1 Corintios 2 - Kashibo-Kakataibo Biblia

Cristo i curúsocënu bama bana

¹ ꞌËn xucë́antu, Nucën Papa Diosan bana mitsu ñuixuni cuanxun cana an quirica ꞌunáncë unicamaxa quicësai unin cuaisama banan banaquinma mitsu ñuixuan.

² Mitsubë ꞌixun cana bëtsi bana ñuixunti sinánquinma, Jesucristo, unin i curúsocënu matáscë, ashi mitsu ñuixunti sinan.

³ Mitsubë ꞌëx ꞌain ca ꞌën nami ꞌaisama ꞌiaxa. Mitsúnmi ꞌën bana cuaisamasa sinani cana racuëti bërëan.

⁴ An ñu ꞌunáncë unían aín sinanënshi sinánquin bana ñuicësa oquin cana Jesucristo ñuiquin mitsu ñuixuncëma ꞌain. Ama, aín Bëru Ñunshin Upitan ꞌaquincëxun cana Nucën Papa Diosan cushínshi ñuixunquin Jesucristomi catamënun mitsu sinanamian.

⁵ Unían aín sinanënbi sináncë banami catamëcë cupíma, asérabi aín cushían Nucën Papa Diosan sinanamicë mitsux ꞌinun quixun cana usaquin bana ñuixuan.

Aín Bëru Ñunshin Upitan sinánmicëxuan unin Nucën Papa Diosan ꞌunánmicë ñu ꞌunánti bana

⁶ Axa Jesucristomi catamëcë unicaman aín bana quicësabi oquin ꞌaia cananuna a unicama uisaira cara aín banacama quia quixun ñuixunin. Nun banax ca ënë nëtënu ꞌicë axa Cristomi catamëcëma unicaman ñuicë bana ama ꞌicën. ꞌIanan ca aín ꞌapucaman ñuicë bana ama ꞌicën. Acaman banaxa cushi ꞌicëbi ca xënibuquin unin sinanima.

⁷ Usa bana ñuixunquinma cananuna Nucën Papa Diosan ënë me uniocëma pan ꞌixunbi sinan bana a ñuixunin. A bana quicësabi oi ca Jesucristo cupí uni aín ꞌuchacama tërë́ncë ꞌaish xënibua ꞌaínbi Nucën Papa Diosnan ꞌiti ꞌicën. Usa ꞌicëbi ca bëráma Nucën Papa Diosan, unicaman a bana ꞌunánun sinánmiama ꞌicën. Bërí cananuna an nu cacësabi oquin unicaman ꞌunánun a bana ñuixunin.

⁸ Ënë menu ꞌicë ꞌapucaman ca a bana ꞌunánma ꞌicën. A bana ꞌunánxun ca Nucën ꞌIbu Jesús, Diossaribi cushi, a i curúsocënu matásmiama ꞌitsíanxa.

⁹ Nun nu ñuicë banax ca Nucën Papa Diosan bana cuënëosaribi ꞌicën. A banax ca ësai quia: Uinu ꞌicë unínbi ca iscëma ꞌicën, uinu ꞌicë unínbi ca a ñui quia cuacëma ꞌicën, uinu ꞌicë unínbi ca aín sinanën sináncëma ꞌicën, uisairai cara an a nuibacë uni abë ꞌaish ꞌiti ꞌicë quixun, Nucën Papa Diosan mëníosabi oi.

¹⁰ Nucën Papa Diosan mëníocëxun ca unin ꞌunáncëbëtanmabi aín Bëru Ñunshin Upitan nu ꞌunánmiaxa. An ca camabi ñucama ꞌunania, Nucën Papa Diosan sináncë ñucamaribi ca ꞌunania.

¹¹ Uinu ꞌicë unínbi ca bëtsi unían sináncë ñu ꞌunanima, a unínshi ca an aín nuitu mëu sináncë ñu ꞌunania. Usaribi oquin ca unin Nucën Papa Diosan sináncë ñu ꞌunanima. Aín Bëru Ñunshin Upitáinshi ca Nucën Papa Diosan sináncë ñu ꞌunania.

¹² Nucën Papa Diosan ca nu axa Jesucristomi sináncëma unían sináncësaribi oquin sinánun ꞌimicëma ꞌicën. Ama, uisaira oquin cara an nu ꞌimiti ꞌicë quixun nun ꞌunánun ca Nucën Papa Diosan aín Bëru Ñunshin Upí nubë ꞌinun nu ꞌinánxa.

¹³ Nunbi sináncë bana cananuna unicama ñuixuniman. Nucën Papa Diosan Bëru Ñunshin Upitan ꞌamicëxunu sináncë bana ashi cananuna axa aín Bëru Ñunshin Upíñu unicama a ñuixunin.

¹⁴ An sinánmicëma uni an ca Nucën Papa Diosan Bëru Ñunshin Upitan sinánmicë ñu ꞌunanima. A ñucamax ca an iscëx ꞌusani ami cuaitisa ꞌicën. Unin ca a ñu ꞌunánti ꞌicën, Nucën Papa Diosan Bëru Ñunshin Upitan ꞌunánmicëxuinshi.

¹⁵ Usa ꞌain ca Nucën Papa Diosan Bëru Ñunshin Upitan sinánmicë uni an, unin ꞌacë ñucama ꞌimainun aín banacama, asérabi cara upí ꞌicë quixun ꞌunania. Usa ꞌaínbi ca uni itsin, a unin Nucën Papa Diosan Bëru Ñunshin Upitan sinánmicëxun ꞌacë ñu cara asérabi an sinánmicëxun ꞌacë ꞌicë quixun ꞌunanima, Nucën Papa Diosan Bëru Ñunshin Upitan sinánmicëma ꞌixun.

¹⁶ Aín bana cuënëo ca quia: “¿Uin cara Nucën Papa Diosan sinan ꞌunanx? ¿Uin cara a ꞌunánmiti ꞌic? An usaquin ꞌunánti uni ca ꞌaíma ꞌicën”. Usa ꞌaínbi cananuna nun Nucën Papa Diosan Bëru Ñunshin Upitan sinánmicëxun Cristonën sináncësaribi oquin sinanin.