1 Corintios 11 - Kashibo-Kakataibo Biblia

¹ ꞌËx Cristo ꞌiásaribiti ꞌicësaribiti camina mitsúxribi ꞌiti ꞌain.

Axa Jesucristomi catamëcë unicama timë́cëbë usai xanucama ꞌiti bana

² ꞌËn xucë́antu, mitsun ꞌë manuquinma camina ꞌën mitsu ñuixuncë bana quicësabi oquin ꞌain. Usaími ꞌia cuaquin cana —asábi ca —quixun mitsu cain.

³ Ënë banaribi cana mitsúnmi ꞌunánun ësaquin mitsu cain, Cristonën aín Papan bana cuacësaribi oquin ca camabi unin Cristonën bana cuati ꞌicën. Usaribi oquin ca camabi xanun aín bënën bana cuati ꞌicën.

⁴ Axa Jesucristomi catamëcë unicama timë́cëbëtan ca nucë bënë unin Nucën Papa Diosbë banaquin aín mañuti mañutima ꞌicën. Usaribi oquin ca Nucën Papa Diosan sinánmicë bana uni ñuixunquin aín mañuti mañutima ꞌicën. Usoquian unin aín mañuti mañucëx ca ꞌaisama ꞌiti ꞌicën.

⁵ Usa ꞌaínbi ca xanux abë bananan Nucën Papa Diosan sinánmicë bana ñuixuni mapúcë ꞌiti ꞌicën. Usaía ꞌicëxma ca ꞌaisama ꞌaish maxcúcë xanusa ꞌia.

⁶ Axa mapútisama tancë xanu ax ca maxcúcë ꞌiti ꞌicën. Usa ꞌaish ca maxcútimi rabíanan, maruñusa ꞌaish rabíntisama tani mapúti ꞌicën.

⁷ Nucën Papa Diosan ca asaribi ꞌitánun uni uniocëxa. Usa ꞌain ca Nucën Papa Diosan asaribi ꞌinun unio ꞌaish uni mapútima ꞌicën. Usa ꞌaínbi ca Nucën Papa Diosan an uni ꞌaquinti oquin xanu uniocëxa.

⁸ Nucën Papa Diosan ca xanun putu bixun uni unioma ꞌicën. Usaquin ꞌaquinma ca nucë bënë unin putu bixun xanu uniocëxa.

⁹ Xanunan ꞌiti oquin ca Nucën Papa Diosan bëbu unioma ꞌicën. Bëbunan ꞌiti oquin ca xanu Nucën Papa Diosan uniocëxa.

¹⁰ ꞌËn uni ꞌaquinquin ax quicësabi oquin ꞌanun ca Nucën Papa Diosan ꞌë uniocëxa quixun sinani ca xanux mapúcë ꞌiti ꞌicën, ángelcaman —a upí sinánñu ca —quixun isnun.

¹¹ Usa ꞌaínbi ca axa Jesucristomi catamëcë unicaman ësaquin ꞌunánti ꞌicën, bëbu uni ashi ꞌixunbi ca camabi ñu aín cuëëncësa oquin ꞌatima ꞌicën. Usaribiquin ca xanun ashi ꞌixunbi camabi ñu aín cuëëncësa oquin ꞌatima ꞌicën.

¹² Bëráma ca Nucën Papa Diosan xanu unioquin unin putu bixun uniocëxa. Usa ꞌaínbi ca Nucën Papa Diosan mëníosabi oquin xanúinshi uni tuaia.

¹³ Mitsúnbi camina upí oquin sinánquin ꞌunánti ꞌain, Nucën Papa Diosbë banaia xanu mapútima cara asábi ꞌicë quixun.

¹⁴ Cananuna ꞌunan, uni aín bu chaxcë́ira ꞌaish ca rabin ꞌiti ꞌicën.

¹⁵ Usa ꞌaínbi ca usabiiti oi unia ꞌaish xanux aín bu chaxcë́ ꞌicën. Usabi anun mapúti oquin ca Nucën Papa Diosan mëníocëxa. Usa ꞌaish ca xanunanëx upí ꞌicën.

¹⁶ Axa ënë bana cuati cuëbicanáncë unicama cana cain, usai ca xanu ꞌiti ꞌicë quixun cananuna camabi uni cain. Axa Jesucristomi catamëcë unicama timë́cëcamanribi ca —usai ca ꞌiti ꞌicë —quixun sinania.

Pán pianan uvas baca ꞌaquin Jesucristo asérabi sinánquin ꞌati bana

^17-18 Ësaquian mitsu ñuicania cana cuan, mitsux isamina Jesucristo sinánquin pán pianan bimi baca ꞌanux timë́axbi camáxbi nuibananima bëtsibë bëtsibë nishananin. Usaquin ñuicania cuaquin cana sinan, usai sapi camina ꞌicani quixun. Usa ꞌaish camina ñancábi timë́canin. Timë́axbi camina anuaxira nishanancanin. Usaquin Jesucristo sinánquin pán pianan bimi baca xëaibi camina asérabi ami sinánquinmi ꞌacëma cupí ꞌuchain. Usoquinmi ñu ꞌaia cana mitsu, upí oquin camina ꞌai quixun caiman.

¹⁹ Usaquin bëtsi bëtsi oquin sinania raírinëx cuamiananmainunbi raírinëx nishananiama isquin ca unin isti ꞌicën, uicamax cara asérabi Cristonan ꞌicë quixun.

²⁰ Camáxbi timë́xun nuibananquinma piquin camina asérabi Nucën ꞌIbu Jesucristo sinánquin ꞌaiman.

²¹ Usa ꞌixun camina uni raíri tënánan micama raírinën mitsun bëcë ñu pin. Uni raírinëxa ꞌacëñuma ꞌaish panántamainun camina micama raírinëx ꞌaisamaira oquin pitancëx paënin.

²² Mitsux camina anuxun pianan xëati xubuñu ꞌain. Axa Jesucristomi catamëcë unicamabë timë́axmi usai mitsux ꞌicëbë ca uni raírinëx Nucën Papa Dios timai ainan ꞌiisama tanti ꞌicën. Usami ocëx ca anu ꞌicë ñuñuma unicamax ñuñuma ꞌaish rabinia. ¿Uisoquin carana mitsu cati ꞌain? ¿Usaími ꞌia carana uisa ꞌixun mitsu —asábi camina ꞌai —quixun cati ꞌain? Cana catima ꞌain.

Jesucristo sinánquin pán pianan uvas baca ꞌati bana

²³ Nucën ꞌIbu Jesusan ꞌë cacë bana ñuiquin cana ësaquin mitsu can, anúan uni itsin ꞌanun quixun unin a ꞌinánti, a ñantan ca Nucën ꞌIbu Jesusan pán biacëxa.

²⁴ Bitancëxun ca aín Papa —asábi ca —catancëxun tëcë́npaxun mëtícaquin cacëxa: “Ënë ca pit. Mitsúnmi piti pán ënëx ca ꞌë ꞌicën, axa minun rabanan bamati a. Ësoquin piquin camina ꞌë sinánquin ꞌati ꞌain”.

²⁵ Usaribi oquin ca pitancëx sënë́nxun xanpanu ꞌicë uvas baca biquin cacëxa: “ꞌËx ꞌën imi ꞌapati bamati cupí ca mitsúxmi ainan ꞌiti ꞌën Papa Diosan mëníocëxa. Ënë sinánquin camina ësoquin bimi baca ꞌaquin ꞌë sinánquin ꞌati ꞌain”.

²⁶ Usa ꞌain ca Nucën ꞌIbu Jesucristo utëcëntamainun aín unicaman ësoquin pán ꞌimainun bimi baca ꞌati ꞌicën. Usaquian aín unicaman ꞌaia isquin ca unin ꞌunánti ꞌicën, atun ꞌucha cupía Jesucristo bama ꞌain ca a sinánquin usoquin ꞌaia quixun.

Asérabi Jesucristomi sinánquin pán ꞌimainun uvas baca ꞌati bana

²⁷ Usa ꞌain ca uix cara Nucën Papa Dios cuëëncësabi oi ꞌíma ꞌianan —Jesucristo ca nun ꞌuchacama tërë́nux aín imi ꞌapati bamacëxa —quixun sinánquinma a manucë ꞌixunbi usoquin pán ꞌimainun bimi baca ꞌaia, a unix ca Nucën ꞌIbu Jesucristomi ꞌuchaia.

²⁸ Usa ꞌain camina pán ꞌimainun bimi baca ꞌanuxun, mitsux caramina asérabi ami sinani Nucën Papa Dios cuëëncësabi oi ꞌi quixun upí oquin sinánti ꞌain.

²⁹ Nucën ꞌIbu Jesucristo ca nun ꞌuchacama cupí bamacëxa quixun sinánquinmabi usoquin pán ꞌimainun bimi baca ꞌai ꞌuchacë cupí camina castícancë ꞌiti ꞌain.

³⁰ Usai ꞌuchacë cupí camina Nucën Papa Diosan ꞌimicëx raíri cushima ꞌianan ꞌinsínñu ꞌain. Usa ꞌaish ca raíriribi bamaxa.

³¹ Usa ꞌaínbi ca nun ꞌuchacama mëníocë ꞌixun —asérabi ca Jesucristo cupí Nucën Papa Diosan iscëx ꞌën nuitu upí ꞌicë —quixun sinánquinu pán ꞌimainun bimi baca ꞌaia, Nucën Papa Diosan nu ꞌuchotima ꞌicën.

³² Usa ꞌaínbi ca asérabi ami sinánquinmabi usoquin a ñu ꞌaia, Nucën Papa Diosan nu ꞌuchoquin, axa ami sináncëma unicamabënu nuxribi ꞌuchocë ꞌitin rabanan, usoquin ꞌatëcëníma ꞌinuxun ꞌunánun, uisai caranuna ꞌi usaínu ꞌinun nu castícania.

³³ ꞌËn xucë́antu, Jesucristo sinánquin pán ꞌimainun bimi baca ꞌanux timëti camina pinux caínanpanti ꞌain.

³⁴ Usai ꞌiimi upiti timëtiama isquian Nucën Papa Diosan mitsu castícanti rabanan camina panancë ꞌixun mitsun xubunuxun piti ꞌain. Usa ꞌain cana mitsu isi cuanxun uisai caramina ꞌicani, a mitsu mëníoxunti ꞌain.