1 Corintios 10 - Kashibo-Kakataibo Biblia

Unían a rabinuxun uniocë ñu rabitima bana

¹ ꞌËn xucë́antu, ënëmi mitsun ꞌunánun cana mitsu cain: —Nucën raracamaxa Egiptonuax cuania ca Egiptonu ꞌicë suntárucaman ꞌatin rabanan Nucën Papa Diosan nëtë cuin bëararamiacëxa. Usaquiani ca Nucën Papa Diosan parúnpapa tëárabëoquin aín nëbë́tsi ësquimiquin me racáncëbë anun ꞌucë manan sicaracëacëxa.

² Usaquin nëtë cuinan bëararacë ꞌaish parúnpapa sicaracëtancëx ca nucën raracamax Nucën Papa Diosmi catamëti Moisésbë upí ꞌaish an buáncëx abë cuancëxa.

³ Cuanquin ca camaxunbi Nucën Papa Diosan ꞌináncë piti piacëxa. An ꞌináncë ꞌunpáxribi ca camaxunbi xëacëxa, xaxúnpapanuaxa shaquibutia.

⁴ Xaxunuaxa chiquícë ꞌunpáxsaribi ꞌixun ca Cristonën abë cuanquin atu cushiocëxa. Usa ꞌain ca anuaxa ꞌunpax chiquícë xaxusa Cristo ꞌiacëxa.

⁵ Usa ꞌaínbi ca ax quicësa oquian ꞌaiama oquin, usaía atux ꞌiti cuëënquinma Nucën Papa Diosan anu uni ꞌicëma menuxun ꞌitsamashi bërútamainun aín patsan cëñúmiacëxa.

⁶ Nun atun ñu ꞌaisama ꞌati cuëëansaribi oquin cuëënuxunma, nun a ꞌunánti oi ca usai ꞌiacëxa.

⁷ A unicama raírinëan ꞌásaribi oquin camina unin ꞌacë ñu rabitima ꞌain. Atu ñuiquin ca Moisésnën ësaquin cuënëocëxa: “Aín paë bata xëanan pi bucubutancëx cuëëni ca ransacëxa”.

⁸ Usai ꞌianan ca a unicama raírinëx aín xanuma xanu itsibë ꞌi ꞌuchatancëx achúshi nëtë́inshi ꞌitsaira veintitrés mil uni bamacëxa. A unicama raírinëxa aín xanuma xanu itsibë ꞌiásaribiti cananuna ꞌitima ꞌain.

⁹ Atúnbi —Nucën Papa Diosan sapi ca nu ꞌatimotima ꞌicë —quixun sinánquin ñu ꞌaisama ꞌatancëxbi ca runun picëx a unicama bamacëxa. A unicamaxa Nucën Papa Diosmi ꞌuchasaribi oi cananuna usaquinribi sinani Nucën ꞌIbu Jesúsmi ꞌuchatima ꞌain.

¹⁰ Usaribitia a unicama raírinëx a ñui ꞌatimati banaia ca Nucën Papa Diosan cëñúmiacëxa. A unicama ꞌiásaribiti cananuna Nucën Papa Dios ñui ꞌatimati banatima ꞌain.

¹¹ Nucën raracama usai ꞌiá, anu nun Jesucristomi catamëti ainan ꞌixun ꞌunánun ca Nucën Papa Diosan Moisés cuënëomiacëxa.

¹² Nux cananuna usai ꞌitima ꞌai quixun sinanibi camina bërúinraoracati ꞌain, usai atu mina ꞌin.

¹³ Ñu ꞌatima ꞌati sinánquinbi camina ꞌunánti ꞌain, mitsúinshima uni itsínribi ca usaribi oquin sinani tëmëraia quixun. Usa ꞌaínbi ca Nucën Papa Diosan, ax quicësabi oquin mitsu ꞌaquinquin, ñunshin ꞌatimanën mitsu ꞌaisamaira oquin tanun ënima. An ca ami catamëquinmi min ñu ꞌatima ꞌati sináncë ënun mitsu cushioquin, uisaxun caramina ënti ꞌai quixun mitsu sinánmiti ꞌicën.

¹⁴ ꞌËn nuibacë xucë́antu, unínbi ꞌacë ñu a camina ami ꞌunánquin rabitima ꞌain.

¹⁵ Mitsúxmi sinánñu uni ꞌicë cana usaquin mitsu cain. Usa ꞌixun camina ꞌën mitsu cacëxun cuaquin ënë banax ca asérabi ꞌicë quixun ꞌunánti ꞌain.

¹⁶ Timë́xun cananuna, Jesucristo ca nun ꞌucha cupí aín imi ꞌapati i curúsocënuax bamacëxa quixun sinánquin —asábi ca —quixun Nucën Papa Dios cain. Catancëxun cananuna manë xanpanua bimi baca xëaquin —Cristo aín imi ꞌapati bama cupí cananuna nun ꞌucha tërë́ncë ꞌai —quixun sinanin. Pánribi tëaxun tucatancëx mëtícanantancëxun piquin cananuna camaxunbi —Cristo ca nun ꞌucha cupí i curúsocënuax bamacëxa —quixun sinanin.

¹⁷ ꞌItsa uni ꞌixunbi cananuna camaxunbi a pán piquin, —nux cananuna camáxbi Cristonan ꞌaish achúshisa ꞌai —quixun sinanin.

¹⁸ Camina ꞌunanin, an a rabiquin ñuina ꞌacë Israel unicaman ca Nucën Papa Dios rabia. ꞌImainun ca an a ñuina nami picë unicamanribi Nucën Papa Dios rabia.

¹⁹ Usaquin caquin cana unían a rabinuxun uniocë ñu ax ca cushi ꞌicë quixun mitsu caiman. ꞌImainun ca a rabiquian ꞌacë ñuina nami axribi bëtsi namisama ꞌicë quixun cana mitsu caiman.

²⁰ Ësaquin cana mitsu cain, judíosma unibunëx Nucën Papa Diosmi sináncëma ꞌixun ñuina ꞌaxun unin ꞌacë ñu rabiquin ca Nucën Papa Dios rabiquinma ñunshin ꞌatima rabia. Usaribiquin ñunshin ꞌatima rabimi mitsux aín uni ꞌiti cana cuëëniman.

²¹ Nucën ꞌIbu Jesucristo ca nun ꞌucha cupí bamacëxa quixun sinánquin uvas bimi aín baca ꞌacë ꞌixun camina uni itsibëtan ñunshin ꞌatima rabiquin xëati ñu xëatima ꞌain. Nucën ꞌIbu Jesucristo sinánquin uvas bimi aín baca ꞌanan pán picë ꞌixun camina ñunshin ꞌatima sinánquin a rabiquin ꞌati ñu pitima ꞌain.

²² Nucën ꞌIbu Jesús nishmiquin camina ñunshin ꞌatima rabitima ꞌain. Nuxnu cushima ꞌimainun ca axira nubë sënë́nmaira ꞌaish cushi ꞌicën.

Ainanshia ꞌinun ꞌaquinma bëtsi uniribi sinánquin unin ñu ꞌati bana

²³ Ënë banax ca asérabi ꞌicën, “Unin ca aín cuëëncësa oquin ñu ꞌati ꞌicën”. Usa ꞌaínbi cananuna nux asábi ꞌiisa tanquin camabi ñuira ꞌatima ꞌain. Asérabi ca “unin aín cuëëncësa oquin ñu ꞌati ꞌicë” ꞌaínbi cananuna nux Jesusan bana quicësabi oi ꞌiisa tanquin camabi ñuira ꞌatima ꞌain.

²⁴ Axa Jesúsmi sináncë unin ca ꞌënanshi ca quixun sinánquin ñu ꞌatima ꞌicën. Bëtsi uniribia upí ꞌinun ꞌaquinti sinánxun ca ñu ꞌati ꞌicën.

^25-26 Mecama ꞌimainun menu ꞌicë ñucama ax ca Nucën ꞌIbu Diosan unio ꞌaish ainan ꞌicën. Usa ꞌain camina anuxun nami maruti anu ꞌicë nami maruxun piishiti ꞌain. Uinua bëcë cara quixun camina ñucátima ꞌain. —A pi sapi cana ꞌaisama ꞌiti ꞌai —quixun camina sinántima ꞌain.

²⁷ Axa Jesucristomi catamëcëma unían abëtanmi pi cuanun quixun cacëx camina cuainsa tani cuanti ꞌain. Cuanxun camina —uinua bëcë cara a nami ꞌicë —quixun ñucáquinma piishiti ꞌain. —A nami pi sapi cana ꞌaisama ꞌiti ꞌai —quixun camina sinántima ꞌain.

²⁸ Mitsun piti ꞌaínbia uni itsin mitsu —ënë namix ca unin ꞌacë ñu rabiquin piti ꞌacë ꞌicë —quixun mitsu cacëxun cuni camina pitima ꞌain. An mitsu cacë uni an Jesucristomi catamëcë ꞌixunbi, camabi nami ca bëtsi namisaribi ꞌicë quixun upí oquin ꞌunáncëma ꞌixun, —ënë nami pi cana Nucën Papa Diosmi ꞌuchain —quixun sináncë ꞌain camina a nami pitima ꞌain.

²⁹ —A piti ca asábi ꞌicë —quixun mitsun sináncëbëtanbi an mi cacë unin —usa ñu ꞌën piti ca ꞌucha ꞌicë —quixun sináncëbëtan camina pitima ꞌain. Sapi camina ꞌë ñucáti ꞌain, uisacasquin carana uni itsían, ënë nami piti ca ꞌucha ꞌicë quixun sináncë cupí ꞌën pitima ꞌai quixun.

³⁰ ¿Nucën Papa Dios —asábi ca —quixun caxun ꞌën piabi cara unin ꞌuchoquin, —Nucën Papa Diosmi ꞌuchaquin camina pia —quixun ꞌë cati ꞌic?

³¹ Ënëx ca ësa ꞌicën. Ñu piquin, ñu xëaquin, añu ñu caramina ꞌai, usa ñu ꞌaquin camina Nucën Papa Dios cuëënun a sinánquin ꞌati ꞌain.

³² Usoquin camina uinu ꞌicë unibi, judíos uni ꞌimainun judíosma uniribi, ꞌimainun axa Jesucristomi catamëcë unicamaribi, Nucën Papa Diosmi ꞌuchati sinánmitima ꞌain.

³³ ꞌËnribi cana camabi uníxa ꞌën ꞌaia isi cuëënun ñu ꞌain. ꞌËn cuëëncë ñu ꞌatishi sinánxun cana ñu ꞌaiman. Jesucristomi catamëtía ië́nun camabi uni ꞌaquínti sinánxun cana ñu ꞌain.