1 Corintios 15 - Kashibo-Kakataibo Biblia

Bamaxbi Jesús baísquia

¹ ꞌËn xucë́antu, ꞌën mitsu ñuixuncë Jesucristo ñui quicë bana, anúan unicama ainan ꞌinun Nucën Papa Diosan ië́miti, a bana cana mitsu sinánmitëcëinsa tanin. A bana upí oquin cuati camina Jesucristomi catamëtancëx ax quicësabi oi ꞌin.

² ꞌËn mitsu ñuixuncë bana manucëma ꞌianan a bana quicësabi oi ꞌi camina min ñu ꞌatima ꞌacëcama ëni Nucën Papa Diosnan ꞌinun ië́micë ꞌain, asérabi cëmëima ami catamëcë ꞌaish.

³ Jesusan aín bana ñuixunun caíscë unicaman ꞌë unánmicë bana, a paínmi ꞌunánun quixun cana ësaquin mitsu cacën: Nun ñu ꞌaisama ꞌacë nu tërë́nxunux ca Cristo bamacëxa. Usai ca ꞌiti ꞌicë quiax ca Nucën Papa Diosan bana cuënëo quia.

⁴ Bamacëa maíncancëxbi ca rabë́ nëtë ꞌiónxa pëcaracëbë baísquiacëxa. Usaía ꞌiti ñuiquin ca Nucën Papa Diosan ꞌamicëxun aín unin cuënëocëxa.

⁵ Baísquitancëx ca Pedromi chiquiracëanan aín ꞌunánmicë unicama, mëcën rabë́ ꞌimainun rabë́ uni, amiribi chiquiracëacëxa.

⁶ Usai ꞌitancëx ca ꞌaisamaira, quinientos uni timë́cë acamamiribi chiquiracëacëxa. A unicamax ca raíri bamacëxa. Aín patsanëx ca bamacëma paín ꞌaish tsotia.

⁷ Usai ꞌianan ca Jacobomiribi chiquiracëanan an aín bana ñuixunun caíscë unicamamiribi chiquiracëtëcëancëxa.

⁸ Acamami chiquiracëtancëx ca ꞌëmiribi chiquiracëacëxa. ꞌËx aín ꞌunánmicë uni ꞌicëmabi ca an ꞌë ami sinánun sinanamiacëxa. Usa ꞌain ca acamami pain chiquiracëa ꞌaish ꞌëmiribi chiquiracëacëxa.

⁹ ꞌËx axa Jesucristomi catamëcë unicama bëtsi bëtsi ocë ꞌaish cana ꞌëx Jesusan aín bana ñuixunun caíscë uni raíribë sënë́nma ꞌaish acama meuraira ꞌain. Usa ꞌaish an caíscë uni ꞌiisama ꞌicëbi ca ꞌë aín bana ñuixunun cacëxa.

¹⁰ Nucën Papa Diosan nuibaquin ꞌimicëx cana ꞌëx bëráma ꞌiásama ꞌain. Ñancáma ca ꞌë aín uni ꞌimiacëxa. ꞌImicëxun cana aín ꞌunánmicë unicaman ꞌacësamaira oquin a ñuiquin unicama ñuixuan. Ñuixunquinbi cana ꞌënbi ꞌacëma ꞌain, Nucën Papa Diosan aín cushin ꞌamicëxuinshi cana ꞌan.

¹¹ A aín bana ñuixunun Jesusan caísa unicaman ñuixuncë banasaribi ca ꞌën unicama ñuixuncë bana ꞌicën. Nun a bana ñuixuncëxun cuati camina —a banax ca asérabi ꞌicë —quixun sinani Jesucristomi catamëacën.

Bama ꞌaíshbi ca uni baísquiti ꞌicë quicë bana

¹² ¿Nun mitsu —Cristo ca bamaxbi baísquiacëxa —quixun ñuixuncëxbi caramina uisa ꞌaish mitsu raírinëx uni isa bama ꞌaish baísquitima ꞌicë quin?

¹³ Bama ꞌaísha Jesucristo utëcëncëbë uni baísquitima ꞌain ca Cristo baísquiama ꞌitsíanxa.

¹⁴ Cristoa baísquiama ꞌain ca nun ñuixuncë bana cëmë ꞌitsíanxa. Mitsúxmi Jesucristomi catamëcë axribi ca ñancáishi ꞌitsíanxa.

¹⁵ Cristo baísquimiama ꞌain cananuna —Nucën Papa Diosan ca Cristo baísquimiacëxa —qui cëmëtsian. Unicamaxa ax utëcë́ncëbë baísquitima ꞌain ca Cristoribi baísquiama ꞌitsíanxa.

¹⁶ Uni bama ꞌaíshbi baísquitima ꞌain ca Cristoribi baísquiama ꞌitsíanxa.

¹⁷ Cristo baísquiama ꞌain ca mitsúxmi ami catamëti ax ñancáishi ꞌitsíanxa. Usa ꞌain camina mitsun ñu ꞌaisama ꞌacëcama tërë́ncëma ꞌaish usabi ꞌitsían.

¹⁸ Cristo baísquiama ꞌain ca axa ami catamëti bama unicamax abëma ꞌitsíanxa.

¹⁹ Aín nëtënuaxribi cana ainan ꞌiti ꞌai quixun sinanima, ënë nëtënuaxëshi Cristonan ꞌiti sináncë ꞌaish cananuna uni raíri ꞌicësamaírai masá nuituti bënë́tsian.

²⁰ Usama ca. Bamatancëxbi ca Cristo asérabi baísquiacëxa. Cristo baísquia usaribiti ca axa ami catamëcë unicama bama ꞌaíshbi ax utëcëncëbë baísquinuxun ꞌaia.

²¹ Achúshi uni ꞌuchaa cupí ca camabi uni bamaia. Usaribiti ca achúshi uni baísquia cupí axa ami catamëcëcama bama ꞌaíshbi ax utëcëncëbë baísquiti ꞌicën.

²² Adanën ñu ꞌatima ꞌa cupí ca aín rëbúnquicama ñu ꞌatima ꞌai bamaia. Usa ꞌaínbi ca Cristonan ꞌaish uni bama ꞌaíshbi baísquitancëx tsóti ꞌicën.

²³ Nucën Papa Diosan mëníosabi oi ca Cristo pain baísquiacëxa. Baísquitancëx naínu cuan ꞌaísha ax utëcëncëbë ca aín unicama baísquiti ꞌicën.

²⁴ Nucën Papa Dios axëshia ꞌApuira ꞌinun, ca Cristonën utëcënquin ñunshin ꞌatima ꞌimainun an Nucën Papa Dios quicësama oquin ënë nëtënuxun uni sinánmicë cushicama cëñuti ꞌicën.

²⁵ Nucën Papa Diosan ꞌimicëxun ca Cristonën ꞌApu ꞌixun axa ami nishcë unicama ꞌibuaquin ax quicësabi oquian ꞌanun ꞌimiti ꞌicën.

²⁶ Usotancëxun ca uni bamatima oquin ꞌimiti ꞌicën.

²⁷ Nucën Papa Diosan ꞌimicëx ca Cristo camabi uni, camabi ñu aín ꞌibu ꞌia. Usai ca Nucën Papa Diosan bana cuënëo quia. A bana quicësabi oi Cristo ax Nucën Papa Diosan ꞌimicëx camabi uni, ñu, acaman ꞌibu ꞌaíshbi ca ax Nucën Papa Dios, an camabi ñun ꞌibu a ꞌimicë, aín ꞌibuma ꞌicën.

²⁸ A camabi uni ꞌimainun camabi ñun ꞌIbu ꞌimicë ꞌixun, ca Cristonën Nucën Papa Dios —mix camina ꞌën ꞌApuira ꞌai —quixun canuxun ꞌaia. Usai ꞌicëbë ca Nucën Papa Dios aín unicama ꞌimainun uisa ñu cara, aín cushi ꞌiti ꞌicën.

²⁹ ¿Uni bama ꞌaish Cristo utëcëncëbë baísquitima ꞌain cara uisax uni raírinëx axa Jesucristomi catamëcë unicama bama abë ꞌiti sinani nashimicë ꞌiti ꞌic? Ca ꞌitsíanxma.

³⁰ Bama ꞌaísha uni baísquitima ꞌain carana uisa cupí unían ꞌë bëtsi bëtsi ocëxunbi Jesucristo ñuiquin bana ñuixuan. Cana ꞌacëma ꞌitsían.

³¹ ꞌËn xucë́antu, Nucën ꞌIbu Jesucristonën ꞌamicëxun ꞌën micama a ñuiquin bana ñuixuncëx camina ami sinan. Mitsúxmi ami sináncë cupí cana cuëëinra cuëënin. Usa cupí cana cuëëni quixun ꞌunáncësaribi oquin cana ꞌunanin, ꞌëx Jesucristonan cupí cana uinu carana ꞌai, uinu carana cuani anuax sapi cana bamati ꞌai quixun.

³² Efeso ëmanu ꞌicë unicamax pianancë ñuinasa ꞌaish, ꞌëmi nishcëxunbi Cristo ñuiquin a unicama bana ñuixunia ca acaman ꞌë bëtsi bëtsi oxa. Usa ꞌaínbi ca bamatancëxa Cristo baísquiama ꞌaínbi ꞌëx unin bëtsi bëtsi ocë ꞌinuxun bana ñuixuncë ax ñancáishi ꞌitsíanxa. Unia bama ꞌaish Cristo utëcëncëbë baísquitima ꞌain cananuna uni raírinëxa quicësaribiti ësai quitsían: “Bëtsi nëtë́nbi cananuna ashiti bamati ꞌain. Usa ꞌain cananuna bamacëma pain ꞌixun pucháquin pianan xëai nux cuëëncësa oíshi ꞌiti ꞌain”.

³³ ꞌAtimati banacë unínma mi parania ca bërúancat. Ësaía uni quicë bana ax ca asérabi ꞌicën: “Upí ꞌixunbi ꞌatimatia bëtsi banaia cuaquin ca unin ꞌatimaquin sinánquin ñu ꞌatima ꞌati ꞌicën”.

³⁴ Micama raírinën uisai ꞌiti cara Nucën Papa Dios cuëënia quixun sináncëma ꞌixun camina ñu ꞌatima ꞌain. Ñu ꞌatima ꞌacë ꞌaíshmi rabínun quixun cana ësaquin mitsu cain. Usa ꞌain camina ami sinanati ax cuëëncësabi oi ꞌiquin ñu ꞌatima ꞌatima ꞌain.

Uisai cara uni bama ꞌaíshbi baísquiti ꞌicë quicë bana

³⁵ Raíri unix sapi ca quiti ꞌicën: —¿Uisai cara uni bama ꞌaish Cristo utëcëncëbë baísquiti ꞌic? ¿Baísquiax cara uisa uni ꞌiti ꞌic?”

³⁶ Usaía quicë uni ax ca bana cuacëma unisa ꞌicën. Ënëx ca ësa ꞌicën. Unían ꞌapácëx ca ñu ënxë aín íxa cotanun aín nami chëquia.

³⁷ Trigo ꞌapánan bëtsi ñuribi ꞌapáquin ca unin aín i ꞌapáquinma aín bëruishi ꞌapatia.

³⁸ An mëníosabi oquin ca Nucën Papa Diosan ñu ënxë ꞌapácë anua aín i comiquin canimia. Bëtsi bëtsi ñu ënxë ca aín íxa uisa cara, usa ꞌitánun canimia.

³⁹ Camabi ñux ca mëscú ꞌicën. Unix ca ñuina iscësama ꞌicën. Men nicë ñuinanëx ca ñu pëchiñu iscësama ꞌicën, ñu pëchiñunëx ca bacanu ꞌicë ñuina iscësama ꞌicën.

⁴⁰ Naínu ꞌicë ñux ca menu ꞌicë ñu iscësama ꞌicën. Naínu ꞌicë ñux ca upí ꞌicën, ꞌimainun ca menu ꞌicë ñuxribi upí ꞌicën. Usa ꞌaíshbi ca naínu ꞌicë ñun upí ax menu ꞌicë ñun upí iscësama ꞌicën.

⁴¹ Usa ꞌain ca barín pëcacë ax bëtsi ꞌicën. ꞌUxën pëcacëribi ca bëtsi ꞌicën. Usaribiti ca ꞌispan pëcacë bëtsiribi ꞌicën. Usa ꞌixun ca camabi ꞌispan bëtsin pëcacësaribi oquin pëcaima. Usa ꞌaíshbi ca camáxbi upí ꞌicën.

⁴² Usaribiti ca uni bama ꞌaish baísquicë, ax bamacëma pain ꞌaish uni ꞌicësaribiti ꞌitima ꞌicën. Uni bamacë maíncë ax ca aín nami, aín xo acamax chëquia. Usa ꞌaíshbi ca baísquitancëx chëquitëcënux bamatëcëntima ꞌicën.

⁴³ Bamacë maíncëx ꞌaisama ꞌitancëxbi ca baísqui upíira upí ꞌiti ꞌicën. Bamacë maíncëx aín cushi ꞌaíma ꞌitancëxbi ca baísqui cushi ꞌiti ꞌicën.

⁴⁴ Ënë menua tsócë unicamax ca aín nami, aín xo, acamax chëquiti ꞌicën. Usa ꞌaíshbi ca bama ꞌaish baísquitancëx aín nami, aín xo, acamax bëtsi ꞌaish chëquitima ꞌicën. Axa chëquiti nami, xo acamañu ꞌiá ꞌaíshbi ca axa chëquitima nami, xo, acamañu ꞌinuxun ꞌaia.

⁴⁵ Acama ñui ca Nucën Papa Diosan bana cuënëo ësai quia: “Nucën Papa Diosan a pain unio uni, Adán, ax ca sinánñu ꞌianan banañu ꞌianan an ñu ꞌati ꞌiacëxa”. Usa ꞌaínbi ca Cristo, Adánsaribi uni ꞌixunbi an Nucën Papa Diosnan ꞌinun uni ië́miquin abë chëquítimoi nëtë́timoia tsónun ꞌimiti, a ꞌicën.

⁴⁶ Axa chëquitima namiñu pain ca uni ꞌitima ꞌicën. Axa chëquiti namiñu pain ꞌitancëx ca uni axa chëquitima namiñu ꞌiti ꞌicën.

⁴⁷ A pain unio uni ax ca me ꞌacë ꞌiacëxa. A caxua ucë ax ca me ꞌacëma, naínuaxa ucë, Nucën ꞌIbu Jesucristo, ꞌiacëxa.

⁴⁸ A pain uniocë uníxa me ꞌacë ꞌiásaribi ca ënë menu ꞌicë unicama ꞌicën. Usa ꞌaínbi ca uicamax cara ainan ꞌicë acamax naínu ꞌicë Jesucristo, asaribi ꞌiti ꞌicën.

⁴⁹ A pain me ꞌacë uni ax ca namiñu ꞌianan xoñu ꞌiacëxa. Usa cananuna nuxribi ꞌain. Usa ꞌaíshbi cananuna nux ainan ꞌaish Jesucristonën namisaribi ꞌiti ꞌain.

⁵⁰ ꞌËn xucë́antu, ësaquin cana mitsu cain, nucën nami, nucën xo, acamax ca Nucën Papa Diosan nëtënu ꞌitima ꞌicën. Aín nëtënu ꞌicë ñucamaxa chëquitima ꞌain ca chëquiti ñucamax anu ꞌitima ꞌicën.

⁵¹ Unin ꞌunánma ñu cana mitsúnmi ꞌunánun quixun ësaquin ñuin, camáxira cananuna bamatima ꞌain. Bamacëma ꞌaíshbi cananuna camáxbi bëtsi ꞌiti ꞌain.

⁵² Nuxnu bëriquicë usariishi cananuna bënëtishi aín manë banañua banocëbëishi bëtsi ꞌiti ꞌain. Usai ꞌi cananuna bama ꞌaish amiribishi bamatëcëntimoi baísquiti ꞌain. Usai ꞌimainun cananuna bamacëmacama nuxribi bëtsi ꞌiti ꞌain.

⁵³ Nun nami, nun xo, acama chëquiti ꞌaíshbi cananuna bëtsi ꞌaish nun nami, nun xo acama chëquitima ꞌain. Usari ca nun nami, nun xo acamax bamati ꞌaíshbi amiribishi bamatëcëntimoi ꞌiti ꞌicën.

⁵⁴ Nun nami, nun xo, acama chëquiti aíshbia bëtsi ꞌaish chëquitima ꞌianan nun nami, nun xo, acamax bamatëcëntimoi ꞌicë ꞌain ca Nucën Papa Diosan bana cuënëo quiásabi oi ꞌiti ꞌicën. A bana ca ësai quia: “Bama ꞌaíshbi ca baísquiax uni bamatëcëntimoi tsóti ꞌicën.

⁵⁵ Usaía ꞌicëbë ca bamaquin anun unin paë tanti ꞌaíma ꞌiti ꞌicën. Bama ꞌaíshbi ca uni bamatëcëntimoi tsóti ꞌicën”.

⁵⁶ Aín ꞌucha cupí ca unicama chëquinux bamaia. Nucën Papa Diosan bana cuënëo anua ca unin ꞌunania, uisa ñu ꞌati cara ꞌucha ꞌicën, uisa ñu ꞌati cara upí ꞌicë quixun. A bana quicësoi ꞌima ca uni ꞌuchaia.

⁵⁷ Usa ꞌaínbi cananuna Nucën ꞌIbu Jesucristo cupí nun ꞌuchacama tërë́ncë ꞌaish bamatimi racuëtima ax utëcëncëbë baísquitancëx bamatëcëntimoi tsóti ꞌain. Usaquin ꞌunánquin cananuna cuëënquin Nucën Papa Dios —asábi ca —quixun cain.

⁵⁸ ꞌËn nuibacë xucë́antu, uisa ñu cara ꞌicëbëbi camina ëníma ami catamëti Nucën ꞌIbu Jesucristo cuëëncësabi oi ꞌiquin aín bana unicama ñuixunti ꞌain. Camina ꞌunanin, usaquinmi Cristonëan cushiocëxun ꞌacë ax ca ñancábimi ꞌacëma ꞌicën. Usaquin ꞌunánquin camina ënquinma mitsun ꞌacësamaira oquin nëtë camabi ꞌati ꞌain.