1 Corintios 12 - Kashibo-Kakataibo Biblia

Aín cushi ꞌináncëxun ca Nucën Papa Diosan unicaman bëtsi bëtsi ñu ꞌaia quixuan Pablonën ca

¹ ꞌËn xucë́antu, mitsúnmi ꞌunánun cana ësaquin mitsu cain, axa Jesucristomi catamëcë unicaman ca aín Bëru Ñunshin Upitan ꞌamicësabi oquin bëtsi bëtsi ñu ꞌati ꞌicën.

² Camina ꞌunanin, mitsux Jesucristomi catamëcëma pan ꞌaish camina unían ꞌacë ñu banañumabia, ax isa dios ꞌicë quixun unin cacë ñu rabi axa Jesúsmi sináncëma unibubë niacën.

³ Usa ꞌaínbi camina bërí Jesúsmi catamëcë ꞌixun ꞌunánti ꞌain: Nucën Papa Diosan Bëru Ñunshin Upitan sinánmicëx cuni ca uni “Jesús ca Nucën ꞌIbu ꞌicë” quia. ꞌImainun ca axa “Jesús ca ꞌaisama ꞌicë” quicë unicama ax Nucën Papa Diosan Bëru Ñunshin Upitan sinánmicëma ꞌicën.

⁴ Nucën Papa Diosan ca atúan bëtsi bëtsi ñu ꞌanun quixun aín unicama sinánmiquin usaquian ꞌanun aín cushi ꞌinania. Achúshi ꞌixunbia aín Bëru Ñunshin Upitan ꞌimicëxun ca axa Jesúsmi catamëcë unicaman bëtsi bëtsi ñu ꞌaia.

⁵ Bëtsi bëtsi ñu ꞌananbi ca camaxunbi achúshi, Nucën ꞌIbu Jesús, ashi rabiquin ñu ꞌaxunia.

⁶ Usa ꞌain ca atúan ñu ꞌanun aín unicama bëtsi bëtsi sinan ꞌinanibi Nucën Papa Dios ax achúshi ꞌicën.

⁷ Nucën Papa Diosan ca aín unicama achúshi achúshi, anúan aín unicama raíri upiti Jesucristomi sinánun quixun ꞌaquinun ꞌinania. ꞌInáncëxuan aín Bëru Ñunshin Upíñu ꞌixun upí oquin ñu ꞌaia isquin ca unicaman ꞌunánti ꞌicën, Nucën Papa Diosan Bëru Ñunshin Upitan ꞌamicëxun ca ꞌaia quixun.

⁸ Nucën Papa Diosan ca aín Bëru Ñunshin Upitan ꞌimicë́xa, uni raíri sinánñuira ꞌaish upiti bananun quixun ꞌimia. ꞌImianan ca uni raírinëxa aín nuitu mëu racanaquin uisai cara quiti ꞌicë quixun sinántancëx upiti bananun quixun ꞌimia.

⁹ Nucën Papa Diosan ca aín Bëru Ñunshin Upitan ꞌimicëxuan uni raírin ami catamëquin —Nucën Papa Diosan ca asérabi ꞌë ꞌaquinia —quixun ꞌunánquin upí ñu ꞌanun ꞌamia. ꞌAmianan ca aín Bëru Ñunshin Upitan ꞌamicëxuan bëtsi bëtsi unin uni ꞌinsíncë pëxcunun quixun ꞌamia.

¹⁰ Aín Bëru Ñunshin Upitan ꞌamicëxun ca bëtsi bëtsi unin, uni itsían ꞌacëma ñu ꞌaia. An sinánmicëxun ca bëtsi bëtsi unin Nucën Papa Diosan sinánmicësabi oquin aín bana unicama ñuixunia. An ꞌimicëxun ca bëtsi bëtsi unin, uni itsían bana ñuia cuaquin, asérabi cara Nucën Papa Diosan sinánmicëxun bana ñuia quixun ꞌunania. An sinánmicëx ca bëtsi bëtsi unix Nucën Papa Dios rabi, uni itsían cuacëma bana banaia. Banacëbëtan ca Nucën Papa Diosan aín Bëru Ñunshin Upitan sinánmicëxuan bëtsi unin uisai quicë cara a bana ꞌicë quixun uni ñuixunun ꞌunánmia.

¹¹ Usaquin ꞌaquin ca aín Bëru Ñunshin Upí ax achúshi ꞌixunbi, Nucën Papa Diosan unicama bëtsi bëtsi ñua ꞌanun ꞌimia, ax cuëëncësabi oquin.

Aín unicamaxa Jesucristonan ꞌaish achúshisa ꞌicë quicë bana

¹² Ënëx ca ësa ꞌicën. Aín taë, aín mëcën, aín xo, aín pucu, aín bëru, aín pabí acamaxa ꞌitsa ꞌaínbi ca uni achúshishi ꞌicën. Usaribiti ca Cristo achúshishi ꞌicën.

¹³ Nux Cristonën uni ꞌaish cananuna ësa ꞌain: raírinëx judíos uni ꞌimainun raírinëxribi axa griego bana banacë uni ꞌimainun raírinëxribi an ñu uni mëëxuncë uni ꞌimainun cananuna raírinëxribi an uni ñu mëëxuncëma uni ꞌain. Usa ꞌaíshbi cananuna nucamax Nucën Papa Diosan Bëru Ñunshin Upitan sinánmicë ꞌianan Cristonan ꞌaish achúshisa ꞌain. Abënu ꞌinun ca Nucën Papa Diosan aín Bëru Ñunshin Upí nucama ꞌinánxa.

¹⁴ Unia achúshi ꞌaínbi ca aín taë, aín mëcën, aín xo, aín pucu acamax ꞌitsa ꞌicën.

¹⁵ Aín taëx banati ꞌunán ꞌixun ca catsíanxa: “ꞌËx aín mëcë́nma ꞌaish cana ꞌëx a uninanma ꞌain”. Usa ꞌaínbi ca ax aín mëcë́nma ꞌaíshbi ax a uninan ꞌicën.

¹⁶ Aín pabitax banati ꞌunan ꞌixun ca catsíanxa: “ꞌËx aín bëruma ꞌaish cana ꞌëx a uninanma ꞌain”. Usa ꞌaínbi ca aín bëruma ꞌaíshbi ax a uninan ꞌicën.

¹⁷ Bëruñushi ꞌixun ca unin uisaxunbi cuatima ꞌicën. Pabíñushi ꞌixun ca unin uisaxunbi xëtima ꞌicën.

¹⁸ Usa ꞌain ca Nucën Papa Diosan an sináncësabi oquin pabí, bëru, taë, quisi, pucu acamañua ꞌitánun uni uniocëxa.

¹⁹ Pabíshi ꞌaish ca uni unima ꞌitsíanxa. Bëruishi ꞌaish ca uni unima ꞌitsíanxa. Taëishi ꞌaish ca uni unima ꞌitsíanxa.

²⁰ Usa ꞌain ca uni taë, pabí, bëru, acamañu ꞌaíshbi achúshishi ꞌicën.

²¹ Unin bëru banati ꞌunan ꞌixun ca a unin mëcën: “Mixmi ꞌaíma ꞌaínbi ꞌëxëshi ꞌaíshbi cana asábi ꞌitsían” quixun catima ꞌicën. Usaribi oquin ca unin maxcatax banati ꞌunan ꞌixun a unin taë: “Mixmi ꞌaíma ꞌaínbi cana ꞌëxëshi ꞌaíshbi asábi ꞌitsían” quixun catima ꞌicën.

²² Bëru, mëcën, maxcá, acama ꞌimainunbi nun nami raíri anu bërúinra ocëma acamaxa ꞌaíma ꞌain cananuna uisa ꞌaíshbi tsótsianma.

²³ ꞌImainunribi cananuna nami an bëpánti chupa pañuin. Pañuanan cananuna nun namicamaira unin isti rabanan rabínquin, chupan mapuquin bërúinroin.

²⁴ Acama bërúanquinbi cananuna nun bëru, nun mëcën acama unínma isia quixun mapuima. Usa ꞌain ca Nucën Papa Diosan mëníosabi oi nun namicama asábi ꞌicën. A mapucëcamax ca anu mapucëmacamasaribi ꞌicën.

²⁵ Usa ꞌain cananuna —amo ꞌicëxa ꞌaisama ꞌimainun ca amo ꞌicëxëshi nun nami upí ꞌicë —quixun sinántima ꞌain. Camabi nun namix ca upí ꞌicën.

²⁶ Nun mëcënaxa paëia ca camabi nun namin tania. Usaribiti ca nun pabitax paëia camabi nun namin tania. Usaribiti cananuna unían —min bu, min bëmána, min pëñan ca upí ꞌicë —quixun cacëx nun namicamabëbi chuámarua tani cuëënin.

²⁷ Usa ca ënëx ꞌicën. Aín taë, aín mëcën, aín pabí acamaxa ꞌitsa ꞌaínbi ca uni achúshishi ꞌicën. Usaribiti ca Cristobë aín unicama achúshishi ꞌicën.

²⁸ Nucën Papa Diosan mëníosabi oquin ca axa Jesucristomi catamëcë unicaman bëtsi bëtsi ñu ꞌaia. Raíri unix ca aín bana ñuixunuan Jesucristonën caíscë ꞌia. Raíri unin ca Nucën Papa Dios quicë bana unicama ñuixunia. Raíri unin ca axa Jesúsmi catamëcë unicama aín bana ꞌunánmia. Raíri unin ca uni itsin ꞌacëma ñu ꞌaia. Raíri unínribi ca uni ñucë pëxcuia, raíri unin ca unicama ꞌaquinia, raíri unix ca Nucën Papa Diosan bana cuatia timë́cë unicama aín cushi ꞌia, raíri uníxribi ca Nucën Papa Dios rabi unían cuatima banan banaia.

²⁹ Usa ꞌaíshbi ca camáxira aín bana uni ñuixunuan Jesusan caíscë ꞌima, camáxira ca an Nucën Papa Dios quicë bana unicama ñuixuncë ꞌima, camáxira ca an axa Jesúsmi catamëcë unicama aín bana ꞌunánmicë ꞌima, camáxira ca an uni itsin ꞌacëma ñu ꞌacë ꞌima.

³⁰ Camáxira ca anun uni ꞌinsíncë pëxcuti cushiñu ꞌima, camáxira ca axa Nucën Papa Dios rabi unin cuatima banan banacë ꞌima, camáxira ca uníxa bëtsi banan banacë an ñuixuncë ꞌima.

³¹ Camabi ñu ꞌaquinmabi camina añu ꞌaquin caramina camabi unia Jesucristomi upiti sinánun ꞌaquinti ꞌai, a ñumi ꞌanúan mi ꞌaquinun Nucën Papa Dios ñucáti ꞌain. A ñucamami upí oquin ꞌaiabi cana mitsu ꞌunánmiti ꞌain, bëtsi ñu upíirami ꞌanun.