1 Corintios 4 - Kashibo-Kakataibo Biblia

Usaía an aín bana ñuixunuan Cristonën caíscë uni ꞌiá bana

¹ Mitsun camina ꞌunánti ꞌain, nux cananuna an ꞌamicëxun Cristomi catamënun unicama aín bana ñuixuncëishi ꞌain. Usa ꞌaish cananuna unían ꞌunánma ꞌicëbi, usai Cristomi catamëti ca uni ainan ꞌinux ië́ti ꞌicë quixuan Nucën Papa Diosan sinan bana, a uni ñuinun ꞌimicë ꞌain.

² Uinu ꞌicë unin cara uni ñu mëëxunia an ca —upí oquin ca ñu mëëxunia —quixuan an ñu mëëmicë unin ꞌunánun upí oquin ñu mëëti ꞌicën. Usaribi ca an Nucën Papa Diosan bana ñuixuncë uni ꞌiti ꞌicën.

³ Usa ꞌaínbi cana ꞌën mitsúxmi ꞌë ñui ꞌëmi manáncë bana ꞌimainun an uni ñui uni itsimi manáncëxun cuacë ꞌapucaman ꞌë ꞌuchocë bana, abi taniman. Uisa uni carana ꞌëx ꞌai quixun cana ꞌënbi sinaniman, Nucën ꞌIbu Jesucristonën cuni ca ꞌunania.

⁴ ꞌËn ñu ꞌatima ꞌacë ꞌën chiquinacëma ca ꞌaíma ꞌicë quixun ꞌën sinaniabi ca Nucën ꞌIbu Jesucristonën cuni carana asérabi ñu ꞌaisama ꞌacëma ꞌai quixun ꞌunania.

⁵ Usa ꞌain camina Jesucristo utëcëncëma pain ꞌain, uisa uni cara uni itsi ꞌicë quixun sinántima ꞌain. Utëcënxun ca Nucën ꞌIbu Jesucristonën, camabi uni an unë́xun ñu ꞌacëcama ꞌimainun aín nuitu mëúa sináncë ñucamaribi, an upí oquin ꞌunánun ꞌunánmiti ꞌicën. ꞌUnánmicëbëtan ca Nucën Papa Diosan ui unicaman cara aín ꞌucha tërë́ncë ꞌixun ñu upí ꞌaxa, a usaribi oquin —upí oquin camina ꞌa —quixun caquin cuëënmiti ꞌicën.

⁶ ꞌËn xucë́antu, Apolobë ꞌëx ꞌicësaribitimi mitsux bëtsi bana sinanima Nucën Papa Dios quicësabi oíshi ꞌinun cana ënë ñucama ñuiquin mitsu cain. —An mitsu ꞌunánmicë unin ꞌunánmicësamaira oquin ca an nu ꞌunánmicë unin nu ꞌunánmia —quixun camina bëtsi uni catima ꞌain.

⁷ ¿Uin cara mitsu raíri, bëtsi unicama ꞌicësamaira oími upí ꞌinun ꞌimiaxa? Nucën Papa Diosan ꞌimicëxma camina upí ꞌitsianma. Nucën Papa Diosan ꞌimicëx upí ꞌixun ¿caramina uisa cupí —ꞌëxbi cana upí ꞌai —quixun rabíquin sinanin?

⁸ Mitsun camina ësaquin sinanin, —nun cananuna upí oquin Nucën Papa Diosan Bëru Ñunshin Upitan ꞌunánmicëxun camabi ñu ꞌunanin —quixun. Usa ꞌaish camina nun bëtsi ñu mitsu ꞌunánmiti cuëëniman. Mitsun sinani camina mitsúxbi ꞌapusa ꞌain, Jesucristo utëcëncëma ꞌaínbi. Mitsúxmi ꞌapu ꞌain cananuna nuxribi cuëëni ꞌapu ꞌitsían.

⁹ Usami mitsux ꞌaínbi ca ꞌën sináncëxun Nucën Papa Diosan nu uni raíri meuira ꞌimiaxa, aín bana ñuixunun Jesusan caíscë nux ꞌicëbi. Unían —ꞌuchañu ꞌaish ca bamati ꞌicë —quixun ñuicë unisa cananuna nux ꞌain. Nuxnu usaquin unin ñuicë ꞌicë ca unicama ꞌimainun ángelcamanribi ꞌisia.

¹⁰ Cristonën cacësabi oquin ꞌacë cupí mitsun iscëx nux ñuumara ꞌimainun camina mitsux aín bana ꞌunáncë ꞌain. Mitsun sináncëxa nun bana racuëti banacësa, ꞌimainun ca mitsun bana cushi ꞌicën. Usa ꞌicë nu timaquin nu ñuianan ca mitsuishi unin nuiia.

¹¹ Bërí nëtë́nbi cananuna bëráma ꞌiásaribiti ꞌacëñuma ꞌianan shimanan chupa upíñuma ꞌain. ꞌImainun ca unin nu bëtsi bëtsi oquin ꞌatimoia. Usa ꞌaish cananuna anu ꞌiti xubuñumabi ꞌain.

¹² ꞌAtsánxunbi cananuna nun piti binuxun nun mëcënan ñu mëëin. Numia ꞌatimati banaiabi cananuna nun Nucën Papa Dios a unicama ñucáxunin. Nu bëtsi bëtsi ocëxunbi cananuna tanshitin.

¹³ Nu ñui ꞌatimati banaiabi cananuna nun abë nuibanainsa tanquin upí oquinshi ꞌësëin. Unin sináncëx cananuna nux ꞌaisama ꞌicëa unin pucë chinan usaribi ꞌain, bëríribi cananuna unin nu sináncëx usa ꞌain.

¹⁴ Mitsúxmi masá nuitunun cana ënë ñucama mitsu cuënëoxuniman. Mitsúxmi ꞌën bëchicësa ꞌicë cana nuibaquin upí ꞌinun mitsu ꞌësëin.

¹⁵ ꞌItsa unin Cristo ñuiquin mitsu ñuixununbi cana ꞌën pain Jesucristo mitsu ñuixuancën. ꞌËn ñuixuncëxun cuati camina ami catamëacën. Usa ꞌain cana ꞌëxëshi mitsun papasa ꞌain.

¹⁶ ꞌËn pain Jesucristonën bana mitsu ñuixuncë ꞌaish camina ꞌëx ꞌicësaribiti ꞌiti ꞌain.

¹⁷ Mitsúxmi ꞌëx ꞌicësaribiti ꞌinun cana Timoteo mitsu istánun xuan. ꞌËn bana ñuia cuati axribi asérabi Nucën ꞌIbu Jesucristomi catamëcë ꞌaish ca ꞌën nuibacë bëchicësa ꞌicën. Mitsunu cuanxun ca uisai carana ꞌëx Jesucristomi catamëcë ꞌaish ꞌi, a mitsu ñuixunti ꞌicën. Camabi ëmanuaxa timë́cë axa Jesucristomi catamëcë unicama a cana usai cana ꞌëx Jesucristomi catamëti ꞌi quixun ꞌunánmin.

¹⁸ Mitsu raírinëx camina ꞌëx sapi isna anu cuanti racuëti quixun sinani cërutin.

¹⁹ Usaquin sináncëbëbi cana Nucën ꞌIbu Jesucristo cuëëncëbë ꞌitsama nëtë ꞌicëbë mitsu isi cuanti ꞌain. Cuanxun cana a unicaman cara aín cuëbitainshi banaquinma asérabi ax quicësabi oquin ꞌaia quixun isti ꞌain.

²⁰ Axa —ꞌëx cana Nucën Papa Diosnan ꞌai —quicë uni ama, an aín bana quicësabi oquin ꞌacë uni ax cuni ca asérabi Nucën Papa Diosnan ꞌicën.

²¹ ¿ꞌËn mitsu ñu cai cuanti caramina cuëënin? ¿ꞌËn ñu caquinma mitsu nuibaquin upí oquinshi cai cuanti caramina cuëënin?