Zyozuwe 7 - Cebaara Bible 2010

Akan kolomi ní wi kpúmɔnri kéele

¹ Lǎli bee ni a Isirayɛli ye kolo yáriri kéele na, dee Yawe da joo be yaʔa lè péw. Zyuda syɛɛnfelegi wówaa maa yáriri bee tàa láa, pe i wi yiri Akan, wi lè Karimii jáaw, Karimii wi lè Zabidii jáaw, Zabidii wi lè Zera jáaw. A Yawe fundanʔari cò naà Isirayɛli ye kánmi na.

² A Zyozuwe nǎnbèle pèle yìrige Zyeriko ni n tun Ayi ma, wi lè Bɛti-Avɛn taana Betɛli canʔafolomɔ kabangi na. Wi n be pye: «Ye lúgu ye sa tári saanri ye wéle.» A nǎnbèle bee lúgu n sáà Ayi saanri n wéle.

³ A pe ga lúru n pan Zyozuwe ma, a pe baa wi pye: «Syɛ́ɛnbèle myɛ ga náà yɛlɛ bi kári yaà í. Nànbēle selebinnɛ wàlá selebinnɛ ní saala kagunɔ wi yɛlɛ bi kári sa Ayi jaa. Mɔ a kɔ́ fɔ̀rɔgi naa taʔa syɛ́ɛnbèle myɛ na í, níì cán syɛ́ɛnbèle bee ga nɛʔɛ yaà í.»

⁴ A nànbēle selebinnɛ ní saala kagunɔ félege yiri syɛ́ɛnbèle ni n kári yaà. Kàjáa a be sáà fàn Ayi syɛ́ɛnbèle na.

⁵ A Ayi syɛ́ɛnbèle toko ní kpɔrigɔ ní kɔrɔni félege kpóo be ni. Pe maa be kɔ́ri n láa kěgi kpàánweele taana ni nɛnɛ fwɔɔ n sáà nan Syebarimi na, níì be jáa yaà beè nyanbelegi tìgimɛ ni. A syɛ́ɛnbèle fànʔa kwɔ́ɔ, zɔ̀n ga níì pye pe wàa faala ni í.

⁶ A Zyozuwe wi búroyi sulugu níì too n yɛ́ɛgi cíbele tári na Yawe kásuw yɛ́ʔɛ ma fwɔɔ n baa nan cângwɔɔgi nyɔ́ɔ na, n fàra Isirayɛli wolɛɛbèle na, á be támiigi wo peyɛɛ nyúnyi ni.

⁷ A Zyozuwe jo: «Ee, Kàfɔw Yawe, nyàʔá na mɔ syɛ́ɛnbèle naa kɔ́ri a be Zyuridɛnw jeli jàngó bi ba wolo le Amɔri ye kɔ́yi ni bi wolo kálagi? Ki mǎà dée caa pɔ́rɔ wolo í kòro yaà Zyuridɛn jeligɔgee na.

⁸ Ee Kàfɔw, nyàʔá mii a joo àmɛɛ Isirayɛli ye kàdoʔo kaan tɔ́ɔliw ni pe nigoobèle ma lè?

⁹ Kanaan ye ní tári syɛɛnsanbèlē a gi lóʔo si pan ba wolo màʔa bi wolo mɛ́ɛgi kwɔ́ɔ bi yirige péw tári ni. Lǎli bee ni nyàʔá mɔ a kpéʔele mɔ mɛ́ɛkpɔɔgi kéele na?»

¹⁰ A Yawe Zyozuwe pye: «Yìri! Nyàʔá na mɔ too n yɛ́ɛgi cíbele tári na n kòro nya?

¹¹ Isirayɛli ye n kapeele pye. Joogaanni kéele mii da joo n gbàn be ma lè, pe n li kálagi. Yáriree mii da joo lè be yaʔa, pe n di tàa láa. Pe n di yùu n làriga, àlí ti i yaà be túgori ni.

¹² Isirayɛli ye a gbǎn yére bi be nigoobèle sige í. Pe a kàdoʔo kaan pe nigoobèle ma, níì cán pe tiimaw n baa yɛlɛ pe be kálagi. Yáriree mii da joo lè yele a kɔ́ di tàa láa í, yele ga pye yele ga di kálagi n yirige yeyɛɛ níngi ni í, mii a ní pye ní yele ní í.

¹³ Yìri mi syɛ́ɛnbèle jéemununɔ fáli kpéʔele. Mɔ a be pye: ‹Ye yeyɛɛ jéemununi fáli kpéʔele nyɛ̀ʔɛna yɛ́ʔɛ na, níì cán Yawe wi lè Isirayɛli ye Kolocɔlɔw, wi n jo: Yele Isirayɛli ye, yáriree mii da yele pye lè yele a kɔ́ di láa í, di tàa i nyɛ yele níngi ni. Yele si ga pye yele ga di yirige yeyɛɛ níngi ni í, yele a gbǎn yére yele nigoobèle sige í.

¹⁴ Nyɛ̀ʔɛna nyǐngi nyɔ́ɔ na yele a ba ra yèré syɛɛnfeleye syɛɛnfeleye, Yawe ga syɛɛnfelegee tɛ̀ɛn lè, koro a ba ra yèré tùluyo tùluyo, Yawe ga tùlugee wòolo tɛ̀ɛn lè, poro a ba ra yèré narigbaaya narigbaaya, Yawe ga narigbaagee wòolo tɛ̀ɛn lè, koro nǎnbèle a ba ra yèré nibin nibin.

¹⁵ Yáriri láafɔlɔ ga baa tɛ̀ɛn, dee di lè ti da yɛlɛ bi láa í, pe a wi sórigo naà ni, woro ní yala o yala li nyɛ lè wi wolò, àmɛɛ wi Yawe joogaanni kálagi lè níì fɛ̀ɛrɛ kéele kpéʔele Isirayɛli ni.› »

¹⁶ A Zyozuwe sɔ̀li n yìri nyǐngi nyɔ́ɔ na ni Isirayɛli ye yeri ni nùuní syɛɛnfeleye syɛɛnfeleye, a Zyuda syɛɛnfelegi wòolo tɛ̀ɛn.

¹⁷ A wi Zyuda túluyi yeri n nùuni yaà, a wi Zera túlugi wòolo tɛ̀ɛn. A wi i Zera túlugi wòolo yeri ni nùuní narigbaaya narigbaaya, a Zabidii kpáagi wòolo tɛ̀ɛn.

¹⁸ A wi i Zabidii kpáagi nànbēle yeri ni nùuní nibin nibin, a Akan tɛ̀ɛn, wi lè Zyuda syɛɛnfelegi wówaa, ní i nyɛ Karimii jáaw, Karimii wi lè Zabidii jáaw, Zabidii wi lè Zera jáaw.

¹⁹ A Zyozuwe Akan pye: «Ni pyà, Yawe kpɔ́ʔɔganmi kéele córo, wi lè Isirayɛli ye Kolocɔlɔw, mí wi kpɔ́ʔɔ. Gee mɔ kpéʔele lè, ki joo mii ma, mɔ a kɔ́ gi làriga mii na í.»

²⁰ A Akan Zyozuwe yari: «Kányɛʔɛ gii, mii wi kapeeli pye Yawe Isirayɛli ye Kolocɔlɔw na. Gee mii kpéʔele lè koro gi nyɛ gee naa.

²¹ Mii n Syineyari búrogbɔɔ-càngaa nyaa kapɛɛnni yataara ni n fàra wálifiio támabéle sirakele na, ní tɛɛ̀nyinnɛ nibin, lee li cúlo tíla kwɔ́ɔ lè, a di nyabɛɛnni pye mii na, a mii di láa. Ti i yaà dee wolarigara ní tári ni, mii fànikpaagi fúngo ni. Wálifiiw si i yaà di láari ni.»

²² A Zyozuwe syɛ̀ɛnnɛ tun a be fàn n kári fànikpaagi ma. Ti maa pye yaà wolarigara ní wi fànikpaagi ni, wálifiiw si i nyɛ ti láari ni.

²³ A be di yirige fànikpaagi ni n pan Zyozuwe ní Isirayɛli ye myɛw ma n baa tɛ́ʔɛ Yawe yɛ́ʔɛ ma.

²⁴ A Zyozuwe Zera jáaw Akan cò, woro ní wálifiiw, ní burogbɔɔgi, ní tɛɛ̀nyinni, ní wi nànbiigèle, ní wi calipiigèle ní, n fàra wi yaweekpologèle, ní wi jòfanibèle, ní wi yaweeyiligèle, ní wi fànikpaagi, ní wi kɔlɔ̀ yáriri myɛ na, a Isirayɛli ye myɛ fàra Zyozuwe na a pe be kɔ́ri n kári Akɔri jǐnlɔgi ma.

²⁵ A Zyozuwe jo: «Nyàʔá na mɔ wɔʔɔgɔ cáan wolo na? Yawe a wɔ́ɔ wɔʔɔgɔ cáan mɔ na níjanʔa.» A Isirayɛli ye myɛw wi wábagi n kpóo ní kàdɛnɛri ní, ní wɔ́ɔ̀ wi wóbèle myɛ wábagi n kpóo, níì be sórigo.

²⁶ A be kàdɛnɛgbookpɔ́ʔɔ kpoʔolo wi na ki sèʔé i yaà àlí níjanʔa. Lǎli bee ni a Yawe náà wi fundanʔagbɔɔri yaʔa. Koro na be mɛ́ʔɛ le tɛ́ɛgi bee na ni gi yiri Akɔri jǐnlɔgi àlí n baa nan níjanʔa na.