1 Corintios 16 - Kashibo-Kakataibo Biblia

Axa Jerusalénu ꞌicë Jesucristomi catamëcë unicama curíqui buánmia

¹ Axa Jesucristomi catamëcë unicama curíqui ꞌinánti ñuiquinmi ꞌë ñucácëxun cana mitsu cain, ꞌën Galacia menu ꞌicë unicama cacësabi oquin camina mitsúnribi curíqui ꞌinánti ꞌain.

² Domingo nëtëcaman camina mitsu achúshi achúshinën mitsúnmi bicë curíqui uiti caramina ꞌinánuxun nanti ꞌai quixun upí oquin sinántancëxun min xubunuxun nanti ꞌain. ꞌËx bëbacëbëtan ꞌatima cupí camina usaquin ꞌati ꞌain.

³ Mitsúnmi nancë curíquia an Jerusalénu buánti camina uni raíri caísti ꞌain. Usa ꞌain cana bëbaquin, ꞌën a unicama mitsúnmi nancë curíqui acëñun uisa cupí cara atux cuania quixun caquin cuënëoxun quirica ꞌinánquin, Jerusalénua a buani cuantánun xuti ꞌain.

⁴ ꞌËxribi cuanti asábi ꞌain ca a unicamax ꞌëbë cuanti ꞌicën.

Pablo Macedonia me ꞌimainun Corinto ëmanu cuanti sinan

⁵ Macedonia mecamanu cuanti cana sinanin. Anu cuantancëx cana anuax mitsu isi cuanti ꞌain.

⁶ Cuantancëx bëbatancëx sapi cana mitsunu pan ꞌiti ꞌain, anuxun mita inúmi. ꞌItancëx anuax cuania camina ꞌën cuanti ꞌë mëníoxuncanti ꞌain.

⁷ Inúquinshi mitsu isti cana cuëëniman. Nucën ꞌIbu Jesucristo cuëëncëbë cana mitsubë ꞌëora pain ꞌi cuanti ꞌain.

^8-9 Efeso ënuxun ꞌën a ñuiquin bana ñuixunia cuati cuëëni ca ꞌitsa uni Cristomi catamëtia. Usaía ꞌicëbëtanbi ca ꞌitsa uniribi ꞌën ñuicë bana cuaisama tanquin timanan ꞌën ñuixunxunma ꞌanun ꞌë ꞌimitisa tania. Usa ꞌain cana Pentecostes nëtë utámainun Efeso ëma ënu pan ꞌiti sinanin.

¹⁰ ꞌËn ꞌacësaribi oquin ca Timoteonën Nucën ꞌIbu Jesucristo ñuiquin unicama bana ñuixunia. Usa ꞌain camina axa bëbaia upí oquin biti ꞌain, mitsubë ꞌaísha upí oquin sinani cuëënun.

¹¹ Usa ꞌain camina a ñui uisaíbi banacantima ꞌain. Axa nucën xucë́antu raíribë aia cana cainin. Usa ꞌain camina mitsubë ꞌitancëxa ënu unun anúan uti ñu ꞌinánan upí oxun xuti ꞌain.

¹² Nucën xucën, Apolo, a ñuiquinmi mitsun ꞌë ñucácë, a ñuiquin cana mitsu cain, a cana axa Jesucristomi catamëcë uni raíribëa mitsu isi cuantánun quixun can. Cacëxbi ca bërí cuainsama tanxa. Usa ꞌain ca uinsaran cara cuanti ꞌicë quixun isti ꞌicën.

Pablonëan ashiquin bërúanxa ꞌicánun quixun ca

¹³ Mina ꞌatima ñu ꞌai quiax bërúancaquin camina uisa ñu cara ꞌicëbëbi manutima Jesucristomi catamëti ꞌain. Ami catamëti camina unimi racuëtima an cushiocë ꞌiti ꞌain. Upí sinánñu unían sináncësa oquin camina sinánti ꞌain.

¹⁴ Uisa ñu caramina ꞌain a ꞌaquin camina uni nuibaquin ꞌati ꞌain.

¹⁵ ꞌËn xucë́antu, camina ꞌunanin, Acaya menu ꞌicë raírinëxa ꞌicëma pan ꞌain ca Estéfana ꞌimainun aín xubunu ꞌicëcamax Jesucristomi catamëacëxa. Ami sinánquin ca axa Jesucristomi catamëcë unicama ꞌaquinquin ñu ꞌaxunia. —Ësaquin nun ꞌati ënëx ca nun ñu mëëti ꞌicë —quixun ca sinánxa.

¹⁶ A unicamabë upí ꞌianan camina aín bana cuati ꞌain. An ꞌacësaribi oquin ñu ꞌacë unicama ꞌimainun an unicama ꞌaquinquin ñu mëëcë unicama camina abë upí ꞌianan aín bana cuati ꞌain.

¹⁷ Estéfanas, Fortunato, Acaico acamaxa mitsunuax ꞌë isi ucëbë cana cuëëan. ꞌËbëma ꞌixunmi mitsun ꞌë ꞌaxuntima ꞌaínbi ca a unicaman ꞌë ñu ꞌaxuanxa.

¹⁸ Mitsúnmi xucë́xa ucëbë cana cuëëan. Usaribiti camina mitsúxribi acama ꞌënua unun xuti cuëëan. Usa unicama camina ax ca upí uni ꞌicë quixun ꞌunánti ꞌain.

¹⁹ Asia menu ꞌicëcama axa Jesucristomi catamëcë, acaman ca bërúanxmi ꞌinun mitsu camia. Aquila ꞌimainun Priscila ꞌimainun aín xubunu timë́cëcama, an ca Nucën ꞌIbu Jesucristomi sináncë ꞌixun bërúinroxmi ꞌicánun quixun ꞌë mitsu camia.

²⁰ Axa Nucën ꞌIbu Jesucristomi catamëcë uni raíricamanribi ca mitsu bërúanxmi ꞌicanun camia. Jesucristo cupí mitsun nuitu upí ꞌaish camina nuibanani bërúanxa ꞌinun bëtsibë bëtsibë cananti ꞌain.

²¹ ꞌËx Pablo ꞌixun ꞌënbi cuënëoquin cana bërúanx mi ꞌicanun cain.

²² Ui unin cara Nucën ꞌIbu Jesucristo sinaníma ax ca Nucën Papa Diosan iscëx ꞌaisama ꞌicën. Nucën ꞌIbu Jesucristo axa uti cana ꞌëx cuëënin.

²³ An mitsu upiti bucunun nuibaquin ꞌaquinti cana cuëënin.

²⁴ Mitsúxribimi ꞌësaribi Cristo Jesúsnan ꞌicë cana micama sinanin. Ashi, Pablo.