1 Corintios 6 - Kashibo-Kakataibo Biblia

Axa Jesucristomi sináncë uníxa, an Nucën Papa Diosan bana ꞌunáncëma ꞌapumi manántima bana

¹ Mitsux Jesucristonën uni ꞌaíshbi mibëa Jesucristomi sináncë unibë nishanantancëxun camina axa Cristomi sináncëma ꞌapumi manánquinma, mitsúnbi an Nucën Papa Diosan bana cuacë uni raíribëtan mëníoti ꞌain.

² Jesucristo nun ꞌapu ꞌinux ucëbëtan ca aín unicaman abëtan camabi unin uisa ñu cara ꞌaxa quixun isti ꞌicën. ¿Mitsux Jesucristobë ꞌapu ꞌiti ꞌixun caramina unían bërí ꞌacë ñu ꞌunánquin mëníoxuntima ꞌain?

³ Angelnënribi cara ñu upí ꞌaxa quixun cananuna isti ꞌain. Angelcaman cara ñu upí ꞌaxa quixun ꞌunánti ꞌixun cananuna asérabi ënë nëtënu ꞌicë unin cara ñu upí ꞌaia quixun ꞌunánti ꞌain.

⁴ ¿Mitsux Jesucristonën uni ꞌaíshbi mibëa Jesucristomi sináncë unibë nishanantancëx caramina axa ami sináncëma uninu ami manani cuanti ꞌain?

⁵ Usai ꞌitimimi rabínun quixun cana usaquin mitsu cain. ¿Mitsúxbi caramina usa ñu mëníonantima ꞌain?

⁶ ¿Axa Jesucristomi catamëcë uníxa bëtsi ñui ami manani, axa Jesucristomi sináncëma ꞌapunu cuanti cara asábi ꞌic?

⁷ An mitsubëtan Jesucristonën bana ꞌunáncë unimi manánbëquinti ax ca ꞌaisama ꞌicën. Ami manánquinmami an uisa cara mi ocëxunbi tanshiquin min ñua mëcamatiabi isëshiti ca asábi ꞌiti ꞌicën.

⁸ Usai ꞌiti asábi ꞌaínbi camina mitsun uni itsimi ꞌuchaquin aín ñu mëcamanan bëtsi bëtsi ñuribi ꞌain, abëtanmi Jesucristonën bana cuacë unibi camina usoquin ꞌain.

⁹ ¿Aín nëtënu abë ꞌiisa ꞌaíshbi ca an ñu ꞌaisama ꞌacë uni aín nëtënu Nucën Papa Diosbë ꞌitima ꞌicë quixun caramina ꞌunaniman? Camina ꞌunánti ꞌain, ainanmabi xanu cuëëncë unicama ꞌimainun an Nucën Papa Diosmi sinánquinma unin ꞌacë ñu rabicë unicama ꞌimainun aín xanuma ꞌaínbi bëtsi unin xanubë ꞌicë uni ꞌimainun xanúxmabi uni itsibë ꞌicë uni,

¹⁰ ꞌimainun an ñu mëcamacë uni ꞌimainun an bëtsi unin ñu cuëëncë uni, ꞌimainun axa ñuianancë uni ꞌimainun paë́ncë uni ꞌimainun an uni paránxun aín ñu bicë uni, acamax ca Nucën Papa Diosan nëtënu ꞌitima ꞌicën.

¹¹ Usa uni camina mitsu raírinëx ꞌiacën. ꞌIá ꞌaínbi ca mitsun ñu ꞌatima ꞌacëcama tërë́ncë ꞌain mitsun nuitu upí ꞌicën. Usa ꞌaish camina Nucën ꞌIbu Jesucristo cupí, Nucën Papa Diosan Bëru Ñunshin Upitan ꞌimicëx, an iscëx ainan ꞌain.

Nun namia Jesucristonan ꞌain ꞌuchatima bana

¹² Asérabi ca ënë bana quia, “unin ca aín cuëëncësoquin ñu ꞌati ꞌicën”. Usa ꞌaínbi cana ꞌëx upí ꞌiisa tanquin camabi ñuira ꞌatima ꞌain. Unin ca aín cuëëncësoquin ñu ꞌati ꞌicën. Usa ꞌaínbi cana unían ñunshínquin ꞌacësoquin ñu ꞌatima ꞌaisama tanin.

¹³ Ësaía uni quicë ax ca asérabi ꞌicën: Piisa tanquin nun picë ñu ax ca nun pucunu atsíntancëxun nun nami cushioia, Nucën Papa Diosan mëníosabi oquin. Usa ꞌaínbi cananuna ënë menuxunu ꞌacësa oquin Nucën Papa Diosan nëtënu ꞌixun usa ñucama sinántëcëniman. Usa ꞌaínbi ca unin usai ꞌiti sinánquinbi tënëquin aín nami ꞌuchotima ꞌicën, aín xanuma ꞌaínbi xanu itsibë ꞌianan unix uni itsibë ꞌiquin. Unían ainan ꞌixun ax cuëëncësa oquinshi sinánun ca Nucën ꞌIbu Diosan camabi uni uniocëxa.

¹⁴ Usoquin nu unio ꞌixun ca an Nucën ꞌIbu Jesús baísquimiasaribi oquin aín cushínbi nuribi baísquimiti ꞌicën.

¹⁵ ¿Caramina, mitsux camina Jesucristonan ꞌai quixun ꞌunaniman? ¿ꞌËx Jesucristonan ꞌaíshbi carana ꞌëx ꞌatima xanubë asaribi ꞌinux ꞌiti ꞌain? Uisa ꞌaíshbi cana ꞌitima ꞌain.

¹⁶ ¿Axa xanu ꞌatimabë ꞌicë uni ax ca abë achúshisa ꞌicë quixun caramina ꞌunaniman? Nucën Papa Diosan bana cuënëo quicësabi oi ca uni xanubë rabë́ ꞌaíshbi achúshisa ꞌicën.

¹⁷ Usa ꞌaínbi ca uinu ꞌicë unix cara Nucën ꞌIbu Jesucristonan ꞌicë, an sináncësaribi oquin sinani abë achúshisa ꞌicën.

¹⁸ Usa uni ꞌimainun usa xanumi camina ꞌunánti ꞌain. Aín xanu ꞌaímabi xanu itsibë ꞌicë uni ꞌimainun xanúxmabi uni itsibë ꞌicë uni an ca abi aín namibi ꞌuchoquin ꞌatimamia. Ñu raíri ꞌaisama ꞌaquinbi ca unin usoquin aín nami ꞌuchoima.

¹⁹ ¿Aín Bëru Ñunshin Upí a Nucën Papa Diosan mitsu ꞌináncë, ax ca minu ꞌicë quixun caramina ꞌunaniman? Mitsux camina anu ax ꞌicë, a ꞌain. Usa ꞌain camina miishima ꞌain, ax ca min ꞌIbu ꞌicën.

²⁰ Nucën Papa Diosan ca mitsúxmi ainainshi ꞌiti oquin aín Bëchicë bamati oquin mëníocëxa. Ainan ꞌaish camina mitsux cuëëncësa oi ꞌima ax cuëëncësabi oíshi ꞌiti ꞌain. Usa ꞌixun camina mitsun nami ꞌimainun mitsun sinan upí ꞌixun Nucën Papa Dios cuëëncësa oquinshi ñu ꞌati ꞌain. Usaími mitsux ꞌia isquin ca raírinën —upí ca Nucën Papa Dios ꞌicë —quixun ꞌunánti ꞌicën.