish.

²⁶ Axa ami catamëcëma unicaman ca axa Jesucristomi catamëcë unicama ami nishquin bëtsi bëtsi oia. Usaquian ꞌacëx cananuna upitax bucuiman. Usa ꞌain ca ꞌën sináncëx, xanuñuma uni ax usabi ꞌiti ꞌicën, bënëñuma xanu axribi ca usabi ꞌiti ꞌicën.

²⁷ Xanuñu ꞌixun camina a ënti sinántima ꞌain. Xanuñuma ꞌixun camina xanu biti sinántima ꞌain.

²⁸ Unin xanu biti, ax ca ꞌuchama ꞌicën. Usaribiti ca xanu bënuti ax ꞌuchama ꞌicën. Usa ꞌaínbi ca an xanu bicë uni ꞌimainun axa bënucë xanu, ax an Nucën Papa Diosan bana cuacëma unicaman ꞌatimocëx ꞌaisamaira tëmërati ꞌicën, an xanu bicëma uni ꞌimainun bënucëma xanu ꞌicësamaira oi.

²⁹ ꞌËn xucë́antu, ësaquin cana mitsu caisa tanin, xënibuirai cananuna tsótima ꞌain. Usa ꞌain ca uni xanuñu ꞌaíshbi xanuñumasa ꞌiti ꞌicën.

³⁰ Axa rarumacë uni an ca aín rarumatishi sinántima ꞌicën. Axa bëtsi unicamabë timë́ax cuëëncë unicamax ca axa cuëëncëma unicamasaribi ꞌiti ꞌicën. An ñu bicë uni axribi ca ñuñu ꞌaíshbi ñuñumasa ꞌiti ꞌicën.

³¹ Ënë nëtënuanu iscë ñu ënëx ca cëñutia. Usa ꞌain ca ënë nëtënuxuan an ñu bicë uni ax ñu bicëma unisa ꞌiti ꞌicën.

³² Mitsúxmi ënë nëtënu ꞌicë ñu ꞌaisamaira oquin sinani masá nuituti bënë́ti cana cuëëniman. Xanuñuma unin ca Nucën ꞌIbu Jesús cuëëncësa oquinshi ꞌati sinania, axa cuëëntanun.

³³ Usa ꞌaínbi ca xanuñu uni an ënë nëtënu ꞌicë ñuñu ꞌiti sinania, aín xanu cuëëntanun.

³⁴ Usaribi oquin ca bënëñuma xanun Nucën Papa Diosan iscëxun ñu upíshi ꞌati sinánan aín sinan upí ꞌixun Nucën ꞌIbu Jesús cuëëncësa oquinshi ꞌati sinania, ax cuëëntanun. Usa ꞌaínbi ca bënëñu xanu an ënë nëtënu ꞌicë ñuishi sinania, aín bënë cuëëntanun.

³⁵ Mitsu ënë nëtënu ꞌicë ñucama ꞌaisamaira sinánxma ꞌinun caquin cana mitsu masá nuitumitisama tanin. Mitsúxmi chuámarua ꞌiti cupíshi cana usaquin mitsu can, mitsúxmi bëtsi ñumi sinanima Nucën ꞌIbu Jesús cuëëncësabi oíshi ꞌi cuëënun.

³⁶ Usa ꞌaínbi ca unin aín bëchicë xanu, aín bënuti sënë́ncëbëtan, ꞌiisa tania bënumiti ꞌicën. Ax ca ꞌuchama ꞌicën. Usaía ꞌiti ca asábi ꞌicën.

³⁷ Usa ꞌaínbi ca uni itsin upí oquin sinánxun, aín bëchicë xanu bënumisama tanquin axribia bënutisama tania, a bënumitima ꞌicën. Usaía ꞌiti ca asábi ꞌicën.

³⁸ Usa ꞌain ca unin aín bëchicë bënumiti asábi ꞌicën. ꞌImainun ca unían aín bëchicë bënumitima ax asábiira ꞌicën.

³⁹ Bënëñu xanu an ca usai uni ꞌiti quicësabi oquin, bamacëma ꞌicë aín bënë ëntima ꞌicën. Aín bënë bamacëbë cuni ca ꞌiisa tani bënuti ꞌicën, Nucën ꞌIbu Jesús cuëëncëbë.

⁴⁰ Usa ꞌaínbi ca ꞌën sináncëx bënëñu ꞌaish ꞌicësamairai bënëñuma ꞌaish chuámarua tani cuëënti ꞌicën. ꞌËn sináncëxun ca Nucën Papa Diosan Bëru Ñunshin Upitan usaquin ꞌë sinánmiaxa.