1 Corintios 14 - Kashibo-Kakataibo Biblia

Unin ꞌunáncëma banan banati ñui quicë bana

¹ Usa ꞌain camina manúquinma unicama nuibati ꞌain. Nuibanan camina Nucën Papa Diosan Bëru Ñunshin Upitan mitsu bëtsi bëtsi ñumi ꞌanun ꞌamiti cuëënti ꞌain. Bëtsi ñu ꞌati cuëëncësamaira oi camina an mi sinánmicëxun aín bana upí oquin unicama ñuixunti cuëënti ꞌain.

² Axa Nucën Papa Dios rabi unin cuacëma banan banacë uni, ax ca unin uisai cara quia quixun cuanunmabi Nucën Papa Dios rabi an cuanun banaia. Nucën Papa Diosan Bëru Ñunshin Upitan ꞌimicëx ca ax unin cuacëma banan banaia.

³ Usa ꞌaínbi ca an Nucën Papa Diosan sinánmicëxun aín bana unicama ñuixuncë uni an axa Jesucristomi catamëcë unicaman ami catamëquin an cacësabi oquin ꞌanun ꞌunánmia. ꞌUnánmianan ca ñu upíshia ꞌanun cushioquin ꞌësëia. ꞌËsë́anan ca masá nuitutiabi sinanamiquin upí oquin sinánmia.

⁴ Axa Nucën Papa Dios rabi unin cuacëma banan banacë uni ax ca axbi Jesucristo upiti sinania. Usa ꞌaínbi ca an Nucën Papa Diosan sinánmicëxun aín bana unicama ñuixuncë uni an axa Jesucristomi catamëcë unicaman ami catamëquin an cacësabi oquin ꞌanun ꞌunánmia.

⁵ Mitsúxmi unin cuacëma banan banati cana ꞌëx cuëënin. Usa ꞌaínbi cana mitsúxmi usai banati cuëëncësamaira oi mitsúnmi Nucën Papa Diosan sinánmicëxun aín bana unicama ñuixunti cuëënin. Unin cuacëma banan banaquinbi uisai quicë cara a bana ꞌicë quixun ñuixuncëxunma ca bëtsi unin uisai quicë cara quixun ꞌunántima ꞌicën. Nucën Papa Diosan ꞌimicëxuinshi ca unin ꞌunánti ꞌicën. Usa ꞌain ca ami catamëcë unicama Jesucristo cuëëncësabi oi ꞌinun ꞌaquinuxun an a bana ꞌunáncë unin uisai quicë cara quixun raíri ñuixunti ꞌicën.

⁶ ꞌËn xucë́antu, ësaquin cana mitsu cain. Mitsu isi cuanx Nucën Papa Dios rabi unin cuacëma banan banaquinbi, an ꞌë sinánmicë ñu mitsu ñuixuncëma ꞌianan usai ca axa Jesúsmi sináncë uni ꞌiti ꞌicë quixun caíma, ꞌianan Nucën Papa Diosan bana mitsu upí oquin sinánmiquin ꞌësëima, ꞌianan aín bana ñuiquin mitsu ꞌunánmicëma ꞌaish cana upitimi Jesúsmi sinánun mitsu ꞌaquincëma ꞌitsían.

⁷ Ënëx ca ësa ꞌicën. Unían paca ꞌimainun arpasa, a upí oquin banaocëbëtanma ca uni itsin uisai quiquin cara bana oia quixun ꞌunanima.

⁸ Bëtsían upí oquin manë xo bana ocëbëma ca suntárucama —cananuna ꞌacananti ꞌai —quixun ꞌunanima mëniocatima ꞌicën.

⁹ Usaribi oquin ca mitsúxmi Nucën Papa Dios rabi unin cuacëma banan banacëbëtan uínbi a bana cuatima ꞌicën. Usa ꞌaish camina ñancábi banati ꞌain.

¹⁰ Camabi menuax ca uni bëtsi bëtsi banan banaia. Usaía quiabi ca an a bana ꞌunáncë uni an a bana cuatia.

¹¹ Usa ꞌaínbi ca an cacëxunbi ꞌën aín bana uisai cara quia quixun cuacëbëtanma —ax ca ꞌën aintsima ꞌicë —quixun sinánti ꞌicën. ꞌËnribi cana —ꞌën aintsima ca ënë uni ꞌicë —quixun sinánti ꞌain.

¹² Mitsux asérabi bëtsi bëtsi ñu ꞌanun Nucën Papa Diosan Bëru Ñunshin Upitan sinánmicë ꞌiisa tanquin camina añu ꞌaquin caramina camabi uníxa Jesucristomi upiti sinani ax cuëëncësabi oi ꞌinun sinánmiti, a ñuishi ꞌati ꞌain.

^13-14 ꞌËx unin cuacëma banan banaquin cana Nucën Papa Dios rabiquinbi uisai carana qui quixun ꞌunaniman. Usa ꞌain ca axa unin cuacëma banan banacë uni, an unicama ñuixunuxun uisai cara a banacama quia quixuan a ꞌunánminun Nucën Papa Dios ñucáti ꞌicën.

¹⁵ Usa ꞌaish cana ꞌën nuitu mëu a sinánquin Nucën Papa Dios rabi ꞌën cuacëma banan banaibi ꞌën cuacë banánribi banati ꞌain. A rabi cana ꞌën cuacëma banan cantanan ꞌën cuacë banánribi cantati ꞌain.

¹⁶ Unin cuacëma banan banaquinmi Nucën Papa Dios rabiabi ca min bana cuaquinma an Nucën Papa Diosan bana upí oquin ꞌunáncëma unicaman mibëtan Nucën Papa Dios rabiti sinántima ꞌicën.

¹⁷ Minmi a banan Nucën Papa Dios rabicë axa asábi ꞌaínbi camina bëtsi uniribi upitia Jesúsmi sinánun ꞌaquiniman.

¹⁸ Mitsúxmi ꞌicësamaira oi cana ꞌëx Nucën Papa Dios rabi unin cuacëma banan banain. ꞌËn usai banati ꞌunáncë cupí cana Nucën Papa Dios —asábi ca —quixun cain.

¹⁹ Usa ꞌaíshbi cana axa Jesucristomi catamëcë unicama timë́cë ꞌain, unin cuacëma banan ꞌitsaira banati cuëëncësamaira oi unían cuacë banan banati cuëënin. A banan ꞌitsamashi banaquinbi unicama atun cuaisabi oquin ꞌunánmiti ca asábi ꞌicën.

²⁰ ꞌËn xucë́antu, tuáratsunën sináncësa oquin camina sinántima ꞌain. Ñu ꞌatima ꞌati ꞌunáncëma ꞌaísha tuáratsu ꞌicësaribiti camina ꞌiti ꞌain. ꞌIananbi camina bëtsi ñucama sinánquin uni apanën upí oquin sináncësabi oquin sinánti ꞌain.

²¹ Nucën Papa Diosan bana cuënëo ca ësai quia: “Bëtsi banan banaquin cana ënë unicama ñuixunti ꞌain, bëtsi nëtënu ꞌicë unin ca ën ꞌimicëxun atu cati ꞌicën. Usaquian cacëxbi ca ꞌëmi sinántima ꞌicë quiax ca Nucën ꞌIbu Dios quia”.

²² Axa Jesucristomi catamëcë uníxa unin cuacëma banan banaia cuaquinbi ca raírinën uisai cara quia quixun ꞌunánquinma a bana sinanima. An sinaniamabi ca Jesucristomi sináncëma unin a bana cuaquin sinánti ꞌicën, Nucën Papa Diosan ꞌimicëx sapi ca banaia quixun. Usa ꞌaínbi ca an sinánmicëxuan Nucën Papa Diosan bana ñuixuncë uníxa banaia cuati aín unicama upiti Jesucristomi sinánti ꞌicën. Usa ꞌaínbi ca axa ami catamëisama tancë unicaman a bana cuaquinbi asérabi ca usa ꞌicë quixun sinanima.

²³ Aín bana cuacë ꞌaíshmi mitsux timë́ax camáxbi Nucën Papa Dios rabi unin cuacëma banan banacëbë ca an mitsúxmi usai ꞌia ꞌunáncëma uni raíri ꞌimainun axa Jesúsmi sináncëma uni raírinëx atsínti ꞌicën. Atsínquin mitsúxmi usai banaia cuaquin ca —sapi ca ñunshíanxa —quixun sinánti ꞌicën.

²⁴ Usa ꞌaínbi ca timë́xunmi mitsun Nucën Papa Diosan sinánmicëxun bana ñuicëbë, axa Jesucristomi catamëcëma uni ꞌianan mitsúxmi usai ꞌia ꞌunáncëma uni, ax atsínxun mitsúnmi ñuia cuaquin —a banax ca asérabi ꞌicën, ꞌatima ñu cana ꞌën ꞌa —quixun sinánti ꞌicën.

²⁵ —ꞌËn unë́xun ꞌacë ñuribi ca Nucën Papa Diosan isaxa —quixun sinánquin ca a ñucama chiquinaquin Nucën Papa Dios rabiti ꞌicën. Rabianan ca —asérabi ca Nucën Papa Dios mitsubë ꞌicë —quiti ꞌicën.

Timë́ax sharáruima banati bana

²⁶ ꞌËn xucë́antu, timë́ax camina ësai ꞌiti ꞌain. Raírinëx camina ꞌiisa tani cantati ꞌain, raírinën camina Nucën Papa Diosan bana ñuixunti ꞌain, raírinën camina añu cara Nucën Papa Diosan mitsu sinánmiaxa a ñuiquin cati ꞌain, ꞌiisa tani camina raírinëx unin cuacëma banan banati ꞌain, raírinën camina uisai quicë cara a bana ꞌicë quixun ñuixunti ꞌain. Timë́xun caramina uisa ñu ꞌai a ꞌai camina camáxbi ami upiti sinani Jesucristo cuëëncësabi oi ꞌinun sinánmiananti ꞌain.

²⁷ Usa ꞌain camina unin cuacëma banan Nucën Papa Dios rabi banatisa tani, rabëtaxëshi banati ꞌain. ꞌIanan camina rabë́ ꞌimainun achúshtaxëshi banati ꞌain. Usa ꞌaíshbi camina achúshi achúshitaxëshi banati ꞌain. Banaquin camina uisai quicë cara a bana ꞌicë quixun unicama ñuixunti ꞌain. Min ñuixuniama ca bëtsi unin uisai qui caramina quia quixun ñuixunti ꞌicën.

²⁸ An uisai quicë cara a bana ꞌicë quixun ñuixunti ꞌaíma ꞌain camina uni timë́cë anuax Nucën Papa Dios rabi unin cuacëma banan banatima ꞌain. Usari banaima camina min nuitu mëúishi ami sinani Nucën Papa Dios rabi abë banati ꞌain.

²⁹ Usaribi oquin camina Nucën Papa Diosan sinánmicëxun aín bana ñuixuinsa tanquin rabë́xuinshi unicama ñuixunti ꞌain. Ñuixuanan camina rabë́ ꞌimainun achúshixuinshi ñuixunti ꞌain. Ñuixunia camina raírinën —a unin banax cara asérabi Nucën Papa Diosan sinánmicëxa quicë ꞌicë —quixun cuati ꞌain.

³⁰ Usa ꞌaínbi ca an bana ñuixuncë uni, uni itsínribia bana ñuixuinsa tania isi, nëtë́ti ꞌicën.

³¹ Usoquin camina uicamax caramina Nucën Papa Diosan sinánmicë ꞌain, an achúshi achúshixun bana ñuixunti ꞌain. Usoquin bana ñuixuncëx camina camaxunbi upí oquin Nucën Papa Diosan bana ꞌunani ami cushicë ꞌiti ꞌain.

^32-33 Nucën Papa Diosax ca aín unicamaxa timë́ax an bana ñuixuncë unían ñuixuncëxun bana cuatima raíri sharárui banati cuëënima. Usa ꞌain ca raíri unin bana ñuixuinsa tanquinbi tënëpaínti ꞌicën. Uinu cara timëtia, anuax ca axa Jesucristomi catamëcë unicamax ësai ꞌia. Usa ꞌain camina usaribiti mitsux ꞌiti ꞌain.

³⁴ Axa Jesucristomi catamëcë unicama timë́cë ꞌain ca xanu banatima ꞌicën. Usa ꞌixun ca bëbu uníxa banaiashi cuati ꞌicën, Nucën Papa Diosan bana cuënëo quicësabi oquin.

³⁵ Bana upí oquin ꞌunántisa tanquin ca aín xubunuxun xanun aín bënë ñucáti ꞌicën. Axa Jesucristomi catamëcë unicama timë́cë anuax xanux banati ca upíma ꞌicën.

³⁶ Camina ꞌunánti ꞌain, mitsu pain ca Nucën Papa Diosan aín bana ꞌunánun ꞌimiama ꞌicën. —Nuinshi cananuna aín bana ꞌunani —quixun camina sinántima ꞌain.

³⁷ Micama an Nucën Papa Diosan sinánmicëxun uni bana ñuixuncë ꞌimainun a aín Bëru Ñunshin Upitan sinánmicë unicama, mitsun camina ꞌunánti ꞌain, ꞌën mitsu cuënëoxuncë banacama, ënëx ca an ꞌë sinánmicëxun ꞌacë ꞌicë quixun.

³⁸ Ui unin cara usaquin sinánquinma —anbi sinani ca Pablo quia —quixun sinania, a uni camina —asérabi ca aín bana ꞌicë —quixun sinántima ꞌain.

³⁹ ꞌËn xucë́antu, cana mitsu cain, an Nucën Papa Diosan sinánmicëxun aín bana uni ñuixuncë ꞌiti camina sinánti ꞌain. Usa ꞌixunbi camina Nucën Papa Dios rabia unin cuacëma banan banaxma ꞌinun uni catima ꞌain.

⁴⁰ Usa ꞌaínbi camina micamax timë́ax sharárui banatima, bëtsix paían quimainun caini upí oquin sinani banati ꞌain.