Zyudi 1 - Cebaara Bible 2010

Fòów kéele

¹ Mii Zyudi, wi lè Zyezu Kirisi púlo, ní wɔ́ɔ i nyɛ Zyaki cɔnɔɔ, mii a sɛ́bɛw naa tórigo yele ma, yele bele ye nyɛ lè Tofɔw Kolocɔlɔɔ woyeribéle, ní wi syɛɛn-nidaanmabéle, wi si i yele kpáaw wéle Zyezu Kirisi ma.

² Ki n yɛlɛ kàa í da fàrá yele ma nyínimi, ní fûnnyingi, ní tàmagi na!

Tamafɔ-váanabèle kéele

³ Mii syɛɛn-nidaanmabèle, mii maa séli ni ŋàʔaná bi sɛ́bɛwaa sɛ́bɛ tórigo yele ma wolo syɔɔli kéele na, lee na wo pínɛ lè, a mii ní baa gi nyaa ki i nyɛ ŋàʔanaga kéele fwɔɔ mii í wi sɛ́bɛ bi yele kɛɛlɛ si jo, tágalee Kolocɔlɔɔ kàlifáa wi syɛɛncanbèle ma lè, li lè li a gbǎn fàli í, ki n yɛlɛ yele í da kapɛɛnnɛ kpúmɔn li kéeli na.

⁴ Níì cán nǎnbèle pèle n jée yele níngi ni làrama ni, Kolocɔlɔɔ yɛ́ʔɛnaa-sìnvyaabéle bɛɛ, bele be wolo Kolocɔlɔw kpɔ́ʔɔrɔ kàragí lè ni tànʔa kaangi peyɛɛ ma pe kanɔnʔɔbeeri kéele na, poro bele kútii kéele li da sɛ́bɛ lè booma ni, Zyezu Kirisi nibin wi nyɛ lè wolo Kàrigafɔw ní wolo Kàfɔw, pe n wee bee cée.

⁵ Amɛɛ yele wírè kérigèle naa myɛ cán lè n kwɔ́ɔ gbanʔama, koro ní ki myɛ ní mii i caa bi yele sɔ̀ngumi tìrige ge na, koro ge nyɛ àmɛɛ Kàfɔw da Isirayɛli syɛ́ɛnbèle syɔɔ n yirige lè Ezyipiti tári ni, koro kàdoʔo ma poro bele pe da pye lè pe ga tága í, a wi bele bee kálagi.

⁶ Nyɛ̀ʔɛni tundunbéle be pye lè pe da kòro pe fǎngi ni í, níì pe tiimaa tɛɛkòrogi cée, a Kolocɔlɔɔ bànzánʔa yapwɔɔrɔ tɛ́ʔɛ n bele bee pwɔɔ n kɔn táàma yébiliwɔɔlɔ tɛ́ʔɛ ni cângbɔɔgi kútii kánma na.

⁷ Kánmee na bele bee da cée lè, kánmi bee na Sodɔmi, ní Gomɔri, ní yi taana kěyi syɛ̀ɛnnɛ da baa cée níì peyɛɛ gaan kanɔnʔɔri ma, níì kòro fɛ̀ɛfɔnmi kèlē na ni kpéʔele ní peyɛɛ ní. Amɛɛ be wɔʔɔ lè bànvigi náagi ni, pe i nyɛ fɛ̀ɛ syɛ́ɛnbèle myɛ ma.

⁸ Kánmi bee wonijanma na nǎnbèle bee wɔ́ɔ i be céri nɔ́ɔnri ŋúnɔyi báriga ni be ŋúnɔ lè, ní i Kàfɔw fànʔa faari, ní i nìjangbɔɔri fɔ̀ɔlɔ teeri.

⁹ Bi gi taa Misyɛli wi lè nyɛ̀ʔɛni tundungbɔɔɔ, lǎli ni wi da ni túngu lè ní Dàzɔɔnw ní, á be i kàbá Mowizi kúceri kéele na lè, wi da fɔ̀lɔ n wi tɛʔɛlɛ níì jo wi n kolo í, fwɔɔ a wi jo: «Ki n yɛlɛ Kàfɔw í fúlo mɔ na!»

¹⁰ Kérigèle si ge nyɛ lè nǎnbèle bee ga ge cán í, pe i gele bee faari, gele si be cán lè be sɔ̀nguri ni àmɛɛ yaweere nyɛ lè di lè sícilimɛ fun, gele bee ní pe peyɛɛ gálagi.

¹¹ Wɔʔɔli a ba pye be na! Níì cán kólogee Kayɛn da ni táanri lè koro be láa, ní wɔ́ɔ̀ pwɔɔ sàraw kéele na níì tìn n jée Balaami pùununi kólogo ni, níì kálagi àmɛɛ Kore da céemi le wiyɛɛ ni níì kálagi lè.

¹² Nǎnbèle bee i nyɛ tɛɛ̀nɔnʔɔyɔ yele tàmagi lìigboloyo tɛ́ɛyɛ ni, pe i kùunú ni líi làáwologo ni, pe o sɔ̀ngí wàa nikwɔɔ kéele na í kapye peyɛɛ wóli na ban í, pe i nyɛ àmɛɛ zěnaa-sìndoʔo fafaanya nyɛ lè, yee káfalagi lée ni syée lè, ní wɔ́ɔ i nyɛ àmɛɛ tiinaa-sìnzanya nyɛ lè, àlí yi làrizanni ga wírè nan, yi o sangi í, yi n kùu tɔlɔyɔ siin, ncan pe n yi kɔ́nɔgi,

¹³ pe i nyɛ àmɛɛ sólomi lòkpɔʔɔ kungurukpoloyo nyɛ lè, pe i peyɛɛ fɛ̀ɛfɔnmi yirigi kàfugi na àmɛɛ lǒgi kùnguruyo kpáriga nyɛ lè, ní i nyɛ àmɛɛ ŋɔripiigèlē nyɛ, gele ge curugu ni máari lè, yébiliwɔɔlɔ tɛ́ʔɛ n sámaga n kwɔ́ɔ be kánmi na, pe a ba pye nɛɛ bee làla o làla!

¹⁴ Henɔki wi da pye lè wolo tóolɛɛbèle kɔrɔsiin wóo n séli yaà Adami na, wee bee maa téè nǎnbèle bee kéele nyaa n joo níì jo: «Wéle, Kàfɔw n pan ní wi wojanbèle ní pe nyɛ lè córomɔ fun,

¹⁵ bi ba wɔʔɔgi kútii cáan syɛ́ɛnbèle myɛ na, bele myɛ be nyɛ lè pe o fɛ̀ɛgí Kolocɔlɔɔ na í, wi a ba be yíbe be Kolocɔlɔɔ yɛ́ʔɛnaa-sìnvyaari kèlē myɛ na, gele pe da ni kpéʔele sìnvyaa ni wi na lè, bi fàra syɛɛngbanri myɛ na, dee kapeebyebèle bee da ni nyuu ni wáa wi na lè, be lè pe o fɛ̀ɛgí wi na í.»

¹⁶ Nǎnbèle bee i kɔ́nʔɔri ní i kabala ni nyuu, ní i táanri ni yɛlɛgi ní be céri ki laànitaʔa kele ní, ní i nɛ̀ɛnyɛnɛgi syɛ́ɛnrɛ nyuu, ní i syɛ́ɛnbèle lɛ́ɛlɛ ni líi.

Sàmini ní láliiw wi joo n kaan lè

¹⁷ Yele si na, mii syɛɛn-nidaanmabèle, syɛ́ɛnree wolo Kàfɔw Zyezu Kirisi pìitunbèle da téè joo lè, yaa sɔ̀ngí yaa taagi dee bee na.

¹⁸ Pe maa yele pye: «Kakpanami fɔ̀ɔlɔ a kɔ́ ba yìri làrizanni ni, bele pe a ba ra táanri da yɛlɛgi ní be tiimaa ki laànitaagi kèlē ní ge nyɛ lè Kolocɔlɔɔ yɛ́ʔɛnaa-sìnvyaari wòʔolo.»

¹⁹ Bele bee be syɛ́ɛnbèle wálagi peyɛɛ na, pe céri di be kàragí, Pìicǎnni o nyɛ be ma í.

²⁰ Yele si na, mii syɛɛn-nidaanmabèle, ki n yɛlɛ yele í gi yaʔa kàa í da fàrá yele na yele tágajǎnni ni li nyɔɔ n sɔ̀lɔ lè, sáā nyɛ́ɛri Pìicǎnni báriga ni,

²¹ sáā yeyɛɛ kɔ̀rɔsíi jàngó yele í kòro Kolocɔlɔɔ tàmagi ni, bàā wolo Kàfɔw Zyezu Kirisi nyínimi sige sìibangwɔɔw kánma na.

²² Ki n yɛlɛ yele í nyinimɛ taa fûngabalayi fɔ̀ɔlɔ na,

²³ yé be syɔɔ ki pye mɔ a jo yele n be kíle n yirige náagi ni. Yé nyinimɛ taa pèle nikwɔɔlɔ na ní fyáara ní, àlí be búroyi yi nɔ́nʔɔ lè céri ki laànitaʔa kele báriga ni, ye yi yaʔa yi yele bɛɛn.

Sòolozanni

²⁴ Wee má fànʔa nyɛ lè bi gbǎn ra yele kɔ̀rɔsíi koro ga pye yele a kɔ́ kpírige too í, si yele yérige wi nìjangbɔɔri tɛ́ʔɛ ni bi yele tɛ̀ɛn tɛɛlɛ fun yele si pye fundaangbɔɔrɔ na,

²⁵ woro wee wi nyɛ lè Kolocɔlɔɔ nibin, ní i nyɛ wolo Syɔɔfɔw, wolo Kàfɔw Zyezu Kirisi bárigaw ni, woro na nìjangbɔɔri, ní kpɔ́ɔmi, ní fǎngi, ní séew yɛlɛ làrigèle myɛ ni, booma wógèle yoo, tɔ́ɔliw ni yoo, fwɔɔ làla o làla! Amiina!