1 Corintios 5 - Kashibo-Kakataibo Biblia

Ax aín xanuma ꞌaínbi xanubë ꞌicë uni ñuicë bana

¹ ꞌËn cana ësoquian chanioia cuan, micama achúshinëx ismina min papan xanubë ꞌin. Usai ꞌiti ca ꞌaisama ꞌicën. An Nucën Papa Diosan bana ꞌunáncëma uníxbi ca usai ꞌima.

² ¿An usa ñu ꞌacë uni mitsubë ꞌaínbi caramina mitsun —nux cananuna asábi ꞌai —quixun sinanin? Usaquin sinanima camina mitsux —nux cananuna ꞌaisama ꞌai —quixun sinani rabínti ꞌain. Rabínquin camina a uni mitsubë ꞌinúnma chiquínti ꞌain.

³ ꞌËx mitsubëma ꞌixunbi cana mitsubëtan ꞌacësaribi oquin ënuxunbi sinanin. ꞌËxbi anu ꞌixun ꞌacësa oquin cana —a uni ca ꞌaisama ꞌicë —quixun sinanin.

⁴ Usa ꞌain camina ami sinánquin an cushiocëxun Nucën ꞌIbu Jesucristo cuëëncësa oquin ꞌanux timë́ti ꞌain, ꞌënribi an cushiocëxun, an ca mitsu ꞌaquinia quixun sinánxunmainun.

⁵ Timë́xun camina a uni ñunshin ꞌatimanën ꞌapun uisoquin cara ꞌati ꞌicë usoquian ꞌanun ënti ꞌain. Usaquian ꞌacë́xa sinanacë ca a uni bamacëbi aín bëru ñunshin Nucën ꞌIbu Jesusan utëcënquin upí isti ꞌicën.

⁶ Bëtsi bëtsi ñu ꞌaisama ꞌaíbi camina mitsux rabinima —nux cananuna asábi ꞌai —qui cuëënin. Usai ꞌiti ca ꞌaisama ꞌicën. ¿Caramina ꞌunaniman, “anun pán chamiti ñun ca chamaratsu ꞌixunbi xuicëma pain ꞌicë páncama choia?” Usaribi oquin ca anu ꞌicë uni achúshinën ꞌuchaxbi sinanacëma ꞌixun anu ꞌicë unicama usaribitia ꞌinun ꞌimiti ꞌicën.

⁷ Usa ꞌain camina an a ꞌai ꞌuchati ñu ꞌacë uni a ñua ꞌatëcënuxunma ashiquin ënun sinánmiti ꞌain. Bëráma judíos unicamax carnero imi atun xëcuënu ꞌunánti oquin shiax, bamati ꞌaíshbi ië́a, usaribiti cananuna Cristo bama cupí ië́an. Bëráma axa ië́cë unicaman anun chamiti ñucëñunma ꞌacë pán piá usaribi ꞌinuxun camina mitsun Cristonan cupí uisa ꞌuchabi ꞌatëcëntima ꞌain.

⁸ Usa ꞌixun cananuna nun ꞌása oquin ꞌatimaquin sinánquinma upí oquinshi sinánan cëmë ꞌixun uni paránquinma, —nun ꞌucha tërë́ncë ꞌaíshnu Nucën Papa Diosnan ꞌinun ca Cristo bamacëxa —quixun sinánti ꞌain. Usa ꞌixun cananuna ñu ꞌaisama ꞌati sinanima asérabi Cristomishi sinani ax cuëëncësabi oíshi ꞌiti ꞌain.

⁹ Mitsu buánminuxun ꞌën cuënëocë quirica itsi anu cana ësaquin mitsu cacën, ainanmabi xanu cuëënbëquincë uni ꞌimainun xanúxmabi uni itsibë ꞌicë uni abë niaxma ꞌinun.

¹⁰ Camabi unibë niaxma ꞌinun quixun cana mitsu caiman. Ënë nëtënu ꞌicë ñuishi sináncë unicaman ca ainanmabi xanu cuëëanan, uni itsin ñu cuëëanan, ñu mëcamanan, Nucën Papa Diosmi sinánquinma unin ꞌacë ñu rabia. Camabi menu ca usa uni ꞌicën. Usa unibubë ꞌiisa tanquinmabi camina uinu ꞌicë menuabi usa uni isíma ꞌitima ꞌain.

¹¹ Ësaquinshi cana mitsu caisa tanin. Axa —ꞌëx cana Jesucristomi sináncë ꞌai —quibi cëmëcë unibë camina nitima ꞌain. Jesucristonainsa quiquinbia ainanmabi xanu cuëënbëquincë uni ꞌimainun xanúxmabi uni itsibëribi ꞌicë uni ꞌimainun bëtsi unin ñu cuëëncë uni ꞌimainun Nucën Papa Diosmi sinánquinma unin ꞌacë ñu rabicë uni ꞌimainun ñuianancë uni ꞌimainun paë́ncë uni ꞌimainun mëcamacë uni, usa unibubë camina nitima ꞌain, abëtanbi camina pitima ꞌain.

^12-13 ꞌËn cana axa Jesucristomi sináncëma unicama ꞌuchoquin —mix camina ꞌaisamaira uchañu ꞌai —quixun catima ꞌain. Nucën Papa Diosan cuni ca atu ꞌuchoti ꞌicën. Usa ꞌaínbi camina mitsúnbi ax mitsubë Jesucristomi catamëcë ꞌixunbia ꞌatima ñu ꞌaia ꞌunánquin a uni ꞌuchoti ꞌain. Usoquin ꞌaquin camina axa mitsubë ꞌicë uni aín ꞌucha cupí mitsubë ꞌiaxma ꞌinun chiquínti ꞌain.