Hebreos 1 - Diosa' kiika; Génesis Éxodo y El Nuevo Testamento

Dios ya' Na' mityalalanu pantsuve.

¹ Yumaa tinbunu lala' aa-apa millalanu Dios ya' mitya pamu rukulanu tsandikaatu, pure' bijee pakaamuwaave, tsenmin naake vee vee keeware' pakaanu ju'ba tsa tsanguemuwaave.

² Tsaaren challa entsa de-inu tinbutalaya ya' Na' mityaa lalanu pave. Juntsa ya' Na' mityaa ti bain dekive, tsenmin naa ti juu bain yanu tene detaa shuikenu tireve.

³ Yaa Dios naaju tsamantsaañuba juntsaa keewarave, tsenmin Dios ura naajuñuba yaa entsaave ti' keewara jumuve. Yaa ya' palaa pudeechi ti juutala bain naa naa-inuuñuba tsanguikaren tanave. Tsejtu bene lala' ujcha depitsale' dyatu, selusha Diosa' chuchudinu chunjuu urandyasha chudive.

Diosa' Naya anjeelanu kayu pulla.

⁴ Diosa' Naya anjeelanu kayu pulla bale juu tiyaive, yaa kayu Dioschin juntsaanuu kura' mitya.

⁵ Matyu Dios naaju anjeelanuba entsandityuwaave: Ñaa in Nave; ñunu uma ke' kujteyu. Tsenmin ma anjeenu laapu' ne entsandibaindityuwaave: Iya yachi apa junu tsuyu, tsenmala yaa inchi Na junu tsuve, tityuwaave.

⁶ Tsenmin yachi balenguramu Nanu, selusha mamikandu entsandive: Dioschi kumuinchi ya' anjeela bain yanu teedi' aawa dekuresa, tive.

⁷ Tsejtu anjeelanu laapu' patuya, Diosa' Kiikanu entsandive: Ya' anjeelanu ishuwa juuñuu tirekemuve, tsandityu'ba, yachi tiba taawasha kemulanuya ñi llu'kaya juuñuu tirekive, timuve.

⁸ Tsaaren ya' Nanu laapu' pamiya entsandive: Dios, ñu rei ju' naa-uwanuba tsaa tsananu tsuve, tsenmin ñu rei ju' mika deechu' kemuve.

⁹ Ñuya uraa tene kenu tyamu' mitya, tiba firu' jumunuya anbuindyamuve. Tsa' mityaa iya, ñu' Dios, ñunu mi'ke' kayu; tsangue' kayu ñuchi ura' kera chachillanuba pullake sunden puiteyu, tive.

¹⁰ Tsenmin entsa bain tsandive: Ñu, Bale Ruku, uma ajke' peepunu uwanuren tu kemuwaave; tsenmin ñuren kai'sha tiba jenamulanu bain dekemuve.

¹¹ Kumuinchi juntsa de-i' pinu tsuve, tsaanuren ñuya naa-uwanuba tsananu tsuve. Kumuinchi juntsala jalleeba ju' de-uinbu' kan tsanguenu detsuve;

¹² juntsalanu uinbu jalleeba dejuñu dyajpiityulin tsanguenu juve ñu; juntsalanu jalleeba dejuñu vera mavete' panan tsanguenu tsuve. Tsaaren ñuya tsaren ju', naa-uwanuba tsananu tsuve.

¹³ Naaju anjeelanuba Diosya jaiba entsandityuwaave: Ñunu kundaa tyamulanu, kayu ñu' neepa teetanainsha detsungarendyuya ñu in urandyasha chudide, tityuwaave.

¹⁴ Matyu naaju anjeelaba Dioschi tiba kiikenu eramu deeve, livee inuu chachillanu kivetes nemula.