Zyozuwe 8 - Cebaara Bible 2010

Pe n fànʔa taa Ayi na

¹ A Yawe Zyozuwe pye: «Mɔ a kɔ́ ra fɛ̀ɛgí í, zɔ̀nviige a kɔ́ ra mɔ kɔɔn í. Kapɛɛnkpumɔnbèle myɛ kɔ́ri mi yìri maa syée Ayi kánmi na. Wéle, mii n Ayi fànʔafɔw, ní wi syɛ́ɛnbèle, ní wi kěgi, ní wi tári le mɔ kɔ́gi ni n kwɔ́ɔ.

² Gee mɔ kpéʔele Zyeriko, ní wi fànʔafɔw na lè, koro mɔ a kpéʔele Ayi, ní wi fànʔafɔw na, kàjáa yele a wi lɔ́ri ní wi yaweeri koli bi kòro ní di ní. Ki si n yɛlɛ mɔ í sa syɛ́ɛnbèle pèle làriga kěgi kàdoʔo ma.»

³ A Zyozuwe yìri ní wi kapɛɛnkpumɔnbèle myɛ ní n lúgu n kári Ayi ma. Zyozuwe si maa kapɛɛnkpumɔn-sànbalibèle pèle sirakama ní selebingéle kagunɔ nyɛ́nɛ n wòlo be ni n tórigo yaà yébiligi ni,

⁴ níì gi joo n gbàn be ma níì be pye: «Ye kɔ̀rɔsíi! Ye sa làra kěgi kàdoʔo ma, ye gi sige. Yele a kɔ́ léeli kěgi na cama í. Ye myɛ si n yɛlɛ ye pye wogboʔoro-yaʔabéle ní.

⁵ Mii si na, n fàra syɛ́ɛnbèle myɛ na pe nyɛ ní mii ní lè, wolo a ra nùuní kěgi na. Pe ga yiri ni wolo fàrá àmɛɛ ki da sélì pye lè, wolo a kíni pe yɛ́ɛgi na bàā fé.

⁶ Pe a yiri bi taʔa wolo na da nɛnɛ, wolo sáā be lɛ́ɛlɛ bi léeli kěgi na, níì cán pe a gi joo si jo: ‹Pe i fé wolo na àmɛɛ ki da sélì pye lè.› Wolo a ra fé pe yɛ́ɛgi na,

⁷ yele si fùrú yiri tɛɛlaragi ni bi kěgi syɔɔ taa. Yawe yele Kolocɔlɔw a gi le yele kɔ́yi ni.

⁸ Lǎli ni yele ga kěgi taa n cò lè, ye naà le gi na. Ye gi pye ye yɛlɛ ní Yawe syɛ́ɛnri ní. Ye kɔ̀rɔsíi! Mii n gi joo n gbàn yele ma.»

⁹ A Zyozuwe be tórigo, a be kári n sáà làra kapɛɛnni kánma na Betɛli ní Ayi níngi ni, Ayi canʔajeemɛ kabangi na. Zyozuwe si maa syɔ́ɔn ní kapɛɛnkpumɔn-sànbalibèle ní yébiligi bee ni.

¹⁰ A Zyozuwe sɔ̀li n yìri nyǐngi nyɔ́ɔ na n kapɛɛnkpumɔnbèle sɛʔɛ, á woro ní Isirayɛli wolɛɛbèle kíni be yɛ́ɛgi na, a be lúgu n kári n sáà nan Ayi na.

¹¹ Kapɛɛnkpumɔnbèle myɛ be pye ní wi ní lè, a poro i lúru ni syée ní wi ní n sáà nùuni yaà. Lǎli ni be sáà nan kènyɔɔw na lè, a be tɛ́ɛn Ayi solomɔkulo kàbangi na. Jǐnlɔgi maa pye pe ní Ayi níngi ni.

¹² A Zyozuwe nànbēle selebingéle siin ní saala kagunɔ félege kɔ́ri n làriga kěgi canʔajeemɛ ma Betɛli ní Ayi níngi ni.

¹³ Kánmi bee na pe da kapɛɛnkpumɔnbèle télege, a kabigee pye kěgi solomɔkulo kàbangi na, á kàdoʔo ma wóbèle pye canʔajeemɛ kabangi na. A Zyozuwe kári cángi bee yébilige ni n sáà syɔ́ɔn jǐnlɔgi nínge ni.

¹⁴ Lǎli ni Ayi fànʔafɔw gee bee nyaa lè, a woro ní wi syɛ́ɛnbèle myɛ sɔ̀li n yìri kelekele. A woro ní kěgi nànbēle yiri n yɛlɛ ní fɛ̀ɛ́w ní wi kaan lè ni Isirayɛli ye fàrá bi sa kapɛɛnni kpúmɔn ní be ní Araba zǐnmi na. Wi si da gi cán ncan pèle i yaà n làra n woro sige kěgi kàdoʔo ma í.

¹⁵ A Zyozuwe ní Isirayɛli ye myɛw gi pye mɔ a jo pe n fànʔa taa poro na níì fìími tára kólogo láa ni fé be na.

¹⁶ A be kěgi syɛ̀ɛnnɛ myɛ yeri n yirige jàngó be taʔa be na da nɛnɛ. A pe baa léeli kěgi na.

¹⁷ Nàɔn da níì kòro Ayi, ní Betɛli ni, wee wi lè wi da yiri n taʔa Isirayɛli ye na ni nɛnɛ í. A be kěgi yaʔa womúgu-yaʔaga ní níì taʔa Isirayɛli ye na ni nɛnɛ.

¹⁸ A Yawe Zyozuwe pye: «Tàbaaw wi nyɛ mɔ kɔ́gi ni lè, wi fìin mi yaʔa Ayi kàbangi na, níì cán mii a wi le mɔ kɔ́yi ni.» Tàbaaw wi pye Zyozuwe kɔ́gi ni lè, a wi wi fìin n yaʔa kěgi kàbaan na.

¹⁹ Lǎli ni wi kɔ́gi sánʔa lè, nǎnbèle pe da làra ni sige lè, a poro fùru n yiri be tɛɛlaragi ni n fàn n jée kěgi ni n gi syɔɔ n taa, níì náagi le gi na kelekele.

²⁰ A Ayi syɛ́ɛnbèle kàri n wéle n gi nyaa a poro kěgi sógulo wírige i lúru ni syée nyɛ̀ʔɛni na. Kàbangáriga ga níì pye be ma í. Ncan Isirayɛli syɛ́ɛnbèle bele pe da ni fé ni syée fìími tára ni lè, poro maa kolo n lúru n taʔa pe nɛnɛfɔbèle na ni nɛnɛ.

²¹ A Zyozuwe ní Isirayɛli ye myɛ ga gi nyaa nǎnbèle pe da làra n sige lè a poro yiri n kěgi syɔɔ n taa, ní wɔ́ɔ̀ gi naà wírigi nyaa ki i lúru, a be kolo n lúru n too Ayi syɛ́ɛnbèle na.

²² A bele yiri kěgi ni ni be fàrá, á Ayi syɛ́ɛnbèle kòro níngi ni, bele i nyɛ pe yɛʔɛ̀ ma, bele si i nyɛ pe kàdoʔo ma. A Isirayɛli ye be kpóo n kwɔ́ɔ. Pe wàa nibin ga yaʔa sìi na wàlá n fàn n syɔɔ í.

²³ Ayi fànʔafɔw na, pe maa woro cò n pan woweeo ní Zyozuwe ma.

²⁴ Lǎli ni Isirayɛli ye Ayi ye myɛ kpóo n kwɔ́ɔ ní ŋɔséew ní fìími tára ni lè, beè pe da yiri n taʔa Isirayɛli ye na ni nɛnɛ lè, a Isirayɛli ye myɛ lúru n pan Ayi ma n baa ŋɔséew tɛ́ʔɛ n kěgi syɛ̀ɛnnɛ myɛ kpóo.

²⁵ Syɛ́ɛnbèle bele nyɔ́ɔ be kpóo cángi bee na lè, n nǎnbèle fàra cébèle na, pe n pye selebingéle kɔrɔni. Gee bee n jo Ayi ye myɛw.

²⁶ Kɔ́gee Zyozuwe da sánʔa ní tàbaaw ní lè, wi ga gi tìrige í fwɔɔ n taa a be Ayi ye myɛw kpóo n kwɔ́ɔ péw.

²⁷ Kàjáa Isirayɛli ye maa kěgi bee yaweere ní gi yáriri koli n kòro ní di ní n yɛlɛ ní syɛ́ɛnri ní Yawe da joo n gbàn Zyozuwe ma lè.

²⁸ A Zyozuwe Ayi sórigo níì gi yaʔa a gi kòro kataʔa làrigèle myɛ ni fwɔɔ n baa nan níjanʔa na.

²⁹ Wi si maa Ayi fànʔafɔw cɔ̀rɔ tiige na n yaʔa yaà fwɔɔ n taa n baa nan cângwɔɔgi nyɔ́ɔ na. Lǎli ni cángi baa too lè, a Zyozuwe gi joo n gbàn níì jo pe wi kúceri tìrige tíigi na. A be wi tìrige tíigi na n cáan kěgi kpàánweele na, níì kàdɛnɛ-gbookpɔʔɔ kpoʔolo wi na. Ki sèʔé i yaà àlí níjanʔa.

Làlwaw syɛ́ɛnrɛ wélele Ebali nyanbelegi na

³⁰ Lǎli bee ni a Zyozuwe sáriga-wòlo-yafanʔa faan Ebali nyanbelegi na Yawe ma, wi lè Isirayɛli ye Kolocɔlɔw,

³¹ n yɛlɛ ní syɛ́ɛnri ní, dee Yawe falipyew Mowizi da joo n gbàn Isirayɛli ye ma lè, àmɛɛ di sɛ́bɛ Mowizi làlwaw sɛ́bɛ ni lè n jo: «Ki a pye kàdɛnɛnaa-sìndanra sáriga-wòlo-yafanʔa, dee di lè tunmɔrɔ yála a nyáʔana di na í.» A be sáriga sórigoo wòlo gi na Yawe ma n fàra pínɛnyɛnnɛgɛ sáriga na.

³² Làlwaw Mowizi da sɛ́bɛ lè, a wi woro syɛ́ɛnri sɛ́bɛ nɛɛ bee kàdɛnɛyi na Isirayɛli ye nyɛ́nɛ na.

³³ Isirayɛli ye myɛw, ní be wolɛɛbèle, n fàra be kùndigibèle, ní be kútiijoobèle na, nibɔɔn yoo, kànaɔn yoo, a be sáà yére kásuw kàbanya myɛ siin na yaà Levii ye sáriga-wòlobèle yɛ́ʔɛ ma, poro bele pe da ni Yawe joogaanni kásu tugu lè. Syɛ́ɛnbèle tílawaa maa yére Gariziimi nyanbelegi zìnmɛ na, á tílawee yére Ebali nyanbelegi zìnmɛ na n yɛlɛ ní syɛ́ɛnri ní Yawe falipyew Mowizi da joo n gbàn lè yaà booma ni níì jo, ànbée gi yɛlɛ pe dùbaw kpéʔele Isirayɛli ye ma.

³⁴ Koro kàdoʔo ma a Zyozuwe làlwaw syɛ́ɛnrɛ myɛ wéle n joo, ti lè dùbaw syɛ́ɛnrɛ n fàra dángaw wóro na n yɛlɛ ní gee myɛ ní gi sɛ́bɛ làlwaw sɛ́bɛ ni lè.

³⁵ Syɛ́ɛnri myɛ Mowizi sɛ́bɛ lè, a Zyozuwe ti myɛ wéle n joo Isirayɛli syɛ́ɛnmi myɛ ma. Wi ga di tàa faala yaʔa sìnwéle ni í. Lǎli ni wi da ni di wéle lè, cébèle ní pìíbèle n pye yaà, n fàra nibɔnbèle na be nyɛ be níngi ni lè.