1 Corintios 1 - Kashibo-Kakataibo Biblia

Corintonuaxa Jesucristomi catamëcë unicama Pablonën quirica cuënëoxuan

¹ ꞌËx Pablo ꞌixun cana mitsu quirica buánmin, camina biti ꞌain. Nucën Papa Dios cuëëncësabi oquin aín bana unicama ñuixunun ca Jesucristonën ꞌë caísacëxa. An caísa ꞌixun cana Sóstenesbëtan mitsu quirica buánmin. Axribi ca Jesucristomi catamëcë ꞌaish nucën xucën ꞌicën.

² Mitsúxmi Corinto ëmanuax Jesucristomi catamëcë ꞌicë, cana cuënëoxun ënë quirica mitsu buánmin. Mitsux Cristo Jesúsmi catamëcë ꞌaish camina Nucën Papa Diosnan ꞌain. An ca ax cuëëncësabi oíshi ꞌinun mitsu caísacëxa. Camabi menu ꞌicë unicama, an Nucën ꞌIbu Jesucristo aín ꞌuchacama tërë́nxunun quixun ñucácë, a unicama usai ꞌinun caíscësaribi oquin ca Nucën Papa Diosan mitsu caísacëxa. Jesucristo ax ca a unicaman ꞌIbu ꞌianan nun ꞌIburibi ꞌicën.

³ Usa ꞌaíshmi mitsux Nucën Papa Diosbëtan Nucën ꞌIbu Jesucristonën nuibaquin ꞌaquincëx chuámarua bucucanti cana cuëënin.

Cristo cupí nuibaquin Nucën Papa Diosan uni ꞌaquinti bana

⁴ Cristo Jesús cupía mitsu nuibaquin ainan ꞌimicë cupí cana camabi nëtën Nucën Papa Dios —asábi ca —cain.

⁵ Cristobë ꞌaíshmi aín sinánsaribi ꞌicë ca Nucën Papa Diosan an aín unicama ꞌunánmiti ñu ꞌunánmiquin upí oquin sinanimi upiti bananun mitsu ꞌimiaxa.

⁶ Usa ꞌaish camina mitsux an Cristo ñui quicë bana ꞌunánquin, a bana quicësabi oquin ꞌacë ꞌain.

⁷ Usa ꞌixunmi Nucën ꞌIbu Jesucristo utëcënti nëtë cainia ca Nucën Papa Diosan aín unicama ꞌaquincësaribi oquin ami ꞌunánun mitsu ꞌaquinia.

⁸ Nucën ꞌIbu Jesucristo utëcëncëbëtan uinu ꞌicë unínbi mitsu ñuiquin —a unix ca ꞌatima ñu ꞌacë ꞌicë —quixun canúnma ca Nucën Papa Diosan mitsúnmi ami catamëquin ꞌatima ñu ꞌaxunma ꞌanun ënquinma mitsu bërúanti ꞌicën.

⁹ Nucën Papa Diosan ca ax quicësabi oquin ñu ꞌaia. Mitsúnmi aín Bëchicë, Nucën ꞌIbu Jesúsbë ꞌixun, an sináncësaribi oquin sinánun ca mitsu caísacëxa.

I. PABLONËAN CORINTONU ꞌICË UNICAMA ꞌËSËA BANA (1.10-6.20) Axa Jesucristomi catamëcë unicama bëtsi bëtsi oquin sinántima bana

¹⁰ Mitsux Jesucristomi sináncë ꞌaish camina ꞌën xucë́antu ꞌain. Usa ꞌicë cana Nucën ꞌIbu Jesucristo cuëëncësabi oquin mitsu ësoquin cain: Bëtsin sináncësaribi oquin sinani camina bucucanti ꞌain. Masáquin sinani camina bëtsibë nishanancantima ꞌain. Nishananíma nuibananshiti camina camaxunbi bëtsin sináncësa oquinshi sinani upitax bucucanti ꞌain.

¹¹ ꞌËn xucë́antu, cana mitsu cain, Cloénën aintsi ꞌibun ca mitsux ismina bëtsibë bëtsibë ubíonan ubíonani bucui quixun ë caxa.

¹² Usoquian cacëxun ꞌën sináncëx ca ësa ꞌicën: mitsu raírinëx ca ax isa ꞌën ꞌunánmicë ꞌicë quia. Quimainun ca raírinëxribi ax isa Apolonën ꞌunánmicë ꞌicë quimainun, raírinëxribishi ax isa Pedronën ꞌunánmicë ꞌicë quimainun raírinëxribishi ax isa Cristonën ꞌunánmicë ꞌicë quiax quia.

¹³ ¿Mitsun sináncëx cara Cristo ꞌitsa ꞌic? Cristo ca ꞌitsama ꞌicën, ax ca achúshishi ꞌicën. ꞌËx cana mitsun ñu ꞌaisama ꞌacëcama tërë́ncë ꞌinun i curúsocënu bamama ꞌain. ꞌËmi catamëtima Cristomishi catamëti camina nashimicë ꞌian.

¹⁴ ꞌËn mitsu achúshibi nashimicëma cupí cana Nucën Papa Dios —asábi ca —cain. Crispo ꞌimainun Gayo a rabë́ishi cana nashimian.

¹⁵ Usa ꞌain camina mitsux Cristomi sinanima —Pablonan ꞌaish cana nashimicë ꞌai —quiax quitima ꞌain.

¹⁶ A ꞌimainun cana axa Estéfanasnën xubunu ꞌicëcamaishi nashimian. ꞌËn sináncëx ca bëtsi uniribi a ꞌën nashimicë ꞌaíma ꞌicën.

¹⁷ Cristonën ca uni nashiminun ꞌë cáma ꞌicën. Uni aín ꞌuchacama tërë́ncë ꞌaish Nucën Papa Diosnan ꞌinun ië́minux ca Cristo i curúsocënu bamacëxa quixun camabi uni canun ca Cristonën ꞌë ꞌimiacëxa. An quirica ꞌunáncë unicamaxa quicësai unin cuaisama banan banaquinma unin cuaisabi oquin, upí oquin aín bana ñuixunun ca ꞌë cacëxa.

Cristonëx ca Nucën Papa Diosan cushiñu ꞌianan aín sinánsaribi ꞌicë quicë bana

¹⁸ Cristo ca unin ꞌucha cupí i curúsocënu bamacëxa quixun ñuicë bana a ca an Nucën Papa Dios cuëëncëma unicaman —a banax ca cëmë ꞌicë —quixun ñuiquin ꞌusania. Usa ꞌaínbi ca axa Nucën Papa Diosbë ꞌinux ië́ti unicaman a bana cuaquin, aín cushin ꞌimicëx cananuna nun ꞌuchacama tërë́ncë ꞌaish Nucën Papa Diosnan ꞌai quixun ꞌunania.

¹⁹ Ësai ca ꞌiti ꞌicë quiax ca Nucën Papa Diosan bana cuënëo ësai quia: ꞌËn sinanëinshi cana ñu ꞌunani quixun sináncë unicama ax ca ꞌën ꞌimicëx aín sinan ñancáishi ꞌiti ꞌicën. ꞌËn cana ñu ꞌunani quixun sináncë uni ax ca ꞌën ꞌimicëx ñu ꞌunáncëma unisa ꞌiti ꞌicën.

²⁰ Sinánñu uni ꞌimainun an quirica ꞌunáncë uni ꞌimainun an ënë menu ꞌicë ñuishi ñuiti ꞌunáncë uni acaman, ñu ꞌunáncë cana ꞌai, quixun sináncë ꞌaínbi ca Nucën Papa Diosan sinan abë sënë́nmaira ꞌicën. Usa ꞌain ca usa unicaman aín sinánsamaira Nucën Papa Diosan sinan ꞌicë quixun isti ꞌicën.

²¹ Nucën Papa Diosan upí oquin sinánquin mëníosabi oi ca uni anbi aín sinanënbi sinani Nucën Papa Diosnan ꞌitima ꞌicën. Usa ꞌaínbi ca aín bana cuati ami catamëcë unicama ainan ꞌinun ꞌimia, raírinëxa —a bana ca ñancáishi ꞌicë —quicëbëtanbi.

²² Judíos unicaman ca, nun cananuna asérabi Nucën Papa Diosan cushínbi ñu ꞌai quixun ꞌunántisa tanquin unin ꞌacëma ñunu ꞌaia istisa tania. Usai atux ꞌimainun ca griego banan banacë unicaman unían ꞌunáncë ñu camabi ꞌunántisa tania.

²³ A unicamaxa usa ꞌaínbi cananuna nun i curúsocënu matáscë Cristo, a ñuiquin unicama bana ñuixunin. A bananu nun unicama ñuixuncëbë ca judíos unicamax rabini, uisa ꞌaish caraisa Cristo i curúsocënu bamati ꞌicë quixun sinani, ami catamëisama tania. Usaía judíos unicama ꞌimainun ca judíosma unicaman —Diosan Bëchicë ca i curúsocënuax bamacëxa —quixun ñuiquin ꞌusania.

²⁴ A unicama usai ꞌimainunbi ca uicama cara Nucën Papa Diosan Cristomi catamënun sinánmicë ꞌicë acama, judíos unicama ꞌimainun griego banan banacë judíosma unicamanribi, —Cristo cupíshi ca Nucën Papa Diosan upí oquin sinánquin nun ꞌuchacama tërë́nquin ainan ꞌinun nu ië́mia —quixun ꞌunania.

²⁵ Nucën Papa Diosan Cristo i curúsocënuaxa bamanun ëncë, ax ca ꞌaisama ꞌicë uni quicëbëtanbi ca axa usai quicë unicaman sináncësamaira oquin sinánquin Nucën Papa Diosan Cristo nun ꞌucha cupí i curúsocënuax bamanun ëancëxa. —Ax cushima ꞌixun ca Diosan Jesucristo bamanun ëanxa —quixun sináncancëbëtanbi ca Nucën Papa Diosan unin cushisamaira ꞌixun ië́mitsinxunbi camabi unin ꞌucha cupía bamanun Cristo ꞌimiacëxa.

²⁶ ꞌËn xucë́antu, mitsun camina ësoquin ꞌunánti ꞌain: mitsux camina raírinëxëshi unin ꞌunáncë ñu ꞌunáinracë ꞌain, raírinëxëshi camina ꞌapusa ꞌain, raírinëxëshi camina uni itsibëtan sënë́nmaira unin bëchicë ꞌain. ꞌItsamanëxëshi camina usa uni ꞌain. Usa ꞌicëbi ca Nucën Papa Diosan ainan ꞌinun micama caísaxa.

²⁷ Nucën Papa Diosan ca unían sináncëxa ñu ꞌunánma unicama ainan ꞌinun caísaxa. Caísun anbi atu ꞌunánmia isi ca an ñu ꞌunáncë unicama ax rabinia. Usaribi oquin ca unin iscëxa cushima unibu Nucën Papa Diosan ainan ꞌinun caísaxa. Caísuan anbi atu sinánmicëbë ca unin iscëx cushi unicama ax —nun sináncësamaira oquin ca atun sinania —quixun ꞌunani rabinia.

²⁸ Ainsa ñu ꞌunánxa quixuan sináncë unicaman, —Diosan ꞌamicëxun ca aín unicaman nun sináncësamaira oquin sinania —quixun istánun ca Nucën Papa Diosan axa ënë nëtënu ꞌicë unían ñu ꞌunánma isa quixun sináncë unibu ainan ꞌinun caísaxa.

²⁹ Uinu ꞌicë unínbia —ꞌënbi cana ñu ꞌunáncë ꞌai —quixun sinánunma ca Nucën Papa Diosan ënë nëtënu ꞌicë unían sináncëxa ñu ꞌunánma unicama ainan ꞌinun caísaxa.

³⁰ Nucën Papa Diosan ꞌimicëx camina ami catamëti Cristo Jesúsbë ꞌianan an sinánmicë ꞌain. Usa ꞌaish camina Cristo Jesús cupía, ax cuëëncësabi oquinshimi ꞌanun Nucën Papa Diosan ië́micë ꞌain.

³¹ Usa ꞌain ca Nucën Papa Diosan bana cuënëo quicësabi oquin, “Uinu ꞌicë unix cara rabítisa tania ax ca axbi rabiacatima —Nucën ꞌIbu Diosan ꞌimicëx cana asábi ꞌai —quixun sinánquin ashi rabiti ꞌicën”.