1 Corintios 3 - Kashibo-Kakataibo Biblia

An Nucën Papa Diosan bana uni ñuixuncë uni ñuicë bana

¹ ꞌËn xucë́antu, ëx mibë ꞌixun cana axa aín Bëru Ñunshin Upitan sinánmicëx upiti Nucën Papa Diosmi catamëcë unicama ꞌunánmicësa oquin mitsu ꞌunánmiama ꞌain. Ama, an ënë menu ꞌicë ñuishi sinánquin ëncëma pan unisa ꞌicë cana mitsu ꞌunánmiacën, bërími Cristo ꞌunáncë ꞌicë.

² Tuá xuratsu aín titan ñu pain pimiquinma aín xuma pain ꞌamicësa oquin, cana a pain ꞌunánti banaishi mitsu ꞌunánmiacën, Cristonëan mitsu ꞌunánmiti ñumi asérabi ꞌunántisama pain ꞌicë. Bëríbi camina usabi ꞌain.

³ Usai ꞌaish nutsi cuamianani nishananquin camina Cristonanma unin sináncësa oquinshi sinanin. Usa ꞌi camina an Nucën Papa Diosan bana cuacëma unicamaxa ꞌicësai ꞌin.

⁴ Usa ꞌaish camina raírinëxa —ꞌëx cana Pablonën ꞌunánmicë ꞌai —quimainun raírinëx —ꞌëx cana Apólonën ꞌunánmicë ꞌai —quin. Usai qui camina Cristonanma unin sináncësa oquinshi sinanin.

⁵ ¿ꞌËx Pablo ꞌaish carana min sináncëx uisa uni ꞌain? ¿Mitsun sináncëx cara Apolo uisa uni ꞌic? Nucën Papa Diosan nu sinánmicësabi oquin mitsu bana ñuixuncëishi cananuna nux ꞌain. Nun aín bana ñuixunia cuati camina Nucën ꞌIbu Jesucristomi catamëacën.

⁶ Ënëx ca ësa ꞌicën: Unían ñu bëru anu ꞌapatia ca a me bëtsi unin ꞌumpaxan chabóia. Usoiabi ca Nucën Papa Diosainshi ñu bëru comia. Usaribi oquin cana ꞌën mitsu Nucën Papa Diosan bana ñuixunquin ꞌunánmiacën. ꞌËn mitsu ꞌunánmicë bana a ca Apólonën mitsu ñuixuntëcëancëxa. Usoquinu nu rabëtan ñuixuniabi ca Nucën Papa Diosainshi Jesucristomi catamënun mitsu sinánmiacëxa.

⁷ An ñu bëru ꞌapácë uni ꞌimainun an a me ꞌunpaxan chabócë uni anbi ca ñu comima. Nucën Papa Diosan cuni ca comia. Usaribi oquin ca unin aín bana ñuixuniabi Nucën Papa Diosanshi uni Jesucristomi catamëti ainan ꞌinun ꞌimia.

⁸ Ainra paían uni bana ñuixuncë uni asaribi ca anribia uni bana ꞌunánmitëcëncë uni ax ꞌicën. Uisoquin cara aín ñu mëëti ꞌaxa istancëxun ca Nucën Papa Diosan a unicama cupíoti ꞌicën.

⁹ Nucën Papa Dios cuëëncësabi oquin cananuna nucaman mitsu Jesucristomi sinánun aín bana ñuixuancën, unían ñu bëru ꞌapácësaribi oquin. Usa ꞌain ca Nucën Papa Diosan unían ꞌapácë ñu bërua comicësaribi oquin Jesucristomi upiti catamënun mitsu ꞌimia. ꞌImainun ca ësa ꞌicën: Xubuoquin ca unin amia cushiti itácama pain nitsíntancëxun i puruia. Usotancëxun ca aín mascuáncama ꞌaia. Usoquian ꞌacëx ca xubu upí ꞌia. Usaribi oquin ca Nucën Papa Diosan mitsu upí oquin ꞌacë xubu achúshisa ꞌinun ꞌimia.

¹⁰ An xubu ꞌati ꞌunáncë unin ca itá upí pain caístancëxun nitsinia. Usaribi oquin cana ꞌën pain mitsu Jesucristomi catamënun ꞌunánmiacën. Usa ꞌain ca uni itsían, ami xubu ꞌati nitsíncë itámia unin i purucësa ꞌitánun mitsu Cristomi catamënun bana ñuixunquin mitsu ꞌunánmia. Usa ꞌain ca uicaman cara mitsu ꞌunánmia an Jesucristo cuëëncësabi oquinshi mitsu ꞌunánminux, bëtsi bana mitsu ñuixunti rabanan bërúancati ꞌicën.

¹¹ Unían bëtsi bana ñuixuncëxbi ca ꞌën a ñuiquin ñuixuncë banaishi cuati Jesucristomi catamëti uni Nucën Papa Diosnan ꞌiti ꞌicën.

^12-13 Jesucristonën uni, an uni bana ñuixuncë, an ca Nucën Papa Diosan ꞌaquincëxun aín bana upí oquin ꞌunánquin, Jesucristomi catamëtia Nucën Papa Dios cuëëncësabi oi ꞌinun unicama ꞌunánmiti ꞌicën. Usa ꞌaínbi ca uni raírinën, usaquin ꞌunánmiquinma unicama Nucën Papa Dios cuëëncësabi oi ꞌinun ꞌunánmima. Usa ꞌain ca utëcënquin Jesucristonën uin cara aín bana upí oquin ꞌunánmiaxa quixun isnuxun ꞌaia. An upí oquin ꞌunánmicë unin ꞌunánmicë unicamax ca upí ꞌaish maxax upí ꞌimainun curi ꞌimainun uxu manë tsin nëënquinbi picëma usaribi ꞌiti ꞌicën. An upí oquinma ꞌunánmicë unin ꞌunánmicë unicamax ca i, pëi, basi xo acama nëënquin tsin picë usaribi ꞌiti ꞌicën.

¹⁴ An a ñuiquin bana ñuixuncëxun cuati ami catamëquian unin Jesucristo quicësabi oquin ꞌacë ꞌain ca an atu bana ñuixuncë uni a Nucën Papa Diosan, upí oquin camina uni ꞌë ñuiquin bana ñuixuancë quixun caquin cuëënquin upí oquin cupíoti ꞌicën.

¹⁵ Usa ꞌaínbi ca an aín bana cuacë unicama asérabi Jesucristomi catamëquin ax quicësabi oquin ꞌati ꞌunánmiama cupí, an atu bana ñuixuncë uni a Nucën Papa Diosan, upí oquinmi ꞌën bana uni ꞌunánmiama ꞌicë cana mi cupíoima quixun cati ꞌicën. Usa ꞌaish ca a uni —ñancábi cana uni ꞌunánmiacë —quixun sinani, cupí bitsimabi ië́ti ꞌicën, tsin nëëncëxbia uni ië́cësaribi.

¹⁶ ¿Mitsun caramina ꞌunaniman, anua Nucën Papa Dios ꞌicë a camina mitsux ꞌai quixun? Nucën Papa Diosan Bëru Ñunshin Upí ax ca mitsunu ꞌicën.

¹⁷ Aín Bëru Ñunshin Upí anu ꞌicë unicamax ca Nucën Papa Diosan iscëx upíira ꞌicën. Usa uni camina mitsux ꞌain. Usa ꞌain ca ui unin cara usa unicama sinanamiquin bëtsi bana ñuixunquin ami manumia, a Nucën Papa Diosan uisa cara oti ꞌicë usoquin ꞌati ꞌicën.

¹⁸ Uni itsían mitsu sinanamiti rabanan camina bërúancati ꞌain. Mitsun camina —ꞌënbi ñu ꞌunáncë cana ꞌai —quixun sinántima ꞌain. Usaquin sinanima camina Jesucristonën sinánmicë ꞌinux ñu ꞌunáncëma unisa ꞌiti ꞌain.

¹⁹ Abia unin sináncë bana ax ca Nucën Papa Diosan iscëx ñancáishi ꞌicën. Nucën Papa Diosan bana aín unin cuënëo, ax ca ësai quia: “Ui unin cara bëtsi uni parania, a uni ca Nucën Papa Diosan ꞌamicëxun bëtsi unínribi usaribi oquin cupiti ꞌicën”.

²⁰ Ësairibi ca aín bana quia: “An ñu ꞌunáncë unicama anbi sináncë banax ca ñuuma ꞌicë quixun ca Nucën ꞌIbu Diosan ꞌunania”.

²¹ Usa ꞌain camina uin cara mi ꞌunánmia a unin ꞌunánmicëxbi rabítima ꞌain. Uisa ñu cara aín unicama Nucën Papa Diosan ꞌunánmia, a camina mitsunribi ꞌunánti ꞌain.

²² ꞌË ꞌimainun Apolo ꞌimainun Pedro, nucaman mitsu ñuixuncë banacama camina camaxunbi ꞌunánti ꞌain. Nucën Papa Diosan ca ënë menu ꞌicë ñu mitsu ꞌinania. An ꞌimicëx camina ënë menu upiti bucuin. An ꞌimicëx camina bamatancëxbi abë upiti bucuti ꞌain. Bërí camina an ꞌimicëx asábi ꞌain, usabi camina ꞌiti ꞌain, xënibua ꞌaínbi.

²³ ꞌIanan camina Cristonan ꞌain. Cristo ax ca Nucën Papa Diosnan ꞌicën.