1 Corintios 13 - Kashibo-Kakataibo Biblia

Unicama camina nuibati ꞌai quixuan Pablonën ca

¹ ꞌËx bëtsi bëtsi banan bananan anun ángel banacë banánribi banacëxbi ca uni nuibacëma ꞌaish ꞌën bana rata tancácësa ñancáishi ꞌicën.

² ꞌËn Nucën Papa Diosan a sinánmicë ñu ñuiquin unicama ñuixuanan, camabi ñu ꞌunánquin uni itsin ꞌunáncëma ñuribi ꞌunánan, —Nucën Papa Diosan ca ꞌë ꞌaquinti ꞌicë —quixun sinánquin aín cushin aín bashibi amanu tacuiabi, ca uni itsi nuibaquin ꞌacëma ꞌicë Nucën Papa Diosan ꞌë upí isima.

³ ꞌËn ñucama ñuñuma uni ꞌinánan upí ñu ꞌacë cupí bëtsi unin nëëncëx bamaiabi ca uni nuibati ꞌicëma ꞌicë, Nucën Papa Diosan ꞌë upí isima.

⁴ An uni raíri nuibacë unin ca bëtsi unia abë upíma ꞌicëbi ami nishquinma upí oquinshi caia. Usa ꞌaish ca bëtsi unibë upí ꞌia. An uni raíri nuibacë uni ax ca bëtsimi nutsima. Ca —bëtsi unibë sënë́nmaira cana ꞌai —quixun sinanima. Ca rabiacatima.

⁵ Ca nishcësashi ꞌaish aín cuëëncësa oíshi ꞌima. Aín cuëëncësa oquinshi ñu ꞌacë ca ꞌima. Ca bënëtishi nishima. Ami nishquian unin ꞌatimocëxunbi ca axribi ami nishquinma tanshitia.

⁶ Ñu ꞌatima unin ꞌacëbë ca cuëënima. Usa ꞌaish ca upí ñu cuati cuni cuëënia.

⁷ An uni nuibacë unin ca amia nishcëxunbi uni, axribi ami nishquinma —sapi ca sinanati ꞌicë —quixun cainia. Axa upíma ꞌaínbi ca ami nishíma usabi abë upí ꞌia.

⁸ Ënë nëtëcama cëñúcëbëtan camaxunbi a ꞌunáncë cupí ca uinu ꞌicë unínbi Nucën Papa Dios quicë bana unicama ñuixuntëcëntima ꞌicën, uinu ꞌicë uníxbi ca Nucën Papa Dios rabi unin cuatima banan banatima ꞌicën, unían bëtsi uni ꞌunánmiti ca ꞌaíma ꞌiti ꞌicën. Usai ꞌiti a ꞌaíma ꞌaínbi ca nux nuibananti ax cëñutima, bamatancëxribi cananuna Nucën Papa Diosan nëtënu ꞌaish anuaxribi bëtsibë nuibananti ꞌain.

⁹ Ënë nëtënuxun cananuna ꞌunánquinbi camabi uisai caranuna ꞌiti ꞌai quixun ꞌunaniman. Usa ꞌixun cananuna camabiira ꞌunáncëma ꞌixun nun ꞌunáncëshi ñuixunin.

¹⁰ Usa ꞌaínbi cananuna ënë menuxun ꞌacësamaira oquin aín nëtënuxun upíira oquin an sinánmiti ñucama ꞌunánuxun ꞌain.

¹¹ Xuratsu ꞌaish cana ꞌëx tuá xuratsu ꞌicësari banacën. Usa ꞌixun cana tuá xuratsunën sináncësa oquin sináncën. Xuratsu ꞌixun cana xuratsunëan cuacësa oquin cuacën. Usa ꞌixunbi cana canitancëxun xura ꞌaish ꞌëx ꞌiá acama ëancën.

¹² Espejo upíirama ꞌaínu upí oquin anun ñu iscëma usaribi oquin cananuna uisaira cara Nucën Papa Diosan sinan ꞌicë quixun camaira ꞌunaniman. Usa ꞌaínbi cananuna aín nëtënu ꞌixúinra ꞌunánti ꞌain. Bërí cana camabiira ꞌunaniman. Usa ꞌixunbi cana ꞌunánti ꞌain, an ꞌë ꞌunáncësaribi oquin.

¹³ Bëtsi ñucama cëñúcëbëbi cananuna nux cëñútimoi abë ꞌaish Nucën Papa Diosmi catamëti ꞌain. —Cananuna ënë Nucën Papa Diosan nëtënuax cëñútimoi ꞌiti ꞌai —quixun ꞌunani cananuna cuëëinra cuëënti ꞌain. Anu ꞌaish cananuna camáxbi cëñútimoi bëtsibë nuibananti ꞌain. Nucën Papa Diosmi catamëti cuëëanan abë nëtë́timoi ꞌiti sinani cuëëníbi cananuna bëtsibë nuibanancë cupíira cuëëinra cuëënti ꞌain.